كتب الكاتب الفاتح جبرا المتوفرة بمعرض الدوحة
|
|
 الهايس واقفة برة..لازماني بكيات كتيرة..ومواجبات..الماشي منو؟؟!!..
|
النصيييحة انا جنس الحوامة دي براي كده ما بقدر عليها ..
والجري والمساككة فترت منهن..
إلا كمان في ناس لازمني وما بقدر ما أمشي..
فدحين يا ناس سودانيز انا مشيت جبت لي هايس من الظلط وعايز أمشي أواجب وأعزي في الناس ديل فالماشي معاي يجيب الشيرينق بتاعو ولمن نصل جمب بيوتهم بنضرب ليهو البوري يطلع لينا سريع عشان اللفة طويييلة والمشاوير بعيدة ..
أووولاً كده بالتبادي نمشي نعزي في أحمد فؤاد نجم في مصر ..والراجل النصيييحة ما قصّر معانا وطوااالي في مناسباتنا ..والمصريين عموووماً كده في البكيات حقتنا دي ما بيلعبوا ..أووول ما يسمعو بالخبر بيجو جارين..بتذكر لمن مات الشاعر حمّيد رحمة الله تغشاه المصريين ديل كسرو علينا كسرة صاح ..ياخ في ناس فرشوهو في رابعة العدوية وناس في ميدان التحرير..وحتى في صفحة ليلى علوي في الفيس بوك لقيتا خاتا صورة حميد وكاتبا تعليق تحتا (نحن نصاحاً زي واطـــاتنا ااا حمّيد ..إت كيفنك أبوي انا..)
ما حنقعد كتير يا جماعة وما تقعدوا تشبكوني جابو الكشري خلينا نفطر ونطلع ..سيد الهايس ده قال مستعجل والساعة 2 عندو ترحيل بتاع طالبات وقال ما عايز يتأخر..
بعد داك نمشي لي نانسي عجرم قالوا ولدت .. والله ووالله يا نانسي ما كان عندي خبر وعرفت قريييب ده وبالصدفة ..اخر مرة كنت بتكلم معاك قلتي لي دافقتي في الشهر الرابع ..أها قبل كم يوم جات سيرتك وانا بحضر في حلقة بتاعت بنات حوا ..سألت مرت جيرانا قلت ليها إنتي يا اختي تعااالي هنا بي مناسبة إنصاف مدني دي ويييين نانسي عجرم الأيامات دي ما ظاهرة ؟؟ ..
أها ياهو قالت لي نانسي دي ولدت وأتحلت بالسلامة ..بس يا نانسي أوووعا تقولي لي " ربعنتي " ؟؟
نانسي زولة واجب وفي بكا حوا الطقطاقة ده خدمت بي إيدينا وكرعينا ..وبراكم عارفين نانسي غسيل الهدوم والعدة ده حقها ..اليوم كلو قاعدة في الطشت تغسل ..لكن يا نانسي أعفي لينا والله كنا ناوين في أربعينك ده نعمل ليك حفلة بي هاجر كباشي وندى القلعة ..لكن ندى قالت أحمد فؤاد نجم ده واااجعا شديييد وما بتقدر تغني ..
أها يا جماعة منننن أسة النحدسكم صاح نحن ماشين بيروت وأيييو شي لكن انا حالف يمين ما بمشي أعزي في أبو نجوى كرم !! ما تقولوا لي الدرب جابنا والبيت قريب و و و ..
انا زول ما عزاني في محمود عبد العزيز ما لازمني ..ونجوى دي تحديييداً سمممعت بي البكا وفاااات أضانا ..مالا ما بتجي يعني؟؟؟ محمود هيين ولّا هيين؟؟ صاح اللبنانين بكوهو بالدموع وفي تويتر شوفت لي كم تغريدة لي كم لبناني بيعزي في محمود وحتى لقيت لي لبنانية كاتبة بوست في لبنانيز أون لاين إسمو " ما بطيق لي غيرو أسمع ".. وجوة بتتكلم عن محمود وعن صوته وعن معاناته مع المرض في الفترة الأخيرة..
المهم انا نجوى ما بعزيها في أبوها انتو كان دايرين تمشو غايتو بي طريقتكم انا بقعد ليكم في الهايس دي امشو وتعالو ..لكن النبي فيكم ما تطولوا لأنو الراجينا ما راجي زول والمشوار بعد داك طويييل لأنو لاااازم نمشي جنوب أفريقيا نلحق الدافنة بتاعت مانديلا ...
مانديلا وجعني شديييد ..وووب من موت مانديلا وووب ..ووووب..صحي الموت نقّاي ..أححححيَ من موت مانديلا ..مرتو الفقرية دي صاح ما بتستاهل يمشو ليها لكن والله هو كان زول طيّب..إنتو تعااالوا هنا هو مش مطلّقا ؟؟؟ يا ربي بتجي البكا ؟؟ غايتو تلقاها أسة مبسوووطة عشان ما ح تتحبس أصلها من زمااان شايفة روحا ومتشببة ..
بعدين ناس جنوب افريقيا ديل برضو في الرؤساء حقننا كانوا قاعدين يجو ..ما يسمعوا ليهم بي طيارة وقعت إلا وجو بي الأعمدة حقتكم وبي غداهم وشوالات السكر وعزّونا ..مننن ايام نميري الله يرحمو و الزبير محمد صالح واااخر مرة في جون قرنق ده جو عصروا الفراش تلاااتة يوم وواجبونا ..
أها في جنوب افريقيا بنقعد شوية ناخد نفسنا ونرتاح حبة ومن هناك بي الأطلنطي ده نشاقق كده عشان مفروض نمشي نبكي في الممثل الأمريكي بول ووكر ..قالوا مات في حادث حركة في طريق شريان كاليفورنيا ..يااا حليلو صغيير وجاهل وموتو وجعني شديييد ..سبحان الله بتشبه موتت الفنان المرحوم إن شاء الله نادر خضر ..وانا بتذكككر الأمريكان ديل لمن سمعوا بي موتت نادر الشباب الأمريكي خشّ في صدمة عجييبة خلاس ..مافي بتاع ليموزين ما علّق صورة نادر في اللموزين حقّو ..وأييي واحد فيهم كتب في اللموزين حقو بي ورا :"حبيبو"..
ياخ أي محل مرطبات في لاس فيغاس كان مشّغل أغنية " الساعة خممممسة ..يا حبيبو ما تنسى..في شارع خمسة مواعيدنا ..والليلة مسااافر انا انا ما جبر الخاااطر خاطري انا ..."
دقيقة دقيقة لكن خلونا نتفق على حاجة قبببل ما نخش أمريكا دي ..انا كاتب تعهد إنو نرجع كلّنا زي ما طلعنا كلّنا ..أها أوووعكم لمن نصل هناك تعملوا لي حركاتكم بتاعت تشرطوا الأوراق ولا كمان واحد فيكم يفضحنا ويجيب لينا الكلام بي النضم حق الما بعرفو ليكم شنو داك بتاع الحرية الشخصية بتاعت البيعملوا شنو ديلك ...هووووي أحححسسسن ليييكم
تخريمة :
رحمة الله عليكم جميعاً مبدعو بلادي ..ليتهم يعلمون عنكم كما نعلم عنهم..وليتهم يحتفون بموتكم كما نحتفي بمواتهم..وليتهم يبكونكم كما نبكيهم ..
ويظل حنكنا البش أننا شعب مثقف دون أن نفكر بإحساس الدونية ..
|
|
  
|
|
|
|
|
|
|
|
Re: الهايس واقفة برة..لازماني بكيات كتيرة..ومواجبات..الماشي منو؟؟!!.. (Re: ismeil abbas)
|
ود الفاروق ما تفوتني انا جاي عليك بس بكوي في البنطلون ,,, ما تلومنا مع الناس ديل ساي اصبر ما تستعجل خلينا النجي ,,,
انا غايتو نجوي دي ما بقدر افوتها ساي لكن زول امريكا داك ما عندي فوقو شغلة امشو برااكم ,,, وناس جنوب افريقا ديل بذكر لامن اخونا الفنان عادل مسلم مشي هناك وسجل علي كيفك تفوت وعلي كيفك تعااااال لاقوه جماعة في رحلة وسالوه مني وقالو ليهو سلم عليهو شديد ,, اها عاد ديل انا ما بقدر اتلوم معاهم لازم اعصر فراش مانديلا ده .. لكن الله يرحمو احمد فؤاد نجم ما واجبني في بكيات كتيييييييييرة وانا اصلا مصر دي مكجنة خير شر وما لازمني اصلا .. ياخ كدي خليني اصلك وبعدين نتفاهم ,,, يلا انا جاي عليك ابقى مارق..
غايتو يا عمر الله يجازي محنك عيشتنا في الدور زاتو ،، هههههههههههههههه
تحياتي : ياسر العيلفون
| |
|
|
|
|
|
|
|
|
|
Re: الهايس واقفة برة..لازماني بكيات كتيرة..ومواجبات..الماشي منو؟؟!!.. (Re: عمر الفاروق)
|
ياسر يا عليفون..
ياخ يكفي إنك ما قصرت ومثلتنا خير تمثيل في بكا طلال مدّاح الله يرحمه..وقبل فترة لاقوني أحفاد المرحوم وحكو لي عن مواقفك النبيلة معاهم بعد ما سكيت ليهم قطعة الأرض الفي خان شليلة وطلعتها ليهم ..
بالنسبة لي نجوى كرم فالنصييييحة هي صوتا جبلي وأييي شي لكن الزولة دي طالعة لينا في الجبل فوق ومشخخختا لينا ..
أحكي لي دي ...لما مات خوجلي عثمان الله يرحمه نجوى دي كانت شغالة حفلة في مهرجان جرش وبتذكر كوييييس مجزوب أونسة إتصل عليها وكلللمها عديييل كده ..لكن للأسف نجوى واصلت الحفلة عاااادي وما كلفت نفسها حتى تضرب لي أسرة المرحوم تعزيهم ..مع إنو نحن في شكلة فيروز مع الرحبانية خليك من بكا وموت شكلة بس وقفنا معاهم وكتبنا في جرايدنا دي لمممن فترنا ..
بعدين ياخ نجوى دي ما قاعدة تصل لحددددي مصر دي مااالا ما بتختف رجلا تجينا ؟؟؟ كلها ساعة زمن وبتصل..
| |
|
|
|
|
|
|
|
|
|
Re: الهايس واقفة برة..لازماني بكيات كتيرة..ومواجبات..الماشي منو؟؟!!.. (Re: ياسر السر)
|
عاطف يا ود عبد الله ..يا ود النيل النيييل وأحب النيييل يا جمييل :)
عارف أخطر حاجة في القصة دي كلها شنو؟؟
عندنا جستفيكيشن كده غاشين بيهو روحنا كل ما جات سيرة الموضوع ده والمقارنات دي ..
يقولوا ليك ما مهم يعرفونا هم فهم شعوب جاهلة ..لكن نحن نعرفهم لأننا شعب مثقف يحب المعرفة ..!!!
ياخي تتتخ ؟؟؟
لا صدقتكم ..
ثم يقولوا ليك في الخطوة البعدها نحن ما بنعرف نقدم روحنا ولا بنقدر نسوّق ليها !!!
مثالك القلتو عن وردي ده مثال ممتاز جداً للقصة دي ..
وردي الما قعد في اثيوبيا لمن مشاها الاستاد إتملا فهل نقول والله الشعب الاثيوبي مثقف عشان كده بيعرف وردي؟؟
وردي اثيوبيا هو نفسه وردي القاهرة ..والبيخلي الاثيوبيين يرعفوهو هو نفس المفروض يخلي المصريين يعرفوهو ..وعدد المصريين في الفترة الفاتت كان عدد ما بسيط من اللي دخلوا واستقروا تفتكر كم واحد منهم عرف يعني شنو ود اللمين ودخل نادي الضباط عشان يسمعو؟؟
ياخ نحن بنعرف فنان إسمو الشاب خالد ومماي وديددي واا ديددي وعايشة و و و و
أسة عليك الله عايشة دي ما مريم الأخرى ؟ :) :)
الشعب السوداني شعب يستمتع بالدونية ويغلفها بي الثقافة العالية والمعرفة ..بيحب يطارد حاجات الناس ويهتم بيها لا للشئ يا للشوفنية يا الدونية ..
| |
|
|
|
|
|
|
|
|
|
Re: الهايس واقفة برة..لازماني بكيات كتيرة..ومواجبات..الماشي منو؟؟!!.. (Re: عمر الفاروق)
|
| Quote: الشعب السوداني شعب يستمتع بالدونية ويغلفها بي الثقافة العالية والمعرفة ..بيحب يطارد حاجات الناس ويهتم بيها لا للشئ يا للشوفنية يا الدونية .. |
لا لا يا عمر الفاروق - ما بتفق معاك نهائي، المسألة ما ليها علاقة بدونية وفوقية!!
المسألة ببساطة ممكن نشبها بنظرية حركة الرياح: لما يكون في فرق ضغط بين منطقتين تحدث خلخلة للهواء وينتقل من مكان الضغط المرتفع لمكان الضغط المنخفض !
و(الضغط) هو الحضور السياسي والاقتصادي والثقافي للدول.
وكذلك نظرية (كلام القصير ما بتسمع) واحنا قصار ... قصار شديد سياسيا واقتصاديا وثقافياً قصاد دول زي مصر (مثلاً)
يا اخي في السودان دا ذاتو - رغم جمال غناء الفلاتة والنوبة الا انو ما عندو حضور اعلامي ... ليه؟
لأنو الثقافة المهيمنة (عربية) ونظرية الضغط - وهل لو احتفى او حزن الفلاتة بمحمد وردي دي تعتبر دونية منهم؟!!
وحرم بوب مارلي لمن مات عملو ليهو فراش في الخرطوم
| |
|
|
|
|
|
|
|
|
|
Re: الهايس واقفة برة..لازماني بكيات كتيرة..ومواجبات..الماشي منو؟؟!!.. (Re: محمد حيدر المشرف)
|
| Quote: الشعب السوداني شعب يستمتع بالدونية ويغلفها بي الثقافة العالية والمعرفة ..بيحب يطارد حاجات الناس ويهتم بيها لا للشئ يا للشوفنية يا الدونية .. |
شفت يا وضاح كلامك مشى وجاء وطلع صاح
عمر يا حبيب.....نحن علقنا إشارة سوداء لما مات بوب مارلى.....لما مات وردى هل فى زول إتذكرنا...الله يرحمه..ولا زيدان..كلامك صح... نعرف مريم ماكمبا وهيفاء وهبى ونانسى عجرم ونتابعهم حتى علاقاتهم الشخصية وأدق تفاصيلهم ألأجتماعية..وعندنا الله يرحمهن عائشة الفلاتية ومنى الخير و.و.و.
يا أخى خلينا نشوف شغلنا......تحياتى.
| |
|
|
|
|
|
|
|
|
|
Re: الهايس واقفة برة..لازماني بكيات كتيرة..ومواجبات..الماشي منو؟؟!!.. (Re: ismeil abbas)
|
زي ما قال محمد البشرى
Quote: أي سوداني من طرف بتابع الدوري الإنجليزي و الأسباني و الإيطالي
يوووووم واحد شفت ليك خواجة عارف حاجة عن دورينا غير ناس غارزيتو و كروجر |
ولا نحن كسودانيين عارفين اسماء مغنيين من تركمانستان ولا اسماء لعيبة في اوزبكستـان!
يازول الخواجات ديل نجوم ولا على كيفنــا
_______________________
لو قعدت ساعة بدل دقيقتين ونص ما كان قريناكـ
| |
|
|
|
|
|
|
|
|
|
Re: الهايس واقفة برة..لازماني بكيات كتيرة..ومواجبات..الماشي منو؟؟!!.. (Re: عمر الفاروق)
|
سلام ياعمر
رغم ان الموضوع يغلب عليه الطابع الكوميدي .
ومع احترامى لك ولكننا شعب فارغ بنضيع زمنامع ناس الهيلاهوب وجمال حسن ببضاعتهم التى لاتسمن ولاتغنى من جوع وما تفسر كلامي داء بإننى متحجر وضد الترويح والمتعة ولكن مضمون اعمال هؤلاء لاترقى لشعبنا ولاتعبر عن معاناته الفعلية . Quote: تخريمة :
رحمة الله عليكم جميعاً مبدعو بلادي ..ليتهم يعلمون عنكم كما نعلم عنهم..وليتهم يحتفون بموتكم كما نحتفي بمواتهم..وليتهم يبكونكم كما نبكيهم ..
ويظل حنكنا البش أننا شعب مثقف دون أن نفكر بإحساس الدونية .. |
اتفق معك في التخريمة .
واعتقد ان دقيقتين لاتكفى لتأليف هذا الشتات حتى ولو كنت حافظ الموضوع .
تقديري واحترامي لك
| |
|
|
|
|
|
|
| |
عمر الفاروق
حمد عبد الغفار عمر
أيمن محمود
ismeil abbas
ياسر السر
وضاح عبدالرحمن جابر
محمد حيدر المشرف
عاطف عمر
Mohamed E. Seliaman
aydaroos
محمد يوسف الزين
طلحة عبدالله
محمد البشرى الخضر
الصادق عبدالله الحسن
فتح العليم محمد أبوالقاسم
فيس بوك
تويتر
انستقرام
يوتيوب
بنتيريست