|
حبيت سيد اللبن
|
من اسمع حس الحمار تجيني حمي .. ووجع كرعين ، ووجع بطن، و ما اشوف قدامي .. اقوم أداعي " الله ياخدك" قلبي الاهبل علَى يرد : "ياخدك انتي دي!" كنت في الاول من امي تسمع ضرب العصا علي الباب تكورك " جيبي اللبن" وأنا انق وانق حتي امشي .. واقول ليه "انت الباب دا كتل ابوك?" يقوم يضحك واليوم التاني يخبت اقوي من القبلو . الايام دي من يقرّب المغرب اقول املّس شعيراتي وامسّحن بمويه اشان يرقدن ،واتمسح سمِّح واول مايدق اشيل جكي بتاع الالمون وامشي .. يكب اللبن ويغمز في عينو ويرفع في حواجبو ..
يوم ورا التاني الشغلة بقت زيادة .. الولد اخوي الصغير في سنة سادسة !من يسمع نقريطة الحمار ينط علي طولو " عمو علي جا" وانا مع نطتو قلبي يقرررب ينط لفوق ..لمن الشغلة بقت ليها اربعه أيام الولد أخوى صاحب سيد اللبن. وقلّت فرصتي في شوفتو .. خطر لي اليوم الخامس فكره قريب المغرب.. وناديت الولد "تعال يا اخوي الصغير" - اها اكيييد دايره شي عاوزه شنو؟ -+ عاوزه اجيب اللبن - شنو ؟ + لا عاوزه لي لبن بدره من الدكان - بس القريب دا مافيهو + امش البقاله - سمح بس تشتري لي + اي الحمد لله عدت .. وهو كأنو راجيني.. سلّم وقال " لايغرك بيعي للبن دا ..تحسبيني هوين؟" - " لالا انت ماك هوين.. بس "" ".. بس الشافع اخوك دا اقهري .. لا تخلي ياخد اللبن"
وعزمت ازيح الشافع من سكتي . مامعقول يدافرني في جيب اللبن .. و كمان عمو علي! الولد التقول موصينو قبال حادثة الحب دي حلقي ينقرش من الكوراك " ياولد ...يازفت ..." ويشيل الجك ويطنطن : "انتي مالك ماتجيبيهو ! محننة ؟ .. و لاّ مقعدة ؟" بس والشكلة تدوّر .. مرات امي الحجّاز.. ومرات سيد اللبن يفوت .. تبيت القـَوا . ومرات كمان تعدي علي خير . واخونا الكبير يكون في .. هو لسانه بنقطع. اها من يوم بقيت اكون عاوزة أجيب اللبن بقي يتصيدني ليك .. يوم بنشوف في المسلسل وبلاا مناسبه قال " ها والله الناس الكبار ديل هبل هبالة" .." هسه دي شنو العواره دي ؟ حبيتك وشنو ! " امي قالت ليه " هوي اسكت .. خلينا نشوف والا امرق بره" + " تطرديني عشان التركي الكضاب؟" دا اريتني ما ضحكت .. الساعه اللانفجر :" والله ما أخليك .. تضحكي فيني؟ اصبري بس .. اصبري.. بجي عمو علي وبتحنسيني تجيبي اللبن " وسكن الكلام اشان امي تحديدا تفرزو انتهت المساسل وكوركت ليهو " كدي تعالي معاي شويه " والشافع يتبسم .. ويرفع في حواجبه زي الاهبل .. ومشيت وراسي يشيل ويودي " ياربي مالو؟ غريبة" أمي كانت بتتكلم قدام اخواني وانا سارحة .الساعه القالت : سيد اللبن علي! مالو؟" .. " هوي يابت بلا ملاوعة معاك..!!! اخوك كان مو خابر شي مابطلق كلامو ساي!!" + "تصدقي الشافع ..وانا لا؟ - " انا لا صدقت ولا كذبت .. سألت .. بعد تجاوبي بقرّر!!" + " اها وحات تربة ابوي علي.. بس اشان اسمه على علي .. جدي الشيخ علي" - "المعني اي علي بتريدي "! + " اريد شنو ؟ انا ..انا ....." - " انتي شني؟ .. قايله يعني ماني فاكرالك؟" + "سمح .. اعمل شنو انا يعنى " - " ماتعملي شي انا البعمل.." + " هو زاته مو خابر بى ريدي دا!"
اتيقنت ان المشكلة في طريقها للحل.. امي دي حكمتها مي ها شويه . وبس جا سيد اللبن.. لفحت توبها ومرقت براها تجيب اللبن .. واتاخرت .. قلبي اكلني ، اتدبيت علي اطراف اصابعيني. سمعت خالتي فتحيه تقرقر، وامي بتحكي ليها في المسلسل التركي! قي العشاء الساعه الرمت ليك الدرابة لاخوي الكبير + " علي ود اختي علوية الفي قطر قروشا مطر قال داير اختك المعولقة دي " - " ..خير .." + " وعلي سيد اللبن .. العنده مرَة وشافعين ..حتي هو نضم في حقها ؟" - " وانتي شِن رائك ؟" + " يا يمه علي ود اختي فى قطر قروشو مطر .. المهندس الوحيد عند امه لا تاني لا تالت" - والعروس رايها شنو؟
"انا..اتا.." .. آي انا .. طبعا علي ود خالتي.."
يتبع
|
|
|
|
|
|
|
|
Re: حبيت سيد اللبن (Re: مها عبدالمنعم)
|
علي ود خالتك ده يوم ساي اتذكرك وجاب ليكي معاهو حاجة في اجازاتو الكتيرة الفاتت دي ؟! ان شاء الله معجون سجنل ساي ؟! والا صابونة لوكسي ! الا على سيد اللبن البديكي الرطلين .... تلاتة ،،،، تابيهو ؟!! عليك الله شوف الغبيانة دي !
| |
|
|
|
|
|
|
Re: حبيت سيد اللبن (Re: Hani Arabi Mohamed)
|
تنبيه: مها لديها قصص كثيرة كتلك فى هذا المنبر، وكلها من وحى الخيال. بمعنى دى قصص وروايات يا بشر. كثير من الكتاب تركوا المنبر نتيجة هذا الخلط بين بطل الرواية وصاحب القصة.
| |
|
|
|
|
|
|
Re: حبيت سيد اللبن (Re: وضاحة)
|
فى القصة رابط مفصلى اشار اليه صديقنا كيشو بسودانيات وهى شرارة العاطفة التى ربطت الراوية بسيد اللبن .. وهى علاقة مبتكرة فى هذه القصة .. اذ نجد ان اغلب قصص "سيد اللبن" تدور حول إنتهازيته او إستغلاله لخلوته القصيرة "بصاحبة الدار " إن كان فى شكل ثناء إعجاب /أهات حسرة او اشكال اخرى هو ادرى بابعادها...لم نسمع من قبل بوقع طرقات عصا سيد اللبن على قلب احدى العذارى .. ولكن ها هى مها تدهشنا بحدوث ذلك......رغم ان القصة لم تتطرق لمسببات هذه العاطفة من جهة الفتاة على اقل تقدير
شكرا مها
| |
|
|
|
|
|
|
Re: حبيت سيد اللبن (Re: إسحاق بله الأمين)
|
والله لكن بالغت يا مها.. لولا كلام د. امبده بأن مها عندها قصص كثيرة في المنبر وكلها من وحي الخيال كنت فاكراك انتي بتحكي قصة واقعية عن نفسك .. وفي كل سطر يزداد اعجابي اعجابا... وفعلا خلطنا ما بين بطلة الرواية وصاحبة القصة..
انتي عارفة يا مها ده معناه شنو؟؟ ده معناه انت روائية واديبة بحق وحقيقة .. وهسع بصراحة عاوزنك تكملي بقية القصة وعليك الله طوليها شوية عشان نشوف في النهاية سيد اللبن والمغترب حيتقابلوا ولا لا؟؟
والله يديك العافية
| |
|
|
|
|
|
|
Re: حبيت سيد اللبن (Re: هويدا شرف الدين)
|
يا هويدا شرف الدين بطلي إنتهازية القطر اليطوطحك
خليها للبيختارو القلب
قالت قطر قال
سيد اللبن مالو ؟
مش ياهو البيقابلوه بجلابية البيت وما بيلبسوا طرحة قدامو وإن جا راجل ماري بالشارع ست البيت تتضاير وترجع تاني تفتح الباب
بعدما الراجل الغريب يفوت !!!
| |
|
|
|
|
|
|
Re: حبيت سيد اللبن (Re: Asim Fageary)
|
رغم انو القصة جميله و السرد رائع الا انو فيها استعلاء ثقافي غريب من نوعوو .. مالم بتاعين اللبن عيبيهم لي . انا كنت شغال بتاع لبن اسرج حماري واخت التمن ( بضم التاء و تخفيف النون ) وبيت بيت وحاره حاره ودار دار .
يعني شنوو البت ما ممكن تحب ليها سيد لبن ..؟؟؟؟
واصلي .
| |
|
|
|
|
|
|
|