|
|
 هوي يا فاطمة الصادق .. اطلعي من نافوخ الشعب السوداني لانه ما ناقصك ....
|
من صفحة الروائية الأديبة الأريبة سناء جعفر في الفيس بوك ...
هوي يا فاطمة الصادق .. اطلعي من نافوخ الشعب السوداني لانه ما ناقصك ....
December 24, 2013 at 11:10am
انتو يا جماعة الخير مهنة الصحافة دي مالا بقت ملطشة لليسوى والما يسوى ؟! .. والقيد الصحفي دة مالو بقى هامل كدة واي زول ممكن ياخده ويجي بالفم المليان يقول انا صحفي ويجري على اقرب جريدة تقبله وهاك يا كتابة ( عواميد ) ؟! .. وهي الكتابة الصحفية زاتا مالا بقى حالا مايل وبتقبل أي شئ بدون الاهتمام بالكم والنوعية ؟! .. والله يا جماعة وما طالبني حليفة انا لمن بديت اكتب في جريدة الاحداث كنت شايفة انه الموضوع دة كبير خلاص .. كنت خايفة وبرجف زي القصبة قبل مواعيد نشر اول مقال .. كنت حاسة انه الكتابة في جريدة يومية دي مسئولية كبيرة ولازم اكون حريصة جداً على الكيف قبل الكم .. كنت براجع المقال مليون مرة قبل ما ينزل وبعد ما أراجعه برسله لناس تانيين يراجعوا وراي عشان اقلل احتمال الاخطاء حفاظاً على عيون ومشاعر وحواس الناس الحتقرا لي .. كنت متيقنة انه قراية الناس لكتابتي تكريم منهم وشرف مفروض اكون حريصة عليهو وعليهم .. ولمن حسيت اني فقدت الرغبة في الكتابة واني لو واصلت ممكن ابدأ اخرمج .. انسحبت بهدوء احتراماً لتاريخي القصير جداً ولقرائي الاتعودوا مني مستوى معين في الكتابة ..
لكن الظاهر موازين الصحافة والكتابة الصحفية زاتا في الفترة الاخيرة بقت معولقة ومخوذقة زي أي حاجة في البلد .. بقت صحافة الاثارة والكلام الفارغ هي الغالبة .. وبقت الصحافة المحترمة زي العملة النادرة وسط العملات الرخيصة .. والا اقنعوني كيف فاطمة الصادق دي بقت صحفية ؟! شنو المعيار البخلي انسانة ما عندها شغلة غير الاساءة للشعب السوداني تبقى صحفية ذات صيت وعندها عمود راتب ؟! .. شنو تاريخا ؟! .. شنو انجازاتا ؟! شنو مؤهلاتا ؟! .. كل البعرفو عنها انها كانت بتقدم برامج رياضية .. فجأة انتقلت من التقديم للكتابة في الامور الرياضية مع تحفظات كتيرة على اسلوبا وطريقة كتابتا والادوار المشبوهة القامت بيها ابان بعض الصراعات الكروية الشهيرة ( وذاكرة الاسافير متخمة بكل هذه الكتابات ) .. وفجاة كدة بقت صحفية لامعة .. خلت الكتابة في الكورة والرياضة وبقت بتتكلم في الشئون السودانية وبتفتي في الليها والما ليها .. وبتشتم وبتسئ بدون أي محاسبة ولا عقاب !!
ايامات الثورة اساءت لشباب زي الورد طلعوا شايلين ارواحهم في ايديهم ومعاها رغبة في تغيير بحلموا بيه لوطن اجمل وانضف .. وقامت بدور بوق السلطان ال######ان بكل جدارة .. شتمت شباب الثورة ووصفتهم بانهم بتاعين مخدرات وخلافه .. الدنيا قامت وقعدت على مافيش .. مافي زول اشتكى عليها ولا فتح فيها بلاغ اشانة سمعة ولا زول طالب بانها تتحاسب على استفراغا في وشنا .. ومشت الامور بالطريقة السودانية المعتادة .. اها السكوت اللامبالي دة خلى البت مدعية الصحافة تتمادى في غيها واساءتا .. وطلعت لينا بفرية افدح من الفاتت وصرحت في عمودا القبيح ( خط تماس ) وبكل بجاحة انه في كل بيت سوداني مدمن و(سكران) و(صايع) و(زاني) !!!! .. عاد لكن يا بت الناس ما بالغتي ؟! في ( كل ) بيت ؟! يختي انتي ما علموك انه التعميم شئ مخل ولا يجوز استعماله الا في حالة التأكد التام من المعلومة بدون ادنى شك ؟! هسة انتي يا فاطمة عارفة السودان دة فيهو كم بيت تحديداً ؟! .. طيب خليك من السودان الما بقى مليون ميل بفضل اولياء نعمتك البدفعوا ليك عشان تبقي قلمهم وصوتهم وبوق الباطل البردد تفاهاتهم .. انتي عارفة حلتك فيها كم بيت ؟! دخلتي بيوت حلتك دي كوووولها بيت بيت ؟! متاكدة يقيناً انه كووول بيوت حلتك دي فيها مدمن وسكران وصايع وزاني ؟! وحتى بنات السودان ما نجوا من لسانك الزفر وقلتي عنهن ( وامتدت حتى للبنات والتي كنا نرى في نفخ السجائر عيباً كبيراً عليهن؛ لنراهن يتمطوحون سكراً ويجيدن سحب المخدرات بأنواعها وينافسن الشباب ) طيب بيتكم كيف ؟! حسبتيهو من ضمن البيوت المعممة دي ولا هو استثناء ؟! يا غبيانة يا سجمانة انتي ما عارفة انه بكلامك دي بتسيئي لنفسك ولاخواتك ولابوك ولاخوانك ولاولاد عمك واولاد خالتك ورجال اخواتك وكل انثى وكل ذكر في اسرتك ؟! ولا يمكن انتو ما من السودان ؟!
غايتو انا من عادتي ما بتكلم بالشي الما بعرفوا .. عشان كدة حاقول ليك الشئ البعرفو .. دخلت بيوت كتيرة شديد قي السودان .. في الخرطوم وامدرمان وبحري .. في مدني وكسلا وبورسودان والقضارف وشندي ( ودي المدن الزرتها بس الباقية ما زرتها عشان كدة ما بقدر اتكلم عنها ) البيوت دي ما كان فيها ولا زول واحد مدمن ولا سكران ولا صايع ولا زاني .. يمكن فيها ناس عاطلين لكن ما بخاطرهم .. غصباً عنهم لأنه اولياء نعمتك احالوهم للصالح العام او دمروا شغلهم الخاص مع سبق الاصرار والترصد .. يبقى يا بوق السلطان الفاسد ارعي بقيدك .. اتلمي ولمي قلمك ال######ان عليك واطلعي من نافوخنا .. احنا ما ناقصينك .. وبما انك كترتيها ومسختيها معانا .. انا شايفة انه الشعب السوداني (كله) وبلا استثناء مفروض يرفع عليك قضية اشانة سمعة وطلب رد شرف ..
قال صحفية قال .. والله الصحافة في السودان بقت مهزلة عديل ..
احي يا مرارتي .. النبي ما تنفقعي لسة محتاجة ليك شوية ..
الكلمة المشطوبة هي "الوس خ ان" ..
|
|
  
|
|
|
|
|
|
|
 Re: هوي يا فاطمة الصادق .. اطلعي من نافوخ الشعب السوداني لانه ما ناقصك .... (Re: عبد الله كسلا)
|
| Quote: كل البعرفو عنها انها كانت بتقدم برامج رياضية .. فجأة انتقلت من التقديم للكتابة في الامور الرياضية |
فاطمة الصادق يا سناء بدت صخفية تحقيقات وانا غادرتا السودان سنة 2000 كنتا في صحيفة القوات المسلحة بحرر صفحة ثقافية
مع عوض الكريم محمد المهدي المجذوب -
و فاطمة دي كانتعاملة (دويتو) صحفي مع الطاهر ساتي كانو في الوان الوقت داك , وانا كنتا بمشي كتير لانو اصدقائي هناك
(ودالشريف -شبونة - كمال علي -محمد عثمان يوسف حبة- عماد البليك - ايهاب اسماعيل )
اما علاقتا بالرياضة والشاش دي ما عرفتها ...
تحياتي ياعبدالله ..
ومشتاقين ياسناء والله ...يابت ياجدعة
| |
|
|
|
|
|
|
| |
عبد الله كسلا
كمال علي الزين
الزنجي
فيس بوك
تويتر
انستقرام
يوتيوب
بنتيريست