|
العيش حرام مادام أري الموت يحل !!!!
|
الكاتب / زكريا عوض بابكر منتديات البركل
يا أخوانا نظمو نفسكن .. العيش بيكفيكن .. قولو بإسم الله . - سيب النضمي الكتير يا زول وشوف شغلك.. وزع عيشك تنظيمنا ما عندك شغله بيهو . - كيف ما عندي شغله بيهو؟ مليون يد ممدوده أدي منو فيكن هسّع ؟؟؟ - آآآآخ ... كُراعي .. كٌراعي ياأخي .. يازول إنته طالع فوق كُراعي ..أنزل..الشي الطالع فوقه ماها طوبه ..آآآآآخ . - يا أخوانا ما تدّفرو .. ينعل أبو الأفران لأبو الفكر فيها زاتو . - يا ولادي عليكن الله عمتكن عندها الراطوبه ومابقدر علي الوقاف والمدافره ..هاكن .. هااكن كيسي ده سولي فيهو رغايف.. القروش في الكيس . - يا أبو طويله إنته .. أيوه إنته ده .. أُمال أنا !! .. زح كدي ولا كدي .. مضارينا لاعايز تكابس تشيل عيشك ولا مخلينا نحنه نكابس .. ده شنو ده .. يحرق الأفران ويحرق يومه . - يازول الأفران أصلها حرقانه .. شوفلك نعل تاني . -وااااي يا أمي ... واااااي يا ضُلعي.. أنا حا أمووووت . - يا أخوانا الشافع ده فطستو ... حرام عليكن .. يا شافع أمرق رقبتك بتلحق أمات طه . - تُفي عليك يا ######## ... إنته ما عندك أخوات ... غور أمش محل الرجال هناااك .. مندفس وسط الحريم وكمان تقل في أدبك . - مالو سوالك شنو ؟؟ - آبعرفو !!!! - الله يخيبك آ الباطل !!.. تعال هني مع الرجال تجيك الصاقعه التلحقك أبوي .. بس الواحد فيكن ما لقالو فرصه علا ويستقلها أبشع إستقلال ... طاااااخ - عفيت منك والله يستاهل عشره كفوف مو كف واحد . - يا جماعه .. قروشي وقعت تحتكن .. كدي زحو شويه اللفتش قروشي . - يا أخي مو العيش ده خليناهو .. زحو زحزو أمرقوني .. نمشي نسويلنا قُراصه ولا كسره ولا سجم رماد داعكنا . - يا اللخو ... هييييي .. لو سمحته إييدك دي شيله من كتفي .. يازول أنا ماني عفريته لامن أشيل حمولتك دي . - هو عليكن الله هسّع ده عيش !!العيشايه متل زرارة الكبوت - إنته بس أحمد الله اللقيتو نحنه لا زرارة كبوت لا زرارة أبرول مانا لامين فيها . - عليا الليمان نحنه نستاهل ..من حريمنا خلن العواسه نحنه إتملطشنا ... سممممح زمان نجيب دقيق القمح والذره وحريمنا يعوسن وفي أمانة الله لا رغيف ولا مدافره . - يا زول حريم الزمن ديل أدهن الفصاحه والنضمي في المسلسلات والموبايلات والفيس بك.. عواسة شنو البيعوسنها.. والله الوحدي فيهن تعوس علا يجيها إلتهاب ولا طفح جلدي ... حريم متل حلاوه قطن . - آآآآآآآآآآآخ ..عيني .. عيني يابني آدم .. أصبعك الطويل ده تشانا لمو عليك .. إنته عميان مابتشوف !! - سوري .. سوري يا ابن العم . - أنا بس داير أعرف الجديد شنو؟ الخريف ده علاقتو شنو بالدقيق والأفران !! فرن واحد وقع ضرب الدلجه مافي .. والأفران دي شغاله بالغاز ما بالحطب زي زمان .. والطريق ما إنقطع الجرارات تنقل في الدقيق . - السبب أنا بوريك ياهو .. الزيفه جوعت الناس وبقي الواحد يضرُبلو خمسه عيشات في الوجبه الواحدي. - فك .. فك يازول ده كيسي ..أقولك فك .. كمان جابتلها صلبطه !! أمش شوف كيسك وين ده حقي . - يا أخوانا البلد دي أصلها ما فيها حكومه !! المسؤولين ديل ماهن شايفين الصفوف والمدافره والكباس القدام الأفران دي . - والله إنته فااايق ..يا أخينا حكومة شنو البتشوفك!! والله ماتجيب خبرك .. والمسؤلين البتقولن ديل عيشن يجيهن عند أهلن وطوسته كمان مو متل عيشك السجمان ده . - الضيق وضنك العيش ده سببو كووولو عمايل الناس .. بماكسبت أيدي الناس ..صلحو عمايلكن يا عالم . - يامولانا عليك الله ماتوجع راسنا ..عمايلنا نحنه ولا عمايل المسئولين في البلد ..إنته تعاين في الفيل وتطعن في ضلو ؟؟ - يا أخوانا هيييييي .. خلاس شطبنا .. العيش كمل .. أمشو شوفولكن فرن تاني نحنه عايزين نقفل . - يقفل نفسك إن شاء الله .. بالله يا جماعه دي حاله دي ..بلد أمها ميته وأبوها مسافر .. كل زول شغال علي كيفو .. شكيناكن علي الله يا هااادي المسئولين .
المصــــــــــــــــــدر
|
|
|
|
|
|