روحي مكركرة وجسمي مهدود من حياة الالم والبؤس وكمان جات عليها عاطلة دا صبح شنو دا يا البخيت قوم تقوم غيمتك قال شنو مرهق ومفلس أنت متين كانت عندك قروش ولا عيشتك بتشبه عشية البشر زول جربان بس عندو لسان يا خي أتحرك أمشي أنشاالله للدكان الجنب البيت شوف رغيفه وطحنية عشان تفطور فطور يسندك كدا للعصر وبعدا ربك كريم يا خي والله عدمان القرش وكمان ما عندي أي رغبة أقوم من السرير تعرف السرير دا أجمل حاجة في حياتي لوما كان عندي سرير والله كنت من نوم الارض بقت بس طوبة من الارض واليها يعني ما في جديد وهو الدرجة الوحيدة اللي عاملة للواحد قيمة ومقام وأنو فوق للأرض شوية ياخي أتحرك بالله أنا تعبت ما قولوا ليك في الدين( لنفسك عليك حق )أنت شنو يا خي والله ما مامشي أشحد أصلو ولا بقول لزول حالتي تعبانه والله أنتي كان عارفة كل الحله الحله شنو والله البلد كلها في ضيق جنس متاهات وعذاب وهم منو اللي بحسوا بيك ولا فاضين يشوفوا مشكلتك شنو وهم أنت والله والزيك دا مشكلتو شنو يا خي بس قطع حاجاتك دي في حشاك أنشالله تقتلك عشان ترتح من البهدله والجهجهه دي كمان لو مت البكا حقك ح يتنهي بمراسم الدفن في المقابر زول ما مكلف أبدا والله من المؤمنين خرجت روحك للجنة أنت في حياتك العادية بين الناس هنا قايل كنت عايش والله أخير منك درما حارس المقابر شخص معروف حتي البشير بعرفوا لكين ياركام الليبعرفك منو أنت انت مسجون في جنونك وأوهامك ! أنشالله أنا ذاتي نفسك اللي عايشه معاك أطير منك جد كهرت القعدة في جوفك الزي الجحر دا حار وكمان أصلوا مابعرف الفرح يا كافي البلاء لا بتسفر ولا بتمشي محلات فرفشه وحتي الضحك ما نتعرفوا يا خي موت أحسن دي حياة شنو الاكل في عذاب والحركة مافي والقروش زي ليلة العيد من سنة لسنة حتي البنات الجكس الجكس الحقيقي كلهن فروا منك بس بقوا الكسار والكبار شديد زي متحف الشمع بقت ذكريات يا خي دي وقعت شنو من الشغل طردوك في البيت غير الكديس اللي معك دي ماعندها حظ زي كدا ما عندك زول بيجيء يسال منك أبدا ولابيدخل الاوضة الواسخة حقتك دي وال###### لما ما لقي أي شيء ياكلوا قال أحسن الشارع من جوارك المايل دا النهار قاعد في النت والليل قاعد في النت دي حياة شنو بقيت زي شفع الجامعة حارس الكمبيوتر زول مرض غايتو ألله في سماوه يحلني منك سمعت يا ناس في زول بتكرهو نفسو والجوف العايش فيهو كمان سجمان ودي نفسي وكمان بتدعي علي بالموت كأنها ما ح تموت معي مش عجايب !! قالوا كان الدنيا علم علم النفوس سر من الاسرار ما أظن في حل قريب لما الزول نفسو تبرأ منو دا جنب عديل أها الحل شنو ؟؟؟ بالله دعوتك لي بالفرج .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست