الخيط حقك للعزيز أستاذ محمد هارون يستحق التوقف عندو والتركيز عليهو فألف شكرا .. أوقفتني الحرفية التي يكتب بها أستاذ ود هارون فذهبت لتاريخ تسجيلو مايو - 2004 في سودانيز ولبروفايلو ولم أستغرب طبعا فمن الجليّ من يكون ود هارون وواضح إنو ابن كار يكفي أنه مخرج (إن كانت ترجمتي ل دايركتر صحيحة لأنها منكن تحمل معنىً آخر مغاير كمدير وغيره) في تلفزيون وفي الولايات المتحدة وواضح إنو مشغول من مشاركاتو التي لم تتخطَى ال 400 مشاركة الا بقليل..
شكرا ليك ود شامي وشكرا لود هارون.. ***
هنا أنقل ما جاء في صفحتو في الخيط الذي رفدتني به عزيزي ود شامي - لغة ود هارون نفسها ليست عادية ومتأنية وفيها ما فيها من جمال .. ومشبعة بحاجات كتيرة غايتو أقل شي منكن أقولو عنها إنها مبدعة مبتكرة وتشف عن زول فنان .. دا المقال في الخيط :
***
قبل عدة اعوام طلب مني احد الاشخاص – مواطن دولة خليجية- ان اصمم ليه "Banner " للموقع بتاعه! صممت البانر لكن صاحبي عجز عن الدفع! المبلغ كان بسيط حوالي 20$ .. كان عنده مشكلة في الحساب بتاعه في ( paypal ) عرض علي قناته في اليوتيوب .. لما فتحت القناة بتاعته لقيت واحد من الفيديوهات فيه حوالي مليون مشاهدة! قلت ليه بس خلاص تمام ، انا بشيل القناة دي قصاد قروشي! وبي كدا بقت القناة من نصيبي! اول حاجة عملتها نظفت القناة من الفيديوهات المسروقة وخليت الفيديو الاصلي الفيه حوالي مليون مشاهدة! نظفت الشتائم وعبارات الاساءة من التعليقات وعملت فلتر جديد! انتظرت حوالي شهر ونصف ثم قدمت القناة لـ (قوقل) عشان تضع عليها اعلانات! في البداية كان دخل الاعلانات بسيط .. ومع انشغالي بالجامعة ما كنت بلقى الوقت لعمل (traffic) للفيديو كل الحاجة الاتعملت هي صرف الدخل البسيط بتاع الفيديو في تقوية القناة! كلما تصرف القروش البجيبها الفيديو ، في الفيديو نفسه بتزداد شعبيته وبتضاعف الدخل بتاعه! لاحظ الدخل البجيبه فيديو في يوتيوب بزيد بس ما بنقص! يعني لو بعمل مية دولار في اليوم لا يمكن يجي يوم يعمل ليك اربعين! نادرة جدا دي! بعدين فيديو وقاعد في يوتيوب ، لا بحس بالتعب لا برفدوه من العمل! الا تقوم عليه براك تمسحه ( تمسحه ليه ما عارف!) بعد نجاح الفكرة الاولى – الفيديو الاول- بقيت اشتري الفيديوهات العندها مشاهدة عالية في يوتيوب! اغلب البشتري منهم مراهقين الواحد ما يصدق تعرض عليه مئة دولار قصاد الفيديو بتاعه! اهم حاجة طبعا لازم يكون الفيديو الاصل! قوقل بترفض وضع اعلانات على فيديو ماهو الاصل! في حاجات تانية بتتعلق بمدى سمعة القناة على اليوتيوب! بقصد السمعة التقنية ، وليس عبارات الاساءة .. الاخيرة من السهل التخلص منها! طبعا ما كل قناة مليونية معناتها بتدخدل 100$ في اليوم! في قنوات ما بتدخل ولا مليم! مثال قناة (lil' J ) المشهورة! من اكثر القنوات مشاهدة على اليوتيوب ، لكن قوقل حالفة ما تخت فيها اعلانات!
الطرق الجديدة بقت ما بتعتمد على شراء قنوات قديمة واضافتها لرصيدك! لاحظ كل سنتين الانترنت بتغير مية وتمانين درجة .. مسالة شراء القنوات دي بقت مسالة قديمة ، او زي ما بقولوا الامريكان (it's so 2008) الطريقة الجديدة هي عمل قنوات متخصصة في حقل معين وزيادة نسب المشاهدة بحسابات معينة بعضها " SEO " وبعضها فتح قنوات ( ترافيك ) من مواقع قديمة .. الى آخر التقنيات الحديثة المتبعة! المسألة دي اتخيل لي اريح لانك بتكون من الاول اخترت نوع القناة ، وعارف بتعمل في شنو! مثلا القنوات البتتناول المنح الجامعية! لو عملت واحدة زي دي واخترت ليها الكلمة المفتاحية ( المنح الجامعية) انا عارف مسبقا انه الكلمة دي الضغطة الوحيدة عليها بحوالي عشرين دولار! يعني لو وضعت اعلانات على قناة زي دي ، حتى لو ما كانت مليونية .. قول مثلا الفيديو فيه الفين مشاهدة .. بدخلوه في اليوم مئة شخص ، واحد منهم فقط بضغط على الاعلان ( نسبة 1% ) معناتها الضغطة الواحد بعشرين دولار! اها دي ممكن تكون بداية! كلما تلقى فرصة صور ليك فيديو! التلفونات الحديثة اغلبها بتحتوي على كاميرات فيديو! في السودان في الخليج في امريكا ايا كنت! العالم مستعد يشاهدك! زمان كان الغربيين الواحد اول ما يلدوا ليه طفل ببدأ يجمع في السنتات في برطمانة كبيرة ، يقول ليك لما ولدي يبقى في عمر الجامعة السنتات دي بتكون بقت آلاف يقرأ بيها الجامعة! وحقيقة درسوا معاي عشرات الزملاء في الجامعة هنا ( بقروش السنتات) هسي بقوا يقولوا اعمل للولد كمين فيديو في يوتيوب عشان بعدين يقرأ بيهم الجامعة! دا على مستوى المواطن الامريكي العادي! يرفع الفيديوهات دي على يوتيوب يتركها للزمن! اها ما بالك لو قلت ليك ممكن تتجنب مسالة الزمن دي ، والولد قبل يدخل سنة اولى ممكن تكون قروش الجامعة جاهزة! أي حاجة فيها عامل الزمن يمكن التغلب عليها! زمان موش كان السفر بالجمال بياخد ثلاثة يوم .. بقى بالعربية بياخد يوم .. وبالطيارة ساعات! كله اختصار للزمن والجهد! اها المعرفة بتختصر ليك الزمن والجهد!
ناتي للحديث (فيما بعد .. ) عن الفيس بوك! مين فيكم بعرف " Justin Bieber" اتخيل نفسك دخلت نادي الهلال السوداني وسالتهم يا جماعة في واحد بعرف هيثم مصطفى؟ في الغالب بشيلوك ويجدعوك برة النادي! اها في الفيس بوك لما تسال السؤال دا بتكون اما مريخابي حاقد ، او واحد عارف بعمل في شنو! انا عايزك تكون من النوع التاني! سؤال بسيط زي دا ( مين بعرف جستن؟) بتجيك عليه خمسين الف اجابة في ظرف ساعات! اتخيل انك سالت السؤال دا في فيديو ورسلته للمعجبين بتاعين جستن في فيس بوك! بعد 24 ساعة جاتك خمسين الف اجابة! اقصد خمسين الف مشاهدة للفيديو بتاعك ، وثلاثين الف تعليق! قمت اتصلت بقوقل قولت ليهم يا جماعة عندي فيديو طريف عن جستن ، ممكنوا تختوا اعلاناتكم علي الفيديو بتاعي؟ عارف الضغطة الواحدة على اعلان فيه "Justin Bieber " بي كم؟ الفيس بوك اهميته موش لانه ( ترافيك ) لليوتيوب ، على غرار ( الخيار مفيد للجبنة) فيس بوك في نفسه جبنة! براه كدا من غير تحشيه بي يوتيوب بيتاكل! تصدق صفحة المعجبين بجستن ، ما العملها جستن العملوها الناس التانين ، تصدق انها افضل من بقالة ناصية في الخرطوم اتنين! يعني لو عندك مشروع ما تفتح دكان! اعمل صفحة معجبين بالراجل دا! بجيكم لشرح المسالة دي واحدة .. واحدة! الموضوع انه الفيس بوك في ناس فاهمنه لطق الحنك! ما يُفهم اني ضد التواصل ، انا عندي حساب صغيروني للتواصل مع الاهل والاصدقاء المقربين ، لكن عندي سبعة وعشرين حساب في فيس بوك للعمل! اكثر من الفين فيديو في يوتيوب ، عايزين نتقاعد بيها لما نصل الاربعين!
لاحظ دا كله عمل جانبي ما محتاج تفرغ! عمل للمستقبل عشان الفيديوهات دي ، والمواقع والروابط الانت بتختها في الانترنت بتزداد قيمتها كلما مر الوقت! بالذات لو عملتها من الاول صاح! اسوأ حاجة انك تحتاج تغير رابط صفحة قديمة ليها خمسة اعوام! الناس العندها مواقع قديمة في الانترنت بعرفوا الحاجة دي! كل شيء قديم ليه علاقة بالتجارة حافظ عليه! قبل فترة بعرف واحد سوداني عنده محل تجاري في ميريلاند ، محل قديم ليه سنوات! أخينا دا قرر فجأة يرحل من محله دا لي محل جديد! قلت ليه دي تكون غلطت عمرك! عشان اثبت ليه فتشنا في الانترنت عن اسم المنتج الهو ببيعه جانا عنوان المحل بتاعه في اول البحث! اتضح فيما بعد ان شركات كتيرة كانت منتظراه بس متين يرحل ، عشان تشيل السمعة الحسنة للمكان ، موش عند المواطن العادي بس ، بل عند قوقل نفسها! حقيقة السودانيين ، والعرب عموما في امريكا ما بعرفوا يعملوا اعلانات لمحلاتهم ، ولا حتى براجعوا الانترنت عشان يشوف هو ترتيبه الكم في محرك البحث! ببساطة لو ترتيبك في الصفحة نمرة ثلاثة ، ومحل تاني في الصفحة نمرة واحد في محرك البحث ، بكون الفرق بين دخل المحل بتاعك ، ودخل المحل الفي الصفحة الاولى قريب متين الف دولار! مثلا لو فتحنا قوقل وكتبنا كلمة "لحم حلال" بالمناسبة سوق اللحم الحلال بيقدر بحوالي ثلاثين مليار دولار! طيب عندك محل في فرجيينا ببيع لحم حلال! محل صغير وجديد ما ناس كتيرين بعرفوه! وفي محل كبير جدا منافسك وعنده سمعته وزبائنه! هل تعلم انك ممكن تبيع اكتر منه بعشرين ضعف لو الموقع بتاعك في الانترنت اتقدم للصفحة الاولى! طريقة قريبة من بتاعت الفيديوهات الـ (SEO ) زايد حبة (testimonials) .. عندي تجربة مع محل بتاع ورد في نيويورك! الراجل محله صغير وما على قدر كدا! قلت ليه بتبيع ورد بالتلفون؟ قال ايوة! نسيت موضوع المحل وحرصت اني ارفع تلفونه في الصفحة الاولى! بعد عمل استمر قرابة ثلاثة شهور ، بقى تلفونه نمرة خمسة في الصفحة الاولى ، لما تكتب كلمة "ورد" وتعمل بحث محلي في نيويورك هو نمرة خمسة! لاحظ في نيويورك بحالها هو نمرة خمسة! البحث عن الورد بقدر بحوالي 500000 عملية بحث في الشهر في نيويورك وحدها! لو صاحبنا دا باع 30000 بوكيه ورد في الشهر ، حيعمل كم؟ حاشرح بالتفصيل كيف ترفع الموقع بتاعك ، او التلفون بتاعك للصفحة الاولى في قوقل! اي مراهق ممكن يعمل ليك موقع! اعمل موقع ولو صغير ، بعدين نجي لمسالة دفعه للصفحة الاولى! دي المراهقين ما بقدروا عليها!
06-27-2013, 11:29 AM
مجاهد محمد الهادي مجاهد محمد الهادي
تاريخ التسجيل: 01-14-2013
مجموع المشاركات: 1665
ول إدريس محمد ابراهيم الذي أحببت دون اشتراط رغم عدم التقائي به حتى الآن..
وهشام شيخ الدين صديقي الذي رأيته قبل أن ألتقيه هنا "في جدة من شهر" بعد تواصل عبر تقنيات الهاتف والفيس (والروح والقلب" دام فوق الأربع سنوات.. كم أحببت هشاماً هذا بحقّ ودون مواربة!
و لأخ فاضل وجدت في ظروف كنت أحتاج وقوفه معي فيها منهم أمين كامل وعثمان جاد الله..
****
ولناس بعرفم وبعرفو إني بهديهم الغنية السمحة بأداها ولحنها وكلماتا السمحة هم بعيدين عني لكنهم يسكنون هنا في القلب ...قد يشاهدون هذا الكومنت مني وقد لا ... لهم مني غال المحبة والتقدير..
لشخص أحب "كل من صادف من الناس .. لا لشيء وإنما فقط لعلمه الجازم أننا إخوة في الانسانية يجب علينا نشر المحبة دون شروط ..
وعلى رأس هؤلاء بكري أخونا الذي لولا مساعيه وموقعه الجميل لما أصبح ممكنا تلاقينا في هذه الساحة الرائعة .."سودانيز اونلاين"
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مجاهد محمد الهادي
saidahmed shami
فيس بوك
تويتر
انستقرام
يوتيوب
بنتيريست