يا واتمد جوات الزمن حرف الندا زمن النديهة حين تداهمنا النجيهة والحالة فوضى لايجيك صوتا يوريك الحقيقة لا انت تعرف كيف يكون شكل الصدى واحترت جد احترت كيفن انظم الكلمة الحياة وجوانا يتردد صدى طلقات بتحصد في الحياة تنصب احابيل الردى في اللحظة يتقاصر شديد الف المداد مد الندا يتكتم الحرف البداية وتبقى ي جواها آهات الوجع وتصير تشاكيل الحروف احي آه يا الله حي طفرت دموع جوة الفؤاد نادت قواميس الكلام .. سكت الكلام واتبدا بينات السما شفقا محمر بالدمى لون التراب ريحة التراب عرق المساكين في التراب صوت النوائح في البويتات المستفة بالالم صوت الثواكل في البويتات المجرتقة بالدموم ناحت حروف المفردة هدلت قميرات في السقف والحالة زادت ما بتخف كل البيوت مفتوحة في الشارع العريض ، جوة الزقاقات.. اتندل الفقر المقيت جوة الفقر ناسا معشعش في احاسيسا الفقر إلا صابرين .. العزة والنفس الابية الرؤيا والزمن الكفيف حلم الجعانين للعشا القمرة تصبح زي رغيف ناسا بتلبس في النضيف تضحك كتير لمن تشوف زولا فقر ويقولو بالله هسة ده بالله كيفن بس يعيش بالله كيف ؟ يزعل برق ممكون وصابر في السما صاقعة بتلملم في الصواقع شان يوم تقع كيفن تقع !! والغيم رحل شايل اماني الحالمين عشم الخريف السيلو بهدم لي بيوت ناس الفريق والصيحة من عند البحر يا ناس غريق بلدا غريق شعيا بفيق نجدة فريق كسرة فريك طورية تمرق من حشا الطين اليبس كوريق مصدي على الطريق وبيوت مرطبة بالكهارب ما عرفت الحر والعرق متمزجة ومبسوطة كيف ما بهمها السوق المولع والحريق الباش بزق ضو الكهارب في الشوارع جاي من ارض الحجاز والساقية نشفانة وتئن ما لاقية جاز وسالت شيخنا الحافظ الدين والكتاب يا شيخي يا المطر البحارب للحراز كيفن بجوز المشية لي ارض الحجاز والحالة دين ؟ رفع الكفيف بصيرته لي اعلى السما وقال لي شوف الحج فريضة الزول ولازما بس تكون الحجة من مالا نضيف ما فيه حرام. وسالت تاني يا شيخي لو من المرتب والعلاوات الكتار ضحك الكفيف قال لي هل حقيت عرق هذا المرتب؟ والعلاوات كان عشان جهدك بزيد والا قاعد في الطراوة وناس تئن راجياك تجيب ليها الدوا ورجعت محتار كيفن تحج والناس تئن راجياك تجيب ليها الدوا ؟ وضعت ما بين الحقيقة والمجاز مشيت على الجامع العتيق ما عرفت ادخل باليمين والا ارجع شان هرب من جوفي احساس اليقين ناسا بتنهب في الحقوق ويقولو دين وناسا بتبرك كل يوم عند الفجر تنده على الخالق تقول ياربي لزمنا اليقين. ياتو الصحيح ؟! الماعرف غير الشقا وديمه ياكل في الحلال ؟ عرقا حلال ؟ والا البياكل في الحقوق ويطلع على المنبر يقول يا ناس بعدتو من اليقين؟ كيفن يجيب ليكم مطر وعملكو شين ؟ كيفن يكون عملنا شينا وقرشنا من اخضر ضراع وانت المكنز بالحرام تشيل تعدد في الحريم غيرك مجدع في الرصيف عتت سنين لا حنة لا زغرودة تفرح بالحلال ، واصلو الحرام بمشي للزول السمين يارب تسهل لينا من هذا الجدا وابعدنا بس من الحرام والمفسدة وندهت ي ماتت حروف الكلمة قبال افردا الاية تلو الاية تسرح في الفكر العدل والاحسان والمال الزكاة كنز الدهب والفضة والحال الفقر النازعات البسملة وحمد الاله حق المساكين في الحياة الرحمة والكسب العفيف كيفن تشيد ليك قصر والبير معطلة بالسنين !! مش يا هو يا شيخنا البعلم فينا دين القلتو ليك مش ياهو دين والدين كدا حقو قبال الحصاد العاملين عليها زي حق الفقير ، والقسمة الضيزى فساد غمط الحقوق ببقى امعان في الفساد ويصدح مغنينا الصرخ مليون سنة ويا .. وضحكت حروف المفردة من زولة بتبيع الكسرة عشان تدفع مصاريف مدرسة وزولة بتجيها القروش بالباردة من الباشبزق . جوة المصارف والبنوك ناسا حساباتها بتئن مليانة ديمة مترسة جوة البلد برة البلد دين البلد الحيلها قد انهد هد زي الجنازة ممدة وينهم ولادك يا بلد ؟ بين المنافي الغارقة في عز المطر مرات جليد مرات برد بين المرافي مشتتة مرات تبادر بالسلام مرات تهزوز راسها من دون الكلام ومرا ت عوافي وفي كتير احيان حتى السلام ببقى بيناتهم مجافي ، تعليم ولادك راح سدى لا جوة علاه لمقامك لا من الغربة التعيسة جاب ليك قروشا تسعدك والحالة تبقى نفرهدة كيفن يجيب والنفس ديمة مهددة ما بين سجون او حتى ترحيلا مذل كيفن يجيب والناس هناك رجينه في بطن في البلد راجين قروش آخر الشهر شان الايجار قسط القراية الكان زمان من غير قروش حق الروشتة والعلاج حق الخضار ( والناس مع الغربة الفقر تقعد تنقنق وين الحكومة ؟) ويضحكوا الناس في البلد انسى الحكومة ياخ رسل الحال وقف والله جد حالة بتحزن للعدا يانيلنا يا رمز الخلود عايزين نعود فيض يا نهر كسر متاريس الضفاف كسر بيوت الاغنيا وخلي البويتات الرهاف عايزين نعود نبنيه من تاني وجديد شان الصغار ييجارو بينات الحواري لمن يصب مطر الخريف ويغنو في فرح حبور ( يا مطيرة صبي لينا نغسل الحزن القديم يا مطيرة في عينيا شان نشوف فرحك جديد يا مطيرة صبي لينا شان نشيل نخل الجريد يا مطيرة في عينينا شان نشوف الدنيا عيد ) والدنيا ديمة معيدة واتمد ياء حرف الندا الحمد ثم الحمد ثم التسابيح بالزيادة نرددا تحفظ بلدنا ياقدير من كل دقنا و شيطان رجيم باكر نعود ما اصلو شايلنا الهوى واشمنا بي الوشم النبيل لون ترابك والنخيل ينضح حنينا و موجدة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.محمد حسن
فيس بوك
تويتر
انستقرام
يوتيوب
بنتيريست