|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: عاطف عمر)
|
من بروموهات المسلسلات لاحظت ان الكثيرين من القائمين على امر المسلسلات حاولوا الاستثمار في نجاح مسلسلات موسم رمضان الفائت – ان كان من نجاح اصلا لاعمالهم في رمضان الفائت – فكانت مسلسلات هذا العام بنفس الطاقم وبافكار شبيهة بعدين ملاحظ انو في حضور لافت للبطل الاوحد ... غايتو المصريين ديل ربنا يعينهم ... من الحاكم الفرد للممثل الفرد حتى اسم المسلسل مستمد من البطل وكمثال عندنا مسلسل لمصطفى شعبان ومسلسل لغادة عبدالرازق وآخر للاردني منذر ريحانة دا كوم ومحمود عبدالمغني اللي بقى من نجوم الصف الاول كوم ... للمزيد من التفاصيل تابعوا مسلسل الركين
الحشرات والطيور تسجل حضورا لافتا هذا العام ... مسلسل العقرب والشاهين مثالا بالمناسبة انا من مسلسلات رمضان الفائت ما حضرت ولا مسلسل باستثناء خطوط حمراء الذي رمته الصدف في طريقي
التحية والسلام لإسمارت ومقدما رمضان كريم وكل سنة وانتي والجميع بخير
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: Hussein Mallasi)
|
سلامات مهدي صلاح..و تصوم وتفطر على خير. شكرا على ال insight...انا السنة الفاتت ما حضرتا و لا مسلسل واحد. بعد رمضان بديت احضر مسلسل الفخرانى...و ما تسهلت.
زمان المسلسلات كانت مبالغة...الحلمية.... اربسك...النوة....عباس الابيض...اوبرا عايدة (ده مسلسلى المفضل). الان كل ممثل عاوز يشيل مسلسل براه. :(
ملاسي...الاربعة اللى ذكرتهم ديناصورات...رشيد عساف و منى واصف و عادل امام و احمد عبد العزيز. لكن احمد عبد العزيز لسه عنده مكانه خاصة يا اخى :) كله كوم و "يوسف عباس الضؤ" فى "المال والبنون" كوم تانى ....ياااااه. ايام.
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: smart_ana2001)
|
تعرف يا ود البشرى انا زمان بزهج من والدى -عليه رحمة الله- لما يقول لى :"المليجى ده فنان قدير" او حجات من النوع ده. هسي انا بقيت ذيه. الفرق انه موش بس اولادى اللى عايشين خارج السودان ما عارفين انا بقول فى شنو...حتى اولاد اخوانى اللى فى الثانوى و الاساس ما فاهمين انا بتكلم عن شنو. و الله قبل سنتيت فى اتنين.. واحد فى ثامنة و اخوه فى الثانوى قالوا ما بيعرفوا عقد الجلاد و ما سمعوا بيها. اما شكر خلف الله المخرج ده فافتكروه شكر الله المغنى.
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: smart_ana2001)
|
Quote: ايوه, بوست انصرافى |
لأ.. بوس جلــــــــف.. :) النصييييحة واجعاني.. أكضب؟ :)
بالنسبة للمسلسلات معقولة في ناس لسة بتحضر مسلسلات؟؟؟ عن نفسي والله ما بتذكر اخر مرة تابعت لي مسلسل حقتين ورا بعض..مع إنو انا أحسن زول بيقعد في التلفزيون.. يا قول أبوي الله يديهو العافية كل ما يمر ويشوف ليهو مسلسل يقول لينا يا أبنائي أجم مسلسل هو الشهد والدموع.. وكل ما يجي ماري يشوفنا بنحضر في فيلم يقوللينا أجمل فيلم هو من أجل أبنائي.. :):)...
غايتو انا عن نفسي اخر مسلسل تابعتو كان مسلسل سالي بتاع الأطفال عادوهو السنة الفاتت في إسبيس تون (جدجد ما ضحك..)
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: عمر الفاروق)
|
تعرف يا عمر الفاروق امى بقت ما بتحضر ملسلات. و بقول امى ليه? لانها زولة (الان) ما عندها مشغوليات. اولادها كلهم كبروا...احفادها كبروا و على راى واحدة صحبتها (امك الارملة اللى ما عندها مسؤليات). انا موضوع المسلسلات دى بنسبة لى guilty pleasure.....ذى "رجل المستحيل" و "مجلات ميكى". حجات بعملها لروحى دى. وبتبسطنى انا. زوجى العزيز برضوا بيمشي المكتبة يجيب كتب لما ابدا تابع مسلسل عربى. عن مسلسل سالى...اكتر حاجة محيرانى فى مسلسلات الاطفال اللى ذى سالى دى كمية التعاسة اللى فيها? رغم انها مسلسلات جميلة لكن انا اشك انها مسلسلات اطفال. يا اخى وصغيرة شبعتا بكى مع "سالى" و" فتاة المراعى" و "ليدى ليدى"* و شنو تانى ?شخصيا مستحيل اخلى اولادى يحضروا مسلسل تعيس كده ___________________________ * ليدى ليدى دى انا كنت كبيرة اثناء عرضها.... البوست -لو فكرتا فيه شوية كده- فعلا لاى زول سورى او مصرى فيه جلافة غير محدودة. الناس بتموت فى مصر و سوريا و السودانية الجلفة بتسال عن المسلسلات.
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: amir jabir)
|
سـلام يا سمارت.. أول ـــ بعـد ربنا يبلغنا جميعاً رمضان ــ حكاية الخمسين دولار دي زي ما قال الفاروق ما شايفا كتيرة لكن العارفو إنو أغلب القنوات العربية ما عايزة أي نوع من الإشتراك، وحسب تجربتنا في أوربا على الأقل لو جبتي دش قطرو متر بجيب ليك أربسات (أو بدر) بارقامه المتعددة وفيهو عشرات القنوات العربية بالإضافة طبعاً لإمكانية برمجة أكتر من قمر للحصول على مختلف القنوات.. مثلا عندنا المصرية أو أبوظبي إلا في هوتبيرد بينما الشروق (عـدم المؤاخذة) في اربسات فقط.. وبعد كلامي دا كلو بالمناسبة فأنا نهائي ما من هـواة المسلسلات (وخاصة المصرية) من زمن تلفزيون السودان كان برااااهو ومسلسل الساعة تمانية البجوا في وكتو الحرامية داك!.. وكنت بقول لناس البيت: متمني يوم واااااحد كدة يجي مسلسل وبعد حلقتين تلاتة تقولوا: (ما عرفت أكتب صوت ال (قتنة) ) المسلسل دا ما سمح ما ح نتابعوا!.. وعلى فكرة تاني برضو ما راكبة لي حكاية دا فيلم ولاّ مسلسل هادف وفيهو موضوع.. وبرضو دي حاجة تفتقدها أغلب الأعمال المصرية ـــ كما الروايات المصرية ــ لكن بحب الأعمال الكوميدية عشان الضحك والتسلية.. عشان كدة المرة دي شايف في دعاية بتاعت عمل فيهو عبدالحسين عبدالرضا وناصر القصبي، أنصح الناس الما عايزين موضوع وهادف ومش عارف ايه، ولو كانوا من حيث المبدأ ممكن يتفرجوا على عمل خليجي ممكن يحضروه.. بعـدين: Quote: زكي فطين عبدالوهاب |
: سـؤال إنصرافي: فطـين دا راجل ولاّ مرة؟!..
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: Isa)
|
amir jabir....رمضان كريم. لكن اعمل حسابك....مرتك دى ما الصيام و موجة الحر فى اوربا و قصة المسلسل تطلع (موش و لا بد )...تقوم تعمل حاجة (كده و لا كده) و تقوم توحشنا. I am just saying ....
سلامات عيسى...رمضان كريم. تصوموا وتفطروا على خير. امريكا دى ما فيها شيء بلاش....حتى القنوات العربية. طبعا فى قنوات ممكن تلقطها بالدش -مجانا- و منها السودانية الفضائية و اليمنية و الكويتية وللمغربية والجماعة ديل. عاوز الجزيرة والعربية و المصرية ودبى و ابوظبى و النيل للدراما و المستقبل و اى ار تى امريكا و اى ار تى افلام و حجات السمحة دى لازم تدفع. المشجع فى القنوات دى غير انها سمحة..الرسيفر بتاع الشركة دى معاه مسجل. ولانى شغالة... بعرف من اول يوم مواعيد المسلسلات و اسماءهم وبقول للريسيفر يسجل لى اى حلقة جديدة من المسلسل الفلانى. مرات بعد رمضان بلاقى مسلسلات كاملة ما حضراها بقعد احضرها على راحتى. عشان كده انا قبل كده عملتا حملة هنا عشان نخلى الشركة دى تضيف النيل الازرق. عشان احضرها على راحتى. 50 دولار كتيرة...خاصة و انه مصاريفى على الانترتتيرمت كلها كتيرة جدا. كم وخمسين انترنت و كم و سبعين دش امريكى و 8 دولار نتفلكس...too much
المسلسلات اللى ممكن تقول عليها هادفة هى المسلسلات التاريخية. وخاصة السورية الجديدة دى. ذي :ابناء الرشيد, هارون الرشيد, و لزير سالم وكده
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: smart_ana2001)
|
قالت اسمارت
Quote: و الله قبل سنتيت فى اتنين |
ثم عقب عمر الفاروق
Quote: لأ.. بوس جلــــــــف.. :) النصييييحة واجعاني.. أكضب؟ :)
بالنسبة للمسلسلات معقولة في ناس لسة بتحضر مسلسلات؟؟؟ عن نفسي والله ما بتذكر اخر مرة تابعت لي مسلسل حقتين ورا بعض..مع إنو انا أحسن زول بيقعد في التلفزيون.. يا قول أبوي الله يديهو العافية كل ما يمر ويشوف ليهو مسلسل يقول لينا يا أبنائي أجم مسلسل هو الشهد والدموع.. وكل ما يجي ماري يشوفنا بنحضر في فيلم يقوللينا أجمل فيلم هو من أجل أبنائي.. :):)... |
وعادت اسمارت مرة اخري و قالت
Quote: تعرف يا عمر الفاروق امى بقت ما بتحضر ملسلات |
________________________________________________________________________ ده حالتو انحنا لسة في شعبان !!!
تصوموا و تفطروا علي خير ...
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: Maawya Hussein)
|
مستر قبانى!!!!! تصوم وتفطر على خير...... و الله الايام دى عندنا سخانة كده محترمة...لدرجة الحكومة فتحت مراكز تبريد للناس اللى ما عندها مكيفات فى بيوتها. ح نفهم حاجة رمضان ده. و كلو كوم و اليوم اللى ح يبدا 4 صباحا و ينتهى بعد 8 ونص مساء ده براه قصة. الله يسترتا.
معاوية....الله جابك لى. اولا كل سنة وانت طيب يا اخى وتصوم وتفطر على خير. عاوزة لى برنامج يسجل فيديو استريم من النت. عاوزة اسجل اغانى و اغانى. مستر قبانى قال لة جيبى ابل TV و وصليه بمسجل و شكلها قصة طويلة. انا الايام دى مفلسة...ما عندى اى طريقة اشترى اى شيء.
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: Maawya Hussein)
|
مرحبتين معاوية
الابل تي في
مجرد جهاز ناقل لكل ماهو علي تلفونك ... ايباد ... أي ماك
و كل منتجات ابل ... الي شاشة التلفزيون أيا كان
يمكن توصيله مباشرة الي التلفزيون ... و هو يقوم بنفسه بقراءة و استشعار كل أجهزة ابل بالمنزل
فمثلا عند تشغيلك لأي فيديو يو تيوب سيظهر لك مربع جديد و يسألك هل تريد المشاهدة علي الايباد ( مثلا ) أو علي الإبل تي في؟ لذلك اقترحت علي سمارت تشغيل القنوات عن طريق الآب الخاص ب GLARAB و الذي أتيت به انت علي ما اذكر
وبه قناة النيل الأزرق و تلفزيون السودان
و عن طريق توصيل الإبل تي في علي ال DVR يمكن تسجيل أي شئ
لي عودة
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: يحي قباني)
|
Quote: فى بلاد الفرنجة دى عندى دش عربى فيه ذى 12 قناة عربية ب حوالى 50 دولار فى الشهر. و لانى ما فاضية... نص السنة بيكون واقف. بشغله فى حالة فى ضيوف من السودان او رمضان عشان المسلسلات. اها السنة دى ما عارفة...اشغله ام اسكت? ______________________________ ايوه, بوست انصرافى |
الله يتقبل صومك أخت سمارت
ووفقك الله لتلاوة القرآن وقضاء الوقت فيما يفيد
أتعجب كثيراً من أن الشهر صار فرصة لمتابعة ما يسمونه بالمسلسلات
هكذا يتم تفريغ الشهر من مضمونه والله المستعان
تحياتي
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: يحي قباني)
|
سمارتي والجميع سلامات وتصوموا وتفطروا على خير
في زمن ما كنت بعمل جدول لمسلسلات رمضان عشان ما أفوت واحد الساعة كدا قناة كدا مسلسل كدا آخر مسلسل تابعتو نص نص كان مسلسل الملك فاروق "عمل الدور تيّم الحسن" قبل زي خمسة سنين بعديهو ولا حلقة أمي قلبت تركي خلت مصر وسوريا
يا حليل زمن ليالي الحلمية ورأفت الهجان والمال والبنون ..
ـــــــ بوست هادف
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: خالد عبد الله محمود)
|
فعلا يا اخ خالد المسلسلات التركية (غير) بس المشكلة طويلة جدا ... الله يرحم ايام السباعيات والمسلسلات ام 15 حلقة ويوم ما تتفاجا بكلمة (الاخيرة) بعد اسم المخرج
اللي عايز يحافظ على أجر الصوم يبعد عن مولد وصاحبو غايب ... بيكون مسلسل مفخخ فهو من بطولة هيفاء وهبي وفيفي عبده اي نعم فيفي عبده من العصر الحجري لكن بعد الشد والرجيم بقت حاجة تانية خالص
اصلا الواحد اذا عايز يتابع حاجة فأنا اذهب بترشيحاتي لمسلسل الشك من حيث وزن ونجومية واحترافية ابطال هذا العمل
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: داليا حافظ)
|
إخترت ليك حاجات من press release اترسل لي .. و برشح ليك منو يا سمارت ديل
"قصة حياة" على أبوظبي tv
بطولة غادة عبد الرازق ..طارق لطفي ..أحمد زاهر .. وقالو ا( بحكي عن (حياة) المريضة بانفصام الشخصية والموجودة في مشفى الأمراض العقلية لتقضي عقوبتها بعد أن حرقت منزل عائلتها ما أدى إلى وفاة أمها، حيث تحاول حياة إقناع الطبيب النفسي المعالج لها بأنها ضحية لمكيدة دبرتها عائلتها..)
و "لعبة الموت " بطولة ماجد المصري وعابد فهد الاتنين بحب تمثيلهم شديد ومعاهم سيرين عبد النور بتجيد دور المرأة السمحة شديد والمجننة الناس ..ههههه وقال ليك المسلسل .. (يناقش قضايا اجتماعية مثل الحب والكراهية والغيرة والحقد، وهو تجربة جديدة تعتبر مثال لتجسيد التنوع الثقافي نظراً لوجود العديد من الفنانين الذين ينتمون إلى مدارس فنية مختلفة، ودول عربية عدة، والجميل في هذا العمل أن كل ممثل يتحدث بلهجة بلده الذي ينتمي إليه دون توحيد اللهجات)
ولو بتحبي المسلسلات التاريخية
في مسلسل إسمه (خيبر) على دبي tv
بطولة أيمن زيدان وسامح الصريطي سلافة معمار ودي مثالا شديد ..:)
المسلسل بحكي عن تاريخ اليهود والتحولات الحصلت ليهم نتيجة التهميش ..
وبحسب كلامهم عنه قالوا(ركز المسلسل على حياة اليهود الاجتماعية والاقتصادية والدينية وجلائهم عن الجزيرة العربية وقصة تحالفهم مع من حولهم من القبائل المجاورة والصراعات القائمة بينهم كما يلقي المسلسل الضوء على سمات اليهود وصفاتهم وكيف تكونت لديهم العدواة والبغضاء للآخرين.)
عندي صور جميلة ما عرفت أنزلا أبدا ...
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: داليا حافظ)
|
يا مستر قباني،،،،الأيام دي لو قلت ليه اشتري فرشة أسنان، ح ياكلني. الرجل في خلال شهر اشتري بوتجاز، فرن، ماكيرويف، غسالة عدة، و عمل لينا خرسانة و حشيش و ركب لينا راكوبة بمروحة في الحوش. ده غير انه بقي عنده عدد 2 مورقج. و دفعيات عربية. لو قلت عندي 95 دولار زائدة من مصاريفي عاوزه اشتري بيها ابل تي and#1700;ي، ح يقول لي ادفعيها لزول يجي ينظف الحوش أو يركب المراوح أو رفوف الأولاد. هسي انت لو عندك 95 دولار رسلها لينا :) لو في أي طريقة ان ال ابل تي and#1700;ي يتوصل بالرسيفر بتاع دشنتورك ( شركة الدش) بمشي اجيبه هسسسي.
كتر خيرك يا معاوية. اليوم ح أجرب البرنامج ان شاء الله. شكرًا جزيلا.
و عليكم السلام أخ عماد. ربنا يتقبل صيام و قيام الجميع. مسلسلات ساي يا شيخ عماد؟ أغاني كمان ( موش "أغاني" بس "أغاني و أغاني". و فوازير و خيمات رمضانية و حجات ما يعلم بيها إلا ربنا. لكن بالجد كده يا عماد، المسلمين ( اغلبهم)، مع المسلسلات، بيحرصوا علي صلاة التراويح و قراءة القران و صلة الرحم و ذكر الله في رمضان.
سلامات يا تيسير. رمضان كريم يا فردة. المسلسلات السورية التاريخية بتستاهل المتابعة. أمي بطلت مسلسلات و بقت حارسة قناة المنار اليوم كله. و يوم يكون في خطاب لحسن نصر الله بتطرد الناس من بيتها. شيخ عماد، ما تفتح لي الموضوع إياه كمان، عليك الله :) تعرفي يا تيسير في بلاد الفرنجة بيعملوا إحصائيات علي الناس ( علي حسب الفئات العمرية) بتحضر أي مسلسلات. و علي هذا الأساس سنويا بتتغير نوعية المسلسلات عشان تجذب كل الفئات العمرية.
سلامات معتز المقبول. دريم بوكس ده أظنه لأوربا بس. ناس أمريكا و كندا، في زول جربه؟؟
سلامات يا خليل. كل سنة و انت طيب. يا أخي عادل أمام ده بقيت ما بطيقه مؤخراً. لكن نجرب، ليه لا!!!
سلامات أمبر طمبل. رمضان كريم. الشروق دي في ليها لنك في الإنترنت ؟ شكرًا جزيلا.
سلامات خالد عبد الله محمود. تعرف المسلسل ده سمعتا بيه من جارتي البوسنية. الزولة دي عمرها كم و ستين سنة. و إذا انت آخر شيء حضرته مسلسل لوست، هي بتكون آخر شيء حضرته مسلسل في السبعينات. اها الزولة دي ما بتفوت حلقة و أظنها بتحضرها في يونيوب مترجمة بلغتهم. حنستني احضره، لكن حقيقي قلتا جارتي دي خرفت. :(
سلامات يا مهدي. اهم شيء تسجل المسلسل و تحضر علي راحتك. تمشي أي حوار يطول اكتر من دقيقتين و كل الدعايات.
مستر قباني. الله لا جاب ملل يا أخي. :) لقيتو وين كلام بشة ده ؟؟
سلامات وائل فحل. رمضان كريم. ما ده هو التطبيق اللي بيقول عليه مستر قباني من بداية البوست. :) شكرًا علي معلومة انه أحسن نعمل حساب معاهم.
شكرًا معاوية. اول شيء اعمله بكرة الصباح أني انكت الكومبيوتر في أي كرتونة ( بعيد عنك رحلنا لينا أسبوع، و أي شيء ما احتجنا ليه لسه في كرتونته).
عاد نادر اللي شكره ملاسي ده معناها وردي السودان القادم. :)
داليا السكرة، رمضان كريم. كيفك و كيف ست البنات ملوكة؟ شكرًا جزيلا. أشوف لي طريقة احضر خيبر ده.
شكلي مفروض امشي أجيب لي هارد درايف كبير و اقعد أسجل رمضان كله. و احضر علي راحتي لحدي رمضان الجاي.
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: Maawya Hussein)
|
تنوع المسلسلات التي ترشيحها للمشاهدة في البوست دلت على انه لولا اختلاف الامزجة لبارت سلع المسلسلات لمن شعر بالملل من نوعية المسلسلات بتاعة البطل الخارق البيكون مثخن بالجراح والهموم ويجي يرتاح عند الحسناء حبيبة القلب ولمن مل من الاسقاطات السياسية للواقع العربي الراهن على الدراما والتي تم حشوها حشوا ليكون المسلسل بمسحة سياسية مع انو برايي الوقت مازال مبكر لإنتاج اعمال درامية تناقش ما يحدث فالاحداث مازال دمها ساخنا ، لمن مل كل هذا ارشح له مسلسل (الشك) الذي يقول عنه حسين فهمي احد ابطال المسلسل : مسلسل الشك يقدم حدوتة إنسانية واجتماعية ، اذن الشك مسملسل بعيد عن السياسة اللهم الا اذا حبكة المسلسل تطلع وراها الموساد مثلا
| |
|
|
|
|
|
|
Re: خلونا فى المهم....مسلسلات رمضان كيف مع الحاصل فى سوريا و مصر ده ?? (Re: مهدي صلاح)
|
شكرا امير طمبل على الوصلة
سلامات يا معاوية...ما عارفة مالى...لكن عادل امام ده بقيت ما بدوروا كلو كلو. مع انى من نوع الناس البيض ديلاك اللى لما تتكلم معاهم نص كلامهم من مسرحيات او ااغانى. و طبعا اغلبها مسرحيات عادل امام. لكن لانك قلت سمح ح احاول احضره. من اليوم ان شاء الله
سلامات مهدى صلاح...احاول برضو مسلسل الشك. لكن بصراحة ما عندى طريقة لاكتر من مسلسل وااااحد فى رمضان ده. عشان كده نبدا ب العراف بتاع معاوية. و اللى فيه الخير يقدمه ربنا (باللهجة المصرية)
| |
|
|
|
|
|
|
|