في هذه الايام طفي الي السطح موضوع سد كجبار مرة اخري رغم علم الحكومة رفض المواطنين لهذا السد وتم ابلاغها بشتي الطرق والوسائل وتاكيدا للرفض تم تقديم اربعة شهداء في كدنتكار لكن الحكومة في حكاية قريبة لحكاية المسطول والديك (مين يقنع الحكومة ) في عناد ظاهر وتحدي من الحكومة للمواطنبن وبعد ان جربنا كل والوسائل والطرق ..... ابتكرنا طريقة اخري لايقاف الحكومة عند حدها قررنا انا ووالدي متعه الله بالصحة والعافية وبالتشاور مع افراد الاسرة قررنا وبكامل وعينا وادراكنا منح السيد باراك اوباما قطعة ارض ملك حر في وسط كجبار ومعني ملك حر للذين لا يعرفون معناه اننا احرار في منححه لمن نشاء ولان الوالد يحب الارض قدر حبه لاولاده واكتر اقننعنناه ان هذه الفكرة ستبقي باقي اراضيه وننخيله واملاكه دون ان يعتدي عليه احد الي ان يرث الله الارض ومن عليها ويتم تسجيل اسمه في سجل التاريخ وبعد تفكير عميق قال الوالد طيب يا اولاد الراجل اديناه قطعة الارض حيسكن وين الراجل لازم نديه كمان بيت يليق بمقامو
انا قلت انا بديه بيتي ابوي اعترض بشدة وقال اولادك حيمشو فين ثم ثانيا انت بيتك بعيد شوية من النيل وقال نديه بيت حبوبتكم بس البيت داير شوية ترميم وصيانة والله فكرة اولا البيت في موقع استراتيجي بيت حبوبتنا زهراء حقار في حي دراركي جوار منزل شقيقها المرحوم علي حقار ويبعد من النيل حوالي الخمسين مترفقط والاهمية الاخري يطل مباشرة علي الضفة الاخري كدنتكار يعني حيعجب المالك الجديد وكمان جنبو مسيد جدنا علي حقار عليه رحمة الله .... طبعا ادينا الوالد بعض الخلفية التاريخية عن السيد اوباما وانه من اصول افريقية وانه درس الحقوق في جامعة هارفارد وانه عمل مستشارا للحقوق المدنية في شيكاغو وانه حائز علي جائزة نوبل للسلام نظير مجهوداته في تقوية العلاقات الدولية والتعاون بين الشعوب .....وان له زوجة تسمي ميشيل اوباما وسال الوالد دي زوجتو ولا اختو لان الاسم مطابق وتم الشرح بان هذا اسم العائلة وله بنتان مايا وساشا وبعد تفكير سال عدد من الاسئلة طيب ميشل تقدر تعوس الكسرة او تقدر تسوي القراصة والبنات ما عندهن مدارس فعلا اسئلة مهمة بالنسبة لميشيل يمكن تعليمها العواسة وعمل القراصة بمساعدة الجيران خلال اسبوعين لتلاتة كمان يمكن الاستفادة منها في تدريس اللغة الانجليزية في مدرسة البنات وبالنسبة لمدارس البنتين ساكلم ابني روعة التي تدرس في مدرسة شدة الثانوية لتاخد معها صحباتها ماليا وساشيا وانا اقوم بتكفل كافة الرسوم الدراسية للبنتين دون علم السيد اوباما ان هناك رسوم دراسية تفرض علي الطالبات مخالف للدستور الذي ينص علي مجانية التعليم علما بان السيد اوباما كان يقوم بتدريس مادة القانون الدستوري في كلية الحقوق في جامعة شيكاغو واذا عرف حكاية الرسوم يقوم يعمل لينا مشكلة قانونية اخري مع الحكومة ونحنا ما ناقصين ,,,,, انتهينا من الجانب المهم وهي حريتنا في ان نمنح ما نملك لمن نريد وان نمنح بيت حبوبتنا عليها الرحمة لعائلة السيد اوباما وذلك حفاظا علي ارضنا وارواحنا وممتلكاتنا طبعا الحكومة ما حتسكت وحتفتش ليها علي ثغرة او ثغرتين ولكن نحنا جاهزين اذا الحكومة قالت لا يمكن ان ان تمنحوا الاجانب اراضي وبيوت في السودان
نقول ليهم ما انتو عندكم في ماليزيا ودبي والقاهرة وكمان بايعين نص السودان للاجانب ومتنازلين عن النص الاخر يعني بالعربي كدا بايعين البلد كلو ثم ثانيا نحن ما حنتكم معاكم تاني عندنا محامي شاطر جدا انتو عارفين لوكترتو معانا الكلام حندخلو كمان في لجنة مناهضة سد كجبار حكومة ما بتجي الا بالعين الحمرا ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الفاتح شلبي
Medhat Osman
فيس بوك
تويتر
انستقرام
يوتيوب
بنتيريست