|
|
 صباح الخير ايها العالم اللذيذ جداً .
|
صباح الخير ايها العالم اللذيذ جداً
عن وقائع ما يحدث لنا بشكل يومى
***
بلدنا دى زى الرصيف
وسـخـانـة
لازم تتكنس
فى ناس بـ تعرق ع الرغيف
وناس بـ تعرق م التنس .
(فؤاد قاعود)
***
الى
د. شاهين , ابى وحبيبى وسندى وعكازى , مؤلف روايات (خواطر طبيب بيطرى) , (ابو عكاز) , (عثمان ارم) عن تهجير وادى حلفا , و (المرضعة) .
والى
شاهين الصغير ابن اخى , والذى لم يُكمل عامه الثانى بعد , لكنه اصبح صديقى الصدوق بواسطة لغة الاشارة , والذى اتمنى ان يسير مثلنا فى طريق الادب , بدلاً عن طريق قلة الادب والشقاوة وتكسير الاشياء والذى يسير فيه حتى الان بنجاح منقطع النظير .
|
|
 
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
سلامات
فى المرة الاولى لى فى هذا الشارع , مررت بجواره دون سلام , يجلس تحت ظل شجرة (النيم) رغم اننا فى الصباح الباكر والشمس الشريرة مازالت رحيمة بخلق الله
فى المرة الثانية القيت عليه تحية سريعة
- السلام عليكم .
لم يرد , او ربما لم ينتبه
بعدها صرت امر بجواره دون اهتمام , يجلس نفس الجلسة فى نفس الموقع , سيجارة بين أصابع يده اليمنى , و(منشة) بلاستيكية حمراء لقتل ذباب وهمى فى يده اليسرى
قلت هو من أرباب المعاشات , قذف به قطار الخدمة المدنية فى المحطة الاخيرة ولم يدرى ما يفعل بعدها
هو من اعاد المياه الى مجاريها فى ذات يوم , رفع راسه بطريقة درامية ونظر لى عندما اصبحت فى مُحاذاته
- كيفك يا شاب ؟ .. ربنا يساعد .
أبتسمت لهذه البادرة الطيبة
- ربنا يخليك .. كيف الصحة ؟ .
- تمام .
قالها فى يأس
اصبحت التحية من الطقوس الروتينية فى طريقى للعمل
- السلام عليكم .
- صباح النور .
كان يُحب ان يرد على التحية بطريقة مختلفة
- صباح الخير يا حاج .
- وعليكم السلام يا ابنى .. ربنا يقويك .
المرة الوحيدة التى صافحته فيها باليد , كانت بعد أجازة عيد الفطر
- كل سنة وانتا طيب يا حاج , ربنا يحقق الامانى .
أكتشفت عندها ان هناك رعشة خفيفة فى يده , وصعوبة بالغة للنهوض من على الكرسى الخشبى الصغير , ربما أثار (جلطة) خفيفة تعافى منها
ابحث عنه بنظرى لو غاب يوماً عن مجلسه المُعتاد فى طريقى
- السلام عليكم وين أمبارح ؟ .
- صباح النور .. مشاغل الدنيا والزهج من الروتين .
وجدت ذات مرة شابة بديعة تقف امامه وتتحدث معه بعنف بالغ
- قلتا ليك الكلام ده مليون مرة , انتا الظاهر عليك بقيت مُخرف وانسان ما مُحترم , يلا قوم خش جوه .
عرفت دون صعوبة انها ابنته , الشبه كان كبير , نفس اللون والفم والانف , القيت عليه التحية المعتادة , لم يرد نظر لى فى خجل , ونظرت لى الشابة بغضب غير مفهوم
فى اليوم التالى وجدت خيمة عزاء كبيرة تسد الطريق , سيارات , وزحام من الناس .. غيرت طريقى للشارع الموازى , فى الايام التالية بعد أنتهاء العزاء كنت ابحث عنه بعيونى .. أسبوع كامل دون ان يظهر
وذات مرة وجدت الشابة الغاضبة تقف امام الباب ترتدى ملابس حداد سوداء وهى تنادى على طفل صغير شبه عارى
- السلام عليكم .
اُريد السؤال عنه
نظرت لى بحقد , واغلقت الباب , نظرت لشجرة (النيم) فى حزن ومضيت فى حال سبيلى .
...
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
انسان عادى
رائحة عرقه العطنة , جعلتنى التصق أكثر بالجسم المعدنى الذى ترتكز عليه نافذة المركبة العامة حتى ابتعد عنه قدر المستطاع فى هذا الحيز الضيق , لمحته بطرف عينى اليمنى , يقترب مثلى نحو عتبات الخمسين من العمر بخطوات سريعة
- الراكب بـ كم يا أستاذ ؟ .
قالها فى هلع
رددت عليه بحسم وجلافة وانا انظر من النافذة
- 600 جنيه .
شعرت انه ما زال ينظر لى فى رجاء
فى المقعد الذى امامنا كان هناك شاب صغير وامرأة بدينة , كانت هناك حركة مُريبة بينهما , رفعت يدها اليسرى , بينما انزلقت يد الشاب الى ما تحت يدها , كانت حريصة على وضع (التوب) بطريقة اخفت عنى ما يدور
- عندى 1000 جنيه بس .
- الحالة بقت صعبة يا ود العم .
المرأة البدينة التى امامنا نظرت للشاب صغير السن ثم أبتسمت , قال لها كلمة لم أسمعها
وجارى صاحب الرائحة العطنة يطلب باصرار من (كمسارى) المركبة العامة
- عليك الله رجع لى 500 جنيه .
- يا حاج التعريفة بـ 600 , ما تعمل لينا صاموتا فى راسنا من اول الصباح .
قال لى بعد ان خسر معركته
- محطة الشجرة لسه .
- لسه يا ود العم .
نامت , رفعت يدها اليسرى بكاملها على الحافة العلوية للمقعد الذى امامها ووضعت راسها عليها , بينما انحنى الشاب الصغير الجالس بجوارها نصف انحناة ويده اليسرى مُختفية فى ثنايا (التوب) , كانت تتحرك فى بطء
- بالجد الحالة بقت صعبة فى البلد دى , انا هسع ما عندى غير 400 جنيه .
لم اهتم بالرد
المرأة قالت بعض كلمات وهى نائمة على يدها , والشاب رد عليها
- لا .. لازم .
نبهت جارى
- دى محطة الشجرة .
نهض بعد ان توقفت المركبة العامة , لاحظت ان بنطاله مثقوب من الخلف بشكل فاضح , وانه لا يرتدى سروال داخلى
اعتدلت المرأة فى جلستها واسندت ظهرها على المقعد , قال لها الشاب فى تضرع
- عليك الله .
هزت رأسها بالنفى , وقالت فى همس
- لما ننزل .. بس انشاء الله تكون مُقرش عشان تعزمنى حاجة باردة وسندوتش .
هز الشاب الصغير السن رأسه بالايجاب , كان كف يدها اليمنى مُمدداً على فخذه
تمنيت ان تجلس بجوارى على المقعد الشاغر امرأة بدينة .
...
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
كهل
اثمرت سنوات غربتى الطويلة فى بلاد النفط الصحرواية , وانجبت بيتاً انيقاً فى اطراف العاصمة وعربة فى مقدمتها اسد , وداء (السكرى)
تساقط شعر الراس من الامام , واصبحت لا استغنى عن النظارة الطبية ليل نهار
قالت لى ابنة بنت زوجة خالى بلسانها السليط
- الناس اكلوا وشنا عشان انتا ما اتزوجتا لحدى هسع , وانتا عندك قروش , مالك ؟ , ناقصك شنو ؟ .
وبدات رحلة البحث عن من سوف تنجب من يحمل اسمى , ويبكى على شاهد قبرى المُلوث ببول كلاب الطريق اللعينة .
...
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
شاهين .. فريدة .. محسن
الحياة مرض عُضال
( سقراط)
واحدة من طموحاتى ان اكتب عن تاريخ (الكلاكلة) فى شكل رواية .
تلك القرية التى شهدت طفولتى ومراهقتى وشبابى وكهولتى .. القرية التى صارت بقدرة قادر شبه مدينة , عرجاء , عجوز , مُخيفة , سخيفة.
عن الاصدقاء الذين تركوا السياسية , وعن الذين تركوا الدنيا , وعن الذين حملوا حقائبهم على اكتـافـهم وهاجروا .
ان اكتب رواية عن همى .. واحباطى .. وخوفى .. وفشلى .
عن سخريتى من طبقتى التى انتمى اليها , الطبقة الوسطى التى انحدرت - وانا معها - .
ان اكتب عن تغيير القيم والمعايير .
عن الخيانة العاطفية , والخيانة الزوجية , وخيانة التاريخ الشخصى .
عن تجارب الحب الاولى .. وتجارب الجنس الاولى .
الكتابة , والمشى لمسافات طويلة , هما بهجتى الوحيدة فى هذه الارض الخراب .
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
لحظات لن تعود
اليوم (خميس) وغداً (جمعة)
يُزغرد صوته
- خميسك يا شوش .
- بعتا قميصك يا دين ؟ .
لا يدخل .. يرمى الكلمات من فوق الحائط الطينى القصير .. احتمى انا بظل حائط الغرفة من لهيب الحر
- ما تتأخر .
- جهز المسائل .
يعود هو بعدى من العمل .. كلانا عطالة مقنعة .. (الخميس) لنا وحدنا , لا مكان لـ (فريدة) .. من السابعة والنصف مساء حتى منتصف الليل
يدخل انيقاً , مُعطراً , (طاقية) خضراء , (جلابية) بلدية نظيفة , يحتضن (العود)
- يا عزابى يا كحيان .
الاشياء مُرتبة .. الارضية الرملية (مرشوشة) .. منضدة خشبية صغيرة فى المنتصف بين سريرين , عشاء دسم .. (حلة كوارع) يتصاعد منها البخار
- كاس يا شوش .
- عرقى سُكسك من ناس ماريا .
- سجمنا من عرقى ماريا .
وحدنا .. سنوات طويلة ونحن نشرب بمفردنا , انا وهو فقط .. لا نحب صعاليك الحى , ولا جلسات شرابهم التى يتم اقحام السياسية فيها بمناسبة وبدون مناسبة , لا نحب مُشاجراتهم السخيفة
انا وهو فقط
يُدندن
- مافى حتى رسالة واحدة
بيها اتصبر شوية .
- الله عليك يا محسن .
- سرع الكاسات يا شوش .
ينزل الى الساق .. ويصعد الى الراس
- سجمنا من عرقى ماريا .
يُدندن
- الشوق والريد
والحب البان فى لمسة ايد .
- وااى .. وااى .. وااى .
ادور مثل الفراش
- ليك يا هاجر ليك رسالة
لو روحك يوم تنسى دلالها .
صوت رجولى قوى , صوت مثل عرق (الذهب) فى منجم بعيد على اطراف صحراء كلها (ديناصورات) مُتوحشة
- ان تكن انت بعيداً فى الثرى
فخيل الشعر يجتاز الثريا .
- وااى .. وااى .. وااى .
اليد مكان القدم , اتبول وراء (المزيرة)
- سجمنا من جسمك يا ماريا ومن عرقيك .
سنوات طويلة ونحن نشرب بمفردنا
اعارة لزوجته (فريدة) فى المملكة العربية السعودية .. اربع سنوات كاملة , اربع سنوات افتقدت فيها دندنة (العود)
- محسن وفريدة رجعوا من السعودية يا شاهين .
ذقن كبيرة .. جلباب ابيض قصير .. (سبحة) انيقة
- شيخ شاهين .. لسه انتا عايش ؟ .
ادخل فى احضان كلها رائحة نفاذة من العطور (النبوية) الشريفة
- اتغيرتا يا محسن ! .
- الدنيا كده يا شاهين .. الثابت الوحيد هو ربنا سبحانه وتعالى .
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: Muna Khugali)
|
غريب
انا الغريب الان .. انا من نظر , وابتعد
وهو القريب الان .. هو من امسك اليد , وانحنى هامساً على الأذن
اللقاء كان صدفة , وحرارة صيف هذه المدينة بشع كالعادة
- شاهين .. معقول ! .
- اصلو ما ممكن .. فريدة ؟ .
- اهلاً وسهلاً .
- اخبارك ؟ .
تصافحت الايدى .. قبل عشر سنوات , كانت المصافحة تنتهى بقبلة على الجبين والفم
الان , كانت اللحظة مربكة .. كانت الاسئلة من اجل سد فراغ التحديق الغبى , دون اهتمام حقيقى
- من متين فى الخرطوم يا فريدة ؟ .
- انا جيت السودان لى شهر .
- والله ؟ .
كانت تمسكنى من خصرى من الخلف .. نهودها كانت ترتاح على ظهرى
- الشارع يا مجنونة .
- جـبـان .
الصحف اليومية انتقلت من اليد اليسرى الى اليمنى
- انتا لسه فى عوارة السياسة والجرايد , والكتابة ؟ .
- لسه .. انتى لسه فى السعودية ؟ .
- سعودية شنو كمان ؟ زمان مشينا منها .. نحنا هسع فى استراليا لينا سبعة سنين .
- ما شاء الله .. والله كويس .
العمر يجرى بهذه السرعة ؟
- ناس البيت كيف ؟ .
- كويسين .. تمام التمام , الحمد لله .
- شنو شابكنى الحمد لله , ما شاء الله .. انتا خليت الشيوعية وبقيت كوز ؟ .
- يا ريت .
انتقلت الصحف اليومية من اليد اليمنى الى اليد اليسرى
- الجاى داك زوجى .
طويل , غبى , له وجه حمار
- الجاى داك ود عمى , جاى من البلد عشان داير يسافر السعودية .
- ومالو شكلو كده , غبى وعندو وش زى وش الحمار .
- حرام عليك .. ده انسان طموح , وبكرة بعد ما يسافر ويغترب ما فى زول حـ يقدر يتكلم معاهو .
عندما اقترب نظر لى بغضب ظاهر
- محسن .. ده شاهين , صديق عزيز .
- اهلاً , اهلاً .
كانت نبرة اللغة النوبية ثقيلة , تتكسر عندها الكلمات العربية .. وقف بعيداً عنا , غريباً منا , ينظر بعيداً
- شاهين .. ده محسن زوجى , شاهين ده كان صديق عزيز .
- اهلاً , اهلاً .
كانت اللغة النوبية ثقيلة
- بعد اذنك استاذ شاهين , نشوفك تانى .
- طيب مع السلامة .
امسك يدها وانحنى هامساً على أذنها .. كركرت بعدها فى ضحكة انثوية خافتة , سعيدة
وقفت انظر لهما , غريباً عنهما , وحيد
نظرت الى الصحف اليومية , كان المانشيت الرئيسى فيها كلها بعبارات مختلفة
(رئيس الجمهورية .. التحول الديمقراطى يحتاج لتضافر الجهود)
انتقلت الصحف من اليد اليسرى الى اليمنى , اخذت اضرب بها على فخذى وانا اُدندن بنغمات اغنية نوبية قديمة عن الغريب الذى يتخبط فى غربته بعيداً عن حلفا القديمة .. ومضيت فى حال سبيلى .
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
طيار حربى
انا مُجرد سائق لطائرة صغيرة تقوم برش المحاصيل فى مشروع (حلفا الجديدة الزراعى) , حتى اننى املك التواضع المطلوب لكى ارفض ان امنح وظيفتى المؤقتة هذه لقب (طيار)
خالتى فى (حى الزهور) هى التى كانت تقوم بتسويق هذه الدعاية غير المبررة
- شاهين ابن اختى جاى من البلد .. هو طيار كبير فى شركة برتغالية .
يبدو ان هذه الدعاية قد تسربت فى كل انحاء (حى الزهور) , حيث اننى اجد باستمرار ترحيب واحترام مدهش من (عوطلجية) المنطقة المنتشرين حول اعمدة الانارة
- كيف يا كابتن ؟ .
- انشاء الله يا خال حوادث الاختطاف بتاعت منظمة التحرير الفلسطينية ما تكون مؤثرة على الشغل عندكم ؟ .
- جاى من لندن ؟ .. ولا نيويورك ؟ .
وخالتى تغضب لو كشفت السر
- الدنيا مظاهر يا ابن الغالية .. وبعدين مافى زول حـ يراجع الاوراق .. ولد جيرانا ممرض فى مدنى , وهسع بالدعاية اتعمل اخصائى باطنية وبيكسب احسن الف مرة من ناس كلية الطب .
انا منتسب فى جامعة القاهرة فرع الخرطوم, كلية القانون , وهذا هو سبب زياراتى المتكررة (للخرطوم)
ضجرت من رائحة المبيدات الحشرية النفاذة .. اتمنى بقية عمرى ان اضع حول رقبتى تلك (الكرفتة) البديعة , وارتاح من الرائحة
- سلام عليكم .. انتا شاهين ؟ .
- اهلاً وسهلاً.
- معانا هنا فى الجامعة ؟ .
- انا منتسب فى قانون .. سنة تالتة .
- انا فريدة من حى الزهور , ساكنة جنب ناس خالتك .. معاك فى قانون برضو سنة اولى .. برلومة .. هاهاهاها .
- اهلاً وسهلاً.. دراسة القانون حاجة جميلة .
- بس القانون كلامو كتير بيعمل صداع نصفى .. ممكن اعزمك حاجة باردة وسندوتش .
- أأأأ .. مافى مانع .. ok .
- ok ؟ ده انجليزى ؟ .. ماشاء الله عليك .. انتا بتتكلم كم لغة ؟ .
- نعم ؟ .. أأأأ , يعنى ما كتير .
كوب عصير اصفر مجهول الهوية , وسندوتش (طعمية) عجيب عليه سائل حارق
غمزت بعينها وهى تنحنى لتقترب من راسى , ظهر لون (السنتيان) من فتحة صغيرة , احمر بنقاط سوداء
- انا عارفة السر يا متواضع .
- سر شنو ؟ .
- انتا طيار فى الخطوط الجوية البرتغالية .
- مافى حاجة بتدسا فى البلد دى ؟ .
- انا بالمناسبة من زمان بتمنى اتزوج طيار واسافر معاهو حول العالم .
- والله كويس .
- مُتعبة ؟ .
- الـ شنو ؟ .
- شغلانة الطيار .
- المشكلة بس الريحة .
- ريحة شنو ؟ .
اصبحت زائرة مستديمة فى بيت خالتى , ورفيقة تجوال طويل بين طرقات (أداب) و (قانون) فى الصباح , ومحل (حلوانى الانتفاضة) فى المساء
- انتا العلاقة شنو بين القانون والطيران ؟ .
- والله ما عارف .
اصبحت اخاف من رعشة حبها , احببتها .. استيقظ وافكر فيها , انام وافكر فيها
- فريدة يا فريدة , يا بنت الجزيرة .
سوف اكتب يوماً ما قصيدة عنها بهذه القافية
اغانى (ام كلثوم) فى الليل .. واشعار (نزار قبانى) فى لحظة شروق الشمس .. واتصالات مُزعجة مع (حلفا الجديدة) فى الظهيرة لتمديد الاجازة اسبوع اخر
- فريدة انا .. أأأأ .
- اتكلم عليك الله .
- انا بحبك .
- يا الله يا شاهين انا منتظرة الكلمة دى من اول يوم عرفتك فيهو .
- بالجد ؟ .
- انا بموت فيك .. بعبدك عديل كده .. تعرف انا مفكرة ادرس ضيافة جوية فى مصر عشان نكون فى طيارة واحدة وما نتفارق خالص .
- أأأأأ .
صدقونى اهم الاشياء فى العلاقات العاطفية هى الصراحة المطلقة بين الطرفين .. قررت ان اكشف لها سرى الخطير , اختيار المكان ضرورى .. قررت ان اتكلم فى (حلوانى الانتفاضة) لسببين , الاول هو الاسم الذى احبه بسبب ميولى السياسية , والثانى ان لديهم (بسبوسة) خطيرة بالسمن البلدى
- فريدة انا ما طيار .. أأأأ , يعنى قصدى ما طيار بالمفهوم العند الناس .
- شنو ؟ .. كيف يعنى ؟ .
- انا سواق فى طيارة رش صغيرة .
توقفت قطعة (البسبوسة) فى منتصف حلقها تماماً
- انا انسان فاشل يا فريدة .. بحاول اكون انسان محترم , وعشان كده انا بقرأ الجامعة من جديد .
- يعنى انتا ما طيار فى الخطوط الجوية البرتغالية ؟ .
تحول وجهها الى ثمرة (طماطم) .. وانحدرت دموع مالحة من العيون الجميلة
- انا شغال فى شركة بلغارية وما برتغالية.. شركة وقع ليها عطاء رش مشروع حلفا الجديدة وهى طلبت ناس خريجين ثانوى .. كان مفروض نمشى بلغاريا عشان كورس تدريب , لكن حتى دى ما حصلت واتدربنا فى حلفا ذاتها .
- يعنى انتا ما بتسافر لندن , وامريكا , والنمسا ؟ .
- انا غير حلفا الجديدة والخرطوم ما مشيت حتة تانية فى حياتى .. انا انسان فاشل يا فريدة , لكن حبك ممكن يعمل منى انسان جديد .
- وبتتكلم كم لغة ؟ .
- اتنين .. رطانة وعربى .
انفعلت وارتفع صوتها فى حدة قاسية
- يعنى انتا يا حيوان ما بتلبس بدلة الطيارين وبـتنزل فى فندق خمسة نجوم ومعاك بنات شعرهم اصفر ؟ .
- نحنا بنلبس ابرول .. ومرات لو فى زول معاى فى الطيارة بقرب من بيتنا فى القرية وبنط منها لحوش البيت , والزول التانى بيواصل السواقة عادى جدا .
- انتا ما عندك مستوى .. انسان منحط .
حملت حقيبتها وخرجت فى خطوات مترنحة
- انا بحاول اكون انسان محترم يا فريدة .. بحاول .
نظرت الى طبقها .. ربع كيلو من (البسبوسة) بالسمن البلدى عليها (ذبابة) كبيرة تنظر لى فى حيرة
صاحب المحل سياسى قديم من جيل الاربعينيات الذهبى , ضجر من السياسة ومن مؤتمر الخريجين , وتفرغ لصناعة الحلويات , كان يهز راسه مع نغمات (ام كلثوم) التى كانت تغرق المحل بالشجن
- اهل الحب صحيح مساكين
لما الحب نده على قلبى
ما ردش قلبى جواب
ياما الحب حاول يحرمنى
ياما عيون شغلوُنى .. لكن ولا شغلونى
الا عيونك انتا .. دول بس اللى خدونى
وبحبك امرونى .
امرونى احب .. لقيتنى بحب
لقيتنى بحب .. وادوب فى الحب .
قلت لصاحب المحل وانا انهض فى تثاقل
- انا بكرة راجع حلفا الجديدة يا حاج محسن .. اشوف وشك بخير .
لمس كتفى فى حنان
- اوعا تخلى الظروف تهزمك يا ولدى .. النسوان ديل اوسـخ حاجة فى الدنيا .. شد حيلك , والشغل ما عيب .
خرجت لليل (حى الزهور) الهادئ .. التاسعة مساءً , نباح كلاب وضجة سكارى واصوات نشرة الاخبار الرسمية فى التلفاز
وضعت يدى فى جيوب بنطالى ورفعت صوتى الى اقصى درجة تذبذب حبالى الصوتية
- ياما عيون شغلوُنى .. لكن ولا شغلونى
الا عيونك انتا .. دول بس اللى خدونى
وبحبك امرونى .
علق شباب متسكع بجوار اعمدة الانارة
- ابو الزفت الكابتن مُشعشع , وواقف لمبة .
- ديل يا حبة بيشربوا ويسكى من الاسواق الحرة .
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: سليمان القرشي)
|
عشان خاطر عيون المرحوم
- السلام عليكم .. معاى استاذ شاهين لو سمحتا ؟ .
- اهلاً وسهلاً .. انا شاهين .
- معاك فريدة .
- اهلاً , اهلاً بيك يا فريدة البركة فينا كلنا فى محسن .
- فقد .. فعلاً فقد كبير يا شاهين .
- معليش يا فريدة انا ايام الوفاة كنتا فى بورسودان عشان كده ما جيت البكاء .
- ما مشكلة كفاية كتابتك عن المرحوم فى المنبر .
- كيف يا استاذة ؟ .. المرحوم ده كان واحد من احسن الناس البيكتبوا فى المنبر .
- شكرا على البوست بتاع جمع اعمال المرحوم فى كتاب .
- دى اقل حاجة تتعمل يا فريدة .. وشايف تعليقاتك جميلة فى البوست .
- ما تتخيل محسن ده كان بالنسبة لى شنو ؟ مش بس حبيب , ده كان اب روحى , ده كان ....
صمتت تُغالب بكاء
- كلنا لها يا فريدة شدى حيلك ماما .. واحسن هدية تتقدم للمرحوم قبل الذكرى السنوية الاولى هى تجميع اى حاجة كتبها فى المنبر فى شكل كتاب .
يأتى صوتها مُتقطعاً, مُرهقاً
- ممكن نتقابل عشان نفكر بصوت مسموع .
- مافى مانع فريدة .
- خلاص لو بتقدر تجينى البيت , انا ساكنة فى بحرى المزاد , اخر محطة .. من يوم وفاة محسن وانا ما قادرة امرق للشارع .
- فريدة ما تعملى فى نفسك كده .. الزول لازم يواجه المشاكل والاحزان .. ارجعى تانى اكتبى الكتابات الظريفة بتاعاتك فى المنبر .
- ما قادرة .. والله ما قادرة , غايتو ربنا يصبرنى .. حـ تقدر تجينى متين ؟
- الليلة بعد ما اطلع من الشغل , يعنى ممكن اكون معاك زى الساعة ستة ونص .
- خلاص بس اول ما تصل بحرى المزاد اخر محطة اضرب لى تلفون وانا برسل اخوى الصغير يجيبك البيت عشان الوصفة صعبة شوية .
- خلاص .. شكرا ليك .
لم اتخيل المنزل هكذا .. هذا ليس منزلاً عادياً , اشبه بالقصر , فخم , الوان مُتناسقة بديعة , ثلاثة طوابق ترتفع فى شموخ
- ده بيت ناس فريدة ؟ .
- ايوه يا عمو .
- متأكد ؟ .
- اهى ديك فريدة .
واقفة على شرفة الطابق الاول .. ملاك فى ملابس كاملة السواد .. رفعت يدها وصوتها
- اتفضل يا استاذ شاهين .. ميدو دخل عمو فى الصالون .
اغوص فى سجاد ناعم طرى , اجلس على كرسى وثير .. نوع من المنازل التى تشعر فيها انك مُتسخ مهما فعلت , انظر لحذائى فى قلق
- اصلوا ما اتخيلتك كده يا فريدة .
- كيف ؟ .
- يعنى اولا انتى ما بتنزلى صورتك فى المنبر , ومن نوعية كتاباتك افتكرتك اكبر من كده .
- ما بحب قصة الصور فى المنبر .. لكن انتا زى صورتك بالظبط .
اين اهرب من قُبحى ؟ .
- شغال وين يا شاهين ؟ .
خادمة من الممكن ان تكون فلبينية او كورية او صينية .. تحمل اكواب من عصير شهى , تحدثت معها (فريدة) بلغة غريبة , لغة فلبينية او كورية او صينية
- قلتا لى شغال وين ؟
- محامى .
مكتب محاماة صغير فى عمارة قذرة تتحول فيها المكاتب الى غرف نوم بعد الثالثة ظهراً
- بتحب عصير التوت ؟ .. معليش مفروض كنتا اسألك تشرب شنو .
- لا كويس .. بحب التوت جداً.
لم اُشاهد ثمار (التوت) الا فى صور المجلات الدعائية
- محسن كان معجب جداً بالبوستات بتاعتك فى المنبر .
- الله يرحمو كان اديب وشاعر كبير .. محسن ده كان استاذ .
- تعرف فى اليوم الفكرتا انى اكتب بوست عن تجميع كتابات المرحوم فى كتاب لقيت البوست بتاعك .
من حسن حظى
- افتكر انو لما الكتاب يتعمل محتاج تدشين راقى يتعزم فيهو ناس من الجرايد ونُقاد .. يعنى لازم تكون فى دعاية كويسة .. انا شخصيا مُتبرعة باتنين مليون جنيه , مناسبة ؟ .
- احنا مفروض فى الاول يا فريدة نشوف تكاليف الطباعة كم .. وعايزين كم نسخة , ونوعية الورق , وبعد كده نشوف ايجار قاعة زى الشارقة مثلا بيكلف كم عشان تدشين الكتاب بعد كده بنقدر نحدد التكاليف المالية .
تضرب باظافر طويلة نظيفة على كوب (العصير) الزجاجى .. تنظر بعيداً
- ما مشكلة .. انا شخصيا متبرعة باتنين مليون جنيه , بعد كده ممكن نكتب بوست فى المنبر لو فى اى زول عايز يتبرع عشان المشروع ده .
- انتى والمرحوم عرفتو بعض عن طريق المنبر ؟ .
- لا .. احنا كنا مرتبطين من ايام الجامعة , ومن زمان بنحب بعض وبنحب نكتب اشعار وقصص , محسن اشترك فى البداية فى المنبر وبعدين انا .
نهضت على قدمى
- خلاص انا الليلة بكتب البوست .. والبركة فيك مرة تانية , شدى حيلك .
- ماشى كده طوالى ؟ ما تقعد تتعشاء معنا .
- شكرا ليك فريدة , عندى مواعيد كتيرة , مرة تانية نقعد ونتكلم عن محسن .
نهضت هى الاخرى
- انا بالمناسبة مسافرة القاهرة بكرة .. ماشية اقعد مع ماما زى كم شهر .. ما اظن اقدر اكتب بسهولة تانى فى المنبر , دقيقة بس اكتب ليك الـ email بتاعى عشان نكون على اتصال , وبرضو اتابع معاك .
رفعت سماعة الهاتف الثابت الذى بجوارها وتحدثت بلغة غريبة , لغة فلبينية او كورية او صينية , جاءت الخادمة تحمل ورقة بيضاء وقلم (رصاص) عجيب الشكل
- ده الـ email بتاعى .
- يلا شكراً ليك .. تمشى وترجعى لينا بالسلامة .. وعليك الله واصلى الكتابة فى المنبر ما تحرمينى من ابداعك .
- بحاول .. شكرا ليك .. شرفتنا شاهين , شرفتنا كتير .
مدت لى يد طرية .. يد لم تعرف الغسيل وكنس الاتربة
قلت - مُحاولاً اطالة مدة تلاقى الكفين -
- انا ما شفتا اخلاص فى الحب يا فريدة زى اخلاصك للمرحوم محسن .
ابعدت عيونها عنى فى ضيق واضح
- شكراً .. ميدو , يا ميدو .. تعال وصل عمو شاهين لحدى المحطة .
عندما خرجنا التفت ورائى كانت تقف على شرفة الطابق الاول وتنظر لنا انا و (ميدو)
- فريدة دى خالتك يا ميدو ؟ .
- عمتى .. احنا مسافرين بكرة مصر يا عمو شاهين .
- انتا ماشى مع عمتك ؟ .
امسك الطفل يدى فى فرح
- ماشيين كلنا نحضر عرس فريدة .
- فريدة حـ تتزوج ؟ .. حـ تتزوج منو ؟ .
- مهندس عايش فى امريكا , درس معاها زمان فى الكلية .
- خلاص ارجع يا ميدو انا عرفتا المحطة .
- مع السلامة يا عمو .
حشرت راسى عبر النافذة
- السوق العربى يا ريس ؟ .
رد السائق فى قرف
- اركب .. ايوه عربى .
صعدت وجلست على مقعد جوار النافذة .. اخذت انظر للناس بحياد تام لا حب و لا كراهية
وما زال طعم عصير (التوت) فى اللسان .
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
تغيير طفيف
هذه هى سنتى الرابعة بالنسبة للساقين معاً
الساق الاولى تم بترها قبل ست سنوات
الثانية بعدها بسنتين
انا قوى مثل (حلوف) .. اُمارس نفس هواياتى التى كنت امارسها وانا امشى على ساقين , القراءة , وكتابة القصص والاشعار
فقط انقطعت عن العمل .. نعتمد الان على راتب زوجتى الشهرى , لا اطفال واشكر الله على ذلك .. فقط اشتكى من زوجتى (فريدة) , عندما كنت امشى على قدمين كانت تنادينى
- شوشو حبيبى .
حتى اننى فى رقعة الدعوة لحفل عرسنا , طلبت من صاحب المطبعة ان يكتب
(عقد قران الوجيه شوشو على ست الحسان فيفى)
لكنه نظر لى بغيظ
- بس كده يا عريس الناس حـ يقولوا العريس ده خيخة .
منذ ان بدات مرحلة الزحف على بطنى قبل اربع سنوات من الان , حدث تغيير طفيف فى لهجة (فيفى)
- يا زفت الطين .. غسل الحمام كويس بعد ما تنتهى من خراءك ده .. ما معقول تقلب بطنى كل يوم .
- يا فيفى لازم نستحمل بعض .. احنا ما لينا غير بعض .. انا بحبك فيفى , بحبك جداً .
- (..) امك .
ظهر فى حياتنا مثل ملائكة جدران الكنيسة .. ظهر (محسن) , ابن الجيران الوسيم , المهذب , القادم من (انجلترا) بعد غيبة طويلة
- ازيك يا عم شاهين , صحتك كيف ؟ .
- السكرى قتلنى قتل يا ابنى محسن .
- شد حيلك .. المؤمن مُصاب .
- المشكلة انى ما مؤمن .
تصيح (فريدة) من الغرفة البعيدة
- تعال يا محسن اشتكى ليك من عمك شاهين .
- اتفضل يا ابنى .. بس لو سمحتا تكلم خالتك فيفى انى لسه بحبها .
اختفى فى الغرفة البعيدة لمدة ساعة , سمعت بعدها صوت مياه (الحمام) تتدفق على الارضية , ثم صوت (فريدة)
- كفاية .. يا ولد كفاية الليلة .
دخلت غرفتى مُتوردة الجبين , يشع من عينيها بريق الحب القديم المفقود
- محسن طلع ؟ .
- مرق لكن جاى بكرة .
- ده ولد ممتاز ومحترم ما شاء الله عليهو .. انا عايزو يسكن معنا هنا عديل .
ردت فى ابتهاج
- اعمل ليك العشاء يا شوشو ؟ .
صحت فى فرح
- معقول اقنعك بالسهولة دى انك تقولى لى شوشو من جديد .
- كيف , ودى دايرة كلام يا شوشو .
وضعت راسى على الوسادة المتسخة باثار اللعاب ورائحته
- شكراً يا ربى .. شكراً يا ربى .
رفعت صوتى ليصل اليها فى (المطبخ)
- انا من الليلة حـ ابدأ الصلاة يا فيفى .
- اعمل اى حاجة تريحك يا شوشو , بس لما تخش الحمام غسل الخراء بتاعك من المقعد .
قلت لنفسى همساً
- لكن محسن ده لما يرجع انجلترا حـ اعمل شنو ؟ .
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: د.نجاة محمود)
|
الرصاصة لا تزال فى جيبى
- انتى فريدة ؟ .
- نعم استاذ شاهين .
انظر لها من فوق نظارتى الطبية سميكة العدسات
- خريجة اعلام 2006 ؟ .
- نعم .
- واشمعنى يعنى اخترتى جريدتنا دى ؟ .
- بابا زميل استاذ محسن رئيس التحرير .
- استاذ محسن ده واحد من اهم الصحفيين فى الشرق الاوسط .
- فعلاً .. انا مُعجبة بيهو شديد , وهو طوالى مع بابا فى الشغل والبيت .
(محسن) المنبحط ؟
(محسن) الذى تربى فى كنف الشمولية (المايوية) ؟
(محسن) الذى طالب براس الشعب فى 26 مارس 1985 ؟
(محسن) الذى طالب براس (نميرى) فى 8 أبريل 1985 ؟
- مفروض تدربى معاى هنا فى القسم السياسى ؟ .
- يا ريت استاذ .. ده شرف كبير لى .
- بتحبى السياسة ؟ .
- والله بصراحة ما شديد .
- احسن .. بتقراى شنو من الجرايد السياسية الجادة .
- الدار و حكايات ومجلة سيدتى وحواء .
- ممتاز .. ممتاز , برافو عليك حـ يكون عندك مستقبل زى عمك محسن .
صغيرة وحلوة .. قصيرة القامة , لديها (تسريحة) كلاسيكية
- معليش يا بنتى , عمرك كم ؟ .
- 23 سنة .
- بدون خصم ؟
- هاهاهاها.. لسه ما حصلتا مرحلة الخصم .
- رئيس فرنسا منو ؟ .
- أأأأأأ .. هاهاهاها .. لا دى صعبة شوية مافى خيارات ؟ .
- فعلاً صعبة , عمك محسن ذاتو ما يكون عارف الاجابة .. طيب رئيس امريكا .
- جورج بوش .. مش كده ؟ .
- عظيم يا بنتى .. عظيم .
تقف بيننا 20 عاماً كاملة .. 20 عاماً لتتعلم وتفهم معنى كلمة (صحافة) كما هى على ارض الواقع , والتى تختلف عن تلك الموجودة فى صفحات المراجع الاكاديمية
- الزول ليه بيكون صحفى ؟ .
- عشان الشعب .
- عشان الشعب ولا عشان يأكل عيش ؟ .
- هاهاهاها .. والله بصراحة اعتقد عشان يأكل عيش .. عمو محسن وعد بابا انو حـ يدينى عمود يومى بعد ما انتهى من التدريب .
- بابا بيشتغل شنو ؟ .
- عميد فى جهاز الامن .
- انتو الظاهر عليكم اسرة وطنية .
- وعندنا كمان عمى استشهد فى انقلاب هاشم العطا بتاع الشيوعيين سنة 1950 .
- عليه رحمة الله .. والشهيد كان مع الانقلاب ولا ضدو ؟ .
- لا هو كان بصراحة ماشى الدكان يشترى فول وسردين فى نفس يوم الانقلاب , قاموا الشيوعيين قصدوا مخصوص وضربوا طلقة فى راسو .
- هم الشيوعيين كده , مُجرمين .. ضد الدين , وضد الفول والسردين .
- هاهاهاها .. تعرف يا استاذ لما مشوا المشرحة لقوا الرصاصة مكتوب فيها صُنع فى الاتحاد السوفيتى لا اله والحياة مادة .
- لا حول ولا قوة الا بالله .. والكلام المكتوب فى الرصاصة بالعربى ؟ .
- لا .. بالروسى , عشان الروس بيتكلموا روسى .. ما بيعرفوا عربى .
- والله العظيم ؟ .
- بالجد والله .. وبابا لسه محتفظ بالرصاصة دى .
- طيب ما تحاولى تكتبى عن الحاجة دى .
- عندى حاجة جاهزة .. مقال بعنوان الرصاصة لا تزال فى جيبى .
- ده مقال ولا فيلم ؟ .
- لا , مقال .. وبصراحة بابا ساعدنى فيهو كتير .
انبعثت نغمات شجية مرحة من داخل حقيبتها الصغيرة الانيقة
- بعد اذنك دقيقة يا استاذ شاهين .. ممكن ارد ؟ .. ده خطيبى .
- اتفضلى .
تدفقت ينابيع حب وحنان من عينيها وهى تتحدث
- ايوه .. معليش .. معليش .. لا , ما تمشى , انا قربتا انتهى .. خليك واقف تحت .. دقيقتين بس .. يلا مع السلامة .
- خطيبك عمرو كم ؟ .
- 27 سنة .
- بتحبيهو ؟
ابعدت منى عيونها المستديرة فى خجل طفولى
- شديد .
- شديد ساكت ؟ .. ولا شديد جداً , جداً ؟ .
- يعنى .. اكيد جداً , جداً , جداً .
- شغال شنو ؟ .
- ماشى ابوظبى بعد بكرة .
- اقول ليك حاجة وما تزعلى منى ؟ .
ابوها (عميد) فى جهاز امنى .. و (محسن) على ما يبدو (عقيد) فى نفس الجهاز
- اتفضل يا استاذ انتا زى ابوى .
- مالك ومال السياسة والصحافة ؟ .. ده كلام فارغ يا فريدة , ضياع عمر بدون معنى .. انا لو لقيت انسانة تحبنى شديد جداً , جداً .. كنتا خليت الكلام ده كلو .. انزلى لخطيبك وانسى قصة الرصاصة والشيوعيين والشعب .. اقراى حواء وسيدتى واحضرى قنوات دريم وروتانا وافلام كارتون , عيشى حياتك وشبابك , اتزوجى وسافرى مع خطيبك وما ترجعوا البلد دى تانى .. البلد دى ادبخانة .
اخذت تنظر لى فى اندهاش
- سبحان الله , ده نفس كلام خطيبى .
- ده انسان عاقل .. انتى مفروض تتعلمى منى .. ودى نصيحتى ليك .. فى السودان ده ابعدى من السياسة والصحافة , وحاولى تطلعى منه لاى بلد تانية عشان تكونى انسانة متوازنة نفسياً .. وهسع انزلى لخطيبك .
- شكرا ليك كتير .. انتا انسان عظيم يا استاذ شاهين .
- انا لو عظيم يا بتى ما كنتا حـ اكون قاعد فى الكرسى ده .
خرجت فى خطوات شابة ينتظرها مستقبل باهر
- انا بس لو لقيت انسانة حلوة زيك تحبنى شديد جداً , جداً , جداً .. كنتا بقيت انسان تانى .
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
اشجار النخيل
فقال يسوع (( يا أبتاه , اغفر لهم , لانهم لا يعلمون ماذا يفعلون))
(انجيل لوقا23)
*********
وقفت لا اصدق نفسى .. انظر فى تعجب يا سادتى
ادركت عندها ان (الكلاكلة) قد اكملت دائرة السقوط النهائى .. عرفت عندها اننى لن اعود الى هذا الشارع مُجدداً
سنوات طويلة وانا امارس رياضة (المشى) .. تجولت فيها حتى حفظت عن ظهر قلب كل المعالم الهامة .. ذرعتها طولا وعرضا , عندما كانت شبه قرية , وعندما تصابت وصارت شبه مدنية حيزبون
استطيع ان اصف لك بدقة موقع منزل فيها عليه بوابة خارجية عجيبة الشكل فى شكل (كاس) رياضية من (الاسمنت) على الجانبين
للشوارع عندى فيها ذكريات , وذكريات .. فذاك طريق كنا نمشى فيه ونحن ما زلنا طلاب مرحلة ابتدائية نتعلم حروف الهجاء والمديح وقصائد وطنية عن وطن لا نعرفه , هل هناك اسخف من القصائد الوطنية ؟
على هذه الشوارع عرفت معنى القُبلة الاولى , على ثغر فتاة طائشة كانت اكبر منى كثيراً , منحتنى القُبلة فى شارع مُظلم امام بيتها مُباشرةً , ومست فى حنان اعضاء حساسة من جسدى , وربما كانت ستمنحنى المزيد لولا (كـلـب) ضال اصر على تعكير التجربة الاولى باطلاق نباح مُتواصل , خشينا معه خروج الجيران للبحث عن اللصوص , افترقنا على موعد لم يحدث .. وكثيرا ما اتعمد الان المرور فى نفس الشارع , اقول ربما ستتذكر بعد كل هذه السنوات الوعد القديم وتمنحنى القُبلة الثانية , وجدتها ذات مرة وقد تحولت الى (دبابة) مُصفحة ضخمة , ترتدى (فستان) بيت متسخ قديم , تقف امام نفس المنزل , فى نفس الشارع الذى حاولت فيه اغتصابى , وهى تسب الدين والانتماء العرقى لطفل صغير عارى تماماً وعليه اثار (براز) من الخلف , طالبة منه الدخول الى المنزل .. قلت ربما تتذكر , وقفت وانا انظر لها وابتسم فى اشراق , ردت على رومانسيتى الحالمة رداً اوجعنى
- فى شنو يا ود الحرام ؟ .. بتعاين ليا وتتبسم زى الفتاة المفتوحة .. انتا قايل ده بيت شكش ولا شنو ؟ .. امشى طير من هنا بلاش كلام فارغ .
حملت الطفل من ذراعه فى عنف وهو يصرخ , واغلقت الباب بقوة
عرفت عندها اننى الوحيد الذى يتذكر فى شبه المدنية هذه !
ما حركنى دائماً هو ذاك المنزل الرائع البديع , شد انتباهى .. اصبح مركز جولاتى المكوكية .. اتوقف وانظر اليه , اتغيب سنوات واعود اليه
غابة من اشجار النخيل , غابة حقيقية .. والمنزل فى منتصف هذه الغابة , تستطيع لو وقفت على امشاط ارجلك ان تلمح ثلاث غرف طينية تحتضن بعضها البعض فى وداعة .. فى موسم الاثمار يتحول المنزل الى جنة (عدن) تنقصها انهار (اللبن) و (العسل) .. ثمار خضراء , تنقلب الى صفراء , ثم حمراء غامقة
كتبت معظم اشعار فترة المراهقة الطويلة امام هذا المنزل .. شربت من (مزيرة) انتصبت امامه , ماءً بارداً .. اصبحت عندى (فوبيا) الدخول اليه , ان اراه من الداخل , المس سيقان (النخيل) الشامخة , اقول لمن يسكن فيه
- والله انتو فى سعادة .. دا اجمل سكن فى السودان كلو .
منعنى الحياء من خوض التجربة
ترقبت من يسكن فيه .. عرفتها هى فى البداية , سمعت من تناديها وهى تهم بالدخول
- يا فريدة .. الاخبار شنو ؟ .
كانت قصيرة القامة وانا اعشق المرأة القصيرة ! .. ترتدى (توب) اخضر كأنها صنعته من (جريد النخيل) .. عرفت بعد ذلك (محسن)
- يلا يا محسن عشان ما نتأخر .
صادفتهما كثيرا بعد ذلك .. اعجبتنى حياتهما وسط هذه الغابة .. يضع يده على كتفها وهما يسيران ملتصقان , يتهامسان .. حبل من الحرير يربط بينهما فى مودة وانسجام
طلبت من صديق يهتم بالرسم ان يأتى ويرسم لى هذا المنزل , لكنه مات فى حادث سير قبل ان تتحقق الامنية
اقتطعت (القضارف) من عمرى سنوات بعيداً عن (الكلاكلة) .. وعندما عدت ذهبت الى موقعى المفضل فى المساء .. كان الصمت يلف المكان , أشجار (النخيل) كانت حزينة عليها غبار كثيف .. شعرت بالقلق
قلت لاول عابر سبيل
- ناس البيت ديل وين ؟ .
- وين كيف ؟ .. ديل ليهم مدة هاجروا امريكا .. عقبالنا يا ابو الشباب .
شعرت بطعنة نجلاء .. شعرت بالعطش , كانت (ازيار المزيرة) مُحطمة , وعليها (طحالب) خضراء !
عدت بعدها من جديد فى الاجازة التالية احمل حول رقبتى (كاميرا)
- عايز اصور بيت عندى معاهو ذكريات حلوة .
وجدت بناية اسمنتية عبيطة من طابقين تحتل المكان القديم , بطلاء خارجى فاقع وكثيف وغبى .. لا شجرة (نخل) واحدة
- الحصل شنو ؟ .
خرجت هى .. عرفتها على الفور .. ترتدى (بنطلون جينز) و (تى شيرت) ابيض يبتسم فيه (ميكى ماوس) , معها فتاة صغيرة تتحدث الانجليزية بطلاقة
اعترضت طريقهما فى جنون
- ده شنو يا فريدة ؟ .. الحصل شنو ؟ .. اشجار النخيل وين ؟ .. المزيرة وين .
تراجعت الفتاة الصغيرة فى هلع
- MAMY .
وقفت (فريدة) فى ثبات , نظرت فى عيونى مُباشرةً قبل ان تنفجر فى البكاء
ادركت عندها ان (الكلاكلة) قد اكملت دائرة السقوط النهائى .. عرفت عندها اننى لن اعود الى هذا الشارع مُجدداً .
شاهين
| |
|
|
|
|
|
|
|
|
|
Re: صباح الخير ايها العالم اللذيذ جداً . (Re: shaheen shaheen)
|
كوكا كولا
هذه العبارة كانت قاصمة الظهر
- انتا حلفاوى جلف , ما متحضر .
- كيف يعنى اكون ما متحضر وانا حلفاوى ؟ نحنا الحلفاويين ناس الحضارة ذاتها , هسع متحف السودان ده فيهو تمثال لزول من اهلك ناس الجزيرة ؟ .
- غبى .. غبى .
الحكاية ليست عنصرية , رغم ان (فريدة) ارادت تصويرها كذلك وهى تعلن بيان انهاء العلاقة عبر سماعة الهاتف فى الساعة الحادية عشر ليلاً بالتوقيت المحلى لمدنية (امدرمان)
- شاهين اعتبر اى حاجة بينا انتهت , وبكرة حـ ارسل ليك الدبدوب مع اختى .
- هو حصل شنو يا فريدة ؟ انتى فجأة شتمتينى ونحنا قاعدين فى الكفتريا بدون اى سبب .
- عشان انتا عنصرى , كيف يعنى ما فى تمثال فى متحف السودان لواحد من اجدادى ناس الجزيرة .
- لكن ما دى الحقيقة يا فيفيان , دى الحقيقة الاكاديمية .
- انتا حلفاوى جلف , ما عندك ذوق لا فى الكلام ولا حتى فى تصرفاتك .
- يا زولة اسمعى , بكرة رسلى الدبدوب , بلاش كلام فارغ .
صحيح ان العلاقة بيننا كانت قصيرة , 6 شهور فقط .. وصحيح ايضاً اننى اهديتها (دبدوب) ضخم , اسود , بحجم قامة الانسان , اشتريته من (القاهرة) واعتز به كثيراً , واقول لكم اننى احببتها خلال تلك الفترة .. احببتها جداً , والدليل اننى كنت اشترى (اسكراتش) كل يوم للحديث معها حتى وقت متأخر
الحكاية ببساطة , هو نمط الاختلاف فى مفهوم الحياة .. رغم ان فارق العمر بيننا ليس كبير , انا فى الثالثة والاربعين , وهى فى الثالثة والثلاثين .. رغم انها حذفت بعد ذلك اربع سنوات لاسباب غامضة
- كل سنة وانتى طيبة فيفيان , 23 ابريل عيد ميلادك الـ 33 .
- سجمى يا يمة .. ده يا دوب يا ود الناس , عيد ميلادى الـ 29 .
- لكن انتى فى اول مقابلة قلتى انك يوم 23 ابريل حـ تكونى 33 سنة .
- شاهين والله العظيم كده ازعل منك بالجد , وتانى ما اتكلم معاك .. انتا بتكون سمعتا غلط .
- يا زولة ما مشكلة .. 29 , 53 , انا بحبك وعندى ليك هدية متواضعة , بره فى العربية الهدية بتاعت عيد ميلادك .. تعالى نشيلها سوا عشان عندى غضروف .
- انتا جايب لى شوال اسمنت ؟ .
- اسمنت شنو يا بت ؟ .. جايب ليك دبدوب .
- سجمى يا راجل وما قادر تشيل دبدوب ؟
- ده دبدوب ما عادى , حاجة كبيرة خالص , ولو شلتو براى مع الغضروف ممكن يجينى شلل رباعى .
حملنا (دبدوب) سوياً بصعوبة شديدة .. هى من جهة القدمين وانا من جهة الراس والكتفين
- كان مفروض اشترى ليك معاهو سرير كبير عشان يرقد فيهو .. لكن معليش عيد ميلادك الجاى .
- وهسع غضروفك ده ما حـ يكون عندو اثار جانبية ليلة الدخلة ؟
- لا ما تخافى .. ليلة الدخلة الناس بتنزل , ما بتشيل .
- هاهاهاهاها .
بقية الايام فى العلاقة كانت عادية .. هى مشغولة فى الامتحانات , وانا فى الاستعداد لحفلة العرس , اتصل بها بشكل يومى للسؤال عنها وعن اخبار (دبدوب)
حتى كان يوم (الكفتريا) الشهير
- الو شاهين .. الليلة اخر يوم فى الامتحانات , لازم تعزمنى فى مكان محترم .
- خلاص يا عروسة اختارى انتى المكان .
- فى كفتريا فى بحرى اسمها الصلات الطيبة .
- دى بتاعت المعوقين ؟ .
- معوقين شنو انتا كمان ؟ .. دى كفتريا جديدة لنج ومجنونة جن , فيها صالة بلياردو , ونافورة ضخمة , ومزيكا اجنبية .
- امرنا لله .. بجيك الساعة ستة فى البيت ونتحرك من هناك .
- يا سلام عليك يا حلفاوى يا عسل .
قائمة الاسعار , هى التى حركت امعائى , وجعلتنى اشعر بالغثيان
- داير اقول ليك حاجة يا فريدة .. بس ما تفهمينى غلط , ممكن ؟ .
- يا سلام , شايف الجو الراقى ده , والناس الراقيين ديل .. داير تقول شنو يا حبيبى شوشو يا عسل ؟
- ده كلو استهبال فى استهبال .. الناس ديل حرامية , والقاعدين هنا ديل طلائع البرجوازية السودانية التـافهـة .. ناس بتحب الاستعراض والفشرخة الفارغة .
- شنو ؟ .
تراجعت فى مقعدها , ونظرت لى بغضب
- براحة .. يعنى عاينى قائمة الاسعار , سعر علبة مياه غازية كوكا كولا 20 جنيه , معقول الكلام ده , يعنى لو شربنا اتنين ح ندفع 40 جنيه غير البقشيش , واحنا ممكن من اقرب دكان نشترى صندوق كولا بسعر اقل من كده كتير ونشرب منه نحنا والجيران لحدى ما يجينا اسهال .
- معقول يا شاهين بتفكر بالطريقة دى ؟ .
- فيفيان لازم نكون واقعيين .. انا بالمناسبة ضد المياه الغازية والوجبات الامريكية , ضدها على طول الخط , دى حاجات ضارة بالصحة .. انا ضد تدويل نمط التغذية الامريكى , لانو ما مناسب معانا .. انتى عارفة القراصة بتاعتنا فى البلد عندها قيمة غذائية اكتر من سندوتشات الجماعة ديل , وفيها فيتامين A و B و C .
- يعنى عايز تعزمنى قراصة ومُلوحة ؟ .. انتا بتتكلم جد ؟ .
- والله العظيم فيها فوائد اعلى وصحية اكتر .. انا زمان كنتا يسارى للاسف الشديد , وفاهم الناس دى كويس .. ده يا فريدة راسمال طفيلى .. وغالباً ما يكون غسيل اموال , عايز يربح بسرعة عن طريق انو يصور للناس انك لازم تشترى علبة كوكا كولا لحبيبتك وتدفع فيها اضعاف سعرها الاصلى .. وده كلام خطأ , خطأ شنيع , يعنى لو كل سودانى عزم حبيبتو قراصة وتركين وبعدها كباية كركدية بيكون قدم خدمة لاطفالو الجايين لانو صحة الام بتكون حديد .. وفى نفس الوقت وفر قرشو .
تراجعت اكثر فى مقعدها
- خطأ شنيع ! , وراسمال طفيلى ! , اصلو ما معقول .. انتا بخيل للدرجة دى ؟ .
- يا الله ! , ما حكاية بخيل .. انا مستعد هسع اديك الـ 40 جنيه هدية .. انا بتكلم عن قصة انك تدفع قروش فى حاجة ضارة بالصحة .. عارفة مرة عملوا تجربة فى قزازة كولا , رموا فيها اسنان بشرية بتاعت زول ميت .. تصدقى بعد اسبوع الاسنان دى ذابت فى قزازة الكولا .
- الله يقرفك يا مقرف .
- ده ضحك على الدقون .. اى ناس جادة فى علاقة حبها , ما لازم تنخدع بالمظاهر .. وين الحب الرومانسى بتاع زمان ؟ بتاع شارع النيل وكيس التسالى وترمس جنينة الحيوانات وكباية الشاى , كان حب صحى , كانوا زمان عندهم عقل .. الحب يا فريدة اننا نجمع القرش فوق القرش عشان المستقبل , الله ما خلق الحب عشان ناس الكفتريات يبقوا مليونيرات على حسابنا .
ضربت حقيبتها الجلدية بعنف على سطح المنضدة الزجاجية الفاخرة
- انتا حلفاوى جلف , ما متحضر .
هنا فقدت اعصابى .. أياك وان تشتم اهلى فى حلفا الجديدة والقديمة .. هذا خط احمر .. أياك
- كيف يعنى اكون ما متحضر وانا حلفاوى ؟ نحنا الحلفاويين ناس الحضارة ذاتها , هسع متحف السودان ده فيهو تمثال لزول من اهلك ناس الجزيرة ؟ .
- غبى .. غبى .
تركتنى فى (الصلات الطيبة) وهرولت للخارج
مرت شهور على هذه الحادثة وعلى انهاء العلاقة واستعادة (دبدوب) .. قابلتها صدفة امس فى شارع صغير يتقاطع مع شارع (البلدية) .. كانت تمسك بيد شاب طويل وغبى وله وجه مثل الحمار , كان كل منهما يُمسك فى يده الاخرى زجاجة (كوكا كولا) من الحجم العائلى الكبير وهى تناديه بصوت مُثير جنسياً
- محسن .
شاهين
| |
|
|
|
|
|
|
| |
shaheen shaheen
Asim Fageary
Muna Khugali
بله محمد الفاضل
سليمان القرشي
فيس بوك
تويتر
انستقرام
يوتيوب
بنتيريست