|
الضعيف من يخسر السلام دائماً
|
مقوله ما عارف القالهامنو .. لكن لقيتها في تقويم أم القرى بجانب تاريخ اليوم 29/10/1434هـ الموافق: 05/09/2013م
"ليس القوي من يكسب الحرب دائما .... وإنما الضعيف من يخسر السلام دائما"
طوالي جا في بالي الممثل الكوميدي عادل إمام ... ومقولته المشهوره في مسرحية شاهد ما شافش حاجه ـــ متعوده دايما ومن ما كنا صغار ما كنا بنرتاح للشخص الجنو مشاكل وإدعاء بطولات.
عندي صاحبي شديد جنو ينط في الشغل من محل لــ محل ... إسمو حسن ... بقى أمام الأمر الواقع مع الفتره التصحيحية المعلنه في السعودية .. ولبد ليهو زي شهرين كده في شغلو الجديد ... قلت الحمد لله أهو أخيرا أعلن حالة الاستقرار العملي ... اتصلت عليهو عشان أسلم واعرف اخبارو وبالمره ... أوربهو "حكمة اليوم" سالفة الذكر ... الجرس يرن يرن يرن وما برفع .. قلت يمكن مشغول ... رجعت ليهو تاني بعد ربع ساعه ... رد علي صوت زول قايم للتو واللحظة من النوم ... شنو يا حسون الليله إجازه؟ قال لي ... أبدا ناسي ديل أمس قفلتها معاهم فوق تحت وختيتهم في علبهم ووريتهم المكشن برا بصل وخليت الشغل ههههههههههه ... قلت أحسن حكمتي أحتفظ بيها لنفسي ولو حرقتني شديد أجي أكبها ليكم في البوست دا.
أها في ذات السياق وبناءا على ما تم سرده وحيث أنه وكذلك .... اتضح بما لا يدع مجالا للشك وبالنظر إلى حيثيات هذه الحكمه إنو حكومتنا دي .. ضعيفه الضعفه الواحده دي .... وما قادره تقدم للبلد شيتا نافع لمدة 24 سنه في شان كدي خسرت كل اتفاقيات السلام التي أبرمت من قبل ودخلت في حروب لا طائل منها.
طبعا ممكن يجي واحد يقول لي الحكومة عملت العليها.. لكن هنالك استهداف خارجي ونظرية مؤامره واعداء وطن وكده ... أهازي دا أنا بقول ليهو .. كونو الحكومة تخسر كل الاتفاقيات معناها العيب فيها هي ... زي ما وصل ليكم إنو صاحبي الما قادر يستمر في شغل دا وبطلع من كل واحد فيه بمشكلة العيب فيهو هو.
الموضوع عموما مطروح للنقاش للجميع .. ولي عوده.
|
|
|
|
|
|
|
|
Re: الضعيف من يخسر السلام دائماً (Re: عثمان جاد الله بخيت)
|
ياااا عثمان جاد الله, وينك يا راجل ووين تداعياتك, هل طغى حراق الروح أم ماذا Quote: إنو حكومتنا دي .. ضعيفه الضعفه الواحده دي .... وما قادره تقدم للبلد شيتا نافع لمدة 24 سنه في شان كدي خسرت كل اتفاقيات السلام التي أبرمت من قبل ودخلت في حروب لا طائل منها. |
تعرف يا عمّك.. انا دايما بقول انو الحكومة دي ما ضعيفة ولا فاشلة بل بالعكس قوية جدا وناجحة تماما لكن بياتو فهم, ناجحة وقوية ليس كحكومة لكل الشعب تخدمه وتعمل لصالحه - فهي ابلغ مثال حي للفشل هنا - لكنها ناجحة كنظام او حزب او جماعة و للدقة لنقل كعصابة هدفها ان تحكم وتستمر في الحكم بكل الوسائل خداع كذب قهر تنازلات حرب ايّا كانت الوسيلة ما عندهم قشة مرة المهم نجاحهم في الاستمرار في الحكم و الحرب نفسها احد وسائلهم لذلك, وكذلك هذه الاتفاقيات الشوهاء التي لا يتم توقيعها إلاّ لإلغائها و توقيع غيرها فالسلام بالنسبة لهم ليس هدفا استراتيجيا ولا خيارا اوحدا كما يجب أن يكون إلا بمقدار ما يضمن استمرارهم يوما آخر في الحكم و نعم.. اتفق معك في عنوان البوست: الضعيف من يخسر السلام دائما فالسلام خيار صعب و استحقاقاته لا يستطيعها إلاّ الأقوياء, فالسلام الحقيقي يتطلّب تنازلات وتجاوز مرارات وإحن وتاريخ أسود وتسامي عن الأحقاد والمسائل الشخصية إلى رحاب الشعوب و الأوطان ولنا في جنوب إفريقيا اسوة حسنة, من كان يظن ان عقودا من الإضهاد و العنصرية سيتم تجاوزها و المضي قدما و اعلاء ثقافة التسامح و العفو و النظر للأمام السلام يريد رجالا بإرادة حرة قوية قادرة على مواجهة النفس و عصابة المستفيدين من الحرب, و إلاّ فما أسهل اللجوء للحرب وما أيسر من اتخاذها خيارا لا يكلّف إلاّ خطبة هوجاء و قرارا احمق
| |
|
|
|
|
|
|
Re: الضعيف من يخسر السلام دائماً (Re: محمد البشرى الخضر)
|
حكومة شغالة رزق اليوم ياليوم، هي ذاتا لمن تصحى الصباح وتلقى نفسها لسع حاكمة قاعدة تستغرب، وتقوم متكاسلة على راحتا، على اقل من مهلها يارجل، تنجز فطيرا، يكفي لهذا اليوم، وبكرة الزارعا الله تقوم في الحجر، او المطر لا فرق...... لا استغرب والحالة كذلك ان يصحى الشعب ذات يوم ويجد نفسه هكذا؛ بلا حكومة، ............................... الشعب قنع من الحكومة وخيرا فيها... والحكومة ذاتا قنعت من الشعب، وفترت عديل كدة... دايرة تلصقا في الصادق المهدي، او عبد الرحمن لا فرق؛ يا زول الحكومة دي ممكن عادي تسلما الحلو، لو ضمنت عدم المحاسبة، او على الاقل عدم محاسبة كبار فاسديها المتنفذين؛ سال سوداني مغترب في العراق ايام الحرب مع ايران، سال رجلا كبيرا في السن، بالله جية السودانيين هنا واولادكم بالجبهة بالله مش ورطة؟ اجاب الرجل سريعا: ورطة ونص؛ الحكومة ورطة؛ والعاقل فيها يتيرب بي البليلة.... والشعب الصابر يومو اللي يقوم حا ياخد حقوا فوق الحوض* ....................................................... * ايام طفولتنا كنا نشتل البصل مع اهلنا المزارعين، اكتر مزارع بنحبوا ونتحمس للشتل معاهو، هو من ياتي بفكة ويحاسب اولاد الشتل فوق الحوض، بعد غرس اخر بصلة عندك كم حوض؟ تاخد حقك طازجا، في التو والحظة....
| |
|
|
|
|
|
|
Re: الضعيف من يخسر السلام دائماً (Re: عثمان جاد الله بخيت)
|
عبد العزيز ود عثمان مرحبا بك والله من أي مكان و زمان ... وربنا يا سيد الناس يصرف عن البلد الهوان .... ويعين هذا الشعب المحبط وغلبان
وياااااااارب يرجع بلدنا زي ما كان
بلد أمان واطمئنان ..... وسلااااااااااااااااااااااااااام يعم القرى والبوادي والفرقان
قوول آمين .... شايفك محبط يا حبيب ... لكن أبشر بالخير ما بتضيق الا للفرج ... اللهم فرج علينا كروبنا يا الله.
تحيات واحترام وتقدير،،،،
| |
|
|
|
|
|
|
|