كتب الكاتب الفاتح جبرا المتوفرة بمعرض الدوحة
|
نحن ناس الضللة نشكو الألم والوحدة وشوق الوطن كتال !
|
اه لو تعلمون ما نعيشه من احزان وما يعترينا من وجد لتراب الوطن !
ورغم ان الضللة باردة ومهولة والزهور متفتحة والتفاح رخيص والبامية راقدة لكن نحنا ما شايفين دا كلو !
بس شايفين خريطة السودان البقت مشرتمة , مرة تشبه لي الخروف , ومرة تشبه الجدادة الممعوطة , ومرات أشوفها زي الحيطة الداقاها المطرة ! وتتجدد الاحزان والأسى ! والواحد لما يتذكر ان السودان بقى ما فيه ناس ميرى وجون بتجيه غمة ! ولما يتذكر انه حتى لو رجع ما حيلاقي أمو وابوهو وأخوانو ( الله يرحمهم جميعا) بتصيبو غصة أبدية ! ولما يتذكر ان كتير من صديقاتو واصدقائه فزوا من البلد بتمسكو رجفة , دا غير الماتوا منهم والاختفوا ! والواحد مننا بقى يحلم بشوارع الخرطوم وهو صاحي , والله مرات بكون راكبة الباص وأغمض عيوني وأقول كدي النتخيلو ماشى أمدرمان أو ماشي كسلا وأقعد أحلم لحدي ما محطتي تفوت واتم الباقي كداري! ولما أعمل أكل كنت اكلته مع أحبائي في السودان , والله العبرة تخنقني وما أقدر أضوقو واقعد جيعانة , واقول حسبي الله في البشير والكيزان ! ولو سمعت خبر عن السودان حتى لو كان عن الكيزان برضو بجي جارية ومندرشة عشان أسمعو ! كيف تكون الضللة سمحة والزول ماشي في الشارع الله ورقبتو ! الشوارع فاضية حتى الغبش بقوا ماب يحوموا في الشوارع , المدينة ميتة من الساعة 5 مساء ! ضللة شنو ؟ والله أخير منها جهنم على الأقل مليانة ناس ! انتو ما عارفين شئ ساكت ! أسعد ناس القاعدين في السودان وسط أهلهم وناسهم , نحنا بندفع في ضريبة صعبة دون ذنب ! وهسع انا دموعي غلبتني وبتم ليكم بعدين . ست البنات.
(عدل بواسطة ست البنات on 11-17-2013, 05:03 PM)
|
|
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: Hatim Alhwary)
|
(يا حليل حنين الامهات مشتاقة لولد رحل ...لمتين يعود يملأ الفريق بالفرحة زي برد نزل...يمسح دموع سالت كتير...يعدل العوج الحصل). وطعم الفراق في حلقي مر !
شكرا أخي حاتم,
قشقشت دميعاتي أصلو لا وجيع لا زول بفهم الحاصل , وقلت النرجع أواصل الوجد الدفر مارق !
لقيت حاتم خاتي لي شيتا يهمر السيل دموع !
تاني صديت بكيت واستغفرت .
ست البنات.
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: ست البنات)
|
Quote: إشـتـهـيـت أهـلـي ...
إشتهيت ساعة العِصيّر شبورة نزلت فوق فِريعات السُنُط ريحة الدُعاش ممزوجة بي ريحة البرم وريحة المُرآح حبوبة تحلِب في الغنم ندهت جميع أهل الصلآح مطراً يخدّر أرضنا مطراً يحيّن ضرعنا القِبلي يشلع في السحاب ودُكناً بُعاد صِبحن قُرآب والوادي خدّر زي تقول ما كان يبآب نُوارو فتّق في الغصون لمّ الفراش الزِيّفة والمطر الدُعاش طراها زول من اهلو غاب رفعت إيديها اضرّعت للمولى يرجع للصِحاب نزلت دُموعا علي الخدود سآلت مع مجرى الشلوخ يا ربي تِنحلّ الصِعاب ويعودو للبلد البُعاد إشتهيت، شهقة صباحات الفريق وضو الشمس ينسج وِشاحات يوم جديد وناعس الخدآر الفوقو نام قطر الندى صحاهو نسام البحر الهابي من تلآ الصعيد مرقن تخايات في السما نُصّت نهار كايسات يضارن للشمِش يوماً مولّع نار وحآر لكنو كان يوماً سعيّد والدِنيا عيد عيدية واطفالاً سُغار الفرحة في عيونهم تلُوّح وناساً كُبآر الهيبة فوقهم والوقار إشتهيت قيفة البحر مويتو المنقِعة سلسبيل وبحرنا في واديهو نِيّل جُرُوفنا والليل الطويل والقمرا بينات النخيل القعدة فوق صافي الرمال السمحة والزمن الجميل كلآم دُقاق وعبير جروف خدر العِشِق وندى الحروف والدنيا ليل كل الوجود رآخي السمع حتي الخدآر بفوقنا مال يِصنّت النضم الدُقاق لمتين اعود للسمحة ما طال الفُرآق؟ طال الفُرآق والغربة ما بتصير وطن طال الفُرآق وشوق السنين في الجوف سكن ومهما السِنين إتراكمن وقِسى الزمن الغربة ما ممكن تكون لزول وطن والغربة ما ممكن تكون لزول سكن . . . ود المدير... |
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: معاوية المدير)
|
انا وآآآ مغستي رحل تلوت الليل شقاوتي رحل تلوت الليل مسالكي ضلمه ما بتنشق سكت روح نويرة الفرقـة جـــوة الجـــوف تســـوي الـــبق مشيت لا زاد أشيلو معاي ولا زولاً مـــــعا اترفــــق ولما خلاص بقيت مارق نجيم الليل مــشي إتفــــرق بكيت وبكيت طريف العين متمسح بالدموع رقـــرق عشان مظلوم زماني الليلي شتت للشمـــــل فــــــرق بسوي الووب نحاس احزاني جــــوه قليبي ينقـر دق يوهدبي يلوعني واخــــاف من المـــــصير واشفـــق اوادع الناس وافوت مجبور يجيني نغيم من الطنبور اشوفلي جني وقف صفق ينط لا فوق يـــــــــطير ينــدق واطـــير وانـــدق وادنقر فوق تراب بلدي أخم بي إيدي فـــــي رحـلي اقول يا ليل وافارق الدار اجر فوق الوداع مستــدار أنــــوني أنــــوني شـــاق الـــواح محــال ارتــــاح ادخل إيدي في رحلي تراباً فيهو تســــوى الكــــون تــــراب بلـــــدي اشـيل مــــنو اشـــم وارتـــــاح اشـــم طـــــيبة اهــــلي مـــــــــــــنو تفوح ترد الروح عويناتن تلـوح وتلـــوح عــــــراريقن طـــواقيهـن طــــــــواريهـــن سواقيهـــن انين الســــاقي لــــما تنوح حــــسيس البربخ المفتـوح واعاين يا تراب بلدي اشوف فيك صورة ماب تنشاف واشم ريحة الكُليت والشاف بنات بلدي بنات بلـــــدي طريحاتن مناديلن رقيصاتن شبابيلن حـــليلي حـــليلي يــحليلن واشيل من زادي واتكرف واشوف فيك يا تراب بلدي الحنين المـــابي يتوصف سماح ناساً حلاة ناساً بلا السكر طعم قراصه في قدحاً من الدبكر كواريك شفع المغرب يقلبوا في الجمــــر قنــــقر ولاد بلدي نقاقيرن طنابيرن جـــبابيدن سنــانيرن وافوت يا ناسي في دربي أقول يا أهلى واغلبـــي خلاص ريدكن ملك قلبي منو الغيركن بشيل حبي تراب بلدي بنات بلدي ولاد بلدي
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: saidahmed shami)
|
الله يعلم يا ستنا خليتى دموعى نزلوا
الغربة لحقانا كلنا رغم وجود امى وابوى واخوانى حولى اتربينا فى بلاد غريبة عننا وجزور غير الجزور وثثقافة مختلفة احسي بالغربة رغم كل سبل الراحة وحس بيها اكتر لما اعاين فى العيون الحولينى عيون فاقدة براءة ومحنة اهلى في السودان فاقدة البساطة والمحبة والمحنة حتى اللغة واللهجة بتاعتنا الاصل ضاعت منى في سنين الغربة لمتين غربتنا تنتهى يا ستهم !!!؟؟؟
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: وضاحة)
|
يا وضاحة يا خيتي سلام ,
والله يخليلك اهلك دائما حوليك .
لكن كليب النصري لملم معاهو المحن الانا طفشانة منها !
البلد البلد, والتمور والبرسيم والجداول !
يا حليل تنقاسي وناسا !
لكن الكليب دا مالو كلو ضبيح كدي ؟ الزول دا شايل البندقية كمل الشئ الطائر وماشي وجاري !
الغربة حارة يا وضاحة الله يغتس حجر الكيزان , بعد داك غربتنا بتنتهي ! اخير انتو بس في بلد عربي وسمر زينا ,
هنا تلقي نفسك مشاترة ومسنجكة وسط عيون خضراء وزرقاء مرات يتخيل ليك انك مع شواطين !
شكرا لمرورك .
ست البنات.
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: ست البنات)
|
(بتنا ست البنات سلامات غايتو لو رجعتي متل رجعتنا العجيبة .. بعد 12 سنة من التضهب .. دي مشكلة . بجيك رأجع ). هذا ما كتبه الاخ عثمان موسى.
تحياتي أخي عثمان, منتظرنك تودينا بلد ناس (واوا) ان شاء الله يأكلونا ! بس ما جيت راجع وقعت لينا النضم. يا عثمان الناس الفي بلد عربي بيشيلو الشنطة فاضية ولا مليانة وبيمشوا يدخلوا عديل للبلد !
لكن نخنا ناس صف الأجانب ( والله حارة شديد) أنا أول مرة أرجع بكيت لامن اتخجيت من وقوفي في صف الاجانب , وما عرفت نفسي أرجع والآ أدخل ! غايتو شكيناهم علي اللا نام لا اكل الطعام , زي ما غربونا ووحدوا بينا.
شكرا لمرورك , وفي رجاك ما تعوق.
ست البنات.
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: ست البنات)
|
الأخت تراجي تحياتي ,
شفت كيف الناس يهاتوا بالضللة وهم ما عارفين المر الفيها !! تعالي نخصص يوم للبكاء علي الوطن ونفش الغبائن !
والله الواحد بقى زي المجنون يفتش لأي خيط يوصلو بشئ من ريحة الوطن ! عارفة يا تراجي انا بعمل في دراسة وبكون عندي بحث من 5ألف كلمة يتم تسليمه خلال اسبوع ,
لكن برضو بلقى نفسي مشيت طوالي على المنبر أفتش للسودان زي الضهبان حتى بعد داك أشوف البحث!
الله يجازي اللي كان السبب ! والحل في الثورة ,
و طول ما النضال مستمر البكاء سيوضع ليه حد بإذن الله .
مشكورة على المرور.
ست البنات.
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: ست البنات)
|
اخوي سيدأحمد شامي ,
سلامين ونعلك طيب,
وغايتو جبت الكلام الصح صح بيوجع القلب !
وان بقيت نزلت البلد شيي أمشي لاعند الرويس وسلملي على ولاد حسنة بت عمر عمتي, وأغشا مترة جدي وجيبلي قفة تمودة ومجوز بركاوي !
وقول لي درب الترك وفتني وانزل لاعند الكروماب قولهن كيف مشاهاكون ! وما تنسى تجيبلي معاك قبضة لوبي وربطة برسيم للعنبلوك ! وكمان اغشى دكان السرير جيبلي معاك تمباك فحال حوقتي خلا من امس !
ولا تنسى المدينيي شي !
وجيدا مريت بهني .
ست البنات.
| |
|
|
|
|
|
|
Re: نحن ناس الضللة نشكو الألم والوحدة وشوق الوطن كتال ! (Re: ست البنات)
|
وها نحن،،توزعتنا الدروب.. مضينا بعيدا في سكة الراحلين وطنا شردنا بنت امي له دمعة وكل الحنين... وطني علي الاهة قلبك قد رحلت بلادك في الناي عنك بعيدا مشت للوراء لماضي القرون ضيعت وجهها الطلق.. رقص صبياتها.. اهازيجها،،،سمارها واكترت خاذن للنار يطارد الشوق ويصادر عطر الياسمين بلادك لم تعد بلادك يابنت ام لا النيل ذاك الذي كان قبلة العاشقين لا الافق تملاه ضحكة الطيبين لا الليل يغمرها بالبهاء لا الشمس تشرق تشعل فيها الحياة بلادك الان سيدتي سادها الاغبياء الصفاء... النقاء... الوفاء... لم يعد الا في خاطر الغائبين لهفة الطيبين شجن،،وحنين.
| |
|
|
|
|
|
|
|