|
|
 يا والدة أعفي لي وعدي القطعتو معاك إنو الكلام ممنوع في شلة ( الخرفان) ـ@ منقول
|
ــــــــــــــــــــــــــــــــــــــــــــــــــــــــــــــــــــــــــــــــــــــــــ
يا والدة أعفيلي ..
وعدي القطعتو معاك ..
إنو الكلام ممنوع .. في شلة الحكام
يا والدة دمي بفور .. لما البلد تغلي ..
لما العساكر ديل .. الشوهو الإسلام
جايبين تفاهاتم ..
سجنونا باسم الدين ..
حرقونا باسم الدين ..
حقرونا باسم الدين ..
كتلونا بإسم الدين ..
الدين بريء يمة ..
الدين بقول الزول .. إن خلى حقو يموت ..
بيخاوي في شيطان ..
الدين بقول تمرق ..
تمرق تقيف في الضد .. وتواجه الحكام..
الدين بقول الزول .. إن شاف غلط منكر ..
ما ينكتم يسكت ..
ببقى الغلط ستين ..
كوز السجم بيغرف .. في خيرنا ويتمتع ..
نحن السقينا النيل .. من دمنا الفاير ..
ما بننكتم نسكت .. في وش عميل جاير ..
الخوف عديم الساس .. وأنا جدي ترهاقا ....
حبوبتي كنداكة .. وعبد الفضيل الماظ
فراس بشيلو الرأس..
يمة الشباب بحيو .. وأنا بالسكوت ميت ..
هزاع ... وسنهوري .. أيمن ولي الدين ..
حازم وفاء وأحمد.. ديل كلهم حيين
أكرم صهيب أحمد .. ومحمد الخاتم ..
مازن... منى ... وعاصم .. لابسين حرير أخضر
سندس وإستبرق .. وأنا " دمي " بتفرّق
ساكت وبتفرج .. وأم در عروس النيل ..
لابسة الرحط والحق .. مليان بخور ولبان ..
ويزغردن نسوان .. للكل يوم عرسان
وانا يمة دمي بفور ..
ما بنكتم وأسكت ..إلا العسس ده يغور ..
إن كان سجن يمة .. سجناً يكوسو رجال ..
سجناً ملان ثوار.. ما قالوا فيو سرّاق ..
ما أندس فيو خائن .. مافيهو ولداً عاق ..
فيهو الشرف ذمة .. فيهو الغباش دفاق ..
الضاق لهيب الشمس .. راح يقهر الرقراق ..
وإن كنتي خايفة الموت .. يمة الرجال أحرار
شن فايدة العيشة .. والروح مولعة نار
الطلقة يمة جواز .. لي حقنا المقلوع
الطلقة يمة خلاص .. لي زول خلاص موجوع
الطلقة يمة طلوع .. من ذل مهانة وجوع
الطلقة يمة غسول..
الطلقة يمة ثمن .. لي كلمة سمحة وقول
الطلقة يمة حياة .. لي زول جريح مقتول
زي وخزة الشوكة .. أقصر كمان في الطول
قال المناضل يوم ..
الطلقة ما بتحرق..
بيحرق سكات.. الزول
بيحرق سكات..
الزول
_@
ــــــــــــــــــــــــــــــــــــــــــــــــــــــــــــــــــــــــــــــــــــــــــ
|
|
 
|
|
|
|
Elhadi
فرح الطاهر ابو روضة
فيس بوك
تويتر
انستقرام
يوتيوب
بنتيريست