ما شوفت لي فنان بيلغي وجود الكاميرا نهااائي زي المخلوق الذري إبراهيم عوض رحمة الله عليه.. يغني وكأنه ماف زول قدامو ..خاصية ما متوفرة في أجعص ممثل أو مقدم برامج سوداني.. وعليييكم الله شوفوهو بيتعامل في الأغنية دي كيف مع المايك برضو ..ولاحظو للمساحة بين المايك وخشمو .. وفوووق ده كلللو شوفو الإحساس بتاع الأغنية دي.. في إعتقادي دي واحدة من أصعب الأغاني السودانية اداء ومفروض أييي فنان عايز يجيز صوتو يجيبو ليهو الأغنية دي عشان تكون مقياس لي طريقة اداء الفنان .. شاهدت قبل فترة تسجيل للفنان عبد الخالق في قناة امدرمان مع حسين خوجلي ورغماً عن إنو عبد الخالق فنان دارس وخريج معهد موسيقى أو كلية الموسيقى إلاإنو ظهر فيها كفنان ناشئ ..
جرحى الأليم الشايله تذكار طول حياتي أسى وهموم جرحي الدفين العذبك يا قلبي طول عمرك أنين داريته في الأعماق سنين غنيته للعشاق حنين شكوى وشجون غنيته أصدق الأغنيات وأصبح مجرد ذكريات وين الصلات وين الشموع الفى دروبنا منورات بقت هموم تذكار تشيله وجرح أليم
تخريمة : أصلو القلوب الهايمة تعبد في الجمال بتضيع سنينا الحلوة في الريد ابتهال ولهانة تحلم بالوصال مسكينة تحلم بالمحال لمتين بتبنى قصور رمال ماكفاية ياقلبي الجمال خلاك تذوب شكوى وسهر ودر شباب عمرك هدر شال النضار الكان مفرهد ومزدهر خلى الشجى وخلى اليباب الكل ثانية بعيشه لحظات من سراب أحسه في روحي اغتراب أحسه شوق وشقى وعذاب نار في الضلوع وجرح أليم تذكار عزيز ياقلبي شايله أسى وهموم
يا خينا لو قلته ليك إبراهيم عوض دا حدوته يصعب الاحاطة بها بتصدقني؟ القصة دي كبييييرة فيها قصة أم درمان و فيها السبب الجاب مقولة :- ود قلبه ذاتو حسب و جهة نظري.
06-11-2013, 06:11 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا نابري كيف ما يكون حدوتة وود قلبا .. في فنان بيفرتق الحفلة ويدق المعازيم براهو لو ما ود قلبا ؟؟ تشوف التسريحة وشقة الشعر والفيونكا والتمايل اثناء الغناء تقول ده شنو الفنان السحسوحة ده.. يلبس الأبرول ويمسك مكنة اللحام ويشق سوق امدرمان أرجل راجل في امدرمان والمدن المجاورة ..
Quote: مفروض أييي فنان عايز يجيز صوتو يجيبو ليهو الأغنية دي عشان تكون مقياس لي طريقة اداء الفنان
كان عملوا كلامك دا ياعمـر.. معناتا: إجازة صوت وااااحد كل عشرة سنين..عليك الله ما تهـظـر (أو كما قال ود الباوقة).. وليدات الزمـن دا البنشوفم في التلفزيونات بقـوا مـع فرمالات إجازة الصوت زمان (ناس) الزكريات وإتلاقينا مـرة؛ في تلتلة... بالمناسبة عبدالخالق وأمثاله كتااار ينطبق عليهم ما قاله الأستاذ حمدنا الله عبدالقادر لامـن إستفزاهو المذيع بإنو الممثلين الشباب ديل ناس دارسين ما جربندية زيكم؛ فقال ليهو: شوف: المعهد دا زي بوليس الحركة.. بعمل ليك قوانين ومتين تلف يمين أو شمال.. لكـن ما بعلمك السّواقة!.. ح أرجـع للحديث عن أستاذنا أبوخليل عليه رضوان الله..
06-11-2013, 07:09 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
تعرف يا عمر... انا لا اضع الفنان الذي يعتمد على (صوته) فقط في مرتبة واحدة مع الفنان الذي يلحن بنفسه ..مهما كانت شهرة الاول الوحيد الذي كسر هذه القاعدة عندي..هو الفنان ابراهيم عوض ابراهيم عوض ليس فقط صاحب صوت جميل ..مؤديا للحن جميل ابراهيم يمتلك ناصية الاداء (بسلطنة) كما وصفته انت في عنوان هذا البوست من اوائل الاغنيات التي سجلها ابراهيم من الحان و كلمات عبد الرحمن الريح ...عندما تسمعها..تكاد تقسم بأن هذا الفنان يغني منذ عشرات السنين اسمع يا عمر (اسرار العيون) بتسجيل الاذاعة.....لتدرك اننا في السودان لا نقدّر المواهب حق قدرها هذا اداء شاب لم يبلغ بعد سن العشرين (Teenager )
نفس الشئ فعله وردي مع لحن برعي (حلفتك يا قلبي...او اغنية الوصية من كلمات اسماعيل حسن)
هذين الاداءين يصلحان ان يقدما (بضم الياء) كدروسا في فن الاداء الغنائي لهؤلاء (المتسلبطين) الجدد
يا الفاروق أنا جيتك جاري.. وبي إصرار واقول إمكن ما جيت.. لأنو مرتين تلاتة بفتح البورد عشان البوست دا وبلقى ماسورة بكري دي قاطعة يا هو قافل البلف ! معليش في الأول أحكي ليك قصة شوية طويلة.. زمااان ونحنا في بداية الجامعة ـــ برضو لم نبلغ سن العشرين :) سنة 92 أو 93.. وقتها لم يكن الراحل الكبير محمود أو الأستاذ الهادي حامد معروفين على نطاق واسع لجمهور المستمعين.. وكان زملينا العـزيز يوسف الشهير بيوسف الحلبي وكان برضو يتمتع بصوت جميل وندي..هو الوحيد في الدفعة البشاركني الإعجاب الكبير بالهادي ومحمود ومتابعة حفلاتهم وأشرطتهم، ونحكي عنهم بحماس شديد وإعجاب كبير، وكتير من الزملا كانوا بقولوا لينا: محمود دا منو؟ لأنهم زي ما قلت إما ما سمعوا بيهم أو ما سمعوا ليهم، وكنت بقول ليهم بعد سنة واحدة أو سنتين ح تسمعوا إنو فنان السودان الأول إسمو محمود عبد العزيز.. للمناسبة قبل تلاتة أربعة سنوات قابلت زميلة في السودان، قالت لي كل ما اشوف دعايات حفلات محمود تملا الكباري وأعمدة الكهربا وفي كل مكان بذّكر كلامك.. مـرة كان الشباب بتكلموا عن فنانينهم المفضلين، وطبعاً الغالبية العظمى ما طلعوا من وردي ومحمد الأمين.. والتقدميين خالص قالوا عـركي أو مصطفى.. كان عندنا زميل وأخ عزيز برضو إسمو خالد، وهو ظـن إنو الناس ديل ــ يوسف وأنا ـــ البسمعوا للفنانين الغناهم غريب دا ح يكون عندهم راي في القدامى.. وبيني وبينك أنا كنت ـــ في حياتي زمان ـــ شوية حاد في التعبير أو الدفاع عن قناعاتي.. قام خالد قال والله أنا داير أقول ليكم فناني منو، لكـن خايف عيسى دا يعمل معاي مشاكل.. طبعاً رديت عليهو بالحنك بتاع إنو دي مسألة أذواق وإختلاف أنظار الخ.. غايتو في النهاية قال وهو يتحفز للجرية: إبراهيم عوض..قلت ليه ياخي حرام عليك.. الفنان الذري دا هـو الزول الإخترع الغنا في السـودان (فأعرب عن إرتياحه التام)..عموماً معليش تاني تعبتك بالقراية الكتيرة زي ما قالت ليك دينا خالد :).. أها يا دينا أخدنا ليك حقك.. بعـدين زي ما تعرف الواحد بكـون معلق ليه في أغنية كدة يوم يومين وبغيرها.. لكـن عندي أكتر من شهر معلق في أغنيتين لدرجة بقيت بلخبت بيناتم: تذكار عـزيز دي.. وأبقا ظالم:
06-12-2013, 00:52 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: انا لا اضع الفنان الذي يعتمد على (صوته) فقط في مرتبة واحدة مع الفنان الذي يلحن بنفسه ..
ياخ في حاجة كده اسمها احمد البنا أو في الحقيقة احمد ود الجقر قال ملحن ليهو زي 60 عمل براهو ..طبعا الاعمال كلها من نوع اها وييين تمااام ادق دق دق.. وبمناسبة اولاد البنا ومن ثم كلامك بتاع الراحل ابراهيم عوض وهو دون العشرين يقدم فيض من الاعمال ..تعال شوف اسة ناس عاصم البنا !!! الواحد فيهم بدا الغنا كبيييير ويمشي يشترك ليهو في مسابقات بتاعت ناشئة وفنانين هواة مع انو طارح نفسو فنان محترف ثم يمشي عشان يقدم ليهو اغنية بيغني فيها ليهو اكتر من سنتين ويقدمها على اساس انها اغنية جديدة وبعد داك يجي يقدنا في قنوات التلفزيون بي إنو هذا فخر للسودان !!! عندي إحساس إنو ممكن السنة الجاية نشوف عاصم البنا في برنامج عرب ايدول طارح نفسه فنان صغيروني دون العشرين ..
06-12-2013, 01:26 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
تعرف يا عيسى انا كنت بستغرب في الناس الما كانت مركزة مع محمود عبد العزيز عليه رحمة الله .. مش عشان لييي ما عايزين يقتنعو بيهو كفنان نووو ..عشان محمود كان موهبة والمواهب بتكون حاجة ظااااهرة ما بيتغالطوا فيها اتنين ..
سـلامات يا خالد.. من حيث المبدأ كـلامك صاح، لأنو زي ما قال عمـر، محمـود بدا فنان كبير .. وكلنا سمعناه في نفس فترة أواخـر التمانينيات.. لكـن أنا قلت ما كان معـروف على نطاق واسـع، ولو تذكـر في تلك الفترة؛ بداية التسعينيات كان فناني حفلات الجامعات أو المسارح هـم غالباً عـركي وعقد الجـلاد (وساورا) والهادي حامد.. وقلما تجـد حفلات عامة كتيرة لمحمود ربنا يرحمو بالجنة.. يا زول السـودان دا أنجب عباقرة كتاااار في المجال دا بالمناسبة.. لكـن حسـرتنا إنو ونتيجة لتضافر أسباب وعوامل عديدة في رأي قد نضب معين ذاك الإبداع... يعني ما ممـكن سـنة كااااااملة الناس يكونوا فاتحين خشومهم راجين (أغاني وأغاني) عشان نسمـع لأغاني الغير والحقيبة بأصوات فرفور والفحيل وأفراح الخ.. دا بوريك إنو ما عـاد في جـديد الناس تنتظـرو أو تحتفي بيهو زي زمـان.. خاصة بعـد رحيل محمـود المبكـر..
06-12-2013, 08:45 PM
فتحي الصديق فتحي الصديق
تاريخ التسجيل: 06-17-2003
مجموع المشاركات: 6072
يا عمـر، في الحقيقة أعجبتني جدا عبارتك إنو الأستاذ إبراهيم يلغي وجود الكاميرا والجمهور تماماً.. على فكرة.. في العادة لامـن بنكون بنتفرج على أي تلفزيون سوداني بنكون أغلب الوكت بنعلق على (الأخطاء الفنية) من وجهة نظرنا على الأقل.. بالنسبة للديكور أو التصوير والإضاءة الخ الخ.. أذكر مرة معاي صديقي وودخالتي الساخر وكان في أغنية وأثناء ما بتكون شغالة الفرقة برضو الكاميرات بتكون مركزة على الفنان.. قام أحمد قال يركزو على الفنان في الوكت الهو ما شغال حاجة.. فما يعرف يعمل شنو.. يقعد (يتبلحـس)..(كان إحتجت مترجم شوف عبدالله داش لو كنبك قريب)..
06-13-2013, 12:21 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الله يسامحك ياخ يا عمر والله قلبت علينا مواجع وذكريات وأيام وناس وأحداث وعيييييك صديق عزيز من أولاد الرملية عزمنا عرس خالو عادة لو الفنان طيارة ساي، بعضي عضتي واكسب زمني بدري بدري قام قال لينا الفنان إبراهيم عوض (رحمة الله عليه) قلت ليهو جهز لي كرسي قدام إبراهيم عوض (الله يرحمو) كان اتفرجنا على لبستو ساي مكسب، خليك من غناهو والله يا عمر بدأ بالأغنية دي نظام بداية هادية بأغاني سلطنة وروقان وشوية شوية يرقصهم وبنفس طريقة الأداء ده رجعت من الحفلة ديك بفهم جديد عن هذا العملاق وعرفت تسمية الفنان الذري دي ما جات عبط ساي /-/-/-/-/-/-/-/-/-/-/-/ فعلا ملاحظتك في مكانها بخصوص المايك يا عمر لاحظ كمان التقنيات الصوتية زمان كانت محدودة جداً ما زي هسع جماعتك الهسع البقربو يبلعو المايك ديل لو حضرو زمن سماعات الجردل ديلاك من سكات يلزمو الدايمة متفرجين
06-13-2013, 03:33 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
والله يا نادر يا اخوي تنهداتك وجرستك دي مااا جرسة صديق عزيز ..دي جرسة صديقة عزيزة عديييل كده .. ابراهيم عوض ممكن يغني بدون مايك وباقي لي صوتو ح يطلع اجمل .. ودي الفطرة بتاعت ابراهيم عوض.. صوت منننو وفيهو لا شق لا طق.. كتبت كتيير إنو كانت امنية حياتي ان يحي حفل زواجي الراحل ابراهيم عوض والفنان زيدان ابراهيم لاسباب تتعلق بي انو اليوم ده مفروض يوم تاريخي وبالتالي لازم يكون الفنان فنان تاريخي يدي اليوم ده هيبتو .. للاسف انا عرسي كان مع موت جون قرنق وحظر التجول ..تخييل عرس يعملوهو الساعة 2 ونص منتصف النهار..هلال ترجي بس..:)
انت أصلا ما تستأهل يدوك وش ههههههههه صديقة عزيزة في عينك
هلال ترجي النص النهار دي برضو ذكرتنا الوالي الغالي الله يرحمه، سحّب التوانسة لما قال كفا. بعدين عليك الله تاريخ شنو تاني لي يوم عرسك اكتر من يوم رحيل العملاق جون قرنق؟ قوم لف لا زيدان لا إبراهيم عوض الله يرحمهم ما بتقدر على عداداتهم
06-13-2013, 05:12 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: قوم لف لا زيدان لا إبراهيم عوض الله يرحمهم ما بتقدر على عداداتهم
معقووولة بس يا نادر ؟؟ العريس ود قلبا والفنانين أولاد قلبا وتقول لي عداد ؟؟؟ انت كان كده ما بتعرف اعراس ام در.. ابو الزيك الله يرحمو قبل ما يرحل ساكن عندنا سكنة .. وابراهيم عوض بي حق الجيرة ساااي بنجيبو .. ها زول ها انت قايلني هيين ولا هييين ؟؟؟ما تشوفني برد ليكم كده ؟ :) :)
06-13-2013, 05:20 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
على ذكر ال( بلحسه) و الفنان ال(طيارة) صحي يا عيسى ود خالتك ما غلطان و فعلاً الكاميرا بتجهجه الفنان لما تكون مركزة عليهو و هو ما بعمل في حاجة و تلقاهو يقلب في عيونو شمال يمين . اما الطيارات ديل يا نادر قال ليك ابراهيم الكاشف كزول (مقدده) هو او من اطلق على الفنانين الجُداد لقب (برينسة) اصلاً الكاشف دا كان زول صعب خلاص و مقتنع باي زول غير (الكحلاوي) - حسب ما توارد الينا- العجيبة انهم الأتنين أنا شايف اصواتهم بتشبه بعض بشكل مبالغ فيهو .
طبعاً يا شباب و انا برلوم (كرت كرتونة) في الجامعة الإهلية ناس الإتحاد (احتمال برضو رابطة اقليمية و تقريباً تكون رابطة القضارف) و خلال إسبوع ثقافي جابو إبراهيم عوض يغني في الجامعة* اها الأستاذ جاء العصر عدييييل كدا زي الساعة 5 مساء و في مسرح النشاط القديم أخر شياكة و جمال و غنى أغنيتين و النشاط مليان خلق بصورة عجيبة فجأة كدا طُلب من الأستاذ أنو يستمع لطالبة بتغني أغانيهو (الطالبة نسيت اسمه بس هي من بنات القضارف) و الأستاذ طوالي و افق و قدم المايك للطالبة و وقف بالجمبة كدا الطالبة جاءت و اول ما المزيكا اشتغلت و ضح على الأستاذ التركيز الشديد مع الطالبة و اول ما الزولة دي ضربت ال(كوبليه) الأول من الأغنية عمنا ابراهيم عوض طلب كرسي و ختاهو و قعد خاتي يدو تحت حنكو و يعاين للشابة دي و يضحك بانبساااااط شديد لما خلصت الأغنية صفق ليها باعجاب شديد و طلب منها أغنية تانية برضو غنته بمزاج شديد ... اليوم داك الأستاذ اشاد بالطالبة دي اشادة شديده و قال :- كلوووو عرفناهو في تقليد الأصوات لكن بت و للدرجة دي ما كنت متخيل دا يحصل .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ اليوم دا كان من اجمل أيام الجامعة هو و اليوم الجاء غنى فيهو بادي محمد الطيب.
06-13-2013, 05:46 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
تعرف يا نابري انا كانت عندي مشكلة في إني كنت ما من رواد دخول الحفلات العامة للفنانين ..وطيييلة حياتي دخلت حفلات بعدد اصابع اليد الواحدة تقريباً كانت فيهم تلاتة لي محمود رحمة الله تغشاه لما بنخرم لي محمود وقادين سلك من الدفاع الشعبي.. أها وحسب ما قييل لي والبسمعو والانا حاسيهو إنو من أجمممل الحفلات الجماهيرية تلك التي تقام في الأهلية .. ويكفي إنو إنطلاقة نادر خضر الحقيقية كانت من هناك .. ما قدر لي ادخل احضر لي حفلة في الاهلية وندمت أيما ندم وحسيت بي انو نظريتي قد تكون فاشلة نوعا ما في عدم دخول الحفلات الجماهيرية إمكن عشان انا بحب استمع لي الفنانين بي اضاني وبي تركيز عالي عشان استمتع لي بت ام روحي دي.. عارف كلامك ده مغسني مغسة شديييدة خلاص واتمنيت لو الزمن يرجع لي ورا عشان تعزمني الحفلة دي..
سفيان يا فنان كيفك ياخ، والله مشتاقين يا حبيب ... شوف يا عمر بوستات حلوة زي د بتجيب ناس سفيان ديل وتحلو الونسة
أظرف حاجة في سماع الغنى السوداني القديم أنا عندي أشرطة كاسيت من الثمانينيات لكثير من العماقة وردي/ مصطفى/ زيدان/ إبراهيم عوض والخ أها أكون بسمع في الشريط بي مزااااج، وطبعا تعجبك تسجيلات زمان في الشخشخة والتسجيلات الكواليتي بتاعها صفر وتحت الاجهزة التعبانة وساونات ماف تجي مريم تضحك وتقول لي هسع أنت سامع كلام وقادر تفهمو وبتطرب؟ أقوم اتعقد شوية كدة من الوضع ده وأمشي الحال وفي النهاية بقيت أقول ليها لذة الغنى ده في الشخشخة وعدم الوضوح، كان بقة واضح بفقد بريقو. ههههههههه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
سفيان بشير نابرى
Zakaria Fadel
فتحي الصديق
فيس بوك
تويتر
انستقرام
يوتيوب
بنتيريست