|
|
 عِنْدي حِلِمْ دايِر أقولو وذلِك في حَيِز الرأي والرأي الآخر وكِده
|
01- إنْفِصال دارفور عن السودان(يجوز عمل إسْتفْتاء لأهل السودان مِن النيلِيين).
02- إقرار نِظام الكونفيدرالِية لِكُرْدُفان.
03- جِدار عازِل بَين السودان ودَولة جنوب السودان.
04- حسم الغبائِن.. كُل الغبائِن في معركة أخيرة.. معركة أبْيي.
05- أن تتزحْزح قاعِدة مُثلث حمدي قليلاً نحو الشِمال.
06- إعلان حالة الحرب مع دَولة جنوب السودان في حالة تبني إسْتفتاء أبْيي.
07- قطع العلاقات مع دَولة جنوب السودان ما لم يتم تسليم السودان كُلِ مِن:
أ . مالِك عقار.
ب. عبدالعزيز الحلو.
ج . مني أركو مِناوي.
08- تمزيق وحرق ثُم بعد ذلِك إجراء السحق لِما عُرِف بِـ"الحُرِيات الأربعة" بَين السودان ودَولة جنوب السودان.
09- تتمزيق وحرق ثُم بعد ذلِك إجراء السحق لِماعُرِف بِـ"الحُرِيات الأربعة" بَين السودان ومِصر.
10- قطع العلاقات مع مِصر، ما لم يتِم حسم ملف حلايِب (إنْسِحاب أو تحكيم دُولي).
11- قطع العلاقات مع أثيوبيا ما لم يتِم حسم ملف الفشقة (إنْسِحاب أو تحكيم دُولي).
12- تطبيع العِلاقات مع دَولة إسْرائيل.
13- الإنْسِحاب مِن جامِعة الدُول العربِية.
14- برمجة بث أغاني "الحمري" بَين الإذاعات السودانِية (أم درمان/مدني... إلخ)، على أمل أن تُبَثْ أُغْنياتِهِ عبر إذاعة أم درمان مرتين في الشهر.
15- تفعيل مبدأ/قانون [مِن أين لك هذا].
|
|
 
|
|
|
|
|
|
|
|
Re: عِنْدي حِلِمْ دايِر أقولو وذلِك في حَيِز الرأي والرأي الآخر وكِده (Re: عزام حسن فرح)
|
الانسحاب من جامعة الدول العربية مرفوض
تفسير الحلم رقم 13
اذا كانت الجامعة لا تهش ولا تنش , فما اظرط من خالتى الجامعة الا خالى الاتحاد الافريقى .
يعنى كل اشكال التكلات الموجودة فيها مشكلة حتى الامم المتحدة , التعامل مع النقد الدولى وشقيقه فى الرضاعة البنك الدولى فيهو مشكلة هيكلية خطيرة .
الانسحاب والاتعزال والانعزال غير منطقى , لازم نكون موجودين فى اى تكتل , لو لقينا دولتين بيلعبوا كرة شراب , طوالى نخش نحكم الكرة دى .
عندنا دوائر تلاتة , دايرة اسلامية كبيرة نتحرك فى كل تكتلاتها الوهمية منها والحقيقية , دايرة افريقية برضو كذلك , ودايرة عربية .
دى المكونات الثقافية بتاعتنا .
بعد كده عندنا دوائر ممكن نصنعها برانا , زى محور السودان / اثيوبيا / ارتيريا .. سوق مُشتركة , حرية انتقال البضائع ورؤوس الاموال دون اى ضرائب جمركية بين التكتل ده .. تتذكر يا أستاذ عزام افتكاسة الثالوث بتاع السادات والنميرى والقذافى , مصر / ليبيا / والسودان ده بالجد كان ممكن يكون قوة ثلاثية جبارة بترول + ثروة سكانية بشرية = عمالة مؤهلة + ارض زراعية هائلة ومُخيفة + صحراء بكر فيها امكانيات تعدين لا تنتهى , لكن نقول شنو بس , الله غالب .
عرب ما عرب , دى حاجة براها , بحبونا ما بيحبونا دى برضو حاجة براها احنا ما ماشيين نتقدم لواحدة منهم .. عايزين رؤوس الاموال الخليجية تخش السوق السودانى بتدفق , عايزين العمالة السودانية تكون موجودة بكثافة فى الدول الخليجية لانو كما تعلم يا أستاذ عزام انو تحويلات المغتربين اصبحت واحدة من اهم مصادر الدخل لدول زى مصر / السودان / بنغلاديش الخ .. والضرب تحت الحزام شغال قرش ونص عشان كل دولة تلقى نصيب الاسد وامتيازات للعمالة بتاعتها , نقوم احنا ننسحب من هنا ومن هنا ؟ , لا , لا , لا .. احنا يا السعودية ويا الامارات العربية ويا سلطنة عمان ويا قطر دولة عربية اسلامية وعضو معاكم فى الجامعة العربية افتحوا لينا مزيد من فرص العمل فى اسواقكم للكوادر الطبية السودانية بشروط مُجزية , وللمجالات الأخرى , ويا الكويت عليكم الله اعفوا لينا ونقفل الصفحة القديمة ونرجع ايام عبدالله السريع الذهبية .
كيف يعنى نطلع من الدايرة العربية ؟ .. دى اكبر منطقة لانتاج البترول فى العالم , ناس امريكا ديل مالم قابضين قوى فى المنطقة العربية ؟ فى سوريا والعراق وليبيا وفى الاحداث فى مصر والتطورات فى البحرين وفى الخوف من الهلال الشيعى والتحالف مع الحزام السنى
ما اعتقد انو اوباما بحب العرب للدرجة دى وبيقعد الليل كلو يسمع اغانى عاطفية ويعمل مس كولات ومسجات ويرسل دباديب للمواطنين العرب .
مندوبنا فى الجامعة العربية مهم ووجودنا مهم للغاية , على الاقل يا سيدى من ناحية الاستخبارات , اها , رسل وفدك كلو من رجال المخابرات السودانية , تقاريرهم دى بتساعدك فى صنع خطواتك السياسية , لانك بتكون عارف بدقة ما سيكون ,
او ممكن تعتبرها يا سيدى علاقات عامة بحتة , انتا عارف يا سيدى الشركات بتصرف كم على العلاقات العامة ؟ .
وبعدين قصة لبنان والمغرب وراغب علامة , شوف يا أستاذ عزام امريكا واليابان بيعمولوا فى شنو هسع على الاقتصاد الكوكبى , ديل بينهم دماء وتاريخ من الاحتقار الانسانى على اعلى مستوى , يعنى يا أستاذ فى احتقار للجنس اليابانى اكتر من انك تضربوا بقنبلتين ذرييتين ؟ فى احتقار ووضاعة وعنصرية وبشاعة وجلافة واستعلاء ولا اخلاقية اكتر من ده ؟ هسع ما شاء الله عليهم اليابان وامريكا وعينا باردة ما نسحرهم , تكتيك وتنسيق والمافى شنو ؟ عشان يضربوا الوحش الصينى فى مقتل .
احنا بالجد مُجتمع هجمى فى طريقة تعاملنا وردود افعالنا , فينا بردوة ورتابة المجتمع الزراعى المنغلق الرافض للتجديد فى الاديان والافكار وفهم ما يدور حوله , وفينا عنف وشراسة المجتمع الرعوى الباحث عن عدو باى طريقة عشان يقطعها معاهو ناشف , ودى حاجات برفضها المجتمع الراسمالى الحديث , انسان المجتمع الراسمالى الصانع للقرار انسان برجماتى للغاية ما عندو حكاية انتو سنة كده قلتوا لينا كده والشبشب فى وشكم , وظووووط وطظ فيكم يا المغرب ولبنان .
يعنى ما اظن اوبما هسع بيزرزر فى طاقم الادارة الحاكم الـ معاهو من اصحاب البشرة البيضاء انو اجدادهم كانوا بيستعبدوا اجداده بفظاظة وانو (الكلوكس كلان) كانت بتتسلى بحرق الناس السود .
الحقونا راغب علامة شتم النسوان السودانيات اضربوا السفير اللبنانى بالشلوت فى جعباتو واحرقوا السفارة اللبنانية , بتاع رسوم كارتونية شتم الرسول الحقونا اضربوا السفير النرويجى والدنماركى فى جعباتم بالشلوت واحرقوا السفارات , يعنى فى النهاية الطواقم الدبلوماسية الاجنبية فى السودان تكون مُردفة احتياطياً لكل التطورات الجارية / الترديف لمن لا يعرف كان على ايام اللابتدائى والثانوى العام تلبس رداء سميك للغاية تحت الرداء بتاع المدرسة عشان الجلد بتاع مسائل الرياضيات بالاضافة للهرجلة , ورغم كده كان فى اساتذة من اول ما يسمع صوت السوط بيكتشف ويقول ليك مُردف يا ود الكـلـب, ويتم الباقى فى ضهرك / .
يا جماعة الخير عليكم الله التروى والعقلانية .. عليكم الله .. هذه دولة وليست دكان مُناسبات لتأجير الكراسى .. انتم سوف تستلمون بعد التغيير السياسى خرابة بكل ما تعنى كلمة خرابة من معنى , خزانة عامة منهارة , جيش مضعضع يحتاج لتسليح واعادة ثقة وهيكلة , جهاز مدنى فاسد , محليات تسرق وتُسرق , مشاريع زراعية تحولت لغابات مسكيت , جهاز مصرفى يحتاج لمراجعة فاحصة , بورصة تحتاج لتحديث الخ .
فى ده كله محتاجين للعرب والافارقة والخواجات , محتاجين لتواجد دبلوماسى رفيع وعالى المستوى على المستوى الاقليمى والدولى , والتحرك بفهم وتخطيط سليم فى (أ) الدائرة العربية ودولها وتكتلاتها السياسية والاقتصادية والاجتماعية والعلمية (ب) الدائرة الافريقية ودولها وتكتلاتها السياسية والاقتصادية والاجتماعية والعلمية (ج) الدائرة الاسلامية وتكتلاتها ودولها (د) الدائرة الاوسع وهى الدائرة العالمية ودولها وتكتلاتها الامم المتحدة ومجلس الامن والبنك والنقد الدوليين .
بالاضافة طبعاً وبكل تأكيد التأكيد على الاهمية القصوى للتكتل الخاص بمياه النيل حيث ان الامن المائى اصبح واحد من اهم حقول الدراسات والبحوث الاكاديمية فى العقود الاخيرة .
هذا والله ورسوله اعلم
والى لقاء لتفسير حلم اخر
| |
|
|
|
|
|
|
|
|
|
Re: عِنْدي حِلِمْ دايِر أقولو وذلِك في حَيِز الرأي والرأي الآخر وكِده (Re: محمد علي عثمان)
|
عادل عبدالرحيم عبدالعزيز
Quote: عزام يا باشا زى حلمك ده بيقولو عليه اللهم اجعله خير
وتف على اليسار 3 مرات وقول بسم الله |
ياخ الحلم ده تقريبًا بحلم بيهو يوماتي وبكون فيهو شايِل لي ربطه مِن الورد والفُل والجو لطيف كِده والناس كلها تشوفا مُبْتسِمة ومُفرهِدة ومبسوطة... ياخ طممت بطني مِن صباح الرحمن، ما كان تقولي بس <... مَا نَحْنُ بِتَأْوِيلِ الأَحْلامِ بِعَالِمِينَ> 44 يوسف
| |
|
|
|
|
|
|
|
|
|
Re: عِنْدي حِلِمْ دايِر أقولو وذلِك في حَيِز الرأي والرأي الآخر وكِده (Re: عزام حسن فرح)
|
عزام كيفك
ليس من حق أحد مصادرة حقك في أن تحلم ، كما ليس بإمكان أحد أن يدرأ عنك الكوابيس ..
لكن اعجبني كلام الزميل شاهين شاهين وهو مختصر مفيد جامع لأسس العلاقات الدولية في عالم اليوم ، عصر البراغماتيزم .. مصلحتك اولا " والماعاجبو يحلق حواجبو" ..
اذا كان ما صنع الحداد يقف ما بين الشمال والجنوب الآن فإن ما كان بين امريكا واليابان اكبر واعظم من ان يصنعه حداد او كما قال شاهين ..
لكن بأمانة اذا استمر الحال على ما هو عليه في السودان فإن تقسيمه سيصير واقعا سواء " بأيادينا او بأيادي عمرو" ..
| |
|
|
|
|
|
|
|
|
|
Re: عِنْدي حِلِمْ دايِر أقولو وذلِك في حَيِز الرأي والرأي الآخر وكِده (Re: Abdullah Idrees)
|
Quote: لكن اعجبني كلام الزميل شاهين شاهين وهو مختصر مفيد جامع لأسس العلاقات الدولية في عالم اليوم ، عصر البراغماتيزم .. مصلحتك اولا " والماعاجبو يحلق حواجبو" ..
اذا كان ما صنع الحداد يقف ما بين الشمال والجنوب الآن فإن ما كان بين امريكا واليابان اكبر واعظم من ان يصنعه حداد او كما قال شاهين .. |
الأخ عبدالله إدريس
ياخي شاهين دا أنا بريدو في الله لله
زول واعي ومحترم جداً
| |
|
|
|
|
|
|
| |
عزام حسن فرح
معاوية الزبير
بريمة محمد
عادل عبدالعزيز عبد الرحيم
محمد مجيدو
shaheen shaheen
محمد علي عثمان
Abdullah Idrees
بدرالدين بابكر مصطفى
فيس بوك
تويتر
انستقرام
يوتيوب
بنتيريست