|
|
 حجيتكم ما بجيتكم
|
حجيتكم ما بجيتكم , خيرا جانا وجاكم وأكل عشاكم
في مرة ( يعني زوجة) من فترة وبتشتكي لراجلها انو البيت صغير وبقي ما شايلنا كلنا ... وطالبته بإنوا لازم ينتقلوا لبيت أكبر
المهم الراجل ده احتار يحل المشكلة دي كيف.. وكيف يخليها تعدل عن طلبها
قام الراجل ده حكي لواحد من اصحابوا شِفت شديد ( شفت دي ما في القصة القريتها).( المهم كلنا فهمناها صاح)..طيب مُفتح كده فهمتوها ان شاء الله.
الصاحب: المشكلة دي حلها بسيط شديد .. انت بس عليك تنفذ البقولوا ليك .
الراجل: حاضر
الصاحب: امشي من دربك ده اشتري غنماية ووديها ليها البيت وقول ليها عايزين نربيها هنا
الراجل: كيف اجيب غنماية وهي بتشتكي من ضيق البيت؟
الصاحب: اعمل القلتو ليك بس وما تجادلني
الراجل : حاضر
مشي الراجل السوق وجاب الغنماية ووصل البيت
المرة: دي شنو دي الشايلة معاك دي.. عايز نضبحها الليلة؟
الراجل: دي غنماية وما عايزين اضبحها ..عايزين نربيها هنا عشان الاولاد يشربو منها اللبن
المرة جاطت وبهدلت ليك الراجل والنقة ذادت
الراجل مشي تاني يوم لصحبو وذعلان شديد
الصاحب: اها الحصل شنو؟
الراجل : يااخ المرة جنت عديل ونقتها ذادت
الصاحب : (مبسوط) كده خطتنا ماشة تمام .
الراجل : كيف ماشة تمام ..والمشكلة كبرت.
الصاحب: قلت ليك ماشة تمام انت بس اديها صنه شوية ... وتعالي لي بعد شهر.
الراجل: حاضر
بعد فترة المرة اعصابها تعبت وبقي عندها مطلبين
الاساسي: تغيير البيت...والثانوي : اخراج الغنماية من البيت
الراجل ذهج ومشي لصاحبوا ..
الراجل: يا زول خطتك دي تعبتنا ذاتو ..اها انا اعمل شنو هسة؟
الصاحب: يا زول براحة .. اها الحصل شنو؟
الراجل: ياخ المرة نقتا ذادت وهسة بقي عنها طلبين كمان البيت والغنماية
الصاحب : مية المية... اشتري ليك قرد وشيلو ليها البيت..وبعد فترة تعالي لي
الراجل: شنووووووووووو؟ (بخلعة )
الصاحب : اعمل البقولوا ليك ده.
الراجل : حاضر (بي طنطنة ) ( والله انت شكلك حتوديني الآخرة)
الراجل اشتري القرد وشالو البيت
المرة : ده شنو كمان
الراجل : ده قرد جبتو يلعبو بيهو الاولاد
المرة المره دي خلاص (كثافتها جات ) والقرد بهدلها بهدلة شديدة .
بعد فترة بقت تطالب بثلاثة مطالب
اساسيين : الغنماية والقرد ، وثاوي: تغيير البيت
الراجل مشي لصحبوا
الصاحب: اها شايفك ما ذهجان ذي كل مرة الحصل شنو؟
الراجل : والله هسة المرة بقت بتطالب بشدة بإخراج القرد والغنماية ..والبيت ده بقت بتذكرو طشاش طشاش
الصاحب: مليون في المية..خلاص انت من دربك ده خش السوق واشتري ليك بقرة ووديها البيت
الراجل: قلت شنو؟؟ بقرااااااااااااااااااا عديل كده ..يا زول المشكلة خفت ..خليني اطلع الغنامية والقرد وخلاص
الصاحب: قلت ليك اعمل ذي ما بقول ليك وبعد فترة تعالي لي (مش قلت ليكم شِفت)
الراجل: حاااااااااااضر لما نشوف نهايتها معاك
الراجل اشترا البقرا ومشي البيت
المرة المره دي نافوخها طاااااااااااار عديل كده
وبعد فترة بقت عندها اربعة مطالب:
اساسية: اخراج البقرة ، ثانوية : القرد والغنماية ، مطلب هامشي : تغير البيت
الراجل مشي لصحبوا
الراجل: (بإبتسامة انتصار) المشكلة خلاص اتحلت ، تغير البيت بقي مطلب هامشي ..اها تاني عندك حاجة؟
الصاحب: امشي طلع الغنماية،، واخد ليك فترة طويلة وتعال
الراجل : ياخ المشكلة انتهت خليني امشي اطلع الحيوانات ديل وخلاص.
الصاحب: يا زول اسمع الكلام
الراجل :حاضر
الراجل مشي البيت والمرة طبعا في حالة نقة شديدة .. وفي نقتها دي وفي قمة انفعالها ،، قال ليها خلاص الغنامية دي حاطلعها ليك
المرة احست بانها انتصرت.. وبعد فترة البقرة ولدت والمرة جنت عديل وبقت ما قادرة تستحمل الوضع عندها مشكلة اساسية وعاجلة واحدة وهي البقرة واولادها وثانوية القرد ( ونست قصة البيت خاااااااااالص)
قالت ليهو : يا انا يا البقرا دي في البيت ده
الراجل قال ليها: يا حياتي انا ما بقدر استغني عنك..حاضر ومن عيوني البقرا دي تطلع الليلة
والقرد ده مش الشجرة دي بنقطها تاني نشوفه حيمشي وين
حقوق النشر محفوظة لأحد اصدقاء الفيس بوك
|
|
 
|
|
|
|
عبدالحفيظ ابوسن
فيس بوك
تويتر
انستقرام
يوتيوب
بنتيريست