|
|
 مكبرات الصوت في صلاة التراويح ؛ وغيرها !
|
أقرب للرياء .. لا أكثر
كثيرون من المرضى والمواليد الصغار يتضررون من الصوت العالي
من الأفضل استخدام مكبرات الصوت الداخلية في المساجد ... فقط !
والسؤال: ما الداعي لإستخدام مكبرات الصوت أصلاً!
من ناحية اخرى: ما الداعي لترك اضاءة منارات المساجد مضاءة حتى الصباح في بلد كالسودان يعاني من شح الامداد الكهربائي ؟
اضواء منارات المساجد تسبب ازعاع للذين ينامون في (حيشان) واسطح منازلهم !
اضاءة منارات المساجد ليلاً ضرب من ضروب التلوث الضوئي !
|
|
  
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: أيمن محمود)
|
عن تجربة سكني وبيني وبين المسجد الشارع - حقيقة كان صوت المؤذن القبيح والعالي مصدرا للازعاج - لا يوصف
طوال سنين كنت اعتبر احساسي بالانزعاج من صوت المؤذن هذا والامام - ما هو الا قلة ايمان مني!
حتى كلفت قبل بضع سنين بتخطيط وتصميم مجمع سكني من الفلل في مدينة الرياض بالمملكة السعودية
وحسب قوانين واشتراطات التخطيط في مدينة الرياض كان لزاماً ترك مساحة خضراء كمتنفس بالاضافة الى مساحة لمسجد صغير وروضة
بعد اعداد المرحلة الاولية لتخطيط المجمع وعند مناقشتة مع مدير المشاريع وهو سعودي ؛ كانت ملاحظته الاساسية:
ان الفلل المجاورة للمسجد ستكون اقل سعرا واقل مرغوبية من باقي الفلل؛ وحقيقة كات هذة الملاحظة وأهميتها سببا اساسيا في تغيير مخطط المجمع !
الشاهد: ان رأيي هذا يعبر عن كثير من الناس (لا اريد ان اقول غالبية)؛ ولكن لا يجرؤون على البوح به !
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: أيمن محمود)
|
سلام أيمن
| Quote: اضاءة منارات المساجد ليلاً ضرب من ضروب التلوث الضوئي ! |
بالفهم ده معناه ان الاضاءه داخل المستشفيات ليلا تعد ضربآ من ضروب التلوث الضوئي ...ويبدو انك إكتشفت عدم قدرة الطبيب السوداني في علاج الكثير من الحالات...فالسبب وكما يبدو من خلال تحليلك هو في الاضاءه!!!!
مع ان هذه اول مره اسمع فيها بهذا النوع من التلوث.
أيمن رمضان كريم...وقول بسم الله ..هذا شهر الخير والغفران...فلتصدح المكبرات في كل الاوقات تذكر الكثيرين بفضائل الشهر الكريم وتحثهم وتدفعهم نحو الذهاب للمساجد.
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: الشيخ سيد أحمد)
|
مداخله من الفيسبوك
Quote:
محمد عبدالقادر ضرار · الأكثر تعليقا · مدير ــ قسم المشتريات / Anelksa في مكتب محاسب قانوني
((والسؤال: ما الداعي لإستخدام مكبرات الصوت أصلاً!))
غريييييبة سؤالك ده والله يالاخو ؟!! ... لانو اجابتو في طياتو ( سؤالك ) عشان ينبهو الناس الزيك عقولها فاااااارغة ، اللا من الكلام الفارغ زي سؤالك دة هسي !!
خلاس يا ايمن ما لقيت ليك حاجة تفتي فيها اللا في اعز حاجة عندنا ياخ !! خليت الفتوى فوق كمال ترباس وداير تصنقر ليك فوق مكبرات الجامع !!
ياخي عيب عليك واللة ، السودان والناس هناك مشاكلهم اكبر واعظم من نوم ناس ( حيشانك ) ديل الشايل هم نومهم بس !! الناس قاعدة يصفوهم في نيالا ، وانت جاي همك لمبة !!!!! |
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: الشيخ سيد أحمد)
|
الشيخ سيد أحمد سلامات ورمضان كريم
| Quote: بالفهم ده معناه ان الاضاءه داخل المستشفيات ليلا تعد ضربآ من ضروب التلوث الضوئي |
الاضاءة المرغوبة هي التي يستخدمها الانسان للرؤية في الليل او أي من الاستخدامات الاخرى
اما تعريض (الشخص النائم) يعتبر تلويث لنومه، فالنوم الجيد يتطلب الهدوء والظلام التامين، وربما تعلم ان للنوم درجات مختلفة،
يبلغ الانسان اعمق درجات النوم عندما تتوفر له الظروف المواتية من هدوء تام وظلام تام بالاضافة لعوامل اخرى اساسية مثل الراحة الحرارية وراحة الضمير !
فبالتالي الاضاءة في المستشفيات وغيرها والتي لاتسبب ازعاجا لنوم المريض لا تعد تلوثاً
| Quote: مع ان هذه اول مره اسمع فيها بهذا النوع من التلوث |
التلوث الضوئي
Light pollution
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: الشيخ سيد أحمد)
|
اتفق معك تماماً يا هندسة
ضوضاء
تلوث صوتي
تلوث ضوئي
لا لزوم له ابداً
مكبرات الصوت الداخلية كافية جدا جدا
والاماكن داخل المساجد كافية ومتاحة للرجال والنساء والاطفال لمن يرغب
من هم خارج المسجد لا رغبة لهم
ومن كان له عذر، فالفضائيات التي تنقل التراويح موجودة وبكثرة
ابن عمي دكتور احمد وراق عميد كلية الشريعة، طلبوا منه ان يؤمهم في صلاة الجمع في مسجدنا بامبدة
اشترط اغلاق المكبرات الخارجية الا في الآذان والاقامة بحكم ان الكثير من جيران المسجد كانوا من اخوانا الجنوبيين
رفضوا، فرفض
تحياتي ورمضان كريم ياخي
غايتو الا تسردب
ح تجيك كم خبطة من فوق وتحت
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: الشفيع وراق عبد الرحمن)
|
حيا الله أيمن ومشكور على المعلومه
ولكن دعني أوضح أمرآ في غاية الأهميه في بناء المساجد...فقد بنيت تلك المآذن الكبيره حتى يرفع منها الآذان...كما أنها وبطولها الشاهق تكون كدلاله للإستدلال على موقع المسجد حين يحين أوان الصلاه ...هذا من الجانب العقائدي...أما الجانب الإجتماعي الذي يمثله وجود المآذن ...فقد كانت ولازالت المساجد قبله للكثيرين من الذين يدلهم بهم الليل وغسقه الداجي فتكون المساجد وبمآذنها الشاهقه مأوى لهؤلاء.
لذلك وجود اللإضاءه على قمة المآذن ضروره تفرضها ضرورة الإستدلال للباحثين عن ملتجأ.
Quote: الاضاءة المرغوبة هي التي يستخدمها الانسان للرؤية في الليل او أي من الاستخدامات الاخرى
|
جميل جدآ نحن متفقين في هذه الجزئيه.
Quote: اما تعريض (الشخص النائم) يعتبر تلويث لنومه، فالنوم الجيد يتطلب الهدوء والظلام التامين، وربما تعلم ان للنوم درجات مختلفة،
يبلغ الانسان اعمق درجات النوم عندما تتوفر له الظروف المواتية من هدوء تام وظلام تام بالاضافة لعوامل اخرى اساسية مثل الراحة الحرارية وراحة الضمير !
فبالتالي الاضاءة في المستشفيات وغيرها والتي لاتسبب ازعاجا لنوم المريض لا تعد تلوثاً |
كيف تعرف ان هذه الإضاءه التي يتعرض لها المريض لاتعد تلوثآ...فالنوم هو النوم...بل على الأغلب أن الشخص المريض يحتاج إلى درجه أكثر من الهدوء...فكيف توفر له هذه الدرجه وأنت تضئ له غرفته التي يتمطى فيها باحثآ عن العافيه لتدب مره أخرى في أوصاله.
أمر آخر...تلك المآذن يقبع ضوءها في قمتها..فما هو التأثير الذي ستحدثه وهي على ذلك البعد الشاهق؟؟؟
في هذه النقطه أنا مختلف معك...ومختلف معك في مسألة عدم إستعمال مكبرات الصوت.
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: الشيخ سيد أحمد)
|
منطق لكن
قلت لى علشان المهندس السعودي المعاك. فى الفلل الانت صممتها
وختيت. فيها متنفس قال ليك. الأسعار بتاعت الفلل الجمب الجامع حاتكون قليلة
قمت اقتنعت بيهو ولقيت الرايحه منك. وأضفت ليها كمان تلوث ضوء وبيئة
عليك. الله آسى الواحد يرد عليك ويقول شنو وكمان. بكل نفس تقول. ما برد على المهاترات
يأخ انت طيب أصلا. بيتدى الناس فيك فرصة لية ....
عالم غريبة
انا غايتوووو متنفسى. فى سماع. الآذان اها رأيك. شنو
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: أيمن محمود)
|
Quote:
فليكن متنفسك في سماع القرآن الكريم ! ... فهو كلام الله !
|
تصمم. فلل وتشكلها على مزاجك. مقبولة. لكن تفرض انت علينا أنة يكون متنفسنا. وين دى المرفوضة
لأننا أدرى بما نفعل. يعنى أحرار ...... بعدين زول بيحاجج. فى رفع صوت الأذان. عاوز يبقى واعظ؟
أقول ليك انت بقيت مهندس كيف ولا أمسك أمسك لسانى وما أقولها ليك ؟
أحسن أمسك لسانى
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: aosman)
|
aosman
| Quote: أول مرة أعرف بأن الإضاءة ممكن تسبب تلوث, يعني دبي المضائة ليلا ملوثة أكتر من الخرطوم المضلمة |
الاضاءة بتعتبر تلوث فقط لما تكون في الاماكن الغير مرغوب فيها
مثلاً: اضاءة عمود الكهرباء
لما تكون موجهة في اتجاه يضيئ للمارة او السيارات او كليهما معا دون الدخول عبر نوافذ المباني المجاورة في هذه الحالة لا يعتبر تلويث - انظر الشكل ادناه صورة 1
اما في صورة 2 فهذا يعتبر تلويث واضاءة في غير محلها !
اضاءة الشوارع موضوع متشعب وكبير فبالتالي لا يمكن اختزالة في أسئلة تهكمية بسيطة!
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: حسام عبد الرحيم)
|
رمضان كريم يا حسام
Quote: بعد صلاة العصر كل يوم فى محاضرة بالميكرفون الداخلى و الخارجى معا" ..
و عندى أطفال بجوا من المدرسة عايزين ينوموا ..
و مرات بكون عايز أقرأ قرآن ..
المهم اتشجعت و كلمت لجنة المسجد ..
الباقى خلى فى سرك .. |
ههههههههه - أكيد نهروك وعيونم بتقول ليك امشي يا ضال 
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: أيمن محمود)
|
سلامات اخونا ايمن
اتفق معاك تماما في مسالة المكبرات الخارجية ... ويمكن ان تنحصر فقط ان
كان ولابد في رفع الاذان للتنبيه بدخول موعد الصلاة وهنا ايضا يجب توحيد
زمن الاذان ياخي يكون حواليك عشرة جوامع كل واحد ينتظر التاني ينتهي
عشان يبداهو ..
غاية الفوضي وعدم الاهتمام بالاخرين اطفال.. عجزة.. مرضى.. او حتى
ناس ساكت كده مابصلوا .......
بعدين ناس الجوامع ديل ما كلموهم بانو الكفار ديل اخترعوا حاجة اسمها منبه
وموجودة في كل الاجهزة وكده .....
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: محمد الزبير محمود)
|
باشمهندس أيمن وضيوفه الكرام تحية و تقدير
أولا أتمنى إنو سعة صدرك تستمر كده في كامل النقاش لأنو أي بوست بيخص الدين بيكون حساس جداً ، وبالمناسبة دي بسأل الإخوة إذا في مسوغ ديني أو فتوى معينة بخصوص الموضوع ده ، لأنو شايف الإعتراضات كلها على شاكلة (طيب ليه ما إتكلمت عن ...) ، أنا ما عندي رأي محدد تجاه الموضوع ده( فيما يخص الدول الإسلامية) لكن إذا وزنت عرض أيمن للمشكلة والحلول و ردود مخالفيه فأكيد حيكون موقفي مساند للباشمهندس بس بتفضل النقطة اللي بعتبرا أساسية وهي وجود فتوى مقترنة بأدلة واضحة حتى نستفتي قلوبنا.
تحياتي
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: Musab Osman Alhassan)
|
وعليكم السلام ود الزبير
| Quote: ويا الشفيع وراق عرس الشهيد وحفلات الدفاع الشعبي كيف ؟؟؟؟ |
كل مسبب للضوضاء وليست له ضرورة يجب ان يقيف
ولاحظ اني استثنيت الاذان والاقامة وهي الاشعار المهم بدخول الوقت واقامة الصلاة
ادينا مبرر واحد لنقل الخطبة او حتى الصلوات بالسماعات الخارجية يا محمود
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: الشفيع وراق عبد الرحمن)
|
أيمن وضيوفه
رمضان كريم
لاشك ان الصوت العالي فيه أذية لكثير من الناس بغض النظر ان كان قرآن أو غيره
ما الحاجة لاستعمال مكبرات الصوت في الصلاة ؟ فالإمام يصلي بأهل المسجد لا بمن كان خارجه
و التراويح صلاة ليل و زمنها طويل فاستعمال مكبر الصوت فيه ضرر على المرضى وكبار السن والمتعبدين في بيوتهم
ايضا فيها تشويش على المصلين بالمساجد الأخرى القريبة
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: بدر الدين احمد موسى)
|
بدر الدين رمضان كريم
| Quote: غايتو كمية الغضب و قلة الحيلة الكانت عندي لو كنت ذاكرت بيها كانت حياتي غير هسع! |
عندنا قريبنا رجل كبير ومريض وانا اذكر انو كان تعبان شديد ونومو كان بصعوبة من شدة المرض والالم - وحقيقة كنت بسعد جدا لمن اجي القاه نايم
على مرتين حضرت استيقاظه مخلوعا ومنزعجا من شدة صوت المايكروفون وما كان باليد حيلة !
وللأمانة الآن انا مقتنع تماما انو السكن بجوار المساجد اصبح مسألة محتاجة اعادة نظر !
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: أيمن محمود)
|
الحياة في الحضر لها قواعد ونظم لا يبدو ان الأنسان
في بلادنا علي اتساق تام معها لأسباب يطول الخوض
فيها. والقائمين علي امر القوانين التي يفترض فيها ان
تنظمها ليس لهم ما يكفي من معارف ودراية بما يجب
ان تكون عليه. وهذه هي الطامة الكبري!
الأصوات العالية اليومية من مكبرات الصوت في الحي (بغض النظر عن مصدرها)
هي ثلوث بيئي غير مبرر (فيما عدا الضروري منها مثل الآذان للصلوات).
ولابد من ضبطها وحصرها في المكان المحدد بما لا يؤثر علي الآخرين.
خاصة والمساجد تتوسط الأحياء السكنية وتقام فيها الشعائر الدينية
خمس مرات في اليوم عدا التراويح (في رمضان) والدروس احيانا.
لا حياء في الدين. وعلي رجال الدين الذين يصرون علي هذا الفعل
ان يعلموا انه امر منفّر. في بعض البلاد الأسلامية هناك تنسيق بين المساجد في ان يتم
الآذان في كل مساجد المدينة في وقت واحد. وان يحصر في الآذان للصلاة فقط.
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: الشفيع وراق عبد الرحمن)
|
الشفيع وراق عبد الرحمن وتصوم وتفطر على خير
Quote: ابن عمي دكتور احمد وراق عميد كلية الشريعة، طلبوا منه ان يؤمهم في صلاة الجمع في مسجدنا بامبدة
اشترط اغلاق المكبرات الخارجية الا في الآذان والاقامة بحكم ان الكثير من جيران المسجد كانوا من اخوانا الجنوبيين
رفضوا، فرفض |
ابن عملك فاهم الدين صاح، لاحظ رغم علمه الذي يفوقهم لم يستمعوا له - الشغلانة عندهم شوفونية ساي
لاحظ أكثر الناس جهلاً أكثرهم تنطعاً !
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: أيمن محمود)
|
سلام يا هندسه ورمضان كريم
هنالك الكثير من مظاهر عدم احترام الخصوصيه والتغول على حريات الاخريين
وحتى لوكانت هذه الجهات المتغوله مساجد ، كنائس ، كافتريات ،اعراس وسط الاحياء .. الخ . فمثل هذه التصرفات تعطى انطباع
بهمجيه من يقوم بها او يروج لها.
ولو فى شخص من الناس البنادو بتشغيل المكبرات عندو شخص مريض او طفل عندو قرايه ، او زول مدبرس ، ما كان بنادى بى طلب زى دا
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: خالد عبد الحليم سعيد)
|
نحية اخى ايمن والمتداخلين
هناك تعميم صادر من وزارة الشئون الدينية والاوقاف بالسعودية بإستخدام مكبرات الصوت الخارجية فى الاذان والاقامة فقط
واستخدام المكبرات الداخلية للصلاة والتهجد والمحاضرات والتلاوات وغيرها من الانشطة .
لكن الواقع انه لا احد يقوم بتنفيذ التعميم نسبة لحساسية الامر
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: Salah Habib)
|
سلام ياهندسة
انا بختلف معاك في حتة بسيطة
انو الاذان والاقامة والصلاة تكون
بمكبرات الصوت حتي يسمع البعيد
والقريب لكت حتة انو يكون في محاضرة
دي المشكلة اديك مثل امبارح نحن عندنا
عزاء في البلد الديوان مع المسجد طوالي
ومعروف انو كل الناس الفي العزاء بتكون
في المسجد وقت الصلاة مافي مشكلة
لكن بعد الصلاة كانت هناك محاضرة
وبي صوت عالي جدا حتي بقينا
ماسامعين الناس بتقول في شنو
دي هنا المشكلة
تسلم
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: سليمان القرشي)
|
| Quote: ايضا فيها تشويش على المصلين بالمساجد الأخرى القريبة |
صدقت يا جبرة
قبل كم سنة كنت اعمل مع الشرطة في الشرقية
كنا بنصلي المغرب في مركز شرطة القطيف والمسجد الخارجي يبعد فقط امتار
امام الخارجي رفع من الركوع وقال "سمع الله لمن حمده"
امامنا رفع من السجود في نفس الوقت وقال "ربنا ولك الحمد"
المصلين نصهم ضحك والنص التاني قعدو يقولوا سبحان الله
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: خالد عبد الحليم سعيد)
|
| Quote: لو فى شخص من الناس البنادو بتشغيل المكبرات عندو شخص مريض او طفل عندو قرايه ، او زول مدبرس ، ما كان بنادى بى طلب زى دا |
اهو ديل احنا في الغالب كسودانيين - مواقفنا كثيرا ما تتغير حسب فائدتنا او ضررنا من الاشياء
الكثير مننا بيرفض الاراء المختلفة بدون ما يفكر بحياد وموضوعية !
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: أيمن محمود)
|
مايا من الفيسبوك قالت ليك I Agree with you ayman
غايتوا يا ايمن خليك مع ناس مايا ديل امسك فيهم قوي 
مع كل الاحترام للاخوة عبر نافذة الفيسبوك فهم محل تقدير بلاشك
عندنا في الامارات ابوظبي الاذان موحد لكل الامارة وبالمايكرفون الداخلي والخارجي وطبعا عندهم فتوي بذلك
اما الاقامة فهي بالمايكرفون الداخلي فقط وتحظر الندوات الا بامر وزارة الشئون الدينية والاوقاف
صلاة الجمعة الخطبة بالمكرفون الداخلي والخارجي
اقترح للاخ ايمن ان ينقل وجهة نظره الي مكتب الهيئة في السعودية ونتمني ان يكون شجاع ويجي يورينا قالوا ليه شنوا
تحياتي للجميع ورمضان كريم
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: محمد عبدالرحيم)
|
| Quote: اما من يأتي متابطاً الاساءات والشتائم فلا يرقى لان نرد عليه، ذلك مضيعة للزمن ! |
ياايمـن .. أول حاجة امسك في القاعدة دي كويس .. لانها السبيل الوحيد لي انك تقدر تواصل فكرتك في اي بوست ..
اما فيما يتعلق بي موضوع الاصوات المرتفعة في الجوامع .. واستخدام مكبرات الصوت .. انا اتفق معك تماما ..
في زيارتي الأخيرة للسودان لوفاة الوالد .. لاحظت ان هناك مسجد في الحي تم اعماره بشكل جيد .. لاحظت ان الادوار في الامامة يتبادلها عدة اشخاص وتبع طوائف مختلفة ثم ان هناك دروس .. يوم وبعد ان خلدت لنومـه بعد عناء ايام لاحظ اني تحركت من السعودية بعد وفاة الوالد بيوم ولحقت ما تبقى من مراسم عزاء وعصرت الفراش حتى صرت لا اشعر بكل جزء من جسدي بالاضافة لي انو مافي مكان الواحد يرقد فيهو اللحظة الوحيدة التي وجدتها نمت بطريقة اعتقد انها فقط يقدر عليها الخفاش نمت في وضعية عجيبة جدا وبعد ان اختفيت عن الانظار تماما وبعد مسافة بسيطة صحيت مفزوع على صوت الشخص الذي يلقي في الدرس وطبعا نمت بعد ان اذن الاذان ودون ان اشعر .. صوت الصلاة لم يصحيني افزعني صوت الدرس كما افزعني صراخ مقدمه .. ولا اعتقد انه كان في حوجة شديدة لكل هذا الصراخ ... هل الدين بحوجة لكل هذا الصراخ لا اعتقد..
سالت عن الذي يحدث .. فكان الرد انهم اعتادوا على تطرف هذا الشخص وان الكثير من اهل الحي طالبوه بخفض الصوت واصبح يقوم بذلك نكاية في الناس وعلى ذلك هجر العديد من الشباب والمصلين المسجد خاصة في الفترة التي يكون فيها .. يا للهول.("ولو كنت فظا غليظ القلب لانفضوا من حولك"). والدين السماحة والتعامل ..
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: محمد عبدالرحيم)
|
التحايا يا أيمن وضيوفه الكرام
قبل رمضان بكم يوم فتحوا جامع جديد قصاد بيتنا ،
في الاول قلت حاجة كويسة لكن بعد داك فهمت حاجة !
الجامع مكرفوناته في السماء في كل اذان وفي كل الصلوات سرية او جهرية ،
في رمضان جات التراويح ، المكرفونات مزعجة جدا بالخارج مع انو السماعات الداخلية الصوت فيها اوضح وانقي ،
المهم عندي ولدين صغار كل ما الاذان يأذن يصحو لو كانو نايمين وما يقدرو ينومو لو كانو صاحين !
لاحظ انو الدين عندنا بقي مظهري اكتر منو عبادة ،
يعني اي واحد هنا يجي ببساطة ينتقدك معتقد انو هو الصاح وانت الغلط لانو بيدافع عن الدين - او كما يتوهم .
يوميا انا والجيران وناس غيرنا بنلقي عربياتنا مقفولة من واحد او اكتر من المسلمين الحريصين علي الصلاة - في حالة التراويح - او النوم في الجامع في الاوقات الاخري ، طوالي كان بيتبادر لذهني السؤال عن انو ليه الزول دا بيعتقد انو اداؤه لعبادته - كما يفهمها هو - مقدم واولي علي احترام حق الاخر ؟
هنا في الخرطوم اذا مريت بي جامع سيدة سنهوري مثلا تلقي الناس قافلة الشارع بالعربات واذا شفت كمية الناس البتصلي في الشارع تقول البلد دي ما فيها اي زول بيكضب ناهيك عن الفساد الاخلاقي وغيرو !
نفس الناس الحريصين علي الصلاة ديل تعال شوف سلوكهم بمجرد طلوعهم للشارع ، شوف سواقتهم للعربات بالنسبة للناس السايقة وشوف مشيهم في نص الشارع بالنسبة للراجلين منهم : ما ياهم المؤمنين
الحقيقيين المن حقهم مضايقة الاخر المختلف الماجا الجامع او العندو راي في صوت المكرفون ،
والمسألة دي بالمناسبة نابعة من اسقاطات داخلية في فهم الدين نفسو وتفسير نصوصو ، مع الاشارة الي انو فهم غالب الناس ديل مستقي من برامج التلفزيون من شيخ فلان وشيخ فلان بل ومن لايكات
الفيسبوك وشير في الخير والي اخره ، ومن النادر تلقي زول فيهم قرا كتاب بيناقش الفكرة ، يعني ما حتلقي زول فيهم قرا لمحمد الغزالي او للمعتزلة علي سبيل المثال ناهيك عن محمد اركون او سيد القمني
او محمود محمد طه او هادي العلوي مثلا !
ذكرت الاسامي دي ما للاتفاق معاها لكن لمقدرتا علي تحريك العقل الديني والنقاش معاهو ايا كانت النتيجة النهائية من النقاش دا مع او ضد .
الي حين ذلك يا ايمن ربك كريم !
| |
|
|
|
|
|
|
|
|
 Re: مكبرات الصوت في صلاة التراويح ؛ وغيرها ! (Re: الوليد محمد الامين)
|
كنا في الموردة نصحى فجرا على صوت الراحل (الشقليني) نصحى دون ازعاج .. صوته يدخل القلب قبل الاذن .. يحمله الهواء ويوزعه جغرافيا في كل الاماكن بالرغم من اننا في الجهة الشرقية للمسجد والمسجد بالجهة الغربية الا ان الصوت ينساب بطمأنينة صوت المؤذن ينساب بنداوة تجعلنا نصحى احيانا قبل ان يرفع الآذان حتى تدخلنا المطأنينة ومن ثم نقوم للصلاة ..
وكانت الفترة ما بين العصر والمغرب يأتينا صوت القارئ من جهة مسجد الخليفة شمالا .. راتب الامام المهدي في الفترة ما بين صلاة العصر حتى صلاة المغرب .. ثم صلاة الجمعة من مسجد النيلين والشيخ الضرير المبصر الشيخ حسن احمد حامد.. بالرغم من توزيع المسافات بين مسجد وآخر إلا اننا كنا نجد متعة متناهية ونحن نقطع الطريق لصلاة الجمعة او صلاة الفجر .. و احدى الصلوات المفروضة وكان الائمة جاذبين اكثر من انهم منفرين
| |
|
|
|
|
|
|
|
|
|
Re: مكبرات الصوت في صلاة التراويح ؛ وغيرها ! (Re: tmbis)
|
سلام اخي ايمن ورمضانك كريم
نكته...قالوا الحلفاوي لقي بيت معروض للبيع وسعره رخيييييييص ..الحلفاوي قال اصلو مامعقول بيت سمح ذي ده يكون رخيص بالشكل ده!!
اها مشي عشان يشوف البيت قال البيت لازم فيهو مشكله عشان كده رخيص ...المهم فتش البيت تحت فوق مالقي اييييييييييي مشكله
المهم وقف في الحوش مستغرب بعد شويه اذن الاذان ...قال ليهو ماقلت ليك في مشكله في البيت ده ....
كلامك انا اتفق معاك لكن البقنع الناس الجاي تتدافع عن الدين بدون ما تفهم وتفكر منو !!!بعدين الواحد يناقش باحترام بدون تجريح وبدون استخفاف
كلنا مسلمين وكلنا نعرف الدين والدين ده ما جديد علينا بس الجديد ظهور فئه تتعتقد ان الله اعطاههم توكيل ليفرضوا علينا افكارهم ود هوس ديني لاعلاقة له بالدين
الاخ الوليد محمد الامين احييك ورمضانك كريم
مع تحياتي للجميع
| |
|
|
|
|
|
|
| |
أيمن محمود
الشيخ سيد أحمد
الشفيع وراق عبد الرحمن
Hisham Amin
عمار عبدالله عبدالرحمن
حسام عبد الرحيم
aosman
osama fadlalla
Musab Osman Alhassan
امجد الجميعابى
محمد جبره
بدر الدين احمد موسى
BALLAH EL BAKRY
خالد عبد الحليم سعيد
محمد محمود محمد
سليمان القرشي
محمد عبدالرحيم
tmbis
عماد شمت
امينة عيسى
فيس بوك
تويتر
انستقرام
يوتيوب
بنتيريست