ياخ رمضان كريم وتصوموا وتفطروا على خير ..وربنا يبلغنا رمضان هذا العام والعام القادم وأعوام عدييييدة ,, عندي رغبة في إعادة فتح بوست رمضان اللي بيتكرر كل سنة ده ..مع إنو السرد فيهو ح يكون مكرر ومعاد لكن بتسمتع جداً بذكريات وطقوس رمضان .. بداية بالتجهيزات ..مروراً بي الجرسة اثناء الصوم ..ختاماً بي صينية الفطور .. البوست ده لو أمكن عايز أييي زول يجي يحكي لي فيهو عن رمضان من زاويتو وشوفو .. رمضان زماااااان. وده حق ناس صديق الموج .ثم رمضان زمان وده حق ناس ياسر منصور ..ورمضان أسة وده حقنا نحن وناس وليد واساسي..:) ما عارف الأجواء الحالية والأيامات دي تحديداً في السودان كيف لكن يبدو لي إنو رمضان في السودان بقت الناس تتفاجأ بيهو قبل يومين ..ومعظم الناس بتعرف إنو رمضان جا فقط لمن تسمع إنو هيئة العلماء تجتمع الان لتحري الرؤيا ..وطبعاً نحن في السودان عندنا ما إسمها تحري الرؤيا ..إسمها تحري القنوات الفضائية السعودية .. بيجيني إحساس إنو مجمع الفقه الإسلامي وهيئة علماء السودان بتقوم تدي أيي زول ريموت وتقول ليهو خش الأوضة دييك قلّب في القنوات وشوف لينا السعودية قالت رمضان بتين .. عبد الحي إنت خليك مع قنوات MBC .. الكاروري انت تابع لينا السعودية 1 والسعودية 2 .. شيخ محمد الأمين إنت ركّز مع قناة العربية والجزيرة .. رمضان الزمان يعرف كل السودان قدومه قبل شهرين تلاتة بي توزيع رقاع الدعوة لمن يدق ليكم الشافع الباب ويقول ليكم حبوبة علوية قالت ليكم بكرة العواسة عندهم وقالت لينا نكلمكم تجو تعوسو معاهم.. رمضان زمان يثبت بي إستنشاق عبير الابري وانت مروراً بي أييي شارع وانت نازل من المواصلات في هجير الساعة 2 ونص ظ هرا وشايل ليك (بتيخة) في كتفك وجريدة تغطي بيها عين الشمس في طريق عودتك و موسيقى عالم الرياضة تغطي الأسواق والبيوت والشوارع.. صاجات العواسة معروفة عند ناس فلانة وفلانة وفلانة فقط ..وعليه فلااازم العواسة تكون مبرمجة بي تواريخ محددة .. الطواحين معروفة طاحونة فلان وفلان وعليه فلااازم تكون عارف بتين ح تبدا الزرّيعة حقتك .. أول طرقة آبري بتطلع بيتعمل بيها السامبل وكأنو دع البروتوتايب بتاع المنتج الجديد ..يمشوا يبلّوها سريع عشان الناس تشرب وتشوف الخلطة كانت كيف.. ويا سلااام على الآبري في أيام الفطر قبل وبعد رمضان .. تكمن متعة شراب الابري حكمة الله في غير الأيام اللي من أجلو إتعمل الآبري.. كوز ألمونيوم بااااارد تختو في الفريزر أو تكسر ليك قالب تلج مكعبات كده بعد ما تكون قديت التلاجة وإنت بتناتل في كورة أو حلّة التلج بي السكين عشان تزح النشادر اللي حولها .. حكمة الله وبعد مداولات وتجارب وضواقات تبدا التعليقات همساً بين النسوان : النصيييحة الابري بتاع بت المنى سممممح.. الععين بتاع السرّة ما كويس..تعّبنا في العواسة.. الآبري بتاع علوية بهاراتو كتيييرة ... حاجة التومة عوّاسة شديييد وبتقلب ليك الطرقة دي زي العجب.. ينفض سامر النسوان بعد قضاء يوم جميييل في بيت العواسة من صباح الرحمن لحدي المغرب ..ومع اخر كشحة باقة حقت غسيل العدا بي تفل شايها وبصلها وجرجيرها وعضامها وليمونها قدام خشم الباب يسدل الستار و يغلق ملف آبري ناس حبوبة الروضة ويفتح ملف عواسة ناس نفيسة بكرة الصبااااح ما تنسو...
ويبدا رمضان ... وما أدراك ما أول يوم في رمضان ..
To Be Continued (إنجليزي ده يا مرسي ؟)
07-06-2013, 01:16 PM
كمال سالم كمال سالم
تاريخ التسجيل: 02-13-2008
مجموع المشاركات: 4786
Quote: رمضان الزمان يعرف كل السودان قدومه قبل شهرين تلاتة بي توزيع رقاع الدعوة لمن يدق ليكم الشافع الباب ويقول ليكم حبوبة علوية قالت ليكم بكرة العواسة عندهم وقالت لينا نكلمكم تجو تعوسو معاهم.. رمضان زمان يثبت بي إستنشاق عبير الابري وانت مروراً بي أييي شارع وانت نازل من المواصلات في هجير الساعة 2 ونص ظ هرا وشايل ليك (بتيخة) في كتفك وجريدة تغطي بيها عين الشمس في طريق عودتك و موسيقى عالم الرياضة تغطي الأسواق والبيوت والشوارع.. صاجات العواسة معروفة عند ناس فلانة وفلانة وفلانة فقط ..وعليه فلااازم العواسة تكون مبرمجة بي تواريخ محددة .. الطواحين معروفة طاحونة فلان وفلان وعليه فلااازم تكون عارف بتين ح تبدا الزرّيعة حقتك .. أول طرقة آبري بتطلع بيتعمل بيها السامبل وكأنو دع البروتوتايب بتاع المنتج الجديد ..يمشوا يبلّوها سريع عشان الناس تشرب وتشوف الخلطة كانت كيف..
يا ود الكلام ده قديم خلاص !! كده حنصنفك كدفعه لود الموج وربما أكبر ! عارف يا عمر شايل ليك بطيخه دى معناها شنو ؟ معناها إنو الفريزر مليانه لحمه ودجاج , وإنو حاجات رمضان للشهر كلو موجوده بالمنزل ما باقى إلا الكماليات أمثال البطيخ وبقية القواكه التى تعصر فى حينها . يا حليل رمضان زمان . هسه شوف عينى الصلصه بيشتروها بالمعلقه .
07-06-2013, 01:24 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا كمال .. ياخ انا ما قديم لكن لفّاح.. ناس ود الموج ديل النوع اللحقو صوموا لرؤيته وأفطروا لرؤيته ..
تلاجة زمان يا كمال تلاجة مستخدمة للغرض اللي إتصنعت عشانو .. تلاجة أسة دي تفتحا بتلقى ليك كمييية من باقات الروزانا مليانة موية ..ياكافي البلا حلّة ملاح ما بتلقاها فيها ..
07-06-2013, 01:35 PM
امير طمبل امير طمبل
تاريخ التسجيل: 10-22-2010
مجموع المشاركات: 1722
Quote: معناها إنو الفريزر مليانه لحمه ودجاج , وإنو حاجات رمضان للشهر كلو موجوده بالمنزل ما باقى إلا الكماليات أمثال البطيخ وبقية القواكه التى تعصر فى حينها . يا حليل رمضان زمان .
هههههه يا كيمو هو زمنكم ياخي اصلا في فريزر زمنكم البطيخة كانت تحت الزير
عمر الفاروق تصوم و تفطر علي خير و بنجيل في البوست ده بالمهلة
07-06-2013, 01:40 PM
ياسر منصور عثمان ياسر منصور عثمان
تاريخ التسجيل: 01-16-2013
مجموع المشاركات: 4496
رمضان لاينسي 1990م والكلام ده تقريباً اول يوم في رمضان مع صداع القهوة داك تقوم مظاهرات عنيفة جداً ضرب وبمبان وكر وفر والهواء ضدنا كل مرة قالب ريحة البمبان علينا والعساكر من زي الساعة 11 فكو الصيام واخوك عامل فيها صحابي وكده اها لمن جات زي الساعة 1 ضهر اخوك بقي لا بسمع لابشوف وواضح جداً انو المتظاهرين شكلهم جالدين رمضان لانهم لا كلو لا ملو !!! اها في نص المعمة دي والدخاخين في السماء ناديت ليك واحد من العساكر اسمع شايف الدكان دااااك !! ايوه ياجنابو .. سريع امشي اتناول ليك منو عيشة بي جبنة او طحنية ومعاها موية وبندول ربنا يغفر لينا بس حقيقة كنا مضطرين لانها ظروف اشبه بالهلاك !!!!!!!!!!!
07-06-2013, 03:00 PM
كمال سالم كمال سالم
تاريخ التسجيل: 02-13-2008
مجموع المشاركات: 4786
Quote: هههههه يا كيمو هو زمنكم ياخي اصلا في فريزر زمنكم البطيخة كانت تحت الزير
زمنا خليهو يا طمبل ... لكن سجل الآتى عندك : فى زمن ناس أبوى وفى مساء أحد الأيام من شهر أبريل من العام 1927 م وقفت عربة ماركة جى أم سى ( بيك آب ) خضراء أمام منزلنا بحى العرب بأم درمان الكائن فى شارع دنقلا (شارع الشنقيطى الآن ) وقفت تلك العربه لتنزل أول ثلاجه تعمل بالغاز فى خى العرب , إنجليزية الصنع مستورده بواسطه قرنفلى أخوان . وبعدها كان الناس يتقاطرون على المنزل ليروا تلك المصيبه التى تبرد الماء بالغصب ( كما كانوا يقولون ) . وقبلها بسنوات كانت تقف فى ذلك الشارع سيارتان فقط ,, من ماركة ( فكسهول ) واحده يملكها جدى على أبو عثمان والأخرى يملكها الشنقيطى سيد الإسم والذى كان منزله على بعد 500 متر شمالا من منزلنا . والزبر برضو كان موجود لكن تحته كانت تنبت الورود والياسمين ,, الوقت داك إنت كنت وين يابتاع الدروشاب إنت ؟ ههههه أمير طمبل أوعك تخلينى إتجنن وأقوم أرجعك لضهارى دنقلا . قال بحرى قال ,, قوم لف بلا أم القرى معاك . ( عارف لسانك طويل ,, ما حا أرجع ليك ) هههههههههههه
07-06-2013, 03:45 PM
كمال سالم كمال سالم
تاريخ التسجيل: 02-13-2008
مجموع المشاركات: 4786
هههههههااااي.. يا جنابو .. أها موضوع الستين عملت فيهو شنو ؟؟ أوعا تكون عملت نايم ..؟ :) حكمة الله كفارتو فيها عتق رقبة وإنت اليوم داك شغال قبّيض رقبة :) :):)
07-07-2013, 07:47 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الأخ الكريم / همر الفاروق وجميع ضيوف هذه النافذة و جميع المسيحين والمسلمين
كا عام وانتم بخير وان شاء الله يعود عليكم الشهر الكريم بخيرات كثيرة ونعمة وفيرة..
عارف يا الفاروق
نحن ناس عطبرة عندنا تقدير خاص جدا وطقوس جميلة لي رمضان، وفي زمنا كانت التلاجات معدودة، عشان كده كنا بنجيب التلج يا من مصنع التلج يا من محلات بيع التلج، اها التلج كان بيخلطوه بي نشارة الخشب، والنشارة دي عندها ريحة خاصة جدا مع التلج، طيلة 30 يوم وانت تكرف الريحة ديي ،ريحة لا تتكرر بصورة جماعية الا كل 12 شهر قمري، الغريبة انو الريحة دي في الايام العادية في غير رمضان لا تنتبه ليها ولا تشعر نحوها باي شيء.. الشيء الثاني الكان ليهو ذكري خاصة تبعث علي الحنين هو، الطقوس الكانت بي تقوم بيها الوالدة عليها وعلي جميع الامهات رحمة الله وبركته، من تنضيف السلطة، لي تحضير الصينية، لي جك الليمون والابري والحلو مر، وصوت قطعة التلج وهي ترتضم بي الجك، وتطائر رزاز العصير.. واللقمة وام شعيفي، والكبكبي، وبليلة اللوبي العفن واللوبي الطيب.. ياه.. يا سلام ... فعلا الواحد كان بي يحس انو رمضان ده شهر مميز. لك الشكر ولي ضيوفك مرة اخري
07-07-2013, 08:59 AM
داليا حافظ داليا حافظ
تاريخ التسجيل: 06-06-2008
مجموع المشاركات: 5055
سلام عمر .... وضيوفك ... وكل عام وانتم بخير ... وتصوموا وتفطروا على خير .. من الذكريات القديمه التي لا انساها في رمضان .. ونحنا اطفال كبار كدا ...في الخرطوم 3 كان رمضان بيجي في فترة اجازة المدارس .. اها كنا نقوم من الصباح ونمشي مجموعات من جنب نادي الاسره حالياً حتى الخزان بعد المنطقة الصناعية في النيل الابيض جنب غابة السنط .... ونقعد نلعب ونعوم في البحر حتى قريب اذان المغرب ولا شغالين بالصلاة ولا حاجتين .. حتى صيامنا زاتوووو نص نص .... كلو موية بحر ... والواحد كل شوية يتدشا ( يكرع ) من كترة الموية الفي بطنووو .. اها .. لما نرجع كل واحد يشيل صينية الفطور ونوديها الشارع وكل الناس تاكل .. وتصلي في الشارع ... الحريم بس كانو بياكلو جوا البيت .. كانت ايام جميله ....
تحياتي ,,,
07-07-2013, 09:31 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
مرتضى يا ادم .. حكمة الله الابري البيشوف التعب البيتعبوهو فيهو وفي سواتا ما يشوف الرجّيع بتاعو من دوون جكاكة العصير.. في السودان أول جكاكة بتكمل وبالترتيب المنقة ثم الجوافة ثم البرتكان ..طبعاً القمردين ده لو سووهو ف ناس البيت برااهم بيكملوهو قبل ما يطلعوهو للضيوف :)
Quote: .انا عندي سؤال برة الصورة خالص (البلع) في نهار رمضان حكمه شنو ..؟!!
...................
عزيزي احمد موسى
طبعا السنة دي رمضان حيكون صعب شديد .. ونحن هسع في ولايتنا في بلاد العم سام درجة الحرارة فوق المية.. ولكن لمن نتذكر ان هذا الشهر الفضيل هو شهر التوبة والغفران وان المرء يخرج من الشهر خاليا من الذنوب كما ولدته أمه يهون كل شئ ويهون العطش والجوع ابتغاء لرضاء الله سبحانه وتعالي...وبعدين ما تنسى ان الصائم يشرب يوم القيامة من حوض الرسول(ص) شربة لا يظمأ بعدها ابدا..
طبعا انا عارفة يا احمد انت بتسأل السؤال البرئ ده من باب الفكاهة وتحلية البوست ,, ولا شك انك حمال الشيل في رمضان ومش زي ناس اصحابنا اجرسوا السنة الفاتت وقربوا يقطعوا الصيام في نص الشهر( وجه ضاحك)
.
عزيزي عمر الفاروق بوست حيكون موفق جدا .. لأني قريت العام الماضي بوست بنفس المعنى وكان بوست جميل جدا وفيه حكاوي ظريفة جدا جدا وخاصة حكاية واحد شيخ حلة كان بيقيف بعصايته في نص الطريق لمن الفطور يقرب وينزل الناس بالقوة يفطروا فطور رمضان ,, ويوم مر عليه واحد مسيحي وبرضه نزله بالقوة.... والحكاية جميلة بالجد.. ورمضان كريم وكل عام وانتم بخير .. والله يديكم العافية
07-08-2013, 02:22 AM
السر جميل السر جميل
تاريخ التسجيل: 05-29-2013
مجموع المشاركات: 721
رمضان مبارك عليكم وعلينا وإن شاء الله ربنا يتقبل من الجميع
الصيام هذه السنة 19 ساعة بالتمام والكمال بتنقص تدريجياً دقائق في كل يوم ربنا يعظم الأجر... بعض الأخوة من دول المغرب العربي السنة الفاتت جابو ليهم كلام كده ما عارف من وين قالو الإفطار على أقرب دولة إسلامية أو على مكة وهذا التوقيت بكون الساعة 6 والإفطار الساعة 10 !!! والغريب لما يصومو التطوع الاتنين والخميس في الشتاء بفطور بالتوقيت المحلي الساعة 4
طيب فيما يتعلق بذكرياتنا الرمضانية انا يا عمر النوع البجهجهني الشمام في غيظ وحمأة الشهر وانا في قمة التعبد ... اي والله الشمام دا عندو ريحة تقرب تفطرني الشمام بالسكر ومجدعة ليك فيهو مكعبات التلج ياخ دي حركة في شكل رفاهية ههههههههههههههههه ..... عصير القنقليز دا برضو بتعبني شديد يا عمر بعدين انا النوع البفتح التلاجة كل خمسة دقايق واهبشة بقلبة يدي كدا نظام اشوفو برد وللا لسا :) :) ..... الراديو ياااااااااااااه ما اجمل الراديو في نهار رمضان ياخ والله رادينا دا في رمضان خمسة نجوم بدون منازع بكون سمح سممممممممح جنس سماحة ... شكلي حا اخش ليك بمداخلة طووووووووويلة بس فيما يتعلق باخانا الراديو دا وبرامجة والموسيقى السمحة ديك بس خليني ارجع ليك براوقة البوست دا عندي فيهو قولان كتيييييييييير .. يا سلام ياخ عليكم الله اسمعو دي
07-08-2013, 07:09 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
اليوم الأول في رمضان هو يوم الهلع العالمي.. دايماً ما تكون شمس اليوم الأول من رمضان ساطعة وفاااقعة كده .. بتصحى الصباح جيعان وعطشان وريقك ناشف مع إنك في الأيام العادية ممكن لحدي الساعة 12 تكون لا أكلت لا شربت.. أبييخ حاجة في أول يوم في رمضان لو ربنا كتب ليك تطلع بالمواصلات ..فجأة كده بتلقى الحافلة كلللها شايلة مسواك ..المسواك ده بيقل تدريجيا مع إنقضاء كل يوم رمضاني.. الغريبة معظم الشايلين مساويك بيكونوا الصباح قبل ما يطلعوا إتسووكو بي معجون أبو وردة عااادي.. أجمل ما في اليوم ده هو التحايا الرمضانية بداية من البيت أمك وأبوك وأخوانك وأخواتك ..مروراً بي جيرانك مع فتحتك للباب كده ..ختاماً بكل المارة في طريقك للمواصلات أو مكان عملك .. مقولة ثابتة بنتداولها في أول يوم مع أصحابي ..أوووو رمضان خشّ العضم... :)
07-08-2013, 07:16 AM
ياسر منصور عثمان ياسر منصور عثمان
تاريخ التسجيل: 01-16-2013
مجموع المشاركات: 4496
الفاروووووووووووووغ بوستاتك الفارغة دي ما داير تخليها إنت ! (ما عندي صورة ببدلة و كرفتة عشان تعمل ليها إقتباس) وش مادي لسانو
نرجع لموضوع البوست المزيكا بتاعت لامبادا مرتبطة عندي برمضان و بتديني دائماً إحساس إنه المغرب قرب يأذن خلاس في السودان أكتر ساعة بتكون جميلة قبل الأذان مباشرة تقش الشارع قدام باب بيتكم و ترش الواطة و الشجر قدام البيت و تفرش البروش و تجهز الأباريق و تملاء الأزيار و ترّص العدة و كان في طريقة ( تقوم تنضف الشيشة و ترص ليكـ حجر ) بمزاج
في الغربة اللعينة أصعب ساعة قبل الأذان دي تكون ما عارف تعمل شنو زاتو إلا تقضيها نوم ولا حمام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
كمال سالم
امير طمبل
ياسر منصور عثمان
omer osman
Ahmed musa
Mortada Adam
داليا حافظ
محمد مجيدو
السر جميل
الخير محمد عوض
فيصل نوبي
فيس بوك
تويتر
انستقرام
يوتيوب
بنتيريست