|
|
 سروية بنيتي دخلت المدرسة...
|
سروية بنيتي دخلت المدرسة
.
.
وانا...
انا وامها ((هنا)) ننتظر
ننتظر، نسمع عنها حكاوي النم وصوت عصفور رزين يغرد جوة قبضة كف،
و بعدها نكبر نحن، في دواخلنا وننكرب في الخيال، ابتسام..
في دواخلنا نكبر مرة تانية، اكتر من الريد بخطوة...
نمشي...
نسرح...
ونزيد شارعين في ما تبقي من زقاقات الروح... ونتحكر نسمع ..
نسمع من نادية حمزة ـ Her God Mother ـ ومديرة المدرسة سمية...
كيف تحولت سارة من طفلة نقناقة ساكت، لزولة محددة لطاقة الامكان في كتب الدراسة
وكيف استفذت اللعابها وتكلتهم في حيطة البال عشان تمشي تهندس طقس الممكن والمسكون
وكيف طلعت من ذوايا الشفع وتركت التصفيق والجري والنطيط ، الساكت.... ساكت ساي...
كيف...
كيف جيهت بيتنا القديم!!
كيف جيهت بيتنا القديم وجعلت الفرح المغبور يقوم من حزنو يعرف يقراء تاني، يكتب وكمان يفرهد مرتين.
ونفرح نحن تاني حد رف عين البكاء، ونشرط في حلقنا الصراخ الما خمج، والله جد.
نفرح ننوم... نحلم نقوم.. نسمع تاني.
نحلم نسمع...
نسمع نحلم...
نسمع من امي...
" سارة رسلوها"
رسلوها (دكان حسن) تجيب بهارات للثورة القادمة..
جابتها ومشت سالمت كل اصدقاء المصطبة..
سالمتهم.. لقيتهم قاعدين ساكت كباقي الناس،
قالت ليهم خلو القعاد، ويلاكم نقوم نمشي، بدل القعاد والسماع لهذا النبيح الكيزاني الذي لا يصدق.
يلاكم نتمشي... في طريق الطليعات من نساء بلادي..
طريق خالدة زاهر، اللهام عبد الرازق، احلام ناصر، فاطمة احمد ابراهيم، نعماد مالك، هالة الكارب، نجلاء سيد احمد، بثينة الامام ، نجاة سيد احمد والكثيرات، الكثير، الكثيرات ...
نمشي نتمشي غبار لطيف...
في طريق اماهتنا الصار حبهم في دواخلنا اكبر ذنب للعشق...
في طريق الكثير من االلاي خيطو للضؤ قريفة الطـــــريق..
.
.
انتكيت علي جنبي اليسار وعلقت نداوة الحنين للبلد، ابتسامة ...
ثم، ثم... دفيت الصبر احمر مسربل بالسواد... لفيتني بشال اخضر يعزف بياض..
ونمت...
نمت في شارع الامل النبت في زقاقات وطني الداخلية
صحيت لقيتني برسم في لوحة فيها دم، دم، دمكـ يا وطن..
اندمدمت ونمت تاني..
صحيت فيني
فيني صحيت لقيتها.. سروية بتي..
بتتونس معاي...
"راني ابوي انا..."
اهلن حبابك يا سرور..
ضميتها في عيني الشمال وقلت ليها الشعب كيف؟
هل لا زال هناك الحب كما كان بخير؟
المدرسة؟ كراسات الوعي؟
الا زلتي تحبين الرسم، لبن الغنم؟
احبكـ اكتر يا بابا
الشعب:
الشعب لا زال يعاني من نقص الفيتامين والـ Mega 3
يصدقون كل ما يسمعون... من تلفاز الـ Peoples ديكـ،
تلفزيون "الانتقاذ" الرفض ينحاز للغبش.
الحب:
"الحب ابوي حبيبي انا.."
المدرسة:
المدرسة مثلث حاد الزواية ،
حاد جداً لتمزيق جميع كراسات الوعي في مدارسهم ديك...
هنا في مدرستنا.. الـ 14 مليون جنيه، عاملة فرق كبير في حصة الاسواق، وخمج الدقون.
الرسم:
رسمتك يا بابا،
رسمتك لوحة ليها يد طويلة... اضاريك بيها في انفاسي...
واحنس بيك فيني النوم...
وانسي بي طيفك مشهد القيامة الحاصل في هذه البلاد.
لبن الغنم:
لبن الغنم ابوي؛ ابوك ويوسف مشو يجيبهو لي من الكلاكة ... لقوهو انكشح دم،
دم في الارض،
دم ملأ كل الشوارع رهاننا ضد هذه الفوضي وشح الرزاز..
دم الناس الابت،
ابت تنحني..
الناس الرفضت للجوع، استغلال الكوز، الضرب، الخوف..
الناس القالت لا لا... لا.. لواو المـــــــد..
الناس القالت كفي، وبس..
فنزف دمهم ريحان وطريق..
يا اريتكـ كنت معاهم.. يا اريتكـ يا ابوي.
.
.
يا اريتني كنت معاهم.. يا اريت كنت معاكم.. يا اريت يا سرو.
.
.
ونواصل
للنص بقية.
راني السماني
Oct 24, 2013
|
|
  
|
|
|
|
|
|
|
|
Re: سروية بنيتي دخلت المدرسة... (Re: rani)
|
Quote: انتكيت علي جنبي اليسار وعلقت نداوة الحنين للبلد، ابتسامة ...
ثم، ثم... دفيت الصبر احمر مسربل بالسواد... لفيتني بشال اخضر يعزف بياض..
ونمت...
نمت في شارع الامل النبت في زقاقات وطني الداخلية
صحيت لقيتني برسم في لوحة فيها دم، دم، دمكـ يا وطن..
اندمدمت ونمت تاني..
صحيت فيني
فيني صحيت لقيتها.. سروية بتي..
بتتونس معاي...
"راني ابوي انا..."
اهلن حبابك يا سرور..
ضميتها في عيني الشمال وقلت ليها الشعب كيف؟
هل لا زال هناك الحب كما كان بخير؟ |
كمية من الحنان ياراني،،،
تسلم ،، والله يخلي ليك سرورة ويديك العافية وعقبال ما تحقق كل امانيك وتشوف الابنة سارة خريجة وتجي في المكان دا وتزف لينا خبر نجاح سارة..
| |
|
|
|
|
|
|
|
|
|
Re: سروية بنيتي دخلت المدرسة... (Re: Nagat Sid Ahmed Elshiekh)
|
هذا نصا جميلا
نص والد واديب
تعرف وليداتنا ديل بخلو هذه الحياة محتملة ,, لا بل أكثر جمالا
وانا أبو بنات ,,
والبنات يلون الحياة بلون البهجة والفرح
بتذكر يوم ولدت توتا ,, اخدت لها صورة ولها من الحياة دقائقا معدودة
وصور ليها وهي بتمشي
ويوم دخولها الروضة كانت احتفال
ويوم تخرجها من الروضة سوينا الخبيز والكعك , وجبنا البارد والحلاوي ,, ومشينا الروضة وصفقنا ليها صفيق
وصورنا جنس صور
والآن توتا ممتحنة الجامعة السنة الجاية
ولأخواتها مثلها ,, حتي التي لم تتجاوز الثلاث شهور
ربنا يخليها ليكم ويحفظها
ويجعلها بارة بوالديها وبارة بوطنها ونافعة لنفسها ولكم وللوطن
وقالو ايضا بت
قلت
مالو ولو
في اللحظة ديك والتو
| |
|
|
|
|
|
|
| |
rani
Nagat Sid Ahmed Elshiekh
باسط المكي
عبدالحفيظ ابوسن
فيس بوك
تويتر
انستقرام
يوتيوب
بنتيريست