|
|
 ولامِنْ الليلْ يِنْجَلي .......
|
ولامِنْ الليلْ يِنْجَلي ......
"لا ترَجِّعْ السَّيفِ الجفِيِرْ ..... والدُّنيا فايرة مُصادَمَة" - حِمَّيد
(1)
يا غُنانا الْفِي الْحَبِيبة
إنتَ عارِفْ،
إنُّو صوتَكْ
يا هُو دوباينا ونَشِيدْنا
يا هُو تَرنيمَةْ صَفانا
ونِيلْ هَدِيِلْنا ......
يا هُو وَشْوَشةْ الْحَديقة
لَمَّا عاشْقَينْ
يِبْقُوا وَرْدَة ..... وبَوح فَراشَة
تايهة في لونا ورحيقا ......
يا هُو جَرَّاري التَّرابْلَة
ويا هُو شَبَّالْ النَّخيلْ ......
ويا هُو ....... آآآآآآآآهـْ ......
ولو بِإيِدْنا
كُنَّا "غَنَّيْنا .... وفرِحْنا"
كُنَّا "أمْسينا .... وصِبِحْنا"
كُنَّا "طَوَّعنا الْليالي"
كُنَّا "ذَلَّلْنا الْمُحالْ ......"
كُنَّا "هّدَّمْنا .... وبَنينا
ونَسَجْنا في الْخَيالْ
أَلْف حِيلَة لىْ لِقانا
وأَلْف حِيلَة للوِصالْ ....."
كُنَّا "غَنَّيناكَ
أشواق شاربةْ روعتنا
وحَنانْ هَمَساتْنا
لابْسَة ضَي الْقَمَرْ ....."
(2)
كُنَّا كُنَّا .......
وياما كُنَّا،
بَسْ تَمَهَّلْ:
ما هُو وَقْتَكْ
ما هُو وَقْتَكْ
ما هُو وَقْتَكْ
شِيلْ وُرُودَكْ يا غُنانا
خَبِّي في الْخَاطِرْ قَصِيدَكْ
شُوفْ بَناتْ "عَزَّة" وهُتافِنْ
"رانيا مأْمون"،
بِتْ شَمِسْ ....
والقَلَمْ في إيدا ضَوَّاي بالنَّضالْ
مِنْ أمِسْ،
لليلة .... بُكْرَة
ولامِنْ الليلْ يِنْجَلي
..... وبِنْجَلي .....
ودِيكْ سَمَر
ما هَابَتْ الجَّلادْ،
ولا أنْكَسَر الْعَزِمْ .......
وقُوُلْ "أملْ"،
تَفْتَح البابْ لىْ الأمَلْ
تحَجِّي في النِّيل بالجَّسارة
توَصِّي فيهو على الصُّمودْ ......
و "داليا"،
"بِتْ شاكِرْ"،
وألْف شاعْرة،
وألْف كاتْبة،
وألفْ عامْلة
وألْف دكتورة ومُحاميّة،
وأمَّاتْ الْفوارِسْ،
والْبِنيَّات الصِّدامْ ........
جِيلْ مَوَسَّمْ بالْبَلَدْ .....
جِيلْ بيوزِنْ كَمْ بَلَدْ ......
(3)
ما هُو وَقْتَكْ
ما هُو وَقْتَكْ
ما هُو وَقْتَكْ يا غُنانا الْفِي الْحَبِيبة
والْحَبيبة الْما بَلَدنا
ذاتا ما ياها الْحَبيبة .....!!!!!!
وينو "هزَّاعْ" يا غُنانا .....؟!
وينو "سنهوري" الْمَجَرْتَقْ بىْ نجيعو،
وينا "سارَّة"،
وينا "هاجِر"،
وين "وفانا"،
وينو "مُصْعَب"،
وينو "مازِنْ"
وين بَناتْنا
ولِسَّه في خُضْرَةْ كِتابِنْ
وين وُلادنا
اللَّسه ما لِبسوا الْحَريرة ......؟!
ما هُو وَقْتَكْ يا دُموعنا
ويا حُزنَّا كمانْ تأجَّلْ
لازِمْ الظُّلْم،
الطَّواغِيت،
الْفساد،
الْقَتَلة،
والْكُهَّانْ
وحارْقِينْ الْبَخورْ .......
كُلُّو يِرْحَلْ،
كُلُّو يِرْحَلْ،
كُلُّو يِرْحَلْ ....!!!!!
لا لا واللهْ،
ما رَحِيلْ .......
مُستحيلْ الْهانْ بِلادنا،
ودَمْ وليداتنا وبناتنا ....
وكَمْ كسَرْ أحلامنا آآآآآهـْ،
مُستحيلْ ....!!!!!
ما رَحِيلْ،
سِنْ بِسِنْ
وعينْ بعينْ
ودَمْ بدَمْ ......!!!!!!
شانْ بَلَد تجِينا تاني،
ونَحْيا نِحنا: أجْمَلْ أجْمَلْ
نِيلنا سادِرْ في نشيدو
والنَّخيلْ مادِّيلو إيدو
والأناشيد شايله غيمة
وخاتَّة غيمة .......
وأيوَّه يا "قَدَّال" نَغَنِّي:
"شانْ عيونْ أطفالْنا ما تضوقْ الْهَزيمة .......
شانْ عيونْ أطفالْنا ما تضوقْ الْهَزيمة .......
شانْ عيونْ أطفالْنا ما تضوقْ الْهَزيمة ......."
عصام عيسى رجب – الأثنين 07 أكتوبر 2013 م
|
|
 
|
|
|
|
بله محمد الفاضل
عبدالعزيز عثمان
فيس بوك
تويتر
انستقرام
يوتيوب
بنتيريست