أوب ولع . . أوب طفا (2) مسرحية سياسية كوميدية/عبدالله علي إبراهيم

نعى اليم ...... سودانيز اون لاين دوت كم تحتسب الزميل معاوية التوم محمد طه فى رحمه الله
الاستاذ معاوية التوم في ذمة الله
رابطة الاعلاميين بالسعودية تحتسب الاعلامي معاوية التوم محمد طه
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 09-12-2018, 10:56 PM الصفحة الرئيسية

مكتبة د.عبد الله علي ابراهيم
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
22-03-2014, 05:51 AM

عبدالله علي إبراهيم
<aعبدالله علي إبراهيم
تاريخ التسجيل: 09-12-2013
مجموع المشاركات: 587

للتواصل معنا

FaceBook
تويتر Twitter
YouTube


أوب ولع . . أوب طفا (2) مسرحية سياسية كوميدية/عبدالله علي إبراهيم

    أنشر مسلسلاً هنا مسرحية كوميدية كتبتها في نحو 2007. وبرجاء التكلم معي من الراغب استثمارها إبداعياً في أي صورة ما شاء

    الفصل الثاني
    المشهد الأول
    (مكاتب "المفوضية الرئاسية العليا لمحاربة الفقر". اللافتة بالاسم واضحة تغطي خلفية المشهد)
    (مكتب بدوي وسلمي)
    بدوي: تعرفي امبارح بتونس مع اخوي الكلمتك عنو.
    سلمي: (تضحك) بند المغتربين
    بدوي: قال لي تصور أي واحد من أولاد الشيخ زائد ورث 40 بليون. قت ليهو 40 بليون شنو. اشوفليك الزول زعل جد. وقال لي إلا تحكوها كدا. ياخي نفرض 40 بليون تمرة بركاوي، قول، 40 بليون حصحاص بتاع الخرسانة دا، يا عالم، 40 بليون بعر غنم، أي حاجة. بالنحو كده قال لي ليس بعد الأربعين بليون تمييز. تقول خمسة بليات أوعشرة مليون جنيه عشان الناس تميز. لكين 40 بليون تقولها كده حافة والفهيم يفهم. والله ضحكت ضحك.
    سلمي: (تضحك) لكين ما بالغ في الحته دي. والله مونسك.
    (يدخل المدير وهو يحمل تقريراً . المدير قصير بطين نزق الحركة وجهه معرض كبير لإنفعالاته)
    المدير: يا سلمي وبدوي تقريركم عن إستراتيجية محاربة الفقر ممتاز يا ابنائي. بس صادم.
    سلمي: يعني شنو يا جنابو؟
    المدير: يعني شديد بلحيل من ديوان حكومي.
    بدوي: أنا فاهم إنو الفقر أسبقية للحكومة.
    المدير: اسبقية بلحيل.
    سلمي: والرئيس قال نعالج قضية الفقر بشفافية.
    المدير. بلحيل قال كده. لكن نحن في دواوينو ما ملتزمين بكده.
    سلمي: ليه؟
    المدير: نحن بناخد ماهية منو عشان نديها كوز (ينتبه، مبتسماً) لا. . لا. . ما قصدي. دي بتجيب هبايب. بلحيل. لكن نحن مهمتنا عدم الشفافية.
    سلمي: ونهرب من الإحصائيات وين؟
    المدير: بلحيل. دي صنعتنا؟
    بدوي: دا صاح لكين؟ وحنحارب الفقر بتزوير الحقائق؟
    المدير: تعرف يا ابني يمكن الطريقة الوحيدة التحارب الفقر.
    سلمى: شنو؟
    المدير:تزوغ منو. دا راجل بطال بشكل. ذي زول إنته مدين منو. خليلو الدرب. بدوي: مردونا
    المدير: وأضل. ما تصدق. مافيش حد يا بدوي عاوز يحارب الفقر. كلنا لو لقينا الفرصة بنغرق ليه. غريزة كده. نحن الجيل القدامك دا في الدولة كلنا هاربين من الفقر. ولدنا في بيوت فقيرة عناقريب وبروش وتقروقات ولدايات ونار عويش وحاجات محرجة. وما صدقنا لغاية دلوقت إنو وصلنا وين. والله يا ابنائي لما ادخل بيتي بنفصم عديل. دا أنا اتخيلتو كيف؟ وبنيتو كيف؟ مافي حكومة بتحارب أي حاجة. لأنو الحكومة نحنا؟ ونحنه في تحالف كبير للهاربين شخصياً من الفقر. ما تسمع محاربة فقر! كلام ساكت!
    سلمي: كلام مئيس يا جنابو.
    المدير: بلحيل. أنا كنت في كل حرب حكومية من الاستقلال. أنا خبير محاربة في الدولة. كنت في حملة محاربة الأمية.
    سلمي: والنتيجة؟
    المدير: وأهو إنت بتسمعو الخطب والراديو والتلفزيون وبتقروا جرائد. في رئيس بلد يقول وجها ولجا ونشكر على حسن سلوكة. دا مش يعمل بروفات قبل ما يعرض على الجمهور. الأمية دي مش فشلنا في حربها وبس ما في زول هسع بتذكر إنو يوم عاديناها. لولا اللافته العلي شارع النيل قبل كبري بري معركتنا معاها تكون نسياً منسيا. الأمية! مالها؟ يا خي خلى لناس تنعم في جهلها.
    بدوي: أفتكر دا صح.
    المدير: وكنت في لجنة محاربة سوء استخدام العربات الحكومية.
    سلمى:: والعربات الحكومية بقت بأرقام خاصة ولا واحدة ولا اتنين ولا تلاته. واحده (للجمهور): أفصل ليك ليه وكلكم فهم.
    المدير: بلحيل: وحاربت العطش في الغرب والجوع في الشرق والحزن في الشمال والعري في الجنوب. وأنا الاخترعت عبارة وقد عقدنا العزم علي أن نكون من يتجه إلى حضنه الوثير الدافئ (يقلد نميري) الحزانى في الشمال والعطشى في الغرب والجوعى في الشمال والعرايا في الجنوب الذين خرجنا في ليلة ليلاء نحمل روؤسنا في أكفنا من أجلهم ولخيرهم.
    بدوي: كلام يمغس. دا أنته العملتو!
    المدير: وهو انا العملتو هين. قلت ابسط العبارة فشخصتها فقلت صديق في الشمال واساغة في الغرب، وأدروب في الشرق ومنقو زمبيري الذي لا عاش من يفصلنا . . في الجنوب. وإنتو شايفين كده.
    سلمي: وواحد فيهم ما متور حركة مسلحة ما في.
    المدير: وكنت مقرر لجنة محاربة الخرافات والعادات الضارة.
    بدوي: والبلد طالعين تنزيل أموال.
    المدير: والأعجب كنت ف إدارة محاربة السكن العشوائي.
    بدوي: طلعلنا عشوائي فاخر.
    سلمي. خلوها مستورة.
    المدير: وانا على سن المعاش جو قالولي تبقي مدير محاربة الفقر على الأقل تصلح معاشك. قلتللهم إلا دي. أنا تاني ما بحارب أي حاجة. دى سيدنا عمر قال لو كان الفقر رجلاً لقتلته. أنا! أنا! أنا ود أبوي دا أحارب الفقر، قدرو واللا لحم صدرو؟
    بدوي: بعدين.
    المدير: قال لي الزول ما إنت عارف نحن بنحارب حاجة. وإنته حتحاربه يعني. دا فقه ضرورة. حارب البتقدرو وخلي الباقي. إنت تجسيد خبرة فشلنا في فشل المحاربة يعني حيغلبك تفشل تحارب الفقر.
    سلمي: وقال كيف يعني.
    المدير:معلوم. أضرضر الموضوع بعدم شفافية. شيخن بيخن إنت طبيب واللا تمرجي.
    بدوي: تألف أرقام.
    المدير: لا بلحيل لا. لكين تلطف صدمتها. مثلا إذا الأرقام صادمة تقوم تلعب بالألفاظ. مثلاً تقول دي أرقام الفقر النسبي أما أرقام الفقر المطلق فكذا وكذا. وحِلك لما الناس تفكك اللغز. فيها الف فرج. يا قام انقلاب، يا حصلت نيفاشا، يا حصلت أبوجا.
    بدوي: ودا الكنت عاوزنا نعملو.
    المدير: مش بالتحديد. أنتو شباب وطالعين فيها. حرام أفجعكم. لكن ما تحاربوا حاجة. الحيريب مش كويس (يعقد اصابعه كما في "محاربك" الطفولية") اتصالحو. اتصالحو شوية شوية.
    سلمي: حتاخد معانا كم لغاية ما نحارب أي حاجة؟
    المدير: لو صدقت العمر كلو. لكن ما حتصدق. حاربنا العطش طلعلنا أركوي حاربنا الجوع طلعتلنا آمنة ضرار حاربنا العرايا طلعنا باقان اموم حاربنا حزن الحزاني طلعلنا الطيب مصطفي. حنحارب الفقر يطلعلنا مين مامون البرير، اسامة داؤد، ود الجبل؟
    ما يمغسني ويسهر بي الليالي وأنا مقبل على طريق الأولين والآخرين إنو اموت ولم اقتل ذبابة. دا كانت حروب فشتك. قضيناها غرف عمليات وفكر ومنجهية .
    بدوي: الفكر والمنهجية
    المدير: منهجية منجهية مجهنية. أنا حأتذكر إية واللا إيه. كلام الليل يمحوه النهار.
    بدوي: على رأيك.
    المدير: (بتأثر). أنا حاربت الانجليز يا أولادي وأنا طالب (يتهدج). واتشرد من اتشرد ومات من مات. صحاب زي كباي الشوب صبا وطلاقة وعزيمة (يخفي وجهه بين يديه) رحمهم الله
    سلمي: عم عمر. أنت كويس.
    المدير. ماشي. ولما اشوف الأوربيين الجو حربيين يحلو لينا مشاكلنا، اخجل والله يا أولادي. هم بيذرعو بأحذية معروفة لدي نفس الشوارع الهتفنا فيها بجلاءهم. هم هم زي ما شفتهم قبل ستين سنة. بطني بتقلب يا أولادي. حاجات كتيره تاريها حصلت وأنا عميان لغاية ما حصلت وجانا الجنود الفرنجة. أرجع بالذاكرة للأصدقاء السمحين الزي البنورات وانقبض (يتهدج أكثر، بوهن كأنه يسترجع مشهد الماضي) يسقط الاستعمار يسقط الاستعمار (يصيح تدريجيا) أنا نقضت عهدكم، أنا خنتكم، أنا خائن خنت عهد الصبا. ولما أرجع البيت أكاد أنكر إنو حقي. إيه البنيتو دا؟ إيه ال###### ده؟ هل خربت بلد عشان أبني عمارة؟ دي حروب فشنك يا أولادي.
    سلمى: عمو إنته كويس.
    المدير: لا. في الداخل لا. إنا الألفت بالنهار مجبور: ثوابت الوطن ودون طموحنا وتراجع الثورة ولا تتراجع وتغيير المواقع. وبالليل بلقى نفسي جالس في قفص اتهام رفاق الصبا. في النهار اكاذيب وبالليل هلاويس. الوطن وهم وأنا ساكن العلالي في خرائب الليل اتقلب في الطنافس (بعذاب) منو أنا؟
    سلمي: (بتاثر واضطراب): عمو. لا. ما كان قصدنا كده!
    المدير: لأ. إنتو حركتو شئ أصلاً مؤرقني. أنا في سن المعاش وما عارف أنا منو! مع منو؟ ضد منو؟ عملته شنو؟ ما عملته شنو؟ هويتي شنو؟ تفتكروا إنتو ما عندكم حق علينا (بعذاب أشد) آسف. آسف. ببحح. ما أورثتكم شيء. الشوارع تطأها نفس الأحذية. (لهما) حتبدو من جديد. جديد لنج. ودا ظلم.
    بدوي: ما مهم. نبدا وبس.
    المدير: (متهالكاً): حروب فشنك! الله يكفيكم شر التاريخ.
    سلمي: عمو (يوهن صوتها وتغيب في إغماءة يحملها بدوي خارجاً).
    المدير: دايره ميثاق جديد. ميثاق روحي. المره دي عشان عهد الصبا الزي البنانيير يضوع إلى الأبد.

    المشهد الثاني
    (في المستشفي)
    (يدخل علي ممرضة. بدوي يدخل بسلمي على نقالة. يتجه نحو ممرضة على كرسى لاستلام الرسوم)
    بدوي: ياست حصلينا منها وبراها غمرت، بالله، ارجوك.
    الممرضة: (ببرود) خمسة وسبعين ألف.
    بدوي: من جيب العدو. (متوتراً) يلا. أرجوك.
    الممرضة: جزاك الله خير (تتجه نحو سلمى، تجس النبض، تفتح العيون، صامته وبحركة روبوتية)
    بدوي: إن شاء الله خير. قولي. مالها. سلامة إن شاء الله.
    الممرضة: كشموتي كشو كشينا كشموري كفوشي.
    بدوي (فاغراً فاه): يا! إنت بتقولي إيه؟
    الممرضة: كشفيرو كشانتي كمشوني كشنيرو.
    بدوي: (منزعجا) هي ماتت. دا سكلي وحي وب حي ووب بتاع المهن الطبية. ما تتكلمي عربي، النبي عربي. حرام عليك ياست. مالها! أرجوك!
    الممرض (تتحرك نحو مقعدها بروبوتية) كشاني كاشو.
    بدوي: ودي معناها إيه بلغة الأنس. يا حليللك يا عبد الله الطيب كنت بتشرح لما تتكلم سرياني: تربرابو ترابرا ومعناها بلغة الجن هذا الإنس كذاب.حرام عليك. دا البت غمرانة وإنت بتتكلمي كلام الطير في الباقير دا.
    الممرضة: كشتوم.
    بدوي: وحياتك دخليها في جملة مفيدة. خلينا على موجة واحدة. قوللي بس البت مالها. خسمتك بالنبي العتق الغزال البت مالها. ارجوك.
    (يدخل طبيب وقور بصورة روبوتية)
    الممرضة:كشتم.
    بدوي: دي عرفتها يا بت الإيه إنتي. دي معناها يا دكتور. والله خايله عليهو متكشتم كده. يا دكتور، ارجوك. نحنا كنا بس بنتكلم مع المدير وانفعل هو وهي انفعلت وكانت معانا تمام التمام وبعدين فجاءة عينها بيضت وداخت.
    (الدكتور يتحرك نحو سلمي. يقوم بالكشف اللازم)
    بدوي: يا دكتور طمئني ارجوك.
    الدكتور: كشتامي كموشومو كشرباني كشتلي (ويواصل الدكتور وبدوي مذهول).
    بدوي: الله إيه دا يادكتور؟ وإنت برضو بتهضرب يادكتور.
    الدكتور: (كأنه غير سامع او غير فاهم): كفوش؟
    بدوي: أنتو دي لغة مين؟ كمشاتو كمشتيري. لغة العرب الأفغان؟ دي وقعة دي. حتجيبلونا السي أي أيه. ديل دايخين دوخة بفتشوا في القوامو لادن، وأنا ما بكتر وأنتو ما تقصرو يا جماعة. اللبيب بالإشارة يفهم. وديل ولاد حنته حيفتحو خشم البقرة إذا بقيتو في كشوشو كشيمه بتاعتكم دي (بصوت صارم) أنا بحذركم. قرية شلعوها الشايقية تحذركم للمرة الألف ما تتكلموا كلام القوامو لادن دا.
    الدكتور: (ينحني بأذنه نحو بدوي دلالة عدم الفهم) كفوش كفوش.
    بدوي: الرزق تلاقيط. كشتم دكتور وكفوش معناها ما فاهم وكفوش كفوش تبقى يطرشني عديل.
    الدكتور: كفوش كفوش كفوش.
    بدوي: دا دنق دا. لغة مين دا والله جد. (للجمهور: دكتور كشكش هنا يا جماعة الخير. دكتور كاشان هنا يا قبيلة). يمكن دي دي لغة جالينوس ابو الطب.
    الدكتور (يلتفت نحو الممرضة، ضاحكا): شمكوتي؟
    بدوي: دي عارفها. دي لغة عالمية. قت ليها ايها البلاوي دي.
    الممرضة: (تضحك): كشنتو.
    بدوي: ويعني قت ليهو "بري"، أحيد مني، ما بعرف والله، أئه ياست؟
    الدكتور (للممرضة): كماش. جزاك الله خير.
    بدوي: ودي ليه بالعربي. (يتوتر) أنا عاوز اعرف دا كلو بالعربي الافغاني ودا ليه بالعربي بتاعنا كده. اقصد العربي بتاع العرب يعني. ليه مكشتبوري كشمتنور كشنفيري. ليه. شابكننا كشتموري كشفتغوري وهلمجرا من صباح الرحمن ولما تجو في دي (بتريقة) جزاك الله خير. والله دي لغة اللغف العالمية. أسمع يا كشتم
    الدكتور: (بحدة): باششكشتم. باش كشتم ب ا ش ك ش ت م (بصورة تقريع) كشنبري.
    بدوي: (بغضب) باش كشتم باش فراش إنتو مش حالفين قسم ابو قراط؟
    الدكتور: (عليه سيماء من تعرف على الاسم): كشاري.
    بدوي: والقسم دا مش بيقول إنو من التزام الطبيب على المريض أن يتكلم معه بلغة الأم. طيب أئه اللغة الكشتمية دي من الصباح. التيجاني الماحي كان بتكلم كدا؟ عبد الوهاب زين العابدين كان بيتكلم كده. أنور أدهم كان بيتكلم كده. حكايتكم معانا ايه؟
    الدكتور: كش (ولا يكملها).
    بدوي: تسكت بقى. صه يا اخا العرب عديل كده. اتكلمتو كفاية، كفاية. أدونا فرصة. أنتو زودتوها خالص خالص. أنتو في عالم تاني بالمرة. حتى لغتكم بقت لغة بلاد برة. حرنا في طبكم، والله. الناس العندها القرش واللا الفيو ايدو القلم مضي التصاريح وسافر بغير الناقل الوطني للأردن وانجلترا وفرنسا وسويسرا. انجلترا وفرنسا دي استعمرت جارتنا شاد دي. وأهو ال###### بريد طب خانقو؟ لكن ايه حكاية الأردن وسويسرا والدنمارك والسويد. يكونو استعمرونا ايام اجدادنا القدماء؟ والله استعمرونا لما كنا في كومة ملاريا ونحن مش عارفي؟ حتى الأردن استعمرتنا برضو ايام أجدادنا القدامي؟ وليه ما بيدرسونا دا؟ دا طبكم وطب المرتاحين. خليتو الغلابة يمشو لطب أنتو نفسكم يتسموه طب الخرافات والدجل. مشينا كشات كشات لفقير الدامر في الخمسنات. أنتو عارفين الدامر دي عبارة عن أيه؟ مديرية وسجن وبينهما شارع ظلط. المؤذن فيها سجان، بتجاويش. مشينا كشات كشات للفكي أب نافورة في القضارف، العميان شايل المكسر. والله موية النافورة ما يشربها إلا مغلوب بالمرض ومضطر ومقهور وبدفع ضرائب لدولة الكيان الصهيوني. وفي التسعينات مشينا لراجل المناقل النارو تش وعلاجو غش. إنت عاصرننا نمشي وين المرة الجاية. لراجل أم درمان المحايتو ببسي وحيرانو جكسي. إنتو ايه؟ ما بشر؟ انتو إنس واللا جنس؟ أنتو سرجي مرجي إنتو طبيب والا تمرجي (يتواري)
    (إيقاع زار. جماعة في مرايل المهن الطبية ترقص علي الإيقاع وخيط الزار: محمد البشير الهدندوي):
    كتشتومشو الكتشتمي
    أصوات: يأولاد ما ما . . دستور يا اسيادي . . تعفو وترضو
    طلباتكم‍‍.
    هاكم رسوم صورة الأشعة فوق البنفسجية (أو أي تكاليف طبية)، سجمنا، زلفته. هاكم البياض.
    دكتور: مستوصف يا أسيادي في شارع الدكاترة الجنب الإسبتالية (لحن من اغنية احمد المصطفي).
    (سلمي تصحو من كومتها)
    بدوي: سلامه. سلمي. الحمد الله. حمد الله على الف سلامة.
    سلمي: انا آسفة كنت مفروض تكونوا عارفين في المكتب أنا بتجيني دوخة مرة مرة لما انفعل. وعندي في شنطتي دائماً بخاخة تفويق كده. آسفة يا بدوي أتعبتك.
    بدوي: ودا كلام. سلامة يا سلمي. أنا ما اتصورت ترجعي.
    سلمي: قت خلاص.
    بدوي: أنا ما قربت من زول أبداً زيك. لما شلتك بين أيدي للمستشفي شعرت بمسئولية إنك لازم تقطعي الكبري دا عشان القاكي بهناك. حتكون خيبة لو ما قطعت. لو بقيت واقف منتظر وإنت ما جيتي. لو خليتي التقرير عن مكافحة الفقر يتيم في يدي.
    سلمي: من كتبنا التقرير سوا أنا شعرت دا زي أكتر من تقرير حكومي. من خلال تحضيرنا ليهو وانفعالنا بيهو شعرت دا ميثاق روحي.
    بدوي: والله علي نضر. والله قلت في سري سلمي تقوم يا جدي اب شرا عليا ببعون ورحلة في جبل اولياء بندي القلعة. أنا عمري ما خف قلبي كدا.
    (يلتفت إلى الدكتور): باششكتم: كتشمتيري كموشمتوري كشمايري.
    سلمي: دا لغة شنو دي؟ حصللك ايه في غيبتي دي؟
    بدوي: اسكتي حا أكلمك. حالتنا في البلد دي ما عايزالها تقرير زي الكتبنا. دي عايزالها شكة تقلب عاليها سافلها. كنت لا زمي تفيقي براكي لأنو التَكل علي ناس كشتم ديل تكل على حيطة مايلة. (يلتفت إلي الدكتور والممرضه) كشافيرو كشمنتور الله ما يغز فيكم بركة بجاه النبي.
    المشهد الثالث
    (في كافتيريا. بدوي وسلمى)
    بدوي: أنا صرفت عاطفة كتير قبيك.
    سلمي: (تهون عليه وتعلن عن رضاها) تمام.
    بدوي: والله ما قايل أصرح عن حاجتي لإنسان بالشكل ده.
    سلمى: إنته قته كلام جميل. ما تتصور وقع كلامك على. أقوم من موت مؤقت ألقاك بتشعر فوقي تبوح وتصرح. (تضحك) وكمان عليك نضر.
    بدوي: (يبادلها الضحك ويجري الأداء وكأن خرفان تنطح بعضها البعض) ببعبعون.
    سلمى: بع بع بع بع يا كشتم
    بدوي: بع عون بع عون كمشتاري كمشقوري (مرواحة على هذا النجوى) لكن جد. ما كنت قائل يجي يوم اناجي زولة بعد يوم المدرسة داك.
    سلمي: يوم المدرسة! دا يوم على المحبين عصيب واللا إيه؟
    بدوي: بالضبط. في اليوم داك . .
    سلمي: او في الليلة ديك ما دمنا بنكلم عن حب. حصل شنو؟
    بدوي: قبل اليوم داك كنت لقيت كتاب اسمو "عبارة المشتاق في ورسائل العشاق" وعجبني. يعني أسلوب وسجع سحرني جداً زي ناس "خدودك التي يجرحها مر النسيم" "وما احسه نحوك يثقل الرياح فترجحن وينداح على البطاح فتئن" وطارت لي العبارات في راسي. من بدري أنا مسحور باللغة. بهوش عديل منها. واتمليت عبارات. قت لازم أعزل منو عبارات اكتب جواب عاشق وأنا لا عاشق ولا حاجة. أنا في تانية وسطى بمدرسة بلدة أم العيال الوسطي. حاجة جهلولة كده. لكن لا زم يكون في إسم بعد "حبيب ونور قلبي وواحة ظمئي" والا التطبيق حيكون فالصو. واخترت بت جيرانا ساكت كده. كان اسمها أمل. والله حلوة قمحية وبسامة زي ما بتذكره هسه. لكن ما كانت مقصودة ولا حاجة. خطاب زي التطبيق في حصة العربي. زي ما يدوك قاعدة المفعول لأجله في النحو ويدوك تطبيق لكن على أحلا. بالضبط كده. وكتبت الجواب ونسيتو. ويوم ما أحرى ما أدرى إلا الناظر يجي الطابور ومعاهو مليجي جاري في الكنبة. هو إسمو بركة لكين بنقولو مليجي عشان خاين وإنسان رخيص زي مليجي بتاع السينما. وعرفنا دا حيكون واحد من ايام الهول في المدرسة. إلا الناظر ومليجي. ما اجتمعا إلا في عظائم الأمور ( يتورايان. يبقى صوت بدوي).
    الناظر: (بصرامة) بدوي عبد المجيد دكين.
    صوت بدوي: الليلة ما وقعت ما سميت.
    الناظر: اطلع بره يا عكروت
    صوت بدوي: وطلعت رجليني تتخابط. وأنا اقول يا واطة ابلعيني.
    الناظر (يخرج ورقة)
    صوت بدوي : ورقتي الما تغباني. جوابي لأمل.
    الناظر: أمسك.
    (يظهر طفل صغير هو بدوي المدرسة الوسطى)
    بدوي: (يمد يده اليمين)
    الناظر: بشمالك. اليوم كتابك بشمالك. يا عكروت.
    بدوي: (يستلم الورقة بيد راجفة)
    الناظر: إقرا.
    صوت بدوي: (ولقيت اسم المرسل إليه مشطوب بحبر شيني)
    بدوي: (يقرأ متعثراً) (نص خطاب مستفاد فيه من أحد كتب الرسائل. يأتي لاحقاً)
    الناظر: (للتلاميذ) خسئت تفو من خشمك هذه الزندقة. يا أبنائي زميلكم المسخوط العكروت هذا جاء بأمر منكر. هو لسع ما قام من حفيرتو وبيكتب لإمرأة أجنبية وعلى رؤوس الأشهاد لحبك ضفاف لمسن الشغاف. لمسن الشغاف يا ضلالي . يحدث هذا عندنا وفي ام العيال يا جماعة الله. اعوذ با الله. وفي الجامعة حتعمل شنو يا مفتري بعد دا كلو. حتخلط وتدفعلك حق الببسي؟ حتحصل بالفاحشة دي وين لما يكبر. حتقول لأهلك الارسال مشوش لما تضربلك صاحبتك عشان تختلي بأجنبية يا ضال مضل. حتغني : سهر السمار والخمار في حان الغرام. أو أو كانت ذراعي لرأسك مرقدا. ما حدود سفهك يا بدوي؟ حأوريك واطير وسواسك دى ليوم القيامة يا سفيه. لا يسلم الشرف الرفيع من الأذى حتى يراق على جوانبه الدم.
    صوت بدوي: وشوية كده أسمع ليك مظاهرة داخلة المدرسة
    ( تفرد شاشة تلفزيونية كبيرة لعرض مشاهد الاحتجاجات على حب بدوي التي سترد في هذا المشهد)
    المظاهرة: لا تحفظ بل إعدام. . . لا تحفظ بل إعدام
    بالدم بالروح نفديك يا ثورتنا بالدم بالروح نفديك يا ثورتنا
    صوت بدوي: وتتالت البرقيات. مهم جداً حكاية "تتالى البرقيات المستنكرة" دي علم الخبر عندنا.
    "حباك برص" اتحاد الفنانين (صفقة).
    "يا صايع" اتحاد الغناء الشعبي (صفقة)
    صوت بدوي: إنتو فاتحين للحب عدادات يا اولاد الهرمة.
    "اضربوه بيد من حديد وبعزم شديد" المصلون بجامع شقدم
    صوت بدوي: ناس جامع شقدم ديل بجوا للصلاة واللا للاحتجاج. ما في استنكار ما هم فيهو.
    "نستنكر بلوغ الأخلاق في البلد إلى هذا الدرك السحيق الذي يؤذن بشر مستطير. قوات الشعب المسلحة (صفقة).
    صوت بدوي: أمك قلبوها.
    "نستنكر هذه الحركات الانصرافية التى تشغل قوى شعبنا عن المعركة ضد عدونا المشترك" " الحزب الشيوعي (صفقة. عاش كفاح الحزب الشيوعي عاش كفاح الطبقة العالمة )
    صوت بدوي: يا ########ات
    "وهذا سوس ينخر في ثوابتنا. هذا ابتلاء" المؤتمر الوطني والمؤتمر الشعبي (تكبير)
    بدوي: أمك ائتلفوا. دي تكبير الثانية الممتازة.
    "اللهم طهر قلبه من هذا الرجس وأغسله منه" صلاح إدريس.
    بدوي: كد يا علي أحمد.
    "هذا فساد سيعم إن لم نحتاط له" أمين بناني.
    صوت بدوي: أمين بناني عليك الله تترشح تاني
    "حبتك التلحقك الزينين" تحالف المعجبين بود اليمني. (حس دليب وصفقة)
    صوت بدوي: فنانكم دا فاتح للحب فصل محو أمية " عينيك فيها علم الحب عينيك علمتني احب".
    "كلام بتاع حب دا هو البخرب بلد دا" جوزيف لاقو وقوات انانيا ثري (ياي بلدنا وكلنا إخوان ( بتركيز على "إخوان") (هناك كاريكتر قديم لعزالدين يمكن عرضه على الشاشة)
    صوت بدوي: والله يا لاقو. خسارة حكاية محمود محمد مدني فيك. قال محمود إنو كان بيحب بت إتعرف عليها بالتلفون. دا عصر التلفون الغابر. وقدر ما طلب اللقاء منها تزاوغ منو. والموضوع طال. كلام تلفونات بس. قام قال ليها إنتي شنو يا فلانة كل يوم كلمنت أمبورو مافي جوزيف لاقو.
    صوت بدوي: وأنا خفت. واتزنقته زنقة. وبديت أكورك: "يا ناس. أنا حأطرشق. عايز اقطع الجمار يا بلد. يا اخوان حنعيب في يوم الحب العظيم ده" والله واحد خبري ما في. واتصرفنا علي كل حال. وبعدين جاء خبر شعرة جلد الناس ######ت لبهو:
    "التقى السيدان الجليلان صباح اليوم لمناقشة الخطاب الماجن الذي عثرت عليه سلطات مدرسة خال العيال الوسطى. وسيصدر بيان بما يتمخض عنه الاجتماع. فارتقبوه"
    صوت بدوي: والدنيا قلبت. لا حظ ديل ما اجتمعوا من كونوهم إلا مرة واحدة ولما اجتمعوا قلبولك ازهري خلو خشمو ملح ملح. يا حافظ يا حفيظ. والدنيا قلبت. الجمهور اصابته حمى راعشة من الحماس وملاريا العقائد.
    (علي الشاشة: شباب ختمية بأناشيدهم. يتلوه شباب أنصار بجلالاتهم، شيوعيون: سايرين سايرين في طريق لينين. وشباب الحركة الإسلامية: خال العيال ليست موسكو، مدرسة حرة أو لامدرسة. ولجنة الانتخابات القومية: "الفانوس حرق القطية")
    صوت بدوي: وكوع الجمهور حمي. سخانة جد.
    واشوفلك علي مهدي
    (على الشاشة: الحوقلي)
    واشوفلك جورج حجار
    (إعلان سجائر برنجي)
    واشوفليك
    حواء الطقطاقة
    (سيرة)
    واشوفليك
    كدايس بورتسودان
    (أغنية: بس كلامي انا الماعرفتوه)
    وقرنتية هاشم صديق
    (من القصيدة)
    وحسين خوجلي
    (شعار: الطريفي زول نصيحة)
    وبت قضيم
    (مشهد من مسرحية لها على الشاشة)
    وعمر الجزلى
    والرئيس بوش بذاتو
    ويان برونك
    والزوحي
    وريك مشار
    ومني اركوي
    وعبد الواحد محمد نور
    وآمنة ضرار
    والتيجاني الطيب
    وجكسا
    وتور الجر: (على الشاشة) أنا أحمد ود الأمين تور الجر. إنتو يا إمة محمد ما تتغشوا ساكت. الكحاية دي مي كحاية غي ولا حب. دي احتيان ساكت. انا ماحكيتلكم اليوم داك في جنينة النزهة ، النزهة اياتا، نزهة ناس أولى، أها ولد قدر بدوي دا وبت قدر بتو المسخوطة. قاعدينلهم في كنبه كدي ويتبسسبسو ويسوليها بعيونو كدي، يعيني بيرفرف ليها، وهي تفتح وتغمض وتقبل جاي وجاي. لكين والله والله وماكم طالبني حليفة عينم دي ما غفلت مني. وانا قت ياهو سخط ولاد مدن. لكنهم يعاينو ساكت. وهو يبصص ليها بعين ويعاين لي ساكت بعين. ويرفرف لها. وهي نفس الحكاية. تبصبص بعين وتعاين لي بي عين. أنا محمد ود الأمين ود تور الجر مالى ومال لاواييق البندر. اليبصبصو ويرففوا لي بعض المساخيط، أنا دخلى شنو؟ شرطة نظام عام؟ وكت قمت قامو سوا وراي. في البوابة عصرو علي بلحيل. مالي بيهم. ونامن مشيت المواصلات وركبته بص الحلة الجديدة الهكر داك ما شي ابيت عن ناس كسيسيبة بنت عمي المر ود تور الجر. جيت اهبش الجزلان القاهو ما في. أنا انتشلت ياجماعة الله. وليداً زين كده دفع الأجرة. لكين عرفتهم. نسنسة البنية والوليد في حديقة النزهة ما كنت لخير. قطع شك كانو يختتوا ينشلون أنا دا أحمد ود الأمين ود تور الجر. حب شنو؟ دا كلو تختيت ساكت منهم عشان يقمحوك ويخرطو حقك.
    صوت بدوي: وجانا الترابي
    (مشهد)
    صوت بدوي: صلاح غوش
    صوت: هو بالغين واللا بالقاف. خليك واضح يا جميل. الغين والقاف دي مرقتنا من العروبة بقد القفة. غين واللا قاف. (كأنه مدرس) إذا غين هو يغنغن الغين غنغنة أو البي القاف فهو يقلقل القاف قلقلة . (كأنه يستجوب صلاح) جاوب؟ بيسألونا الناس. غوش واللا قوش؟ إنته بتكتبها للإمريكان كيف عشان هم المرجع طبعاً!
    غوش واللا قوش واللا بوش
    (مشهد)
    صوت بدوي: ودكتور غندور رئيس اتحاد العمال
    (مشهد. أصوات القديم والا الجديد).
    صوت بدوي: ومن ديك وهاصت بقي
    (إيقاع وأغنية زار)
    صوت بدوي: وجانا علي الحاج
    الطيب مصطفي، صفا إنتباه، إلى الانفصال دور
    (مشهد شارع في خلاء سوداني)
    على الحاج يخطب: يا أهل خال العيال الأحرار خلوها مستورة.
    صوت بدوي: راجل صالح لكين عشوائي فاخر بشكل. والله ودا كان أعقل صوت في الهرج دا.
    (هذا المشهد يحتمل تعاقدات مختلفة مع أفراد وجماعات لها ميسم تعبيري وأدائي معروف وترغب في أن تكون جزءاً من المسرحية لليلة أو اكثر. مثلاً اشتهر د. عبد اللطيف البوني بعبارة وحاجت تاني حامياني. يمكن استقدامه للمسرحية بعبارته التي هي عنوانه)
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de