سيف الدين...كلية الآداب... للأسف ما عارف إسمو بالكامل.. كان معروف لمعظم الطلاب ب سيف آداب.. سيف كان من الطلبة المغرمين جداً بالفنان أبوعركي البخيت.. زي كتير من طلاب الجامعة في الزمن داك... ومعروف إنو معظم حفلات الرواط و الأسابيع بيحييها أبو عركي... لكن ما يميز سيف ... من تبدأ الحفلة...بيرقص رقيص متفرّد جداً... رقيص فيهو نشاط غريب و حركات أكروباتية..وتحتاج لمساحة كبيرة جداً مع حفظ تام لكل إيقاعات أغاني ابوعركي ..بقفلات المقاطع... مع التفاعل الكامل للفنان أبوعركي مع سيف... أنا شخصياً كانت تقل متعتي لتلك الحفلات...إذا سجّل سيف غياب في واحدة منها... ________________ الشي الغريب إنو سيف داخل أسوار الجامعة ..شخص هادئ ..هدوء أقرب للصرامة.. وجاد جداً في تعاملو مع الآخرين... وكتير من رأوه في حفلات أبوعركي..كانوا بيعتقدوا إنو زول هزلي... ليتفاجاؤا بجديتو ..بعيداً عن إيقاعات عركي... _____________ ليك التحايا أخ سيف ..وين ما كنت
09-02-2013, 00:04 AM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
عثمان الفنان... مكانو المفضّل ...ال مين رود قلّ أن يغيب من الحضور للجامعة... حافظ معظم ألحان و إيقاعات الأغاني ..مع إهمال تام للكلمات.. صاحب صوت عادي جداً..وأحياناً نشاز... لكنو صاحب جمهور كبير من الطلبة و الطالبات... يلبّي كل طلبات الأغاني دون كلل.. ما في زول شافو يوم بياكل أو بيشرب كباية شاي أو حتى موية... ولا في زول عارف عثمان بيجي من وين ولاّ بيمشي وين... ما كان بيتبادل أي حديث مع أي شخص ..خلاف طلب الأغنية و الإستجابة الفورية من عثمان.. حتى إسم عثمان..هل هو إسمو الحقيقي...ولاّ أُطلق عليهو من أحد الطلاب... عثمان... من بسطاء الأرض... الذين إذا غابوا ...لايذكرهم أحد... ___________ قرابة ال 30 سنة ..وأنا أتسائل...عملت فيك الدنيا ايه ...يا راجل يا طيب... ___________ طبت حياً أو ميتاً أيها الرجل الفنان...
09-02-2013, 00:53 AM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
عمر أومو... من أساطير الجامعة في تلك الفترة... كان أكبر منّا سناً... حين دخلنا الجامعة..تقريباً في أوائل الثلاثين... كان يسكن داخلية فلسطين ..في غرفة منفردة على ما أظن... كل المعلوكات المتداولة عنّو ...غير مؤكدة... قيل إنو إترفد من كلية العلوم ..وأصيب بعدها بحالة نفسية... وأوصى الطبيب المعالج ..بمكوثو في الجامعة ..حتى لا تتدهور حالتو... كان شخص نظيف جداً و مهندم في لبسو... كانت ليهو كل إمتيازات الطلاب من التسجيل في الداخلية و دخول (السُفرة)..والمكتبة..وكل الحرم الجامعي..عدا حضور المحاضرات ...طبعاً بين الحين و الآخر كان بيعقد أركان نقاش ..خاصة بيهو... وكانت تنافس أركان نقاش التنظيمات السياسية... أكتر من ساعتين يتحدث أومو عن مواضيع ما عندها أي رابط... يبدأ موضوعو دايماً ب (النقطة الأولى)...وحتى نهاية كلامو ..ما بتعرف النقطة التانية شنو.. كان أومو يجلس أكتر من 6 ساعات يومياً في المكتبة الرئيسية... وهو منهمك وسط المراحع في كتابة كتيرة جداً.. وكانت الشائعة ..أنو تنبأ بحريق المكتبة ..ولذلك كان يقوم بنسخ المراجع ..حتى إذا تحققت نبؤتو...تصبح المراجع فقط في حوزتو.. تركنا الجامعة و عمر أومو مازال في داخلية فلسطين ..ويحلم بتحقيق حلم حياتو..بنسخ كل مراجع المكتبة... _______________ تُرى ..أين أنت الآن يا أومو؟؟
09-02-2013, 02:21 AM
صلاح عباس فقير صلاح عباس فقير
تاريخ التسجيل: 08-08-2009
مجموع المشاركات: 5482
الأخ محمد محمود السلام عليكم رغم أني ما تشرفت بالدراسة في جامعة الخرطوم (آنذاك)، لكن برضو كأني أعرف هذه الشخصيات، وعموماً التساؤل عن مصااير الناس اللي كانوا جزءاً من حياتك في يوم من الأيام، لا شك مثير للشجون! أما عثمان الفنان:
Quote: عثمان الفنان... مكانو المفضّل ...ال مين رود قلّ أن يغيب من الحضور للجامعة...
على ما أظن مرة في زياراتي للجميلة ومستحيلة، شفت لي زول قاعد يغني، ويداه في شكل عود يعزف عليه، ويردد بمزاج: ((تسألوني عن حبيبييييي وعن حكاياتو البقن )) على ما أظن ده هو زاتو!
09-02-2013, 08:52 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
سلامات محمد محمود عمر أومو ما حصّلناه في النصف الأول من التسعينات لكن سمعنا عنه, وكذلك حمودة الحلاق اذكر كان في واحد كبير في السن نسبيا تلقاه قاعد في ضهر التور لابس جلابية و يغني براه ممتّع روحه شفناه في البرلم لكنه اختفى تاني لا أدري ماذا حل به
09-02-2013, 09:31 AM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
Quote: ذكر كان في واحد كبير في السن نسبيا تلقاه قاعد في ضهر التور لابس جلابية
بالتأكيد هو عثمان..ف ضهر التور كان من الأماكن المحببة ليهو.. على أيامنا ما كان كبر السن ظاهر عليهو تعرف يا محمد البشرى كان عندي إحساس إنو بيهتم جداً بسماع الجنس اللطيف لأغنياتو.. فكان بيختلس نظرات خجولة جداً ليهم ..ليرى ردة فعلهن... __________ الشي المحزن إنو كلنا كنا نستمتع و نضحك مع ترنيمات عثمان.. وهو جالس بالساعات في مكانو.. دون ما يفكر واحد يبرّو بكباية ليمون أو ساندوتش... شكراً ليك يا حبيب ...
09-02-2013, 09:09 AM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
سلام يا سيد الاسم (محمد محمود محمد طه) حولاااااا!! سلام لكم ولضيوفكم الكرام من الشخصيات في ذهني هاشم محمد أحمد بلول - قانون - كان الواحد بتخيلوا كدة يكون رئيس وزراء .. اين هو؟ برضو ابوبكر الصديق الزيلعي (صديق الزيلعي) اين هو؟ عبدالرحمن دريسة (عبدالرحمن بابكر محمد خير بشارة) - هندسة - كان من ظرفاء الجامعة - خاصة في الكورة: اين هو؟ === وعلى وزن "ويصلّح الساعات" وينك يا محمد وجهت ليك نداء بالمشاركة في البوست اياه ولسع منتظرين (خاصة عن طرائف الاسم)
Quote: قال أخ قال بالله شوف الجلكين ده ههههههههههههههههه.
والله بناتي يسمعوا كلامك ده..يزعلوا منك زعل شديد.. عموماً الشباب شباب القلب ياحبيب..(عبارات سن اليأس) ________ حقيقي أسعدني مرورك (أخوي) الشيخ.. وإن شاء الله نشوفك في الخرطوم أو الأمارات..والملعب بيناتنا... سلام و تحايا
09-02-2013, 08:20 PM
عبدالأله زمراوي عبدالأله زمراوي
تاريخ التسجيل: 05-22-2003
مجموع المشاركات: 744
أثناء قراءتي لهذا الخيط المشوق التفاعلي استرعى انتباهي الأخ سيف عاشق الرقص. تذكرت أخاً فاضلا عاش معنا في منطقة شلالات نياجارا واسمه سيف الدين النقرابي نحيف ويزينه التهذيب الشديد. عندما يدخل حلبة الرقص يتحول سيف الى شخص آخر لا تكاد تصدق انه ذلك الرجل الوديع. يرقص منتشياً ولا يتوقف حتى تتوقف الموسيقى والغناء. شخصياً اعتقد انك تعنيه وقد درس في جامعة الخرطوم.
ان كان هو فانه يعيش سعيدا ويعمل في دولة خليجية وله التحية أينما حل وارتحل ولك أيضاً الشكر على هذا السفر الجميل.
09-02-2013, 09:47 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: الراقص المميز من نواحي الاداب كان يسمي تاج السر (السر) فهو راقص مدهش وخاصة في حفلات شرحبيل
لا أعتقد أخونا عبد الكريم... عموماً قد يأتي واحد من الأخوة ..يأكّد المعلومة... أما سيف ..فكان تخصص أبوعركي فقط.. التحية ل سيف و تاج السر ..ولتشريفك ..أخونا عبد الكريم
09-02-2013, 10:44 PM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
يا سلالالالام يا عبد الله عثمان.. تعرف حكيت عنك لواحد من الأصدقاء... قال لي لو عبد الله عثمان ال في بالي...جانا زيارة الهند في التسعينات ..ونسيت أسألك من صحة المعلومة... __________________
Quote: عبدالرحمن دريسة (عبدالرحمن بابكر محمد خير بشارة) - هندسة - كان من ظرفاء الجامعة - خاصة في الكورة: اين هو؟
توارد خواطر عجيب يا عثمان...دريسة من الشخصيات ال في بالي من الصباح أكتب عنها... الرجل المرح و البشوش...وصاحب كل الطلاب.. كان دايماً ما يقود المشجّعين في مباريات هندسة مع إقتصاد... وفي الحالات النادرة ال بتفوز فيها هندسة على إقتصاد...ربنا يحلّنا من دريسة... ...دريسة الآن مهندس مدني رفيع المستوى... نفّذ كثير من المشاريع في السودان.. قبل سنين هاجر للسعودية ..وكوّن شركة في المدينة المنوّرة.. الآن رجع السودان نهائياً... له السلام و التحايا هذا الرجل البشوش... وسلامي و تحياتي لك أخي عبد الله
09-03-2013, 00:18 AM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
كمال بشاشا ... عرفت مؤخراً ..إنو بشاشا عضو المنبر ... هو نفسو كمال الذي أذكره في الجامعة في تلك الأيام... كان مميّزاً بالشعر ال آفرو الكثيف و بناطلين الشارلستون.. كنت أظنه مساعد تدريس أو أستاذ في كلية الآداب... لم أراه في يوم من الأيام يحمل كراس أو مرجع ... كنا مغرمين بحضور أركان الأساتذة دالي و القراي... كان إنبهارنا بغير حدود لكم المعرفة المبذولة من أستاذنا عمر القراي .. مع إعجابنا بإفحام (دالي) للمرحوم محمد طه و غيره من المشاركين في أركان النقاش... إلى أن يظهر كمال في ركن النقاش ... كمية من المصطلحات الفلسفية...وأسماء الفلاسفة اليونانيين ..لم نسمع بهم من قبل... كان لايكل من إيراد نظريات فلسفية (غميسة) مع إستماتة تامة في محاولة إثبات أخذ الأستاذ محمود محمد طه للفكرة الجمهورية من هؤلاء الفلاسفة.. ورغم تسطيحنا في معظم مداخلات كمال.. إلاّ إني أشهد له بعفة اللسان و عدم الميل للتجريح ..وطولة البال في الدفاع عن ما يعتقد ... ....التحية و التقدير للأخ كمال بشاشا
صديق الزيلعي هو الآن الدكتور صديق الزيلعي بعد دراسته وتحضيره لدرجة الدكتورة في الاقتصاد والعلوم الاجتماعية ويعمل الآن باحثا في احدي الجامعات البريطانية وقد اجري دراسات حول المجتمع السوداني بجبال النوبة ثم واصل بحوثه في المجتمع السوداني الحديث بمافي ذلك الحركات العمالية ولايزال يواصل بحوثه العلمية وهو متزوج ولديه اربعة من الابناء وقد تخرج اكبرهم من الجامعة. وكغيره من ابناء جيله تعرض لبطش النظام وسجونه وبيوت اشباحه وقد كاد ما تعرض له من تعذيب في تلك الفترة ان يقعده بعاهات مستديمة الي ان تمكن من النجاة بجلده من السودان في اوائل التسعينات. وقد اصدر الدكتور صديق حديثا كتيب حول تاريخ الحركة العمالية ويقوم ايضا بتقديم المحاضرات حول انشطته البحثية.
09-03-2013, 09:07 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: لا أعتقد أخونا عبد الكريم... عموماً قد يأتي واحد من الأخوة ..يأكّد المعلومة... أما سيف ..فكان تخصص أبوعركي فقط..
تسلم يا محمد محمود وحياك وحي الغمام سيرة ذلك الزمن الجميل حقا الذي كنا فيه دارويشا نجوب طرقات تلك البقعة المدهشة فترن وتنئن كل اشيائنا من روعة جامعة الخرطوم فيي ذلك الزمان وامس انا عملت المداخلة السيفية دي وكنت مثقلا بجراح النعاس والارهاق في كراكير وجخانين الغربة العجيبة واليوم ذي ما بقولو راسي جاء تماما ولمزيدا من التاكيد لحقني صديقي خليل عضو هذا المنبر بتاكيد معلومة (سيف علوم) فالراجل كان طالب علوم وكنيته (سيف علوم ) ومن اعضاء المنبر هنالك الاخ (طه جعفر) و(بكري ابوبكر) سيد الحوش فعندهم الخبر اليقين ومزيدا من التثبت .. سيف وكما ورد في (بوست اليوم الحار الما بندار) وهو بوست تاريخي في هذا المنبر جاب بتفاصيل موغلة في الحنين سيرة تلك الايام (النصف الثاني من التمانيات) ورد فيه بان الاخ سيف يقيم الان في كندا تحديدا في الحدود مع امريكا فحياه وحياك الغمام وحي ام نخيل تلك الجامعة الوطن وكل طلابها في تلك الفترة التي كانت فترة مترعة بالجمال وشحمانة بالاشياء التي لن تنسي ومهما طال الزمن
وشكرا علي هذا البوست الوفي سنتابع
09-03-2013, 09:12 AM
ALWALEED ALSHEIKH ALWALEED ALSHEIKH
تاريخ التسجيل: 01-11-2013
مجموع المشاركات: 884
الأخ العزيز محمد لك كل الود و الأشواق سيف طالب في كلية العلوم و هو جعلي حسباً و نسباً و سكناً و ثقافةً و لذلك بجانب رقصه المعروف في حفلات الأستاذ أبوعركي البخيت كان مشهوراً بخلع جلبابه و الركز للبطان و سوط العنج في أسابيع روابط مناطق الجعليين الثقافية خصوصاً عندما تغني مغنية التراث الجعلي حميراء و مع ايقاع الدلوكة نجده في باحة الرقص خالعاً جلبابه راكزاً للبطان و خارج حلبة الرقص انسان خلوق يتسم باللطف و الحياء له التحية و الود أينما كان. من الشخصيات التي أذكرها بجانب أومو و عثمان هنالك شخص يسمى أحمد هارمونيكا أروع من سمعت يعزف هارمونيكا و كان نادراً ما يفعل ذلك دوماً كان يتكلم عن الترابي و حديث الذبابة و اختفى أحمد عندما انتقلنا للسنة الثانية و لم أعد أشاهده في الجامعة أيضاً من الشخصيات التى لا أنساها ذلك الشخص الذي كان يسير داخل الجامعة مرتدياً الملابس الداخلية فقط و كثيرون غيره ممن صارت لديهم مشاكل نفسية مثل حسبو قانون وطالب هندسة الكهرباء الذي لا أذكر اسمه و أخيراً تحضرني مقولة للراحل العظيم دكتور حسبو عن أن مستوى الجامعة تدنى في زماننا لقلة عدد المجانين و هو أحد معاييره لقياس مستوى الذكاء الجمعي لطلاب جامعة الخرطوم و لست أدري ماذا سيقول لو كان امتد به العمر ليرى طلاب جامعاتنا الآن. و ختاماً لك الشكر على هذا البوست و ربما أعود لاحقاً. إضافة الأخ الذي سأل عن هاشم بلول أفيده بأن الحبيب هاشم بلول محامياً مشهوراً في مدينة كوستي الغراء وهو رجل خلوق تشرفت بمزاملته و صداقته أثناء الدراسة و التقيته آخر مرة قبل حوالى خمسة عشر عاماً في مدينة كوستي بمنزله أثناء زيارتي لها لحضور زواج الأخ المليح خالد خريج كلية الهندسة في نفس الفترة. لكم و لهم جميعاً كل الود و آسف على الإطالة
09-03-2013, 09:30 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
تحياتي يا الوليد الشيخ و ايووه انه (بابكر) من نواحي منطقة سنجة وكا باني نظريته الجنونية تلك علي (الما غنتك فيلد) اي القوي المغنطيسية ففي اركانه التي كان يقيمها في اي مكان وكيفما اتفق كان يفسر اي ظاهرة في الكون بانها مربوطة بتلك القوي المغنطسية -- وعمر اومو وهو من نواحي الابيض كان معه في فترة من الفترات اخا له متقمص شخصية (عميد في الجيش) وكان عمر اومو يناديه بالعميد وعندما سكنا معنا في داخلية فلسطين وكنا برااالمة كرت كرتونة كنا نناديه بالعميد وننادي عمر او بالبروف,,,(كتبت عن جلابيتي الجديدة لنج وانا برلوم التي ذهبت الي الجامعة وعندما عدت وجدت العميد اخو عمر اومو لابسها) وعندما حاولت اعمل كركبة زجرني عمر اومو وقال لي يا زول خلاص الجلابية دي العميد شااالها.... فسكت
09-03-2013, 09:52 AM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
الأخ عبد الكريم...سلام.. أعتقد إني أخطأت في نسبة سيف لكلية الآداب .. ولكن المعلومة كانت راسخة في الذهن من الزمن داك إنو في آداب... ______________
Quote: وعمر اومو وهو من نواحي الابيض كان معه في فترة من الفترات اخا له متقمص شخصية (عميد في الجيش) وكان عمر اومو يناديه بالعميد
فعلاً العميد ظهر و نحن في السنة الرابعة ..وكنا نسكن داخلية الرهد..المجاورة لفلسطين في البداية كانت الإشاعة إنو حضر لإرجاع عمر أومو لآهلو... بعد فترة لقينا سعادتو ماخد راحتو للآخر في الداخلية.. وسمعنا إنو مشى لعميد كلية العلوم ..و وبّخو قائلاً..(عمر ده ما كفاهو ..مالكم ما عايزين تدوهو شهادتو لغاية هسة؟).. __________ شكراً ليك كتير يا كرومة ...والبركة فيكم في الجلاّبية..
09-03-2013, 03:00 PM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
الوليد الشيخ خوجلي... الدفعة من أولى إبتدائي... كيفك وكيف البنيّات وأمهن... كنت متأكد لو ما البوست جابك ..حتجيبك سيرة الأخ هاشم بلول.. ___________
Quote: الشخص الذي كان يسير داخل الجامعة مرتدياً الملابس الداخلية فقط
والسجارة في يد و كباية الشاي في الأخرى... لا يفارقونه... كنت أراه يأتي بأرجله من نواحي بحري...عن طريق كبري النيل الأزرق.. سمعنا عنه أيضاً كثير من الشائعات..و ارتباطها بتفوقه ..وغيابه عن أحد الإمتحانات نتيجة مقلب من زملائه في الحجرة..... وبعدها أصبحت حالته كما كنا نراه... ________ تحياتي الحارة لأخونا خوجلي...وفي إنتظار عودتك ..
09-03-2013, 03:56 PM
khaleel khaleel
تاريخ التسجيل: 02-16-2002
مجموع المشاركات: 30134
الأخ خليل ...سلام و تحايا... أعتقد إنو ذكريات الجامعة ..هي الزاد للكثير من الزملاء.. فهي آخر الأيام الجميلة و النقيّة... ________ طارق أب شوك ورانا في الجامعة ..حضرت مناسبة زواجه قبل سنوات في أمدرمان برفقة الأخ جلال بلال.. له عاطر التحايا...
Quote: ونسال معاوية اب شنب ود اقتصاد وطارق القصير ود ابو عشر ودانيال ود بورتسودان اقتصاد
معاوية أب شنب (ميو)..قابلتو رمضان 2011 في دبي..مع الإخوة الضو و عيسى..من زملائنا.. طارق القصير علمت إنو في السعودية.. الأخ الحبيب والزول الراقي دانيال ..عرفت إنو هاجر من مدّة طويلة لأستراليا... ..لهم جميعاً خالص التحايا ولك بصورة خاصة أخونا خليل على المشاركة ..
09-03-2013, 07:24 PM
Balla Musa Balla Musa
تاريخ التسجيل: 12-30-2004
مجموع المشاركات: 15238
Quote: بسأل: هل سيف علوم كان عندو جريدة حائطية إسمها عذابات؟
هلا دكتور بلة وحتي ياتينا شفت من اطراف المدن الاسفيرية من يفتي في هذا الامر لانو انا ما بتذكرها فلقد وهنت الذاكرة ياااخ
وخليني احي زول كان الدفعة القدامنا في الاقتصاد اسمو احمد شندي له جريدة حائطية كان بعلقها في البورد بتاع الجرائد اسمها (اخر تسطيح) كانت جريدة خفيفة الظل ودمها خفيف
--------------
محمد حبابك يااخ وتحياتي و بذكر معاوية ابو شنب وطارق وبرعي ودانيال يولعت مزيدا من جمر الحي لانو الناس ديل واحنا برالمة كانو في داخلية الرهد وكان نعم السناير والاخوان الكبار وكانو خير دليل لنا في جخانين الجامعة الغميسة ونذكر في الاثر ياسر وعاطف وجنجا وثلة من الرائعيين الذين رسخو لنا جمال وروعة الجامعة
09-03-2013, 09:44 PM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
Quote: ونذكر في الاثر ياسر وعاطف وجنجا وثلة من الرائعيين الذين رسخو لنا جمال وروعة الجامعة
ديل طبعاً الدفعة ال ورانا.. كانت دفعة مميّزة جداً ..أحمد شندي و عبد الله جنجا و ياسر و النقيب والحبيب قرشي ادريس.. قابلت جنجا في رمضان ..وقاموا بأنشاء منظمة خيرية ..بأسم خريجي كليّة الإقتصاد.. قاموا في رمضان بنشاط مميّز جداً ..بزيارة أسر كل الذين توفّوا من خريجي الكلية... وكانت بادرة مقدّرة جداً من الشباب ديل بقيادة جنجا... التحية ل جنجا و كل الأخوة في إدارة المنظّمة.. شكراً ليك تاني أخونا كرومة
09-03-2013, 09:29 PM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
Quote: بسأل: هل سيف علوم كان عندو جريدة حائطية إسمها عذابات؟
لا اعتقد يا دكتور.. فسيف بعيداً عن إيقاعات أبوعركي ..زول جاد جداً..بل أقرب للصرامة... أذكر مرة ..تاني يوم لحفلة من حفلات عركي في دار الأتحاد..وكان سيف نجم الحفل كالمعتاد.. قابلنا سيف في النشاط ..وكان معانا زميل أول مرة يشوف سيف في الحفلة المعنية.. بادر زميلنا ده بالهزار مع سيف ..بإعتبار الشخصية ال رآها في الحفلة ..والرقيص العجيب.. فما كان من سيف إلاّ والرد بكل صرامة علي زولنا ده..ووقّفو عن التمادي في الهزار ... مرورك شرّفنا.. دكتور بلة..
09-04-2013, 10:26 AM
عبدالله عثمان عبدالله عثمان
تاريخ التسجيل: 03-14-2004
مجموع المشاركات: 19192
شكرا لجعفر علي ولوليد الشيخ عن الأخبار عن صديق الزيلعي وهاشم بلول وليتنا نراهما في حكومة ديمقراطية تدير السودان آمين بخصوص الهند يا (محمد محمود محمد طه) نعم زرتها مع زوجتي نزيهة محمد الحسن مطلع تسعينات القرن الماضي وقد اكرمنا الشباب في بونا ودلهي وبومباي وغيرها ايما اكرام وقد كتبت عنها في حينها لبعض المقربين وآمل ان يأتي يوم لإعادة نشر ما كتبت كمان مرة واحدة بسأل من السماني احمد الشيخ السماني - اقتصاد وجمال حسن عتموري - قانون ليهم وحشة بالجد سلامي لهم ولكم جميعا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد محمود محمد
محمد البشرى الخضر
عبدالله عثمان
الشيخ سيد أحمد
عبدالكريم الامين احمد
ALWALEED ALSHEIKH
khaleel
Balla Musa
فيس بوك
تويتر
انستقرام
يوتيوب
بنتيريست