|
سيناريو إجتماع مُلابسات عودة الطائر الميمون
|
سيناريو إجتماع التبرير وإخراج البيان الصحفي لعودة طائرة الرئيس مكشوشه من الأجواء السعودية:
رئيس الإجتماع: شوفوا يا جماعة نحنا الليلة مجتمعين عشان نشوف لينا تبرير للناس عن مصيبة الكشة الحصلت !!! بس أهم حاجة ما نزعل الجماعة ديل يقوموا ما يرسلوا لينا الريالات ويحمونا الحج والعمرة...!!!
مسؤول (1): نقول بنزين الطياره كمل عشان كدة رجعت...
رئيس الإجتماع: ياخ بنزين شنو ما كان ممكن يتمو التنك من جدة،، شوفوا حاجة تانية ....
مسؤول (2): سيادتك ممكن نقول كان في عجاجة منعت الطيارة من دخول أجواء السعودية عشان كدة جات صاده..!!!
رئيس الإجتماع: عجاجه في عينك ،، حسي الكلام ده كان مشى على المواطنين الجن القاعدين لينا في النت ديل نقول ليهم شنو؟؟
مسؤول (3): الله أكبر ،، بس لقيتا ليكم وبأسانيد كمان: نحنا مش في العشرة الأواخر من رمضان؟ خلاص نقول ليهم لما وصلت الطيارة قصاد مكة لقت ليلة القدر نازلة فما قدرت تمر ورجعت وكمان نجيب لينا كم واحد من أخوانا يشهدوا أنه الطيارة لما نزلت كانت بتشع نور ومحركاتها بتهلل وتكبر...
مسؤول (1): الله أكبر ،،، الله أكبر ،، هي لله هي لله،، الريس بين الله أكبر...... بقية المجتمعين يرددون خلفه كقطيع من الخراف...
مسؤول (5): في سره (الناس دي بتفكنا متين نقبض البدل ونكسح على الشقة المفروشة لي ناس ................... زهجت ياخ)...
رئيس الإجتماع: يا شيخنا الكلام ده ما بيمشي على ناس السعودية،، ديل ناس الشي زاتو،،، العالم عندنا غرقانه وبايته القوى وما جايبين خبر،، أحنا عاوزين حاجة نغطي بيها وشنا البقى زي قعر الدوكة ده وكمان زي ما قلت ليكم ما نزعل الجماعة ديل ،،،
يلا يا جماعة الوقت روح،، شوفوا لينا حاجة...
مسؤول (7): أقول ليكم قوله، نختها كلها فوق الطيار وجماعته أصله أجنبي وزاتو ما راح يجيب خبر القلناهو ده،،، بس نقول ليهم الطيار أجنبي تُجم وما بيعرف عربي ولا إنجليزي وما قدر يفهم السعوديين، بس كمان السعوديين ما يقوموا يزعلوا في حكاية عدم الفهم دي،، بس ما مشكله بنرضيهم ونقول ليهم الطيار هو عديم الفهم...
رئيس الإجتماع: تمااااااااااااااااام يا مسؤول (7) يلا يا مسؤول (4) أخد الكلام ده ظبطو كويس ورسله لي سونا والخرابه التانية ديك اس ام شنو ما عارف.... يلا كده إنتهينا ،،، كل واحد يمر السكرتيره يشيل الظرف حقو....
إنتهي الإجتماع وخرج البيان للعيان...
الشايقي http://www.youtube.com/watch?v=WjNosdjuv7s
[email protected] http://alkatwah.com
.
|
|
|
|
|
|