|
|
 ما بين يالللا والقعود!!!!
|
يبدأ كثير من السودانيين في هذه الأيام حديثهم ب يللا!!
خاصة مذيعو ومذيعات الفضائية الهزيلة بين رفيقاتها الفضائيات الذين يصمون اذاننا كل يوم بلغة عقيمة لا تخلو في كل ثانية من ( متواصلين معاكم , ورجعنا ليكم)!
وما أدهشني لحد الدهشة أني سمعتها من طبيب في لقاء معه للرد علي أسئلة الغبش الذين اضناهم السقم وشح الدواء وقلة الخبرة لدى الطبيب وتردى حال المستشفيات في بلد صار فيه المريض يتم حمله علي أدوات البناء وحمل البضائع( الدرداقات)!
أتعجب من اضمحلال اللغة وقصور التعبير في الوطن حتي توقعت مجئ يوم تعم فيه لغة الاشارة دون استحياء!
في كل البلاد العربية نسمع المتحدثين من العامة والخاصة يتحدثون بالفصحى او العامية (الدارجة) فيوفون , الآ نحن السودانيين فتطول الجملة ونتاتئ ولا نوفى!
ويكثر هذا الامر لدى ساكني المدن فقط!
و لاثبات ذلك تحضرني امثلة ثلاثة: :
الاول: كنت بمعية طفل في الثالثة من عمره وكان يسير في الشارع رجل يقود جملا وصغيره , فأشر الطفل اليهما قائلا: القعود!
ذهبت الي تنقاسي السوق في احدى الأجازات , وكانت لي بنت اخت تزوجت وهي صغيرة السن , ولديها ابنة في السادسة من عمرها أيقظتني ذات صباح قائلة: حبوبة ألبس طريحتك؟
فقالت لها شقيقتي : ما تقوليلا حبوبة ديل اخواتي الصغار!
فقالت لها ذات الست سنوات: نان اقوللها شنو؟ ماها اختك وانتي حبوبتي؟؟؟
الثالث: كنت علي متن حافلة في وسط الخرطوم , وكانت مكتظة بالناس فنزل شاب كي يفسح للنازلين , وتاخر في الصعود مرة اخرى, فهبت امراة كبيرة السن ( يبدو انها والدته) وقالت بعربية فصيحة: وين الغلام؟؟
واتساءل ماذا دهانا الآن؟؟؟
ست البنات.
|
|
  
|
|
|
|
|
|
|
|
Re: ما بين يالللا والقعود!!!! (Re: ست البنات)
|
والله يا ستهم أنا ذاتي محتار في الكلمة الاستهلالية (يللا) دي جات من وين
غبت زي ست سنوات من السودان، لما رجعت لقيت ليك الناس كوولها ما بتعرف تتكلم لو ما بدت بـ(يللا)
يللا قام ويللا عايِن، والغريبة تلقيها مستعملة لدى كافة فئات المجتمع.
ما علينا.. مشتاقين يا زوله، الغريبة قبل ساعات جبنا سيرة الراحل المقيم عبد الواحد كمبال
أحد الأصدقاء كان يحدثني عن تدهور صحة شاعرنا العظيم الفيتوري، وجات السيرة الحزينة
رمضان كريم وتحياتي للأسرة
| |
|
|
|
|
|
|
|
|
|
Re: ما بين يالللا والقعود!!!! (Re: معاوية الزبير)
|
الأخ معاوية ،
رمضان كريم وتحياتي لك ولقبيلة الصحفيين بالدوحة والمغرب,
ووكت جبت سيرة الراحل عبدالواحد كمبال فقد بلغ الشوق الزوبا ولم يعد امامي سبيلاً سوى التزاوق منه !
الله يرحمه فقد فقدنا جوهرة أصيلة وروحاً نقيةً لن تعوّضا! الله يرحمه ويغفر له ويبدل سيئاته حسنات بقدر ما قدم للوطن والبشر من خيرات ويد سخية وقلب نظيف وصافي زي موية الزير!
وعاش ومات مرفوع الراس ونحن فخورون به !
اما فيما يتعلق بإضمحلال اللغة وبديعها الذي فقد بريقه في عهد فساد الإنقاذيين واوهامهم فإنه لمأساة لا تضاهيها ماساة!
في ظل ضياع المؤسسية المحترفة والقادرة علي تسيير البلاد, في وقت يتسربل كل جميل من موروثنا الذي تفردنا به علي كثير من الشعوب والامم! حتي استعصى الحصول علي جملة سليمة من افواه الناطقين كما استعصي الحصول علي لقمة تسد رمق الغبش في خضمِ فساد دولة الفساد الإخوانية فى السودان.
وكما منّ الله علي مصر بالفكاك من بين فكي الغول , نسأله اللطف بنا من مدهم الذي استشرى في الوطن!
ولكنها علي الاقل لمحمدة كبيرة جب أولائك في مصر حيث فيها إضعاف لآفات السودان من امثالهم وتقصير لعمر فسادهم فلن يكون لهم معين علينا في دولة الجوار التي نهضت واغتسلت من دنسهم بأعجوبة لا تخلو من الجهد المضني!
ومنّ الله بالشفاء علي الشاعر المرهف الفيتوري بالصحة والعافية.
ولأخوتي بالمغرب كل الود والتحايا.
وقد اثلج مرورك الصدر ولك التحايا,
ست البنات.
| |
|
|
|
|
|
|
|
|
|
Re: ما بين يالللا والقعود!!!! (Re: ست البنات)
|
ست البنات دا كلو كوم
الجنى البقولوا لي أمجد دا كوم برا
والله الجنى دا التقول بهرررو في كرعي
يومو كل سعيدين وجداً جداً بحسب لي سعدين في الحلقة لقاهن 519 سعيدين
وبحسب لي جداً جداً بلقاهن 913 جداً جداً يعني لو فراهن يسون عشرة جلالايب واربعة عراريق بلدية بي سراويلهن
تسلمي يا ست البنات
| |
|
|
|
|
|
|
|
|
|
Re: ما بين يالللا والقعود!!!! (Re: Haju Muktar)
|
خالد ود عمي محجوب,
ان شاء الله رمضان تمام معاك واللآبري زادك جرامات شوييى !
لكن يا خالد ما هو أمجد براهو المؤلم! حتي المذيعات الشايلات كيلوات من الرءوس فوق الاكتاف ولاب تتطور ولا بتتغير أبدا !
والتغيير يظهر في مهرجان عرض الثياب والحناء بأشكالها المختلفة !
ومما يلفت الانتباه فان المتجدد هو فقط ألوان المذيعات , فلون البشرة الحقيقي يكون في أول يوم تظهر فيه علي المشاهدين ثم يتلاشى اللون الاسمر تدريجيا الي ان يصير كلون المنقة بقدرة قادر!
غايتو يا خالد الواحد من شدة الشوق الي السودان يلقى ايدو مشت علي فضائية السودان وماهى الآ ثوان قليلة ويصيبه الندم والحزن !
عليك الله يا خالد سلم لي علي القردابي, وأحمد وامه ويا حليل بلدنا!
ست البنات.
| |
|
|
|
|
|
|
|
|
|
Re: ما بين يالللا والقعود!!!! (Re: ست البنات)
|
| Quote: ومما يلفت الانتباه فان المتجدد هو فقط ألوان المذيعات , فلون البشرة الحقيقي يكون في أول يوم تظهر فيه علي المشاهدين ثم يتلاشى اللون الاسمر تدريجيا الي ان يصير كلون المنقة بقدرة قادر! |
زمان يا ست البنات موش كانا بنحك التعريفة لما تكون مصدية بي الليمونة
الشي ديل أظهن لقن ليهن لوري ليمون ووقعن في وهاك يا حكيك
الواحدة تسأل السؤال ومابتسمع إجابة الضيف بتكون مركزة مع سؤالها التاني وقد تقطع حديث الضيف عشان ما تنسى
السؤال التاني
غايتو ربنا يعينا علي فضائيات السودان
عشان كدي أنا بحب أتفرج علي برامج أم درمان حسين خوجلي بختار كويس مذيع موضوع حوار
| |
|
|
|
|
|
|
|
|
|
Re: ما بين يالللا والقعود!!!! (Re: ست البنات)
|
خالد اخوي هسع لو الليمون دا كان سووننوا شربات ما كان خلاهن خفيفات الظل وزاد ليهن كرويات الدم ؟
الله يقلع الوطدوا لعقدة اللون في السودان!
لكن كان عمر الجوزلي واحد منهم !!
يا ربي هو برضو جرب الكريمات وعشان كده بينصح بيها ؟!
نحنا ما حتشرق علينا الشمس الآ بزول انقلابيى الانقاذ.
يبدو ان المذيعات والمذيعين حين يحاورون احد الضيوف بيجو للبرنامج خاليى الوفاض! عشان كده بيلفحوا الاجابة ويدغمسوها مع السؤال ويضيع المستمع والمشاهد في غمرة اللفحي دا!
ست البنات.
| |
|
|
|
|
|
|
|
|
|
Re: ما بين يالللا والقعود!!!! (Re: خالد علي محجوب المنسي)
|
| Quote: الاول: كنت بمعية طفل في الثالثة من عمره وكان يسير في الشارع رجل يقود جملا وصغيره , فأشر الطفل اليهما قائلا: القعود! |
السلام عليكم و رمضان كريم
قبل كم سنة كتبت بوست هنا و استخدمت كلمة "القعود" و ناس سألوني الكلمة دي معناها شنو (طبعا ناس المدن). هسي ما شاءالله ياهو الولد ابو 3 سنوات عارف.
برضو قبل كم سنة كنت بشاهد في القناة السودانية و كانت المذيعة في لقاء مع عضوة برلمان من دارفور اسمها مريم تكس و كانت الضيفة قد قالت لمقدمة البرنامج انها درست الابتدائية في مدرسة اولاد و هي الوحيدة الكانت بنت.
تقوم تقوليها المذيعة "اكيد ما بصدقك"
| |
|
|
|
|
|
|
|
|
|
Re: ما بين يالللا والقعود!!!! (Re: Mahjob Abdalla)
|
الأخ محجوب عبد الله ,
وعليكم السلام والله أكرم,
طبعا اللغة حتي وقت غير ببعيد كانت بخير. وكان الصغار علي صلة حميمة بذويهم متصالحين مع بيئتهم ومجتمعهم( قبل انتشار التكنولوجيا التي جعلتهم منطويين عليها فقط فضنوا علي ذويهم باقتسام الوقت بينهم وبين ما فرخته التكنولوجيا رغم حسنها الآ انها زادت من اتساع المسافة بينهما فاختلت اللغة بكل مدلولاتها).
ومرة سمعت مذيعة تسأل فنانة من الواعدات : بتبرفى وين ؟ تقصد أين تقومين بالتدريب علي الغناء!
والبركة في الفضائيات العربية المنتشرة في الساحة والتي بفضلها أمكن للغبش الافلات من ألم الفضائية السودانية واخواتها .
وشكرا علي المرور.
ست البنات.
| |
|
|
|
|
|
|
|
|
|
Re: ما بين يالللا والقعود!!!! (Re: ست البنات)
|
تحية صاحبة البوست وضيوفها
صار من يتحدث عن سلامة اللغة وصحتها متنطعا ودعيا , لاحظت ذلك في لغة الاسافير , فكم من مصحح لغيره بشكل مهذب قوبل بسيل من الاستفزاز والسخرية
اللغة الرصينة الصحيحة مرغوبة فصيحة ام دارجة , فهي تزيل اللبس وتمنع سؤ الفهم ورب كلمة خطأ افسدت المعني ورب تعبيرا صار شتيمة من غير قصد
اما هؤلاء المذيعين والمذيعيات فهم
يرفعون الضغط
ويفسدون المزاج
ويعدونك بالغباء
كمية من اللغة المهدورة وغير المتماسكة ولا تقود لشئ
زوجتي اعجبت مرة بفصاحة مذيع اسمه سعد الدين فنادتني لتثبت لي كذب ادعائي فيهم
حفظت تعبيره ثم سألتها عن معني قوله فلم تجب بل بينت لها تناقض قوله في ذات الجملة
نصيحة
القنوات السودانية سبب رئيسي لمرض ضغط الدم ,
مع كامل التحايا
| |
|
|
|
|
|
|
|
|
|
Re: ما بين يالللا والقعود!!!! (Re: عبدالحفيظ ابوسن)
|
الاخ عبدالحفيظ ,
رمضان كريم,
كلامك في الصميم وضروري تضيف السكري لارتفاع ضغط الدم .
لكن نخف شوية علي سعد الدين لأنه احسن السيئين في الساحة , والشهادة لله هو مذيع ممتاز ومتطلع وواعي وياريت يتفضل علينا ويقوم بتدريب كل مذيعي الفضائيات عسى ولعل ينقذنا من ارتفاع ضغط الدم والسكري!
شكرا علي المرور.
ست البنات.
| |
|
|
|
|
|
|
| |
ست البنات
معاوية الزبير
خالد علي محجوب المنسي
Haju Muktar
Mahjob Abdalla
عبدالحفيظ ابوسن
فيس بوك
تويتر
انستقرام
يوتيوب
بنتيريست