Quote: إتخيلوا و المرتضى لبس لبستو الفي بروفايلو دي وخمش السيف وقدل بيهو زى قدلة الجماعة ديل
يا اخوانا هل حصل وممكن تحصل ؟
في فيلم The Mummy ، إن لم تخني الذاكرة ، واحد مصري عمل حركات بهلوانيه بالسيف كي يرهب خصمه الأمريكي وقدم عرضا لايُجارى بسيفه والأمريكي يضحك بسخرية حتى أنهى العرض بطلقة من مسدسه من مسافة 20 متر.. هسه يا العشا باللبن في زمن الكروز توماهوك دايرني أقدل بي سيف؟ سألتك بالله الفرق بينك وبين القاعدين يرقصوا مع زولك داك : وروني العدو واقيفوا فراجه شنو؟ لخّوهم بالليل في قلب الخرطوم ولحدي الآن ما عارفين الهَبَدُم منو؟ وربما قالوا إن لله جنودا من مكنات لحام..
قال دَقَّاتو من صدرك قال..
04-05-2013, 04:26 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: سألتك بالله الفرق بينك وبين القاعدين يرقصوا مع زولك داك : وروني العدو واقيفوا فراجه شنو؟ لخّوهم بالليل في قلب الخرطوم ولحدي الآن ما عارفين الهَبَدُم منو؟
ديل اصلا ما بيؤمنوا بالشتر من بعيد - ديل الواحد اكان ما اتلهمك عديييييييل جوفو ما برتاح ، وشترات التوماهوك المن بعيد دي ، ايا كان الدمار الذى تحدثه ، برضو بحس زى خرمان التمباك وادوهو بن يسفو .
04-05-2013, 05:28 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
بي حليفتا والله العظيم فوق سمائه كأنك قريت أفكاري يا مسنوح نزلت الأغنية امس في الإنجمامة واليوم كتبت كلماتها دلوكا تخلي شعرة الجلد تكلّب هشششششششششششششش بكتب وبنقز مع الدلوكا هييييييييع نحن قولنا الدلوكا دي وكت تهبق ( تل ) الواحد ابليس بكلكلو ويصبح زي القاعدلو في كانون جمر لو ما عرض مابرتاح بس ناس ديل ناس عرضة جقلبا بس مابعرفوا يسووها زين كان جيتك في مسقط وهبقتها لي بوريك العرضة على اصولها صوقير وتيتيل وقوما حُفا وهييييييع ######ت شعرة جلدي يا سجم هيييييع أنا اخو البنيات
04-05-2013, 06:10 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
أمير كيف حالك آ المبروك ومنا نبلغك كثير التحايا مددا لعندك وتصلك وانت في أحسن حال الرُقي مافاتك شِبر يا رائع ومن أضلك هذا يا جميل خلي المسنوح العدو البندورو دا ومرمي الله مابترفع
============================= المسنوح شوق الشوق وما مشتاق ليك أنا قرش برلندي ( بتعرف القرش البرلندي ؟؟؟؟ ) راقي ومركب كوز تيمس فوقو ريشة نِعام رِقي لكن بنعرف دا وبنعرف دا ولكل مقام مقال وكت الدلوكا تدق وتهبق بتلبش وتقول الزويل جاي هسي من شندي ههههههههههههه عليك الله شوف ود المرتضى دا كيف سفه تراثنا وعرضتنا بي فلم مام والمصري البهلوني الزويل دا علا اسوقو شندي يحضر لي ضحوية بالبشيرة عشان يآمن ويشوف طقوس الدلوكا علي اصولها
04-05-2013, 07:15 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: شايل ليك سيرة ولا مؤجرك مزارع تدلي ليهو قمحو العاجبو من الحواشة؟
شاحن مكوّش كل خير جالبو للبردانة ههههههههههههههههههههه إت من زمن السيرة بي اللوري يا العجب هسي بقت ( HELP YOURSELF ) ( بوفية مفتوحة ) ترمبيلك دابتك ولا تركب امجاد تجي الصالة مشروع حضاري برضو
بتعرف يا ولد البادية والضهاري ما معنى ( الحواشة ) ولما سميت بهذا الأسم ؟؟؟ أجب على السؤال ولو غلبك استعن بصديق ( احمد القرشي ممكن ) ههههههههههههه انا الككو ............ هو معنى قريب من حجوة البعاتية أم كيشونة منتظر ردك علي السؤال ما تزوغ بلف وراك عارفك يا ود الموية
04-05-2013, 08:04 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: عليك الله شوف ود المرتضى دا كيف سفه تراثنا وعرضتنا بي فلم مام والمصري البهلوني
خالد المامنسي، لم أسفه تراثنا لكن صاحبك دا ما منطقي.. ياخ شابكنا صقريه هيييع كععع كررررب وجابت ليها سيوف حتى يخال إليك أنك عدت بآلة الزمن إلى كرري و شيكان..
خليهم يعملوا ليهم برنامج في بلدم يسموهو: Al Bardana got Talent يمشي يعرض فيهو ويريِّحنا.. شايف فيصل جاهو من الآخر ..
04-05-2013, 10:15 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
ختيت إيدى فوق نديدى أبشر يا القواسمى أبشر بالخير أنا وإنت إلا السوط دا يقول لا يا تفوز يا أفوز أنا أخو الجنه بت جابر ياخ دلوكتك سمحه وطربك غير أبشر بالخير
أهلا بي شيخ العرب الليلة جبت خيتنا الله يحلك مننا ___
يا الأحييت سنن البرامكة عاجبني طول ايده سامكة يا يا با قول النعيم درّاج في المسا مكة *** النعيم يا فحل القبائلْ كريم لمّام للهمايلْ شيتا براك ما أظنو خايلْ ايدو ام ِرويق والقِبلي شايلْ
****
النعيم يا قاصدين لبا خشمو انطبع لي مرحبا هو عزيمتو ما بردخا والبتلبن للضيف بضبحا
*** أنا غنيت ِجب مسدارو شوف النعيم كيف لاوي شالو ما حسبوك في القالوا قالوا العيش ِرخص والقمري طالوا
***
النعيم قادر وحدو ما تكترو وتتقعدو هو رب القدرة ساعدو ختو لو الصحة ما فنتدو
***
أنا غنيت للولد الاسمو النعيم ود حمد وكت العيش ِبقى بالقِب ديوان النعيم ولا بنسد
*** غنيت لدابي الرجيمة ما بحوى على البهيمة هو لك الشكرات قديمة ما بشيل المال الفي القسيمة
*** النعيم على كفو السخا يقدل زي شمس الضحي والبتتاوم للضيف يضبحا *** غنت ليك أم رشوم هو مو لها وطق خُشوم وكت العيش بقى معدوم فوق ضهرو الولية تنوم **** يا الشرفت القضا يا الحاكيت المن مكوار بدا خدامتو القعدا هيِ بتدرِش وقالت قضى ______ الحليلة
04-06-2013, 01:32 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
روحك في عرضة يا ود شيقوق ؟؟؟ ياخ أنت رأجع من البلاد أسبوع ما تميتو العرضة مشتهنها نحن يا أخوي . يا ود شيقوق عمك سعرناوي خال صاحبك ود المنسي قال : زمان كان البت تلفحك شبال وهي بي شرق النيل تشم فوحان خمرتو غرب النيل . يا خ هو شبال ولا توم كرووز ؟؟ .. مشتهين العرضة والشبابيل يا ود شيقوق يا أخوي
04-06-2013, 05:37 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: روحك في عرضة يا ود شيقوق ؟؟؟ ياخ أنت رأجع من البلاد أسبوع ما تميتو العرضة مشتهنها نحن يا أخوي .
انت يا عثمان اخوى من شدة ما ابعدتم من عينة دا يكون جلدكم بقى تخين ولا بحرك فيكم شعرة
Quote: يا ود شيقوق عمك سعرناوي خال صاحبك ود المنسي قال : زمان كان البت تلفحك شبال وهي بي شرق النيل تشم فوحان خمرتو غرب النيل . يا خ هو شبال ولا توم كرووز ؟؟
..
ههههههها والله دا نووي عديل
04-06-2013, 05:51 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
والله يا مجدى اذكر لما كنا في الجامعة الدلوكة جابوها في قاعة البغدادي بكلية الطب ومعاهم الراحل الطيب محمد الطيب - والله وقت دقت ناس ود بادي تلبوا فيها بالسوط والله بلاط القاعة كلو اتملأ دم والطالبات هربن كووووولهن من القاعة.
الشبلي
المناسية شنو !!!؟؟؟
زيارة مرسي ؟؟
ولا ذكري انتفاضة ابريل ؟؟!!
ما لازم يكون في مناسبة
مسنوح ....................
الحمام الحمام بس
04-06-2013, 10:28 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: يا ود شيقوق عمك سعرناوي خال صاحبك ود المنسي قال : زمان كان البت تلفحك شبال وهي بي شرق النيل تشم فوحان خمرتو غرب النيل . يا خ هو شبال ولا توم كرووز ؟؟
ود موسى جبتَّا الوحل البجكن الدحيش لي الباطوس خمج ووكرة الشبال من بنات جعل زمان بي حقو كان ما أخذتا حقك في البطان ما بتقدم تعاين بي عيونك ( والفلس شن داير يكوس .. بس يعاين ويشبع مغوص ) وقال ود بادي أنا أخو البت اللكعت قرن الخُمرة النازة فوق وردان الصبوة الراكزة قرن الخُمرة النازة تهتن وتنقط من شعرها عطراً طيبا جدعتا وين يا ود موسى ؟ فوق وردان ( اي في وريد الرقبة للصبي البقول أنا بعد ما اخد حقو من سيطان بطان من أجلها لكي يتهنّى بشبالها السمح ذاك واخخخخخخخخخخخخ وكي من هذه الحال وآآآآخ يا الوحيح الما بتفارق دربي وآآآآخ من نار فلانة وجرحها النوسر بي وهاك يا وليد شيقوق الدلوكة علي أصولها انت قايل الشي ساي كدي دي مضبوطة بكل رنة وهبقة دلوكا وخلفة شتم توجب الحركة في العرضة بأصول العرضة صوقير وتيتيل في التقيل والعرضة في الخفيف ولها اصول 3 نطات لي فوق ثم تبادل الموقع يا اخوي موش نقزي زي ناسك ديل
هبقة الدلوكا يا ود موسى بتجي بعد كتمة بالكوع فوق سطح الدلوكا وتفتح ويخلف الشتم في اللحظة دي يا ودشيقوق بنطلق النمل في صلبك وتغلبك القعدة وهيييييييييييع هناك الحال مغير جد وكان حجازو مدَّ اليد بتسمع كــــــــــع يا ود موسى أنا تهتَّ في الاشواق لاهلي السمحين
04-06-2013, 06:15 PM
مبارك النعمه النعيم مبارك النعمه النعيم
تاريخ التسجيل: 04-04-2013
مجموع المشاركات: 169
طبعاً يا المسنوح البشرى جاد السيد مشهور باسم البشيرة في شندي ونواحيها من كل النواحي تعرف يا شيقوق في مشيتي الاخيرة دي حضرت لي 5 ضحويات بالبشيرة شئ متعة طبعاً يا المسنوح البشرى جاد السيد مشهور باسم البشيرة في شندي ونواحيها من كل النواحي تعرف يا شيقوق في مشيتي الاخيرة دي حضرت لي 5 ضحويات بالبشيرة شئ متعة
عليك اسمع الهبقي دا طبعاً الكثير من الصور كانت في عرس المسنوح الكبير ناذر الخليفة
عليك الله الجنى الناطي فوق عرضة دي مع النزلة بكون التيتيل بي كراع واحدة طبعا الاغنية دي بالذات لما تغنّى في شندي بتلقى الكراسي فاضية والناس كلها في الدارة بنات واولاد والصوت بشتغل صاح هنا وبالذات لما تفرطق أضانك زغاريد الحِسان دي ملكة وشبلولا زماما نموت ركن هنا والموت حق وطعمه حلو في الملكة ومشبلا بي زماما
طبعا في اصل الاغنية في بيت السبب المضيع عمري دُحان الضحي البدري
لكن البشيرة بخجل بقولها نسام الضحي البدر بس ما جات حلوة النسام صباح مساء حلو لكن الضحى بتكون السموم تشوي الوجوه بس لو هبا معها ريحة دُخان بخلي الزول لافي زي تور الساقية مغمض هههههههههههههه عارف جنس النضمي دا بعجبك يا المسكون
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الطيب شيقوق
حيدر حسن ميرغني
علي محمد الفكي
Abdlaziz Eisa
أمير محمد ادريس
محمد المرتضى حامد
خالد علي محجوب المنسي
فيصل محمد خليل
munswor almophtah
علي الكرار هاشم
elhilayla
Osman Musa
عبيد الطيب
عبدالمجيد المقابل
عماد الشبلي
وضاحة
مبارك النعمه النعيم
فيس بوك
تويتر
انستقرام
يوتيوب
بنتيريست