|
نومة نافع
|
زمان غني المرحوم احمد فرح من كلمات الشاعر سماعين ود حد الزين يا حليلك يا بلدنا .. ويا حليلي انا يا حليلي فعلا يا حليلك يا بلدنا .. ونسبة المغادرين في تزايد مستمر وسط ملمات تلم بالوطن وهي لا تخفي علي احد وبكره يرفعوا الدعم عن المحروقات ولا يرفعوا الدعم عن طيب المأكولات التي تملأ ديب فريزراتهم ولا يرفعوا الدعم عن المنهوبات والمهدرات من اموال الشعب السوداني.
يرفعوا الدعم عن المحروقات ويحرقوا حشا الشعب السوداني بدلا عن ما يرفعوا الدعم عن التعليم التجاري والعلاج التجاري والمشروع الحضاري
والدولار بتاع عمنا جورج واشنطن يقترب من ال 8 الف جنيه بالقديم في صورة لم يسبق لها مثيل وهذا قبل ان يرفعوا الضغط آسف الدعم ومما يليه من زيادات في الطريق بدءً من الدكوة إلي العجالي ومن الركشة الي باص الوالي. والضرائب غير المباشرة التي يتم جبايتها من المواطن حسن علي سلوكة في صورة ارانيك محل ما تمشي اورنيك وبالذات لو كنت مغتربا بدء من اورنيك المساهمة والتأشيرة البيكوس ليها البشير يا لهونك يا بلادي في عهد الفريق عبود استقبل استقبال الفاتحين من جون كنيدي في زيارة تاريخية لم تكرر لزعيم افريقي وهاهو البشير يبحث زيه وزي رجل الشارع العادي عن تأشيرة الدخول للستيت في صورة مهينة.
وديتوا بلا دنا وين يالجيتوا مش عارف من فين واريتكم ما جيتوا يعني بالمثل السوداني ما جيدا جيتوا يعني ما في امل كل سنة نفس الاسطوانة رفع الدعم حيعافي الاقتصاد السوداني يعني لحنتوها ما عندكم بدايل ولا خطط ولا استراتيجيات بعد ماضيعتوا الجنوب ويا الفي الجنوب حي الشمال وفي الغرب حروب ويا الفي غروب هاك لحني قال قال وادروب في الشرق قهوته بقت بلا طعم ويا الفي شروق ليك شوقنا طال طال.
وسط كل هذا ينام نافع وسط العوين نومة بشخريها لا كما نام الفاروق قرير العين هانيها ولكنها نومة الظلمة القالوا عبادة والنومة هنا سببها الملل والملل جاي من مثل هذه المؤتمرات والجلسات الفارغة التي تشبه الجعجعة من غير طحين.
وخير الكلام ما قل ودل.
|
|
|
|
|
|