|
|
 بطولة النيلين كرة الصالات ..الببيبسي كلية الهندسة فريق أواب الأمنية.!!
|
ياخ مستمتع جداً ببطولة الصالات المنقولة عبر قناة النيلين والمقامة بصالة هاشم ضيف الله ..
ذكريات جميييلة أسرتجعها مع بطولة الصالات ولعل في البال وأيام الصبا ونحن نتابع اللاعب الفلتة وقتها في ملاعب الصالات اللاعب فيصل كوري ولاحقاً فيصل عجب..
بتذكر جداً فريق البيبسي واللي كان فيهو ثنائية الزين وفيصل كوري ..
بتذكر جداً روعة التشجيع لي فريق كلية الهندسة جامعة الخرطوم وولد إسمو مرضي تقريباً..وكيف كانت النقلة النوعية اللي عملوها أولاد وبنات هندسة في التشجيع وكان عندهم نشيد كده بيرددوهو قبل بداية المباراة تحفة ..
بتذكر جداً فريق وجمهور كمبيوتر مان وتقريبً لاعب الهلال أحمد عبد الله ..
بطولة الصالات في رمضان كانت ملاذ وترويح ومتعة لينا في الوقت داك .. وطبعاً عشان ما ناس صلاح عبد الله وطلحة واساسي يشيلو حالنا بس فعلاً كنا بنهاجر ليها رسسسمي ..والواحد مننا لا يتورع بعد ذلك في إنو يدقها كدر لحدي أمدرمان..
هذه الايام مستمتع جدا ببطولة الصالات المقامة حالياً ووالله بقعد احضرا متى ما تواجدت في البيت كاااملة مكملة واستمتع بي لمسات بعض الشباب .. واستعيد ذكريات الماضي في هذه الاجواء الرمضانية وما أدراك ما دورات رمضان وأشهرها عندنا في امدرمان دورة أسطوانة..
الليلة كان لاعب فريق شكرة أواب الأمنية وحقيقة الفريق ده فيهو أولاد بيلعبو كورة ممتعة بي صووورة ..إستمتعت جداً جداً بي طريقة لعبهم ..فازوا 13-5 ..
صراحة البطولة أجمل من مباريات الدوري الممتاز وفيها حاجات تستاهل الناس تشوفا ..
ويا حليل زماان وسنين زمااان ويااا حليلك يا عجب ويااا حليل بطولة جريدة قوون للصالات ويا حليل فريق كلية الهندسة جامعة الخرطوم ..
|
|
  
|
|
|
|
عمر الفاروق
فيس بوك
تويتر
انستقرام
يوتيوب
بنتيريست