|
|
 فايزة عمسيب:والي الخرطوم ما أداني بيت دي مجرد(شائعات)..
|
صورة (الفيسبوك) زعلتني لأنهم طلعوني ( شحادة)..
والي الخرطوم ما أداني بيت دي مجرد(شائعات)..
عايشة بي كلية واحدة ورجل أعمال اتكفل بي علاجي..
حوار: محاسن احمد عبدالله
المكان ..أمام بوابة المسرح القومي الداخلي..الزمان ..قبل عدة سنوات مضت.. ظهرت متلفحة ثوبها ومتحكرة على الأرض..بجوارها حقيبة قديمة ..واضعة يدها على خدها و(ممحنة).. ترتدي سفنجة.. نظراتها فيها الكثير من الأسى والتفكير العميق.
هذا وصف دقيق للصورة التي نشرت في الأيام الماضية للممثلة القديرة و(أم الدراميين) فايزة عمسيب على صفحات الفيس وعلى مواقع التواصل المختلفة, التي جسدت معاناتها مع المرض وعدم وقوف المعنيين بالأمر معها في محنتها, او كما أراد من قاموا بنشر الصورة التي تداولها الآلاف من المتصفحين للنت والذين غضبوا للإهمال الذي تعاني منه (بت عمسيب) وذلك لحبهم لها ومن خلال قراءتهم للصورة التي صادفت مآرب آخرين قاموا بنشرها على حد قولها.
كان لا بد من إلقاء الضوء على المشكلة وتوضيح الحقائق كاملة من صاحبة الأمر نفسها ومعرفة الأحداث عن قرب .. لذلك يممت وجهي شطر مدينة ام درمان نهار الأمس قاصدة منزل الأستاذة والدرامية فائزة عمسيب.
وصلت الى المكان المقصود في أحد الأحياء الشعبية مرورا بزقاق ضيق.. وصولا الى المنزل المقصود حيث تقيم .. طرقت الباب وتقدمت الى الداخل لأستمع الى صوتها وهي تقول لي (حبابك, حبابك, اتفضلي يا بتي).. عندما تقدمت الى الأمام فوجدتها جالسة على السرير تعلو وجهها ابتسامة صافية مرحبة بشخصي رغم معاناتها مع المرض ..بادلتها التحايا وجلست الى جوارها ..فإليكم مادار بيننا من حديث بلغتها البسيطة.
قصة عجيبة..
عايزين نعرف حقيقة الصور اللي ظهرتِ فيها على صفحات الفيس بوك وانتِ على الأرض؟
تنهدت وتنفست بعمق شديد قائلة :(والله أنا ذاتي يا بتي احترت عديل واتفاجأت لما شفت الصور على الفيس بوك بالوضع العجيب ده وكأني (شحادة) والله زعلت زعل شديد من العملو الحاجة دي).
طيب قصة الصورة دي شنو..عشان الناس تعرف الحقيقة؟
احتدت نبرتها في الحديث: (الصورة دي يابتي قديمة من سنة 2004م كانت في البوابة الداخلية للمسرح وكنت وقتها تعبانة شوية من البروفات وقعدت على المصطبة ولابسة لي (سفجنة) وطوالي بلبسها عشان مابقدر ألبس الأحذية العالية عشان الرطوبة.. لكني اتفاجأت بيها في الفيس ..يعني ناس الفيس بوك ديل بيستهتروا بي ولا شنو؟).
حقيقة المرض..
طيب حقيقة مرضك شنو بالضبط؟
اعتدلت في جلستها وقالت: (أولا أنا بعاني من بدري من ورم في أقدامي وخشونة في الركب ومشكلة في التنفس بسبب ضيق الشرايين وقبل كده سافرت للخارج عشان أعمل عملية لقيت التكاليف غالية جدا وما كلمت زول وختيت الورق تحت مخدتي وتركت الموضوع ومافي زول جايب لي خبر, وفي عام 2009 سافرت للقاهرة وعملت عدد من العلاجات بمركز غنيم لأني اكتشفت إني عايشة بي كلية واحدة.
مقاطعة.. كيف الكلام ده ..دي معلومة جديدة؟
(لا,لا,لا دي خلقة ربانية وماشغالة بالموضوع كتير).
إذا نرجع لي موضوعنا ..السبب اللي خلى الصورة دي تظهر في التوقيت ده شنو؟
صمتت قليلا ثم أجابت:
الأيام الفاتت كان تكريم الفنان الكبير صلاح بن البادية وصلوا البيت أخدوا مني معلومات عن الفنان صلاح بن البادية لحفل التكريم باعتبار أني مثلت معاه في فيلم (تاجوج) وكان من المفترض أكون متواجدة في التكريم لكن أقدامي كانت متعباني شوية السبب اللي منعني من الحضور واعتذروا نيابة عني, والسبب التاني كان في تكريم في سينما المدنيين وكنت من ضمن المكرمين وما قدرت مشيت في اليوم الختامي رسلت مندوب ينوب عني لأني عيانة بعدها انتشر الخبر في النت بأني مريضة واستغلوا الصور القديمة وزي ما شايفة عملوا العمايل دي.
التكفل بالعلاج..
أنت الآن مريضة ..منو المتكفل بي علاجك؟
ما في زول قدم لي دعم ولا مساعدة من الجهات المسئولة غير رجال الأعمال صابر الخندقاوي اللي قام رسل مندوب من مكتبه متكفل بعلاجي وسفري للأردن مع مرافقين وكتر خيرو.
مقاطعة ..كيف ماسألوا منك الدراميين والأستاذ علي مهدي قال انو اتصل بيك وهو الآن ساع للحصول على المبلغ عشان العملية؟
ضحكت باستهتار ثم قالت: (ااااي اتصل بي لكن ماعمل أي حاجة وكتر خير السيد الصادق المهدي اللي اتصل بملك الأردن من أجل العلاج هناك.
ورد في بعض الصحف انو والي الخرطوم أداك بيت؟
وضعت يدها على خدها مندهشة وردت (سبحان الله ..الناس دي بتقول كلام ساي والسلام ..الكلام ده ما صاح الوالي ما أداني أي حاجة دي إشاعة ساي).
تكلفة العملية كم؟
17 ألف دولار.
في شائعات بتقول انو عندك بيوت كتيرة ومؤجراهم ..يعني (كاتلة الجدادة وخامة بيضها)؟
أطلقت ضحكة طويلة ورفعت يديها نحو السماء قالت (ياريت يابتي.. ياريت يسمع منك الله..أنا بعت كل ممتلكاتي الخاصة كيف يكون عندي بيوت ..دي إشاعات ساي).
البيت القاعدة فيهو الآن ده.. بيت منو؟
أجابت سريعا: ده بيت بت أختي
طيب ماعندك بيت الورثة؟
خلي ده موضوع براه
رسالتك شنو لي أهل المسرح والدراما؟
ماعندي ليهم حاجة..ربنا يزيد العليهم
وناس التلفزيون؟
التلفزيون مات من زمان
قبل ما نغادر ..دايرة تقولي حاجة أخيرة؟
طبعا..أولا بشكر منظمة ( الطيبين) لوقفتهم معاي والأخ احمد الجوهري وخليل وكل من ساهم في علاجي وبالأخص الأستاذ صابر الخندقاوي..وبشكرك إنتي كتير.
|
|
 
|
|
|
|
|
|
|
|
Re: فايزة عمسيب:والي الخرطوم ما أداني بيت دي مجرد(شائعات).. (Re: مهدي صلاح)
|
فايـزة عمسيــــــب
د.عادل الصادق المكي
نحن امة تجيد خلط الأوراق.. سواطة الحياة وأركانها.. عاليها بواطيها شرقها مع غربها.. ونعيش حياتنا هكذا.. حياتنا سَلطة.. سياسية مع فن مع إبداع مع أكل عيش مع دين مع قبلية مع مال كلو مع بعض.. ونقعد نسوط في بعضنا.. لكن المسيطر الأكبر في صحن السلطة دا هو السياسة.. لو كنت فنان بتغني ومرضي وراضون عنك أهل السياسة.. تُشرع لك الأبواب ويجند لك ناس شكارتا دلاكتا.. ويقددو اضنين الشعب بكواريكك.. تفتح رادي انت تكورك تفتح تلفزيون انت تكورك تفتح حلة الملاح في الكانون تمد راسك منها وتكورك.. الزول يجري يتحشر منك تحت العنقريب.. يمد ايدو تمسكو منها "ود اللزينا.. قبضتك".. يسيب ليك البلد ويهااااااجر، يشتاق للبلد يفتح قناة فضائية سودانية عشان يبل شوقو يلقاك في وشيهو.. يعني ما بيقصرو معاك كلو كلو.. ما بيفضل لهم الا يستنسخو منك ويدو كل اسرة نسخة تغني ليها ليل نهار.. اما التكريم داك يا زول هه اسكت ساكت.. يرشحك الجماجرة.. والمتسلقون.. لارضاء اولياء النعم.. فتكرم مع اهازيج المدح و النفخ.. وانك لمبدع.. ومبدع ثم مبدع.. ويمدحو صوتك وحنجرتك المطرطة.. وحبالك الصوتية التي في قوتها ومتانتها تفوق حبال بنابر ستات الشاي.. وانت تعيش الدور.. وممكن تجي وتحاضر في تاريخ الغنية السودانية وتكون تاريخ ميلادك ما عارفو متين.. ان سالوك تقولهم:-" ولدوني في السنة الولدت فيها حمارة خالتي ام رخام وجابت دحيشة" فيهب احد الجماجرة ويصّر على ان تُكرم المرحومة خالتك ام رخام.. و المرحومة حمارة خالتك ام رخام.. والمرحومة نديتك وشبيهتك في الصوت دحيشة خالتك ام رخام.. ويتم له ما أراد.. في حين ان هناك كثير جدا من المبدعين الحقيقين.. يفترشون الارض ويلتحفون السما.. ويبيتو القوا.. ما دايرين حاجة غير ياكلو ويشربو ويسكنو ويتعالجو وبس.. لا فوقو لاتحتو.. عذرا أستاذتي (فايزة عمسيب).. لقد ظلمناكي وظلمنا كثرين مثلك.. فنحن اناس لا نقيّم الا الغث.. ولا نحتفي الا بالهوان.. مثلتينا في فلم (عَرَق البلح).. وكنتي في قامة شيرهان وعبلة كامل وحمدي احمد بالرغم من قدومك من بلد مقدراته محدودة في التمثيل.. ولو رأى قومك اداءك في فلم (عرق البلح).. لوهبوك كل يوم جائزة.. ولنحتو لك تمثالا يقف بالقرب من تمثال بعانخي. فالقامات صنوان.. الاثنين قد غزوتم مصر.. هو على صهوات الخيل.. وانتي على مركب الابداع.. لكن نحن كدا.. نجدع المبدع المن (غير ذوي الحظوة) في الشارع و ننتظره لمن يموت.. ونلف عممنا.. ونمشي في المقابر قدام الكميرات و(الفاااااااااتحة).. ويا ريت لو بنقراها!! تسجيل حضور وفشخرة قدام الاعلام.. ونجي ننفخ قدام المكرفون وان المرحوم كان.. وكان.. وكان.. ويجي واحد يكضب ويقول" قال ليوهو في فراش الموت ابقو عشرة".. ويكون ما وقع في عينو ليهو عشرين سنة.. .
أيها المواطنون:- فايزة عمسيب تحتاجكم.. هدها المرض طريحة الفراش ومهددة بالتشرد والطرد من منزلها بامر قضائي.. قدمت فايزة كل عمرها من أجل الفن.. وهبّت كل دنيتها له.. ولكم وللوطن.. والدين علينا كثير ولكن عشمنا ان نوفي بعض منه.. الدولة هي أولى بالوفاء.. وأهل الخير للخير جُلِبو!!
هواتف فايزة :- 0912620113 – 0910046785
| |
|
|
|
|
|
|
|
|
|
Re: فايزة عمسيب:والي الخرطوم ما أداني بيت دي مجرد(شائعات).. (Re: مهدي صلاح)
|
الأخ مهدي
كان لدي إحساس بأن الكلام بخصوص منح الوالي الأستاذة فايزة بيت غير سليم
والآن حصحص الحق
أيضا كنت أقول للأصدقاء في الفيسبوك
عليكم بالتحري في حقيقة الأمر
لآنني كنت أستبعد القصة التي تم تصويرها
نتمني للأستاذة فايزة عمسيب كل صحة وعافية وتوفيق
شكرا لجلب الخبر المفرح
ـــــــــــــــــــــــــ
الحليلة
| |
|
|
|
|
|
|
|
|
Re: فايزة عمسيب:والي الخرطوم ما أداني بيت دي مجرد(شائعات).. (Re: عادل خياري)
|
صلاح والمتداخلين سلام
شكراً جميلاً لابناء السودان فقد قيض احد اهل الخير وهو الاستاذ صابر الخندقاوى وتكفل بكافة
تكاليف الاستاذة فايزة عمسيب مع مرافق فى الاردن ومن المقرر ان تسافر الاستاذة فائزة عمسيب
الى الاردن يوم الاحد 16/ فيراير 2014 جعل الله ذلك فى ميزان حسناته..
وعلى اثر الحملة التى نظمناها على الفيس بوك مع نفر كريم تبرع احد الاخوان وهو زميل بالمنبر
رافضاً افشاء اسمه، تبرع بمنزله للاستاذة فايزة عمسيب تسكن فيه حتى تحل مشكلتها مع الورثة
كما تبرعت ايضاً زميلة منبر رفضت ايضاً ايراد اسمها بشقتها لتقيم فيها الاستاذة فايزة حتى تحل
مشكلتها ومن هنا لابد من الدعاء للزميل والزميل بان يبارك لهما فى رزقهما ويوسع عليهم وفى
ميزان حسناتهم، وهولاء هم ابناء السودان الذين نعرف لهم التحية وامنياتنا ان تعود الاستاذة فايزة
عمسيب وهى بكامل صحتها وعافيتها..
اما حكومة السجم والرماد فما تحركت ساكنة ولن تفعل الله يورينا فيهم يوم،،،
| |
|
|
|
|
|
|
| |
مهدي صلاح
elhilayla
عادل خياري
صديق الموج
فيس بوك
تويتر
انستقرام
يوتيوب
بنتيريست