|
|
 هترشات على حافة الهاوية
|
في يوم من الأيام صحى الشعب من نومو ما لقى كومو ..... لقى ليه مرة ماكنة بالحيل، متفنة في الواطة منبطحة جنبو.. قال بسم الله الرحمن الرحيم ... اللهم أجعلو خير ... ياربي ده حلم ولا علم...
قام سعلها هوي إتي منو آختي ... قالت ليه سجمي ... يا الشعب بقيت كمان ما بتشوف ، عامل كريعاتك الرقاق ديل ووشك التقول وش غنماية ... أنا ما الحيكومة
الشعب: الحيكومة ... آها إتي يا سجم الرماد قاعدة لليلة..
الحيكومة: آي قاعدة .. والبفوتني شنو يابوي .. هو الزمن ده في رجال بتفوت...
الشعب : قاعدة من متين أتي هنا...
الحيكومة: والله التقول لي يوم أو يومين...
الشعب : كضباً كاضب ... بل لبستي خمساً وعشرين عاماً ... أنظري إلى آثار النعمة عليك ... أنظري إلى هذه الجضوم المورمة ، والكرش الباينة
الحيكوم: أت بلا فلسفتك دي شي موديك لورا مافي ...
الشعب: قصدك شنو يا الحيكومة
الحيكومة: قصدي أصبر علينا شوية عندنا ليك أخبار جديدة حاتفرحك
الشعب : أها عندك لينا شنو
الحيكومة: أول شى شلنا ليك الناس الكانو معذبنك ديل ..
الشعب: الناس ياتن.
الحيكومة: الناس الكانت بتلهط دي
الشعب: تقصدي ناس هي لله هي لله
الحيكومة: عليك نور
الشعب: طيب إتي فرقك منهم شنو.. ماهم كانو ناس نضاف زي الجلابية دي وبنومو ساعة واحدة بس في اليوم
الحيكومة : ياخ كنا مغشوشين فيهن ... نحن كنا غلطانين ، معليش سامحونا أمسحوها لينا في جضومنا ديل ... نحن دايرين نبدأ معاكم من قولة تيت ...
الشعب: شنو... من قولة تيت ... تيت ... تاني كان كدي قطرنا صفر
الحيكومة : قطركم دابو دور يابوي.. والله تشبعو في الدنيا دي شبع اليابان ما يلحقكم ... بس أتو لوكو الصبر ده أتو ذاتكن شفقانين بعدين سكتو لينا المعارضة دي... هي دايرة منكم شنو؟
الشعب: قالت دايرة الحرية والعدالة والنزاهة ... تراها بتقول نضمي كتير ونحن ذاتنا ماعارفين كلاما ده صح ولا كضب .. لكين أتو وصلوا الكضاب لحدي الباب
الحيكومة: أولاً بالتبادي الحرية دي أكتر من الواحد نخلي يتنفس هوا الله البارد ده وقاعد في بطن بيتو يحمد سيدو ويقلب في القنوات الفضائية دي يمين وشمال بدون زول يسعلو تاني في شنو... أها هي كان دايرة تشلينا وتقعد محلنا دة تشد حيلها وتكرب صلبها الإنتخابات على الأبواب نحن غير كدة ما عندنا ليها حل تب.
الشعب: شنو إنتخابات ... يعني خج تاني ... ياخ عليك الله فكونا من الموضوع
الحيكومة: ياخ نحن بنديكم ضمانات من عندينا .. المرة دي ما فيها خرخرة تب..
الشعب: لا حول والا قوة إلا بالله ... يا جماعة دي مصيبة شنو دي!!!
مخارجة:
الحيكومة: مكنكشة وراكبة راسا
المعارض: حردانة وتنش في الضبان
الناس البرة: متفرجين ومحرشين
الشعب: الضحك شارطو..
|
|
 
|
|
|
|
فيس بوك
تويتر
انستقرام
يوتيوب
بنتيريست