|
|
 الــــبـــيـــــــــــــــــــــــــــــــــــــاض
|
ختيت بياضي على فال البنية
برقن بروق السعد في ليلا ضرير
لصفن نجيمات حلمني
(يا وليد
اسدر ونم قولك شعر
اركب صهاوي الريح
تنتر نتر
واجمع قوافي القول
مهما صعب درب المسير )
ورهنت خطوي على درب فالك
مشيت نحو الضفاف
والقيفة تسمع للخرير
موجات تناجي القمرة
ترسل في الوحيح
وانا ليك برسل حرفي يرجع لي
من صداك همسك حرير
وارسم عيونك في مسامات الظنو ن
القى الظنون
ضوت عوينات النهار
والقول مغتغت ما جهير
سر ريدي ليك
حبة كلام
غزلا رحل
بين شفة الفجر المرق
وشفة الليل الكسير
يلا ك نغني الريد فرح
يلاك نعيش لحظات مرح
ما تشيلي مني الباقي لي
من عقلا وقد بيك انشرح
ليك الاماني الغارقة
في جوات عشم
والبينا اكتر من حلم
بينا الوعد
والنيل ومشوار العصير
شفتي كيف النيل جميل عند الاصيل
وشفتي كيف لزول بكون دايما نبيل
انا يا ملامح الصحوة
في مقطع
غناي
بهواك عشان ريدك
بهز وتر الغنا الجواي
يدوزن كل فاصلة
وكل آهة عليك تشير
آه انا من عشق
فتت مفاصل الكلمة
جمع كل اوردة الحروف ،
وبين الخلايا ،
خت اسمك
زول وطن
يا بنية فال
غيم الرشاش الجاي
كاسر للمحل
والبشرى بي موسم مطير
باكر بجيك
شايلك معاني العزة
والقول الصدق
باكر بجيك مليان معاني
حرية
لي حد السما
لكني في عشقك اسير
وبس
|
|
 
|
|
|
|
د.محمد حسن
فيس بوك
تويتر
انستقرام
يوتيوب
بنتيريست