|
|
|
 Re: أيهما أفضل لحكم السودان أولاد الفقراء ولا أولاد الذوات (Re: Balla Musa)
|
سلام يا حمد
مع انو اجابتي ح تكون بره خياراتك الطرحتها، لكن اقبلها مننا يا حبيب
قبل فترة طرح الكوز الدكتور التجاني عبدالقادر مفهوم الدولة الادارية
(هو طبعا من الكيزان المفتونين بالتجربة الامريكية - ايوا هي زاتا الدنا عذابها)
اقرب الصورة، انا شخصيا لمن استمع لتقرير صحفي او خبر بكون حريص جدا افرق بين
حاجتين
- الحكومة الأمريكية
- الادارة الامريكية
لمن تسمع الادارة الامريكية يعني الموضوع انتهى، فينيتو الذ فيه تستفتيان، ام الحكومة
الامريكية فما فرق بينها وبين الكيزان حاجة، يصرحوا الليلة وبكره يبلعوا كلامهم عادي، سياسة وكده
خلاصتو
دايرين ناس يديروا الدولة دي بيييي ناس الحكومة زاتهم، حينها الادارة السودانية، التي لا مجال فيها
الا للكفؤ والوطني بجد.
تحياتي
| |
 
|
|
|
|
|
|
|
|
Re: أيهما أفضل لحكم السودان أولاد الفقراء ولا أولاد الذوات (Re: أحمد ابن عوف)
|
الأخ/ حمد عبدالغفار
أنا ضد أن يكون (مؤهل) إذا كان المعنى (أنه متعلم) أو ذا شهادات عليا
(محمد صلى الله عليه وسلم) كان لا يقرأ ولا يكتب عندما نزل عليه الوحي
الشيخ/ زايد بن سلطان رحمه الله تعالى (كان لا يملك شهادات عليا) وكان أحكم الحكام العرب وشاعراً له دواوين شعر كما له من الأقوال مواد تدرس في كتب التربية الوطنية
وعندنا (دكاترة) أي كان ..... وزراء أو حكام ولم نجد منهم غير (الكلام وبس) وهلمجرا ....
أخيراً أنا مع (حمور زياده)
عزيزي المواطن.. فليسقط النظام ويحكمنا (فتحي عباس نقد) لأنو كل من حمل إسم (إبراهيم حسبو) الحقيقي كان زعلان؟؟؟؟؟
عزيزي المواطن .. فليسقط النظام ويحكمنا إبراهيم حسبو
ولكم التحية
| |
|
|
|
|
|
|
|
|
|
Re: أيهما أفضل لحكم السودان أولاد الفقراء ولا أولاد الذوات (Re: Sameer Kuku)
|
حمد ..حبابك يا صديقي
اولاد الذوات جربناهم تلاتة مرات.. اول ما يمسكوا الحيكومة دايرين يرجعوا اموالهم المصادرة..و بعد داك بيقضوها دندرما و آيسكريم.. لمن ينط فيها عسكري..
و اولاد الفقرا.. اهو اربعة و عشرين سنة.. و عشان ما عندهم اموال مصادرة. .قاموا صادروا ليك الشعب.. شي فصل عام.ز شي بيوت اشباح.. شئ ابادة جماعية.. شئ جرائم حرب.. شي جرائم ضد الإنسانية..و شي تقسيم البلد لنصين..!!!
اقترح انو البلد تحكمها زولة.. لأن ثقافتنا الشعبية ربتنا أنو المرا ما عندها عدو..و الزولة ما عندها عدو.. عشان كده احتمال كبير تمرقنا لبر الأمان..!!!!
كبر
| |
|
|
|
|
|
|
|
|
Re: أيهما أفضل لحكم السودان أولاد الفقراء ولا أولاد الذوات (Re: Balla Musa)
|
أهلا د بلة
| Quote: الأفضل أن يكونوا أولاد ذوات الثدى |
ذوات الثدي دي ما لامة فيها كلاب
تذكر يا دكتور زمان لما يقولو ليك دا ود ناس فلان ولا دا ود بروفيسور فلان ولا دا عمو فلان الفلاني وانت تكون جاي من صقيعة من صقائع السودان دي
على طول بتنسج في رأسك قبة للفكي دا وبتكون منبهر بيهو شديد
أو ود ناس فلان دا زاتو يقولوا ليهو بلة دا جاي من الصقيعة بيكون شايفك كد كدا
زمن ياخ
بالمناسبة أولادك انت ذاتك لو كان ولدتهم قبل 30 سنة كانوا حيكونوا أولاد ذوات موش أبوهم دكتور ؟
دا ما بينفي أنهم هسة ممكن يكونوا أولاد ذوات
| |
|
|
|
|
|
|
|
|
|
Re: أيهما أفضل لحكم السودان أولاد الفقراء ولا أولاد الذوات (Re: حمد عبد الغفار عمر)
|
مرحب أحمد بن عوف
تعرف أنا ما عرفت ورطة البوست دا إلا لما ضغطت ارسال لأنو الكلام فيهو صعب وممكن يُفسر خطأ
Quote: الحكومة الأمريكية
- الادارة الامريكية |
في أمريكا الوضع بيختلف
أهو أوباما ود العبــيد (حسب الفهم) فاز على ود الارستقراطيين
بس حتى دا ما بشفع ليهو ولا بيشفع للارستقراطي
بعيد كلام الليل يمحوه النهار دا في السياسة الخارجية فقط ومع الوهم بتاعين العالم الثالث بس
لكن السياسة الداخلية ما فيها مجاملة كلام النهار وكلام الليل كلو تحت المسئولية في حاجة اسمها مواطن أمريكي وحقوقو وفي حاجة اسمها الأمن القومي
البتلاعب في ديل ما ليهو وجود في كرسي لو كان أبوهو الشيطان الرجيم
| |
|
|
|
|
|
|
|
|
|
Re: أيهما أفضل لحكم السودان أولاد الفقراء ولا أولاد الذوات (Re: حمد عبد الغفار عمر)
|
الاخ حمد
تحياتي
الحصل انو الادارة الامريكية قررت تضرب مصنع الشفاء، مشو للحكومة الامريكية (كيلنتون)
وصحوهو من النوم اي والله، سمع اضاني لمن اوبرا استضافتو، قال ايام مشكلته بتاعت مونيكا الشرط ديك
المرا القاهرة الاسمها هيلاري كانت منوماهو في الكنبة الفي الصالة. هو حكاه في شكل نكتة
يعني شهرين منومتهو في كنبة الصالة لكن كان بمارس مهامه بشكل طبيعي ومنها توقيعه على امر
ضرب مصنع الشفاء.
who is running the show في امريكا ويلوح للناس ما مهم يكون ود ذوات وللا وفقراء.
المهم هو من ممسك بالادارة الامريكية.
طيب اجيك بالدرب عدييل
الادارة الامريكية ما وثلت لما وصلت اليه الا لانهم في بلادهم يتمتعون بحاجة اسمها الفصل بين السلطات
جيب لي فصل بين سلطات في السودان وشوف لو في زول سأل الوزير او الوكيل او فلان وعلان ديل جايين من وين.
جيب سلطة قضائية تجرجر رئيس جمهورية للمحكمة من اضانو وسلطة تنفيذية لو امرتها السلطة القضائية
بسجن هذا الرئيس لنفذت دون تردد.
تخلي الوضع يبقى كما هو عليه، لا اولاد ذوات لا اولاد ضهاري ح ينفعوا.
يبقى السؤال، مين هم البقدروا يطبقوا الكلام دا في السودان، مين البقدرو يجيبوا ديموقراطية حقة في هذا البلد المنكوب
؟؟؟؟؟؟؟؟
| |
|
|
|
|
|
|
|
|
|
Re: أيهما أفضل لحكم السودان أولاد الفقراء ولا أولاد الذوات (Re: أحمد ابن عوف)
|
مرحب فتحي نقد
Quote: أنا ضد أن يكون (مؤهل) إذا كان المعنى (أنه متعلم) أو ذا شهادات عليا
(محمد صلى الله عليه وسلم) كان لا يقرأ ولا يكتب عندما نزل عليه الوحي
الشيخ/ زايد بن سلطان رحمه الله تعالى (كان لا يملك شهادات عليا) |
تعرف عدم التأهيل دا ياهو الضيع سودان ما بعد الاستقلال
مجموعة بتاعة متعلمين تكنوقراط وبيوتات دينية ومالية وعسكريين تحكمت في سياسات البلد ولم تجد شعب متعلم ليردعها لذلك جربت كل أنواع الفشل وسقطت في إدارة البلد
الشيخ زايد مع احترامنا ليهو (ربنا يرحمو) لو لقى بلد مفلس وفيها تعداد سكاني وتعقيدات زي الفي السودان دي يمين الناس كان ماتت جوع
الإقتصاد الجيد بغطي على سوءات الإدارة
الزمن العلينا دا السياسة والإدارة بقت عايز تأهيل ونبوغ وتفكير ونزاهة منقطعة النظير (عشان كدا أن سألت السؤال)
سيدنا محمد (ص) خارج نطاق حكمنا فهو لا ينطق عن هوى النفس كل ما يأتيه فهو من الخالق
| |
|
|
|
|
|
|
|
|
|
Re: أيهما أفضل لحكم السودان أولاد الفقراء ولا أولاد الذوات (Re: حمد عبد الغفار عمر)
|
يا حبيب كيفك ..
الموضوع متعلق بالحقوق والواجبات وليس بمكانة الشخص او مقدار غناه او فقره ، هذا من الناحية الدستورية ، يعني فرص الناس متساوية في الحقوق مثلما هي متساوية في الواجبات ..
لكن مين الاصلح ، ده سؤال لا يمكن الاجابة عليه ، الاصلح هو من يتفق عليه الناس ، غنيا كان او فقيرا ..
نحن بنحتاج لنظام مؤسس اكثر من اشخاص بعينهم ، نظام متكامل كل زول يكون عارف حدو وين ، الشغل بتاع ابعاج الله يرحمو وعنتريات البشير الفارغة وحكومات مراكز القوى ، عاملة زي بيوت السحاحير في حجا حبوباتنا ، حكومة داخل حكومة داخل حكومة لحد ما نفسك ينقطع ..
البشرية الآن لديها ارث سياسي / اداري / دستوري ضخم جدا وبإمكاننا المزواجة والانتقاء والابتكار زي ما عايزين ..
تحياتي
| |
|
|
|
|
|
|
|
|
 Re: أيهما أفضل لحكم السودان أولاد الفقراء ولا أولاد الذوات (Re: حمد عبد الغفار عمر)
|
هلا كبر
Quote: اولاد الذوات جربناهم تلاتة مرات.. اول ما يمسكوا الحيكومة دايرين يرجعوا اموالهم المصادرة..و بعد داك بيقضوها دندرما و آيسكريم.. لمن ينط فيها عسكري..
و اولاد الفقرا.. اهو اربعة و عشرين سنة.. و عشان ما عندهم اموال مصادرة. .قاموا صادروا ليك الشعب.. شي فصل عام.ز شي بيوت اشباح.. شئ ابادة جماعية.. شئ جرائم حرب.. شي جرائم ضد الإنسانية..و شي تقسيم البلد لنصين..!!!
اقترح انو البلد تحكمها زولة.. لأن ثقافتنا الشعبية ربتنا أنو المرا ما عندها عدو..و الزولة ما عندها عدو.. عشان كده احتمال كبير تمرقنا لبر الأمان..!!!!
|
أولاد الفقراء بحاكوا في أولاد الذوات ودي المصيبة
والمصيبة الأكبر إنها تكون نهج
خليني اديك مثال لما محمد حسن بوشي هاجم د. نافع في الجامعة كان بنتقد في دكتور نافع لحدي ما حصل حتة إنو ولد نافع راكب سيارة قيمتها 200 مليون
في ظني إنو د. نافع ممكن يكون اضايق من مسألة إنو زول ينتقدوا علانية كتنفيذي لكن حكاية الناس تعرف ولدو راكب سيارة بالقيمة دي ممكن تكون ما ضايقتو بل بالعكس
ممكن تكون عملت بروباغندا هو أصلا عايزة تحصل عشان الناس دي تعرف إنو ولدو ود ذوات
وعلى ذلك قس ولد كرتي ولد المتعافي ولد عبد الرحمن الخضر وربيع عبد العاطي وهلم جرا (عشان د. نافع ما يقول أنا قاصدو هو بس)
 ودي إشارة لأهل البيوتات القديمة إنو نحن ما أولاد ذوات لكن أولادنا حيكونوا أولاد ذوات والمافي شنو ؟ نفوذ في ، قصور في ، قروش في، سفر للمنتجعات في وممكن المسألة تكون شاملة لغالبية الشعب السوداني حتة الظهور والصيت والشهرة دي.
هنا بتبرز أهمية وجود الشخص في العمل العام هل موجود لخدمة الوطن ول لخدمة نفسو وحاجاتو الشخصية
أما مسألة تحكمنا إمرأة دي أنا بثني لأنو تعرف الشعب السوداني دا عايز زول يحن عليهو أو زول يزرع الإبتسامة في نفسو يعني شعب مستعد يأكل ملاح شرموط ثلاثة وجبات أنا في ظني دا شعب ممتاز جدا فقط عايز ليهو أمان ومحبة.
بالله عليك الله تخيل دينا خالد دي رئيس جضمت شغلها في المكتب وتخيل بعد داك نزلت في موكب في الشارع تشاغل في دا وتضحك مع دا وتلاقي ليها مرة عجوزة تقرصها في يدها وتقول ليها إنتييييي ؟ متعة ياخ
آسف للتطويل
| |
|
|
|
|
|
|
| |
حمد عبد الغفار عمر
Balla Musa
Hani Arabi Mohamed
أحمد ابن عوف
فتحي عباس نقد
Hussein Mallasi
Kabar
منتصر صلاح
Abdullah Idrees
فيس بوك
تويتر
انستقرام
يوتيوب
بنتيريست