الحلم القديم اللولانى

فى الحلم القديم اللولانى
شفت مِرق العرِش انشقّ
وقيف الليل واقع محفّر
وحالو يغنى عن السؤال
سمعنا الخبر الطقّ
قالو النيل برك
ياهو داك قاعد بعيد
يبكى وينوح ويعانى
وهناك وقف
سعف الغنيوات المضفّر
فرتق ضفايرو فى الهوا
فى عتمة الحلم النزف
لفاها فى راس النويح
سواها شال
ومرابع الليل الفسيح
مليانه بصنوف المحال
وغنوة النجم الفصيح
عبّت حقيقته بالخيال
والوجعة فى القلب الكسيح
ماسكه فى الطرف اليمين
ساكنه فى الجنبه الشمال

وفى الحلم الجديد التانى
بين انتظار جية الخريف
ورعشة الشوق والأمانى
بخل الغمام
بالتباشير والأغانى
وبالمطر
وفسالة الأيام
بالمحنة والمودة وبالوصال
جود المسافات بالسفر
كرم الليالى بالخصام
بالغباين والسهر
ما بين خجلة العيشة الحرام
وفرحة الموت الحلال

شفت فى الحلم الكبير
وش الغنا
طيب المنى
ونغم الهنا
حس الطنابير
والمسادير
حلم البنيات الأخير
ضى الفوانيس فى وشوشن
نورة الرتاين ماشه قدامن تعاين
تفج السكه شان يبدا المسير
يمشى ويجيب فرح المداين
ينجبر خاطره الكسير
حلم البنيات الأخير
لا فى حسرة ولا غباين
مافى غير نشوة صباهن
جمال مساهن
رونق صباحن
والمسرة الفى وشوشن
دعوات صلاتن
فوق بروشن