هههههه نكتة خطيرة عن التحلل

Quote: "يحدث الان في سودانستان - الجزء التالت !! رغم حرارة النقاش، كان الجو باردا داخل مكتب الرئيس و هو يلتقي ببعض الوزراء و المقربين لمناقشة الارتفاع غير المسبوق للدولار و محاولة إيجاد موارد إضافية سريعة لمجابهة منصرفات الدولة و أهمها رواتب الوزراء و كبار المسؤلين و مخصصاتهم !! الرئيس كان غاضبا من فشل الوزراء في خلق موارد جديدة من وزاراتهم لضخ العملة - صعبة كانت أم (ساهلة) - لخزينة الدولة التي صارت أفرغ من فؤاد أم موسي : - يا اخوانا القصة دي كده ما بتمشي ، داير لينا موارد أقلها ندفع ليكم مواهيكم و مخصصاتكم الما ليها حد دي !!! - إنت يا ريس مليار قطر خلصت ولا شنو ؟!! الرئيس بلهجة غاضبة من سؤال غندور : - المليار دي تتقطع يا إبراهيم ؟! آخر 3 مليون منها دافعين بيها مهر بت عبدالرحيم الاسبوع الفات !!! غندور مواصلا : - طيب يا ريس ما تخلي عبدالرحيم يتحلل باتنين مليون تمشينا كم أسبوع لحدي ما نلقى موارد تانية !! أثار هذا الاقترح غضب عبدالرحيم محمد حسين ....فانتصب واقفا و بصوت جهوري اهتزت له جنبات المكتب الفخيم : - و إنت ما إتحللت من قروش إتحاد العمال مالك ؟! ولا فلاحتكم بس فيني أنا !!! ثم بدأ بالبكاء و النحيب !!! الرئيس موجها حديثه لغندور : - إنت يا إبراهيم الليلة مالك ؟!! يا اخوانا نحن ما جاين هنا عشان تشاكلو بعض ... دايرين لينا حلول حقيقية .. قصة كل واحد فيكم شغال بالمجهود الفردي و يجي يتحلل بربعها بقت ما بتاكل عيش... البلد وقفت زوت و القصة بعد شوية بتجيب ليها مظاهرات و إسقاط نظام و كلام نحن ما قدرو !!! طالت فترة الصمت قبل أن يبددها والي الخرطوم : - والله يا ريس أنا عندي إقتراح لكن ما عارفو بنجح ولا لا !! - أدينا ليه يا دكتور ... ربنا يجعل الشفاء على يديك ... - نحن ممكن نعمل رسوم صلاة ... نجيب اخوانا في المحليات و الشرطة و قدام كل باب مسجد يكون في تلاتة مناديب ، واحد من وزارة الارشاد و واحد من المحلية للمراقبة و واحد من الشرطة للتأمين . أسعار الصلوات تكون حسب الاهميه و كترة المصلين، يعني المغرب و العشاء اسعارهم تكون زايدة من الضهر و العصر و صلاة الجمعة السعر يتضاعف !!! وزير المالية مقاطعا : - أهم حاجة الايصالات ، إنت ناس مكتبك ديل بقو صعبين جدا !! الوالي تجاهل كلام وزير المالية و واصل مقترحه : - و إذا نجحت التجربة و الناس ما اعترضت عليها شديد ممكن نبدأ الجزء التاني منها و اللي هي نعمل تسعيرة للصفوف في الصلاة بمعني نغير سعر الصلاة الموحد و السعر يبقي حسب الصف العايز تصلي فيه !! وزير الدخلية لم ياخذ الاذن بالكلام حينما قاطع الوالي : - أنا معترض بشدة علي الكلام دة !! ثم إلتفت موجها حديثه للسيد الرئيس : - يا ريس ، أفراد الشرطة للتامين ديل حا نجيب ليهم مواهي و حوافز من وين ؟ بعدين براك عارف الجو السياسي بقى كيف ، الأقتراح ده ممكن يكون سبب لمظاهرات تبقي شرارة لتغيير النظام زي ما حصل في دول تانية ... الرئيس يرد بحدة : - الدول التانية دي ما عندك بيها شغلة ، من بتين نحن شغالين بزول ؟ بصوت عالي شرخ حلقومه ، صرخ وزير الخارجية : تكبير !! إهتز المكتب بصوت التكبيرات إستحسانا لكلام الرئيس الذي واصل موجها حديثة لوزير الدخلية : -مافي سبب للخوف من المظاهرات، الناس دي لو كانت بتحس كان طلعت من زمان ، أي حاجة بتجيب لينا موارد أعملوها طوالي !! بصوت خفيض تسآل وزير الداخلية : - طيب أفراد الشرطة لتامين المحصلين حا نجيب ليهم مواهي من وين ؟ الوالي بابتسامة : - ده كلام ده يا با شمهندس ؟ ما بس بنزيد الرسوم !!"

Quote: من وحى فقه التحلل الجديد: سكران قبضوهو ناس النظام العام ودوهو النيابة .. قال لوكيل النيابة انا عايز اتحلل .. الوكيل قال ليهو تحلل كيف؟ .. قال مش العرقى الشربتو ده .. حسى بطرشو ليك

Quote: خليهم يحللو العرقي ...

Quote: مشيت ل عمنا قوقل ,, لقيتو هو زاتي زي ما عارف غير التحلل من الاحرام ,, قدر ما غيرت بدلت في السؤال يمشي ويجيني للحج

Quote: امرأة تصطحب طفلها المخنوق وتقف أمام الطبيب وتصرخ: (ألحقني يا دكتور، الشافع بلع جنيه، وخايفاهو يموت)، فيطمئنها الطبيب بمنتهى الهدوء: (ما تخافي يا حاجة، في ناس في البلد دي بلعت مليارات وما جاتم الحبة)