|
|
 The art and science of كسره
|
الكسره أو (الكسرى) حد يجي يصحح لي بالله...
الموضوع ده شاغلني جداً لأسباب كتيرة... أهمها انه اولادي رغم اننا ما بنعمل كسره في البيت كتير، لكن بحبوها جداً .. لما يمشوا لبيت جدّهم في الامارات حبوبتهم بتعمل ليهم الكسره وملاح النعيمية في اول يوم وصولهم... وبعداك يومياً بتعوس ليهم... القصة بدأت بي محمود لما اكتشف الكسره عند حبوبة، وليلى لأنها بتحاكي محمود في اي شي، بقت تحبها برضو.. في السنين الفاتو كنا بنمّشي الحال بي كسره بنشتريها من سودانية فاضلة، بتعمل الكسره في بيتها... الله يديها العافية، نعفتنا كتير ... كنا نجيب الكسره كتيره في الويك اند، ونختها في الفريزر وبعداك نسخّن على قدر ما هم عايزين... انا على الرغم من اني بحب المطبخ شديد وبفتكر اني زولة بعرف دروبه كويس، وما حصل غلبتني وصفة (لحدي الان على اي حال)، لكن الكسره دي عندي منها عقدة... أمّى الله يديها العافية بتعوس باستمرار مما اتزوجت... واهم شي بتكون شايلاه معاها محل ما تمشي هو خمّار العجين بتاع أمها الله يرحمها، والقرقريبة (طوّرتها لأشكال تانية لما ما لقتها بتكلم عنها بعدين).. امي سافرت بريطانيا، الأردن، كندا، الامارات، قطر...في كل البلدان دي كانت بتعوس، وكانت بتكون الرائدة في محل ما تمشي وتشبّك الناس في الكسره بعد ما يكونوا قِنعوا منها.... اتذكر في الاردن لما مشينا كانت حدث كبير انه امنا بتعوس، وعلّمت السودانيات الهناك يعوسوا بعد ما كان ممشين الحال بي حاجه كده بتشبه الكسره عند الاردنيين اسمها خبز الشراك... أها أمي بي خبرتها الطويلة دي، مهارتها في عمل الكسره تعقّد (ما شاء الله)... وما حصل ضقته لي كسره زيّها...
من زمان من قبل ما اتزوج، ولأني كنت بحب ادخّل يدي في المطبخ كتير كنت مجنناها بي موضوع العواسه ده، وبقول ليها تخلي لي عجين في النهاية عشان اجي اجرّب... اعتقد اني الحركة بتاعت العواسة نفسها بعرفها، لكن موضوع الكسره ده اكبر بكتير من الحركة الcool دي على قول أخواني... فكّرت نناقش نقاط كتيره، ولقيت انه ده ممكن يكون موضوع بوست مفيد ولو طلع بنتائج من تجارب الناس، ممكن يكون تاريخي كمان!
في الفترة الفاتت اقنعني نادر انه بالممارسة ممكن اصل لكسره بشكل يرضيني، لي تقريبا تلاته اسابيع بعوس كل تلاته ايام.... اولادي وابوهم مبسوطين بي النتيجة، لكن انا نهائي ما راضية عنها... قاعده احاول اطوّر المخرجات، وملاحظة في تطوّر... بس برضه محتاجين نفهم الفن والعلم الورا القصة دي... المهارة براها بالنسبة لي ما كافية...
خلونا نبدا بي الفيديو ده، كان مرجع لي كتير في العواسه.. وفصفصتو كتير جداً عشان اقدر استخرج منها شويه من المواضيع الحأتكلم فيها في البوست ده، بما في ذلك قوام العجين (عايزين recipe يا جماعة!)، شكل القرقريبة أو أداة العواسه والخيارات الممكن نستخدمها (سمعت عن اكتر من طريقة)، الصاج وشنو الانواع المناسبة، درجة حرارة الصاج، متين نقدر نقول الكسره نجضت عشان نرفعها من الصاج، طرق مبتكرة ممكن نقترحها عشان نسهّل العواسة... وغيرها
|
|
  
|
|
|
|
|
|
|
|
Re: The art and science of كسره (Re: مريم بنت الحسين)
|
سلام بت الحسين
كنا صغار في مجلة سودانية اسمها الباحث , بصدروها علماء سودانيون من مركز الابحاث , ماصدر منها كتير
مرة جابو موضوع عن واحد اخترع ماكينة للكسرة ,
غايتو ونحن صغار بنحبس الوالدة رحمها الله مع صلاة الصبح , بناكل الطرقات حارة من نارها , البتذكرو بتلشق بأصابعها حبه عجين ولو قام طوالي بتعوس , ولو الصاج سخن بتجر ليها عود عودين من جوه النار , ولامن الكسره تنجض بتقوم من الطرف بتاعها , بتهبشها لسلخها من الصاج لو انسلخت نجضت ,, لو حمر جزء من الطرقه معناتو النار ما متساويه فبتعدل الحطب
بتستعمل الطايوق لمسح الصاج بخرقة اسمها الطملة
الكسره بالخمار حامضه , والكسره الحامضه بقولو بتسمح الملاح
ممكن بدون خمار وبتكون فطيرة بتتأكل
هههههههه
خشيت اسجل اعجابي بالكسرة الكلام جا براهو
| |
|
|
|
|
|
|
|
|
|
Re: The art and science of كسره (Re: عبدالحفيظ ابوسن)
|
يابت الحسين،جدنا حاج الكسرة بقول....
برادت القبور الكسرة
جبارة الكسور الكسرة
البدي الكسرة فوقو الخلق منكسره...
يا مريم ،يا حليل الكسرة وقدحا، خمارتا ،طاجنا وريكتا،،عواستا،،،ولمة اكيلتا،،،الزمن وله الناس اتبدلو...
زمان كانت طعام كل بيت،،،ملاح شرموط ،نعيميه،ام شعيفه،ويكاب،لوبه،،، وطاجنك الظاهر اول ده ليل لقمة،وهي انواع كشكش ،بني كربو،وخميره،،وعندك التانيه رهيفه ،وهناك ايضا طرقة القمح وقراصة الصاج....
يامريم بت الحسين،،،والله الكسرة دي من ما قلت اتنزعت البركة واتقفلت الدواوين وتفرق الناس في نواحي الارض ،،وهذه هو فخارنا البقينا نتفشخر بيهو،،
ياحليل فكة الريق مسمار القلب،،وياحليل كورة العكارة،الدبليبة والمروج،،اي صاح الزمن تغير لكن هل ترك الناس الاكل،،هل من بديل للملايين في القري والبوادي غيرها،،،كسرة مالية صينيتا وله تارذا صحنا،،وملاح سمح من انفس مرحمنه...
اللهم يا رحيم رحمن بلدنا الذي نزع شياطين الانس بركاته،،وكتلو نار عواسته...
| |
|
|
|
|
|
|
|
|
|
Re: The art and science of كسره (Re: عبدالعزيز عثمان)
|
بوست جميل شكرا بت الحسين
وكلماتك عن الكسرة ذهبية يا عبد العزيز
يا حليل زمان الواحد يقعد جنب صاج الوالدة وهو يقرض في الكسرة
طرقة بعد طرقة ..و تقوم الوالدة تزهج مننا تدينا نهرة عتاب زاجرة لنكف
يقوم الواحد يلف و يدور ويرجع تاني يكرر العملية لذيذة وحارة من نارها
يا حليل الكسرة والصاج
| Quote: أولا القرقريبه كلما كانت رفيعه كلما خفت تقل الكسره تانيآ العجين طنعاالخميره بنقوم نلوخ شوية دقيق زره باينوع أنواع الزره بقليل من الماء والعواسه في اليوم الثاني اماالصاج فاالاحسن تكي من الحديد الثقيل ودرجه الحراره متوسطه ثم بطيئه بالتدريج |
| |
|
|
|
|
|
|
|
|
|
Re: The art and science of كسره (Re: سيف اليزل برعي البدوي)
|
سيف اليزل... موضوع الكسره ده بعجب اي زول... لكن انا عايزه امشي في اتجاه اننا نأسس لي معايير الناس يتبعوها عشان يعملوا الكسره... تماماً زي ما انت قلت في الاقتباس الجبته لينا، ما عرفته منو الكاتبه
| Quote: أولا القرقريبه كلما كانت رفيعه كلما خفت تقل الكسره تانيآ العجين طنعاالخميره بنقوم نلوخ شوية دقيق زره باينوع أنواع الزره بقليل من الماء والعواسه في اليوم الثاني اماالصاج فاالاحسن تكي من الحديد الثقيل ودرجه الحراره متوسطه ثم بطيئه بالتدريج |
مثلا في ناس بتفضّل الكسره تكون فطيرة، وفي ناس بحبوها خميرة.. مثلا في بيتنا بنفضلها تكون شويه فطيره لانه الكسره الخميره صعبة شويه في البطن، وبتعمل حموضه كده... في ناس بلخبطوا مع دقيق الذرة انواع تانية من الدقيق، زي دقيق الرز مثلا عشان يكون لون الكسره ابيض، او دقيق القمح ...
اخونا اسامة ماشي في اتجاه مناقشة طريقة عمل العجين... يا ريت لو يفصل لينا اكتر...انا الشي البعرفه انه دقيق الذره واحد مافي غيرو عندنا هنا في السعودية، ما عارفه الوضع في السودان كيف... برضه في امريكا قريت مرّه انهم بستخدموا نوع من دقيق الذرة حق المكسيكيين بس ما عندي تفاصيل... يا ريت لو في البداية نركّز على موضوع العجين من نواحي: نوعية الدقيق، قوامه المناسب يا ريت لو عبدالحفيظ ابوسن يرجع يفصّل لينا كلامه ده...
| Quote: البتذكرو بتلشق بأصابعها حبه عجين ولو قام طوالي بتعوس |
ونحاول نصل لمقادير مناسبة للعجين... نسبة الدقيق إلى الموية، كم لكم... معظم الناس السألتهم بقولوا ليك بالإحساس... انا عايزه نحدد مقادير بالضبط للكسره تحديداً... حتى لو مقادير تقريبية...
| |
|
|
|
|
|
|
|
|
|
Re: The art and science of كسره (Re: عبدالعزيز عثمان)
|
مريم بت الحسين
لك ولضيوفك التحية
طالما الموضوع إتعمل منه science
فالكسرة أساسها الذرة وأعتقد بداية المقرر :) تكون التعرف على أنواع العيوش والمقدرة على التفريق بينها , كل نوع له مميزات وأسعارها بالمناسبة متفاوتة جداً , واختيار الصنف غير مرتبط فقط بالناحية المادية لكن بأذواق الناس أكثر
أما من ناحية art التعرف على فنّيات الخلطات السرية من عدة أنواع بنسب معينة , غالباً نوعين.
| |
|
|
|
|
|
|
|
|
|
Re: The art and science of كسره (Re: عبدالعزيز عثمان)
|
عبدالحفيظ، لو انت من ناس ابوسن حقين رفاعه... فده سبب قعدت الكسره الصباح مع الوالدة... مشهورين بيها ناس الجزيرة جداً، وفي شكل من اشكال الكسره في اي حته في السودان، وفي الحقيقة في العالم كلّه! في فترة من الفترات كنت مهووسة بتصميم آلة لعمل الكسره، ورغم انه انا ما عندي اي علاقة بالهندسة ولا بعتبر خيالي واسع، لكن غايظني انه اشوف الجنسيات التانية العشت حولها طوّرت طرق جديدة لعمل اكلاتها الشعبية وادوات وآلات كهربائية... منها مثلا آلة عمل المعمول حقت الشوام... والمعمول هو اصلا خبيز بتعمل من البرغل المنقوع في المويه لفترة طويلة، وبعداك بتحشي بي مكسرات او عجوه... طريقة تشكيلة مرهقة وفيها صعوبة لانه عجينته ما متماسكة... عملوا الة كهربائية بتشكّل ليك المعمول وتنجّضه في نفس الوقت.. زي الصورة دي
من اللآلات الجميلة جداً برضه الآلة البعملوا بيها الملفوف المحشي او ورق العنب، وهي برضها نفس الآلة البلفو بيها السوشي... الآلة بتدي نتائج سريعة وممتازة جداً لزول ما بعرف يلف زيي كده، بالتالي الآلات بتسهّل وبتساوي بين البعرف والما بعرف...
المهم، قمت في الموضوع فترة وجننت الناس في الفيسبوك، لكن ما لقيت اي فكرة في راسي ممكن تساعد في موضوع الكسره ده... يا ريت لو متذكر الآلة دي يا ود اب سن، تشرح لينا عنها شويه..
| |
|
|
|
|
|
|
|
|
|
Re: The art and science of كسره (Re: عبدالعزيز عثمان)
|
الصور النقلتها لينا يا عبدالعزيز فعلنا جزء اصيل من ثقافة الكسرة... دايما الحتة بتاعت العواسه دي بتكون براها، لانه الكسره معروفة بتوسّخ الحتة بي قطع من العجين بتملا المكان كلّه... احنا في فترات الاجازة كنا بنمشي رفاعة ونشوف قريباتنا بعوسو... ما كنا بنشوف امنا لما تعوس إلا فيما ندر لانها من النوع البصحى بدري جدا... بتقوم تستغل فترة الهدوء وتعوس كسرتها... لكن بسببها ارتبطنا بالسودان.. وفي بيتنا الاكل السوداني هو الأساس، ونقلت الشي نفسه في بيتي حسي مع اولادي... ما في شي بربط الزول بي بلده قدر الأكل! كنا لما ناكل في بيتنا في الامارات ملاح نعيمية ونمشي السودان نلقى الناس زيّنا، نحس انه احنا بنشبه الناس ديل! عرفنا ملاح الويكاب وملاح الروب وملاح اللوبيا... بي الكسره والعصيدة والقراصة.. طبعا الامر ما بخلو من تأثرنا بي مطابخ البلدان البنعيش فيها، لكن الكسره هي الاساس
| Quote: يامريم بت الحسين،،،والله الكسرة دي من ما قلت اتنزعت البركة واتقفلت الدواوين وتفرق الناس في نواحي الارض ،،وهذه هو فخارنا البقينا نتفشخر بيهو،، |
في واحد من شيوخ الصوفية (للأسف الاسم طار)، قال الكسره هي اسم الله الأعظم... والفكرة طبعا انها بتمثل اطعام الناس وبتدل على الكرم... أهلنا ناس رفاعة، لو الصينية مافيها كسره بتعبروا الاكل ناقص!
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
تحية بت الحسين
طال هذا الزمن ,, زمن الباحث الصغير , معقول مافي زول متذكر المجلة دي !?
مصورنها كم صورة وشرح لأجزاءها كمان
ياربي مافي زول في السودان ولا الارشيف تكون عندو ,, كدي اسألي عنها
الدقيق حق الكسرة زمان كان عيش ابيض او فتريته , بدون قشر وبضيف ليهو قمح مرات 1: 3
بخلي الكسرة لينة وبتنجض بسرعة
الكسرة الفطيرة عواستها اصعب لذا يفضلون الخومارة ,, ده كلام العواسات
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
تحية بت الحسين
طال هذا الزمن ,, زمن الباحث الصغير , معقول مافي زول متذكر المجلة دي !?
مصورنها كم صورة وشرح لأجزاءها كمان
ياربي مافي زول في السودان ولا الارشيف تكون عندو ,, كدي اسألي عنها
الدقيق حق الكسرة زمان كان عيش ابيض او فتريته , بدون قشر وبضيف ليهو قمح مرات 1: 3
بخلي الكسرة لينة وبتنجض بسرعة
الكسرة الفطيرة عواستها اصعب لذا يفضلون الخومارة ,, ده كلام العواسات
| |
|
|
|
|
|
|
|
|
|
Re: The art and science of كسره (Re: عبدالحفيظ ابوسن)
|
سلام يا مريم إزيك..
احب الطعام عندى الكسرة.. وزمان عمنا (شيخ الكســرة) رحمه الله، أحمد يعرفه، كان يقول انو الكسرة هى اسم الله الأعظم
الذى إذا دعى به اجاب.. ويكورك فى الشارع.. الكســرة الكســرة.. شغل الرجال الكســرة.
متمنى القى لى كسرة بمويـة وليمون وشطــة.
بس جـد كدا.. البت الجبتيها فى الفيديو دى زعلتنى ، لأنها ما قلبتهـا.. والحاجة البتعووس فيها دى ما دوكـة.
بعدين من الناحيـة العلميـة وكـدا..
1- اللفـة وتعنى شريحـة كسـرة واحـدة
2- الطرقـة: وتعنى شريحتين كسـرة أى لفتين.
3- الطايووق - وهو مخ الغنماية (منو قال الغنم ما عندها مخ) ويستعمل فى مسح الدوكـة عشان الكسرة ما تمسك
| |
|
|
|
|
|
|
|
|
|
Re: The art and science of كسره (Re: Abureesh)
|
بحثت عن مجلة الباحث الصغبر ,, وللأسف لقيت كلام عابر في ارشيف الانتباهة مع الفنان شرحبيل , يقول انو كان برسم في مجلة كذا وكذا والباحث الصغير , وتصدر من دار النشر
فشرحبيل بكون رسم الرسوم التوضيحية
| |
|
|
|
|
|
|
|
|
|
Re: The art and science of كسره (Re: عبدالحفيظ ابوسن)
|
دا موضوع كارب يا بت الحسين
نحنا نواجه مشكلة في تكنيكات أكل الكسره و خاصه لما يكونوا المعزومين خواجات...لفيناها زي السجاره و بعد داك ما عرفنا نخليهم ياكلوا بيها ام رقيقه كيف
فبالله شوفي لينا طريقه contemporary لأكل الكسره عشان نخلي الخواجات يلحقوا الفاتهم
| |
|
|
|
|
|
|
|
|
|
Re: The art and science of كسره (Re: malik_aljack)
|
مريوم....ده اجمل بوست فى تاريخ المنبر.
و مبروك تعلم العواسة يا اخى.
انا اولادى برضو بيحبوها جدا. لكن الان اتعودوا على الانجيرة و بيكلوها تمام برضوا.
اتخيلى عندى عجين خمار. وعندى دقيق. وعندى صاج. لكن ما عندى زمن اجرب. لكن عشان بوستيكى ده ح ابدا اتعلم و ح انزل ليك الصور كل يوم.
امى برضوا بتعوس. اتعلمت العواسة بعد العرس, ذى حالتنا دى. لما جيت اعرس ما كنت بعرف اعمل اى شيء فى المطبخ. قبل ما اسافر باسبوع اتعلمتا صينية المكرونة بالبشمل و ملاح النعيمية. صراحة ما بقدر اعيش من غيرهم. لما قلت لامى تتم جميلها و تعلمنى العواسة. قالت لى : عواسة فى عينك, ضرورى تاكلوا كسرة يعنى.
عمل الكسرة شكلو كده ذى ركوب العجلة....صعب على الكبر
| |
|
|
|
|
|
|
|
|
|
Re: The art and science of كسره (Re: smart_ana2001)
|
سمارت ازيك.. ياخ البوست ده شرك ليك انت تحديداً... ما ممكن تغيبي عن شي في science ومطبخ... 
فيما يخص تعلّم العواسه، اعتقد هو طشاش في بلد العمى.. لكن نادر مقتنع بيها واولادي بياكلوها... واظن الموضوع فعلا عايز تدريب... ما حاجه بين يوم وليله. عليك الله تعال نساعد بعض.. انا البوست ده دايره اطلع منه بي منطق اقنع بيه راسي ده في موضوع الكسره... انا الشي كان ما منطقتو ما بقدر اجوّدوا...
| Quote: عمل الكسرة شكلو كده ذى ركوب العجلة....صعب على الكبر |
أي دونت أقري.... يعني عايزه تتعلمي تعوسي متين يعني! ده احسن توقيت 
| |
|
|
|
|
|
|
|
|
|
Re: The art and science of كسره (Re: malik_aljack)
|
مالك الجاك... كان عندي صاحبتي سودانية بتاكل الكسره بي الشوكة .. اولادي لما يكونوا صغار بكون اسهل ليهم ياكلوا بالملعقة.. قاعدة اعجن ليهم الكسرة بي الملاح وهم بياكلوا بي الملعقة زي العجب... لكن جزء كبير من المتعة انه الزول يستخدم يدّه.... سناء خالد الله يطراها بالخير، قبل كده رسّلت في المنبر طريقة تقديم جذّابة جداً للقراصة بي دمعة الدجاج، وقدّمتها لي ضيوفها اليابانيين ونالت إعجاب شديد... يا ريت لو تجي تقترح لينا افكار للكسره
| |
|
|
|
|
|
|
|
|
|
Re: The art and science of كسره (Re: Abureesh)
|
أوووه باشمهندس أبوالريش.. يا مرحب بيك والله..
الغريبة انا جبته نفس الكلام بتاع انه الكسره اسم الله الاعظم :)...
| Quote: بس جـد كدا.. البت الجبتيها فى الفيديو دى زعلتنى ، لأنها ما قلبتهـا.. والحاجة البتعووس فيها دى ما دوكـة. |
بالله صحي هي بقلبوها؟ اول مره انتبه للنقطة دي.... تفتكر ليه؟ بعدين كيف ما دوكه؟ انا عجبني انها مقعّرة لجوّه... لانه الصاج بتاعي مستوي... كنت حتى عايزه افتش زي حقها ده قلت يمكن كسرتي تطلع زي حقتها دي هههههههههههههه
عجبتني شديد تعريفك للمفردات المهمة دي... انا فعلا ما كنت بعرف افرّق بين الطرقه واللفه.. لكن الطايوق ده بعررررررررفه.. وحأجي ليه بعدين,,,
| |
|
|
|
|
|
|
|
|
|
Re: The art and science of كسره (Re: عبدالحفيظ ابوسن)
|
ود اب سن، مرحب بيك تاني... والله انا ما حصل سمعت بيها مجلة الباحث الصغير، لكن عجبتني فكرتها الظاهره من عنوانها... وبتمنى لو لسه موجودة عشان ولدي محمود بحب الحاجات دي..
Quote: الدقيق حق الكسرة زمان كان عيش ابيض او فتريته , بدون قشر وبضيف ليهو قمح مرات 1: 3
بخلي الكسرة لينة وبتنجض بسرعة
الكسرة الفطيرة عواستها اصعب لذا يفضلون الخومارة ,, ده كلام العواسات |
الفيتريته كنا بنسميها الكسره البنفسجية انا واخواني، ما استسغتها ابداً يمكن لأني اتعودته على حقّت العيش... دقيق القمح بخلي العجين شويه متماسك وفيه لايقه شويه كده.. عشان كده بخلي العواسه تكون ساهله، بس مشكلته انها بخلي الكسره تكون معجّنة بعد تبرد وتتلصق مع بعضها.. يعني ما بتكون لايوقه كده... طبعا عموماً الكسره مفروض تتخت في طبق مهوّي عشان كده في السودان بعوسوا في الطباقة وبغطّوا بيها كمان.. برضه من الاحسن انه الزول يخليها تبرد أول حتى بعداك يغطيها عشان ما تعجّن... انا البعرفه انه برضه ممكن ينضاف ليها دقيق الرز، إليهو الرز مطحون ناعم زي الدقيق.. بديها لون وأمي كانت بتعمله عشان الذرة ما كانت كتيره في الاردن على ما اذكر فكانت بتجيبها من السودان وبتعمل حسابها انها تقضي ليها اطول فترة ممكنه...
السؤال الاول العايزه اطرحه هو موضوع الخمّار ودوره في الكسره... الهدف منّه شنو بالضبط... ممكن يكون اكتر من هدف، الأهم والمباشر هو الطعم... في ملاحات بتكون الكسره الخميرة فيهم ألذ.. اعتقد المفاريك بشكل عام بنطبق عليهم الشي ده... اعتقد برضه الخمّار عنده هدفه في تسهيل عملية العواسه برضها... دقيق الذرة عادة ما بكون ناعم شديد.. التخمير بخلي حبيبات الدقيق دي تذوب وتبقى لينه... بالتالي بتسهل عواستها... عشان كده عجين الكسرة يفضّل انه يقعد شويه قبل العواسه... يعني الزول يعجن العجين الصباح والظهر يعوس... وكلما ما قعد العجين كلما ما بقى خمير أكتر... أمّي بيكون عندها خمّار بتطلع منّه شويه وتضيفه لدقيق الذره.. وتخليه فترة يعمل عمله في الدقيق... بعداك لما تجي تعوس قبلها بي ساعة كده بتضيف دقيق القمح الابيض ومعاه دقيق الرز... ديل ما بحتاجوا لتخمير وممكن لو كانت الكسره من القمح بس انها تتعاس طوالي... طبعا كسرة القمح ساي بتبقى زي حقت ناس الشمالية البسموها "كسره فطير".. الدقيق برضه لما يلقى فرصته يندمج مع المويه ذرّاته بتتنفش وبمتصى المويه.. وده كله بخليه يكون متماسك ويسهّل العواسه.... بس يا ود اب سن، نسبة 3:1 دي جبتها من وين؟
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
Quote: يابت الحسين السلام عليكم
أول شئ خليني أشكرك علي خدمه قدمتيها لي قبل سنين وهي معلومات عن موقع للتقييم وإمتحنت ونجحت وإشتغلت معاهم فترة وسويتلي كم دولار منهن علي بعد داك وقفوني بلاسبب
المهم الكسري دي عندها مصنع متكامل زمان إتعمل له دراسه في كلية الهندسه جامعة الخرطوم قسم الميكانيكا تحت إشراف بروف أحمد عبدالرحمن العاقب لكن مره زي الكانت فيهو مشكله واتنازعو فيها نفرين للملكيه الفكريه وماعارف وصلولي شنو بس مامتأكد من التفاصيل
|
يا اهلا يا بابكر... والله اسعدتني جداً بي كلامك ده، لو قصدك على lionbridge.. فهم بشتغلوا على شكل projects... ارجع ليهم كل فترة شوفهم لانه المشاريع بتتفتح وتتقفل كل فترة... حسب الحوجه...
اعتقد في مصنع لعمل الكسره في الامارات، اسمه الخيرات... بس ما رهيفة زي حقت البيت... الشي الانا بفتش عليه هو شي يسهّل على مستوى شغل البيت... اداة مطوّرة للقرقريبة مثلا!... في الفترة ديك كنت بفتش على الطرق البعملوها الشعوب التانية عشان ينتجوا الحاجات الزي الكسره... لاقاني الفيديو ده لعمل الكريب الفرنسي...
في حاجات تانية وطرق وتقنيات تانية بجيبها ان شاء الله
| |
|
|
|
|
|
|
|
|
|
Re: The art and science of كسره (Re: عبدالحفيظ ابوسن)
|
معليش على التوقف البسيط الحصل، كنت بتحاشي ادخل المنبر بسبب التحذير الكان بظهر، والحمدلله الآن توقّف.... نواصل في كسرتنا...
لازال التركيز في العجين...
أم المؤيد انت من الناس الكنت مشرّكة ليهم بي البوست ده.. ما عارفه ليه، لكن كان عندي احساس انك زوله بتعرف كويس درب المطبخ... فعلا الخمّار الناس بحتفظوا بيه.. لانه كمان بعملوا منّو العصيدة... وعلى عكس عجين الكسره، عجين العصيدة ما بحتاج وقت بعد ما نعجنه... يعني الكسره زي ما قلت الواحده بتطلع الخمّار بتاعها وبتضيف ليه دقيق، وبعداك تنتظر فترة لحدي ما تبدا تعوس، الحاجه دي اكتشفتها بالتجربه ههههههه كنت اعجن وطوالي اجرب اعوس، القى الدنيا مااااا ياها... في النهاية وصلت لإني لازم انتظر.. العجين بكون مفرتق وما متماسك... في العصيدة، الخمار دوره بس طعم، وبسبب طريقة تنجيضها ما محتاجين ننتظر العجين يتماسك... اول خمار لي ادتني ليه بت خالتي لما كنت عروس.. وزي الادتني سر متوارث او حاجه قيمة، باعتبار انه حاجه الزول بضيف ليها كل فترة وما بتنتهي ابداً... الخمار قعد في الفريزر عندي بالسنين لحدي ما في النهاية قررت اجرب الكسره...
أول مرّه اسمع بي الكسره بي دقيق الذرة الشامية دي! والله دخلتيها في راسي لاننا بنحب الذرة الشامية جداً، سواء مسلوقه او مشويه وبنحب التورتيلا بدقيق الذره.. بس دي حتكون بي خماره برضه واعتقد لازم تقعد فتره تتخمر، لانه دقيق الذره الشامية بشبه الذره التانية ذرتها كبيره إلى حد ما مقارنه بي ذرات القمح وما متماسكه ابداً عايزه حاجه تربطها بي بعض... عندي صندوق بتاع دقيق البولينتا، ممكن يوم اتهوّر واعمل نظريتك دي... نادر (ابو محمود) ممكن يكون بعرفها لانه برضه زول كسره فطير وقراصة...
Quote: بجانب الذرة العادية في الذرة الشامية ( المكادة ) برضو بنعمل منها كسرة بتكون احلى من الفتريتة بس دي بتحتاج لدقيق لقمح اكتر لانها ما متماسكة نهائي اكتر من العادية . بس لونها اصفر جميل وطعمها احلى كنا بنعمل منها اكلة حلوة شديد بعد ننشف الكسرة بنبلها بي موية باردة ونرش عليها البهارات وزيت سمسم ويقطعو عليها بصل ابيض وبيدفنو معاها بلح مبلول او مقرمش . وبيسيبوها لين تتشرب البهارات مع الزيت والبلح . وبتكون وجبة خفيفة لذيذة .
|
عليك الله ساهمي معانا في محاولة ايجاد مقادير او نسب للدقيق والمويه والخمّار... لاني اعتقد قاعده اعملها خفيفه شديد... يعني بكتّر المويه....
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
قمت قبل شويه وعجنته لي كسره، عندي ملاح نعيمية خطيييييييييير... عارفه انه استلاب ثقافي كبير اننا نتغدى نعيمية، لكن حكم البلد ده، غير شويه في عادات الاكل حقتنا... من زمن انا في بيت اهلي بقينا ناكلها في الغدا... اولادي بحبوها جداً، وانا برضه من الملاحات الممكن اتغدى واتعشى بيها... حاولت اعمل نسبة للعجين بتاعي... جرّبت نظرية ود اب سن من زمن المرسال بتاع المطحتة... تقريبا طلعت كده:
نص كباية خمّار... لانه احنا ما بنحبها خميرة، بنحب الكسره الفطيرة، نكهه خفيييفه بتاعت خمّار
كباية دقيق قمح ما مبيّض (نفس البنعمل بيه القراصة، ناس البلد ده بسموه دبي)، ممكن نستخدم اي دقيق ابيض، لكن المافيه تبييض unbleached فيه غلوتين، بالتالي بكون لايوق كده.. عشان كده الناس في السودان بضيفوه للعجين بتاع الكسره
كباية ونص دقيق ذرة (عيش)
ذرّة ملح (دي انا ما متأكده منها، براي اتشوبرته وبقيت اعملها)
المويه تقريبا أخدت كبايتين وتلاته ارباع
الطريقة: حسب التحليل السابق لي دور الخمّار الاتكلمنا عنه في المداخلات الفاتت، دي ما طريقتي العادية... لكن عشان نستفيد من التحليل العملناه
نكب الخمّار ودقيق الذره مع بعض ونكب عليهم نص كمية الموية ... ونسوطهم سوا كويس جدا... مافي داعي نقلق من انه (يكلكع) لانه طبيعة الدقيق نفسها ما بتخليه يكلكع.. ومعاهم الملح ممكن.. ونخليهم لمدة ساعتين عشان الدقيق يبقى ليّن وما يتعبنا في العواسه.. بعد ما تتم ساعتين نضيف النوعين بتاعات دقيق القمح وباقي المويه، وممكن نستخدم مضرب الشبك عشان العجين ما يكون فيه كلكعه... وبعداك نخليهم سوا تاني ساعة تقريبا قبل ما نبدا العواسه....بجرّبها واديكم خبر.. عايزه اشوف:
-مدى سهولة عواستها
-كمية الخمّار هل محتاجه انقّصها ولا ازيدها
ضروري جداً تنتبهو انه لو الجو حار عندكم، ما تخلوا العجين برّه، في ناس بكون عندهم نوع الجرادل الملوّنه الصغيره ديك.. مخصوص لعجين الكسره وبدخلوه التلاجه على طول.. لانه الحراره ممكن تخلي العجين يبقى مخمّر شديد... احنا الجو عندنا بارد الأيام دي عشان كده العجين قاعد برّه كان، والخمّار اساسا ما بدخّلوا التلاجه نهائي
طبعا انا عايزه نظبّط المقادير دي اول، بعداك ننتقل للمواضيع التانية ذات العلاقة... زي الصاج وانواعه وبدائله.. القرقريبه وانواعها وفكرة ظريفة بتعملها ماما... هل بنحتاج لي طايوق؟! ولا ممكن نستغنى عنّه.. هل ليه دور غير انه يمنع الكسره تتلصّق؟... ده كله بعدين...
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
| Quote: مافي مقادير محددة للكسرة نحن هنا بنعوس لاسرة صغيرة بس في ناس بيعوسوها لاسر كبيرة ودي ما بيحتاجو فيها لمقادير بي الخبرة والممارسة اليومية الواحدة بتكون عرفت قدر شنو بيفطر الناس او بيغدي الناس . بس العجين في العواسة بيتعرف هل هو موية وبيحتاج لطحين ولا ولا سميك نحلو بشوية موية . مثلا البيحتاج لطحين دا اول ما تجي تختيه في الصاج بيعمل فقاقيق والموية بتاعتو قبل ما تعوسي بالقرقريبة وتطرحي العجين بتكون نشفت والعجين بقى مستوي بيصعب تطرحيه بعديها . العجين السميك اول ما تطرحيه ما بيمشي معاك وبتلقيه زي بدا يستوي . على العموم من الطرقة زاتا بتعرف ,وفي حاجة مهمة العجين في الماعون الانتي بتقسمي منو لو بعد كل طرقة او طرقتين ما قلبتيه بتلقي العجينة التخينة اترسبت تحت وطفحت الموية بي فوق .. بالنسبة لعجينة الذرة الشامية خليهم يرسلوها ليك من السودان جاهزة واتعلمي فيها والذرة برضو في طحين اسمو ذادنا ببيرسلو لينا من السودان يكون مرا عليك كسرتو حلوة وبتتعاس ليك اسهل من دقيق هنا , |
الكلام ده كلام مهم جداً محتاج تحليل عميق... فعلا انا لما المويه كانت كتيره كان بتظهر لي الفقاقيع دي.. لكن انا قصة انه الكسرة ما عندها مقادير دي ما بقدر ابلعها.. وده فعلاً رد أي واحدة سألتها.... لازم نكون قادرين نحدد مقاديرها بالضبط... لأسباب كتيره، اهمها اننا نقدر نوصّلها للأجيال الجديدة ونقدر نوثّق ليها.. حسي اولادي ديل يعتبروا الجيل التاني في الغربة، عايزه اقدر اديهم وصفة يتبعوها عشان يقدروا ياكلوا الكسره بالبحبوها... المقادير الكتبتها قبيل ديك نفعت خالص معاي... اعتقد انها محتاجه ازيد شويّه الخمّار عشان الطعم، لكن الكسره نفسها طلعت احسن كسره اعملها لحدي الآن... بنزل الصور بعد شويه... ما بقول انه الوصفة دي نهائي، لكن انا حأبدأ اشتغل عليها بالتحسين لحدي ما نصل لمقادير نهائية... طبعا مشكلة المقادير وظبطتها بيكون سببها انه الخمّار نفسه فيه مقدار مويه، بأثر على العجنة... لكن على الاقل بنقدر ندي شي ولو قريب للعجين الكويس للكسره... حسي المعلومة الكتبتيها عن متين بكون العجين رقيق ومتين بكون تقيل مهمة جداً، بتخلي الزول يقدر يراقب العجين...
كويس انك جبتي سيرة زادنا يا أم المؤيّد... وريني كيف بستخدموه؟ هل بحتاج لخمّار؟ ولا بس مويه ونعوس؟ بحتاج يقعد وقت قبل ما نعوس؟ مميزاته شنو عن دقيق الذره؟ احيانا بكون متوفر لي وكتير ما بكون عندي... لكن لما يكون عندي بعمل بيه العصيدة بس... ما حصل فكّرته استخدمه للكسره...
حأستمر اجرّب في المقادير واجيب اي جديد اصل ليه... اعتقد كده ممكن بعد ده ننتقل لنقطة تانية... وخلينا نتكلم عن الصاج...أنواعه واشكاله والخيارات المتوفرة في السوق للناس
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
ده شكل الطرقه بعد ما عستها... ومنتظراها تنجض
هنا قربت تنجض، ما عارفه عاديه النفخات الفي النص دي؟ ما بتظهر مع كل فقرة... لكن هي زي فقاعه كده... وما عندها اي تأثير .. بس ما اتذكر اني شفتها في كسرة أمي...
ده شكل الكسره بعد ما نجضت...
الكمية تقريبا بتأكل ليها اسرة زي اسرتنا دي وجبتين (أب وأم وطفلين صغار)... وهي كمية كبيرة طبعا... لكن بعد ما تتظبط المقادير الزول بقدر يعمل نسبة وتناسب ويقلل الكمية أو يكتّرها... اعتقد انها محتاجه تكون أخف من كده.. لسه شاعره بيها سميكه...
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
نواصل لحدي ما اجي بجديد فيما يخص العجنة... ونتكلم عن الصاج زي ما قلت قبل كده.... الصاج انواع كتيره، طبعا في السودان بستخدموا الحطب ومعاه صاج كبير للعواسه... نار الحطب محتاجه خبره عشان الواحد يقدر يتحكم فيها، لكن طبعا اساسا خيار الحطب ده في الشقق ما خيار عملي ولا منطقي.. عشان كده الناس بدت تفتش في بدائل.. منها استخدام الغاز او الكهرباء... في نوع صاج كهربائي أمي بتعوس فيه من سنين طويلة، وماشي معاها كويس خالص...
بس بتكون حوافه شويه اقصر من ده، عشان اثناء العواسه الواحده ما تتش يدّها... في درجات حرارة ممكن نتحكم فيها ننقص ونزيد... حرارته هادئه .. ولو قدرتو تحافظوا عليه ما يتخرّش بقعد زمن طويل... انا ما لقيت زي حق أمي، اشتريت لي نوع كده ما متساوي والعواسه فيه صعبه، خليته للبيتزا ساي.. البيتزا بتاعته رهيبه ومقرمشه من تحت..
النوع البستخدمه انا صاج عادي بخته في البوتجاز ... هو برضه مكتوب عليه انه بتاع بيتزا، ومتوفر في محلات كتيرة... شكله زي ده كده.. بس يدّه طويله.. ما بتسخّن بي الحرارة..
ميزة النوعين انهم ما بلصقوا... يعني انا ما قاعده احتاج أعمل طايوق من أي نوع... لو استخدمتو انواع تانية بتلصّق بتحتاجوا تعملوا الطايوق... ولو ما اتوفر الطايوق، أمي عندها فكره حلوه.. بتستخدم صفار البيض والصاج بمشي معاها تمام بدون مشاكل... ومادمنا اتكلمنا عن الصاج.. اعتقد الفيديو ده مناسب مع الموضوع ده... دي آلة عملوها الهنود عشان يسهلوا عمل خبز الروتي حقهم، وهو خبز رقيق وعجينته متماسكه ما زي عجينة الكسرة... طبعا انا مصره أعرض تجارب الشعوب التانية عشان نطلع لينا بنتيجة ولو فكرة صغيره كيف نسهل موضوع العواسه ده ... رغم اني على ما اظن دربي مرق، لكن لازم نشوف حل للأجيال القادمة
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
سلامات يامريم
بوست ظريف، اعتقد انو الكسرة بتاعتك طلعت محتاجة زيادة خمار شوية بسبب اضافتك للملح من بدري لانو بيزيد الضغط الاسموزي وبالتالي بيمنع التخمر! بالمناسبة تخمر الكسرة ده بكتيري ولا فطري ههههههههه
وبرضو اسمحي لي اخش في غلاط مع ابوريش
يا ابو ريش اولا الكسرة مابقلبوها يعني عواسة اختنا الفي الفيديو صحيحة تماما :)
ثانيا الطرقة هي قطعة الكسرة الواحدة واللفة هي طرقتين مع بعض، يعني عكس كلامك تماما
| |
|
|
|
|
|
|
|
|
|
Re: The art and science of كسره (Re: خالد عبدالوهاب)
|
| Quote: بوست ظريف، اعتقد انو الكسرة بتاعتك طلعت محتاجة زيادة خمار شوية بسبب اضافتك للملح من بدري لانو بيزيد الضغط الاسموزي وبالتالي بيمنع التخمر! |
الضغط الاسموزي ده ترجمته شنو.. ما فهمتها يا خالد.. وضّحها لي... لكن للضمان، تاني بخت ملح في النهاية.... يعني رأيك اعتمد كمية الخمّار دي؟ ما ازيدها المره الجاية؟
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
سلامات يامريم
الضغط الاسموزي بتعريف غير علمي كده هو انتقال الماء من المحلول المخفف للمحلول المركز، والفكرة من الكلام ده وعلاقتها بي كسرتك هي انو بسبب وضعك للملح انتي قمتي بتركيز العجين حقك اكتر وبالتالي البكتريا البتعمل التخمر مابتقدر تعيش في الوسط المركز ده لانو الموية حاتنتقل من خلاياها للعجين وتموت او على الاقل عملية التخمر ماحاتكون بالسرعة المطلوبة، الكلام دع يعني نفس فكرة حفظ اللحم والسمك بالتمليح زي الفسيخ مثلا.
اها بخصوص كمية الخمار افتكر في عوامل كتيرة بتأثر على الموضوع ده زي درجة الحرارة مثلا عشان كده بقترح ليك تضوقي العجين وهو ني عشان تشوفي درجة حموضتو ولو كانت كافية بالنسبة ليك ولا لا
مواصلة في الغلاط مع ابوريش، يا ابوريش الطايوق هو ليس مخ الغنماية، وانما هو النخاع الشوكي بتاع الغنماية ههههههههههه
| |
|
|
|
|
|
|
|
|
|
Re: The art and science of كسره (Re: Abdalla Abbas)
|
Quote: الضغط الاسموزي بتعريف غير علمي كده هو انتقال الماء من المحلول المخفف للمحلول المركز، والفكرة من الكلام ده وعلاقتها بي كسرتك هي انو بسبب وضعك للملح انتي قمتي بتركيز العجين حقك اكتر وبالتالي البكتريا البتعمل التخمر مابتقدر تعيش في الوسط المركز ده لانو الموية حاتنتقل من خلاياها للعجين وتموت او على الاقل عملية التخمر ماحاتكون بالسرعة المطلوبة، الكلام دع يعني نفس فكرة حفظ اللحم والسمك بالتمليح زي الفسيخ مثلا.
|
علم والله! فعلا كلام منطقي جداً... اعتقد الحل الاحسن اني اضيف الملح في الآخر... معناها انا حأجرب مقاديري الزمان دي اول شي من غير الملح عشان اتأكد هل الخمّار كان كافي ولا الملح قلل من عملية التخمير... وبناءا عليه إما نعتمد المقادير دي او نعدل عليها.. طبعا المقادير ابدا ما حتكون دقيقه تماماً لانها بتعتمد على درجة تخمّر الخمار... وزي ما قلت انت درجة حرارة الغرفة...
ألف شكر ليك وضحته الفكره بصورة ممتازة وساهله في الفهم...
| |
|
|
|
|
|
|
|
|
|
Re: The art and science of كسره (Re: Abdalla Abbas)
|
عبدالله عباس.. ألحقنا بالمحاضرة دي عليك الله... دي محاضرة حتكون ممتعة ومفيدة جداً للبوست.. وماشه في خط البوست الأساسي... من خبرتي في المطبخ سواءاً مع المعجنات او الخبايز او الطبيخ العادي، بقدر اقول اني لما افهم العلاقة بين الحاجات بقدر اعمل اكل لزيز... وبقدر اعمل خبايز حلوه.. وكيكة تكون دايماً مظبوطة... اكيد ما زي لما اشتغل على عماي ساي.. لما اكون فاهمة الموضوع بقدر اظبطته في كل مرّه... لكن لما يكون ما مفهوم لي بكون نجاحه وليد الصدفة ومربوط بالظروف.. عليك الله ألحقنا بي المحاضرة دي... بذكر مرّه صديق لينا قال لي ملاحظة عن اللقيمات لما بديت أعمله لأول مرّه.. قال لي دايماً احرصي انه قوام العجينة يكون سائل شويه قبل ما يخمر لانه الخميره بتستهلك جزء من المويه وبالتالي ممكن العجينة شوفه تكون جافه لو من البداية عجنتيها بالقوام المطلوب... ملاحظته دي بعداك كانت اساس نجاحات كتيره زي البيتزا مثلاً... ! ومن يومها عجبتني فكرة فهم الوصفات قبل تطبيقها...
طبقات ود ضيف الله من الكتب المفضّلة لوالدي وكان بقرا لي منها كتير وغالبا حأكون سمعته العبارة منّه... الله يجعلنا موصلين خير لعباده... ويرزقنا من فضله...
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
مواصلة لموضوع العواسه... بعد ما اتكلمنا عن العجين وعلى الصاج... اعتقد من الحاجات الضروري نتكلم عنها هي القرقريبة أو الأداة البتستخدم لفرد العجين عشان ينجض... كل ما تكون الكسره رهيفة كل ما اعتبرت ناجحة... القرقريبة الأصلية بتكون مصنوعة من خشب، بس ما عارفه من ياتو نوع بالضبط.. نادر بقول من شجر الدوم أو النخيل... الناس بعداك بقت تستخدم حاجات تانية، زي كروت الشحن بتاعت الموبايل وزي بطاقات الإئتمان المنتهية الصلاحية credit cards... امي مرات لما ما تلقى قرقريبة بتقوم تستخدم قطعة من علبة البيبسي الفاضية ... بصوّر ليكم شكلها بعدين... الصور دي لقيتها في الانترنت للقرقريبة واستخدامها
الصور دي من search في الانترنت .. ما حقتي ياخوانا
كان عندي سؤال حول زاوية مسك القرقريبة بحيث تحقق افضل نتيجة... هل تكون مايله بي زاوية تقريبا 45 درجة كده، ولا نستخدمها بصوره قائمة يعني العواسه تكون بالحافة؟ يا ريت تدونا الراي...
برجع بعدين تاني
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
نرجع لموضوع الكسره يا اخوانا... من اليوم داك تاني ما عسته، الليله نزلته لي شوربة بتاعت ضلع حألايقها بي ويكه.. وعجنته العجين بتاعي عشان اعوس ليهم كسره معاها...
لازال موضوع القرقريبة مشكلة بالنسبة لي، وزي ما قالت أم المؤيد (المشكورة جدا على الشرح)، وزي ما قال أخونا حسين ديقول، القرقريبة بتاعت السودان في تقديري أحسن خيار... بس البديل شنو؟ محتاجين افكار عملية في الاتجاه ده.. الكردت كارد او كروت الشحن ما صحيّة وبتسيح بالحرارة...طريقة علب الببسي القلت عنها بتسخدمها ماما (شوفو الصورة تحت)، حسيتها لانها مايله، ما بتديني التخن المناسب.... افكاركم عليك الله.. حاجه تكون مدببه زي القرقريبة، واستخدامها آمن وممكن نلقاها في بلاد الغربة دي... انا حأمشي افتّش برضه..
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
*الكسرة .. من القرقريبة لسرطان الإسكراتشات
نضال علم الهدينشر في الصحافة يوم 22 - 05 - 2011
القرقريبة اسم كان يتردد صداه وهي تتحرك عبر أنامل تلك السيدة في الصاج من اجل صناعة الكسرة العالم الاخر الذي بدأ يخفت بريقه لصالح الرغيف، والقرقريبة نفسها كانت في زمن ماضي تقوم علي عملية اخري يدخل فيها عنصر اخر كانت تجلس السودانيات لقضاء اوقات فراغهن فيه وهن يغزلن من السعف التباروقات والنطاع والمقاشيش وما تبقي من اجزاء السعف تصنع منه القرقريب التي تقوم بدورها في صناعة كسرة طبيعية خالية من المواد الكيماوية ، الان ونتاجا للتغيرات التي ذهبت بالسعف ومنتجاته لم يكن امام من يقمن بصناعة الكسرة سوى التعاطي مع مستجدات الحضارة التي لم تكن سوى متبقي كروت الشحن بعد ان يضيع رصيدها في الحديث وهي الآلية الجديدة المستخدمة في صاج العواسة وبما تحتوي عليه من مواد بلاستيكية وتعرضها لدرجة الحرارة مما يجعلها معرضة لمادة الدايوكسين وهو ما يعني ان الكسرة التي يتم استخدامها الان هي كسرة مسرطنة وقد تشابه الرغيف ببروميد البوتاسيوم الذي فيه مما يعرض مستخدميها للخطر .
الصحافة ، ذهبت الي من يقمن ببيع الكسرة في مواقعهن وسألت عن الآليات المستخدمة في صناعة الكسرة، اول من التقينا بها كانت هاجر صالح ياسين بائعة كسرة بسوق ستة الحاج يوسف سألتها عن هل تقوم باستخدام قرقريبة السعف لانها لا تحتوي علي خطورة ووصفت استخدامها بالمريح والصحي، وقالت انها تقوم بالقائها في العجين دون ان تغير شكله وهو ما لا يتوفر لقرقريبة الاسكراتش التي قالت انها لا تقوم باستخدامها، واضافت انها تستخدم الزيت والطايوق حينما يعصلج الصاج معاها، وقالت انها تقوم باستخدام الفحم قبل ان تختم حديثها ان اي سيدة تعرف طريقة التعامل مع صاجها ، بينما قالت امنة عبد الرحمن بائعة كسرة اخري انها تقوم باستخدام قرقريبة السعف في صناعة الكسرة وقالت انها لا تستخدم كروت الشحن وقالت هي جابوها للكلام ولا العواسة ،وقالت انها ما مضمونة وبصراحة انا ما بعرف بعوسوا بيها كيف، وقالت انها تقوم باستخدام الطايوق والزيت ،الا ان حديث هاجر وامنة لا يعني انه لا توجد من يستخدمن الاسكراتشات في العواسة وهو امر يحتوي علي قدر كبير من الخطورة علي الصحة وذلك لان الاسكراتشات تصنع من مادة البولمير والتي يعني تعرضها لنيران الصاج ظهور مواد مسرطنة وهو ما يعني اننا نأكل في بطوننا سرطانا مصدره هذه المرة كروت الشحن مع ان هناك عاملا اخر ايضا يحتوي علي قدر كبير من الخطورة وهو استخدام البلاستيك من اجل معالجة عصلجة الصاج حيث تستخدم النساء البلاستيك من اجل ايجاد معالجة له مما يعني ان مواد مسرطنة اخري مصدرها هذا البلاستيك كخطر اخر، يضاف لخطورة الاكياس المحمولة فيها المواد الغذائية الساخنة كالفول واللبن من البقالات والدكاكين.
كرت الاسكراتش بقيمة 50 جنيها التي ذهبت في جوف ذاك المحمول ليلقي بالكرت علي قارعة الطريق بلون الصفار الذي فيه لم تنته قيمته بعد وتحول في اتجاه اخر حملته تلك السيدة متوجهة به نحو صاج الكسرة وتحرك فيه بيدها ذات اليمين وذات اليسار لتخرج لتكتمل دائرة طرقة الكسرة ولكنه اكتمال تكتمل معه دورة المرض السرطاني الموجود في مادة الكرت البلاستيكية ######ونة درجة حرارة الصاج قبل ان نلقي به في جوفنا ألماً جديداً يحتاج لوضع نهاية له بالتوعية بخطورة استخدامه او بتجاوز الحضارة والعودة لقرقريبة السعف التي تخلو من هذا النوع من السرطان وهي اكثر امنا وضمانا في استخدامها كاداء للعواسة بديلة لاسكراتشات الكسرة المسرطنة .
____________________________________________
http://www.sudaress.com/alsahafa/28049
| |
|
|
|
|
|
|
|
|
|
Re: The art and science of كسره (Re: smart_ana2001)
|
علم ساكت ياسمارت، الغربة دي معلم ممتاز بتعلم الزول اي حاجة :)
عندي ليكم اقتراح قرقريبة ممتاز
في صحانة كده ديسبوزل مصنوعة من شي زي الفلين، او هو فلين مضغوط تقريبا ماعارف اسمها شنو لكن متوفرة في اي دكان
تجيب الصحن ده وتقطع منو مستطيل بالمقص تطلع قرقريبة ممتازة احسن من السعف ذاتو :)
كدى يامريم جربي الفكرة دي ، وانا احتفظ بحقوق الاختراع في حالة انها نجحت وانا متأكد انها حاتنجح بامتياز :)
| |
|
|
|
|
|
|
|
|
|
Re: The art and science of كسره (Re: خالد عبدالوهاب)
|
سمارت وصلت .. يا مراحب ... انا لي زمن منتظراك
والله فكرة السليكون فكرة سمحة يا سمارت... لكن متأكده انه ما بسيح بالنار؟ انا مرّه جبته الspatula في السواطة ساي مسّكت لي، إلا تكون نوع ضارب .. انا شاكه في كده... جرّبي لينا، كان نفعت نمشي نفتش واحده غالية... لكن عجبني الthinking out of the box ده...
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
خالد عبدالوهاب، أحيي فيك والله جهودك دي معانا... قصدك على الصحون زي دي؟
انا غايته اعتقد انه القطعة من الأكواب ممكن تكون أحسن.. ولا رأيك شنو؟ لاحظ انا بتكلم وما حصل شلته لي قرقريبة بتاعت خشب في يدّي! هل الفكرة انه تكون حادة؟ ودور المرونة فيها شنو؟
انا خاشه في راسي فكرة راديكالية عشان نسهّل قصة العواسة دي زاتها، على الرغم من انه الحركة كول يا قول اخواني... حسي حقت الكريب الجبتها في الفيديو فوق دي مالها؟ عيبوها لي؟ ده شكل الأداة بتاعتها
| |
|
|
|
|
|
|
|
|
|
Re: The art and science of كسره (Re: مريم بنت الحسين)
|
مريوم, البتاعة دى مكتوب فيها انها بتستحمل لحدى.500 درجة فهرنهايت
•Heat-resistant up to 500 degrees F
و عشان الترجمة بتاعة الوحدات...(ايوه, عارفة, ناس امريكا و وحداتهم العجيبة دى). عشان تخبزي حاجة عادية فى الفرن(كيكة مثلا) درة الحرارة بتكون 350 درجة فهرنهايت. لكت اعملى حسابك لما تجيبى spatula...لانه اغلبهم بلاستيك عادى وديل اظن للاستخدام فى كب عجين فى القالب او بس لخبطة المقادير و العجن.
خالد...صحونك ال دسبوزابل دى موش تعمل كانسر. دى تودى القبر على طول.
| |
|
|
|
|
|
|
|
|
 Re: The art and science of كسره (Re: smart_ana2001)
|
يا سمارت، ما دام اخدتي 50% من اول محاولة عواسه، اعتقد انك حتمشي كويس.. انا اول عواسه لي عملت بانكيك وأمي قالت لي دي تعمل لي خمسة طرقات... بس استمري في المحاولة، انا لسه ما راضية عن النتيجة، لكن الشعب مبسوط..
| |
|
|
|
|
|
|
| |
مريم بنت الحسين
عبدالحفيظ ابوسن
عبدالعزيز عثمان
سيف اليزل برعي البدوي
أسامة العوض
Abureesh
malik_aljack
smart_ana2001
alsngaq
فيس بوك
تويتر
انستقرام
يوتيوب
بنتيريست