Quote: ومن باب حفظ الحقوق درجة العادة اذا اخترت اي عنوان لموضوع انا اسأل عمنا قوقال اذ كان يعرف احدات او شيئا بهذا الاسم
احييييييييييييييييييييي يا الحر بقيتوا تخافوا من الشرشحة القوقلية هههههههههههه ------------ ابو الدر امكن انا الحيت عليك الحاحا عشان تنقل لينا زهجك بجاي اكتر من مرة ،، واخيرا استجبت عشان الواحد لمن يزهج يخش يفك الزهج في محل الزهج ،هههههههههههههههههههههه دي غلوتية عديل ،، ---------- موعودون ببوست تحفة (لكن في احداث لازم تعمل ليها فلترة بحكم الزمن )
Quote: احييييييييييييييييييييي يا الحر بقيتوا تخافوا من الشرشحة القوقلية هههههههههههه ------------ ابو الدر امكن انا الحيت عليك الحاحا عشان تنقل لينا زهجك بجاي اكتر من مرة ،، واخيرا استجبت عشان الواحد لمن يزهج يخش يفك الزهج في محل الزهج ،هههههههههههههههههههههه دي غلوتية عديل ،، ---------- موعودون ببوست تحفة (لكن في احداث لازم تعمل ليها فلترة بحكم الزمن )
واصل يا زول يا جميل ،، مودتي
يا ابو علوة الغربة علمتنا حاجة عجيبة
انك تحرص على محفظتك التي فيها الاوراق الثبوتية ما تنساها وانت خارج . او تقع منك في اي مكان .. عشان كدا تلاقي المغتربين في اي مكان كل مرة الواحد يتحسس جيبه
هل موجودة ويحمد ربه ... واليفقد محفظته تلاقيه مسكين زي اليتيم ..والناس تعزي فيه بعبارات من نوع ( بتلقاها ماتخاف ) ..
من دخلنا هذا المنبر اصبح الواحد يكتب ويتلفت ويتبن في قوقال مثل جيبه في كل مرة ..
وكل مرة تعمل تحديث تفتح تشوف البوستات المفتوحة تشوف لو في واحد قام بصبلك في المنبر العام ام الامر لازال أمان ..
انا فتحت البوست كما ذكرت استجابة لرغبتك رغما عن خوفي من اني عندما ادخل في موجة زهجنا من الصعب الخروج منها ..
لكن لا بأس نحن اصلا ابداعنا وفننا مبني على قاعدة من ضيق الخلق والزهج ..
أشرف رئيس الوزراء التركى أردوغان على الإطلاق الرسمي لمشروعه التعليمي والذى أسماه "مشروع الفاتح" تيمنا بالقائد العظيم "محمد الفاتح".
بعد أن قامت الحكومة التركية بتوزيع الكتب المدرسية مجانا على طلاب مدارسها ها هي تقوم من جديد بتوزيع حواسيب لوحية معروفة باسم آي باد (iPad) مشمولة ببرنامج "الفاتح"، على 15 مليون طالبٍ ومليون مدرّس مجاناً، وقامت كذلك بتركيب ألواح ذكية –بدلاً من الألواح السوداء- في 260 ألف صف مدرسيّ، ومن المتوقع ان يشمل التوزيع الولايات الـ 81 جميعاً خلال السنوات الأربعة القادمة، لينقل أردوغان بذلك تركيا إلى عالم التقنية والحداثة.
لييه يا رب ما خلقتنا اتراك
او على الاقل خليت لينا اردوقات كوز سوداني
الحمد لله على حكمك يا رب
انا رأيي نقدم دعوة صريحة لتركيا عشان تحتل السودان من جديد
ونوعدهم لا نتبع المهدي ولا غيره وابشروا بطول بقاء معنا
واحد عزابي مستنكح لاحظ انه صاحب بقالة او الدكان قريب من بيته بليد في الحساب جدا فقرر انه يستثمر هذه الفرصة في انتهازية واضحة ..
فراح استخرج ورقة فئة مائة جنيه زمن الجنيه كان جنيه ..
وصاحب الدكان بالتأكيد ما عنده فكة لهذا المبلغ الكبير ( نسبيا ) وصاحبنا يعرف ذلك ..
فقال له ادينا علبة سجائر وقزازتين ببيبسي وكبريته وخلي الباقي معاك ..
وكل يوم يجي يطلب قائلا من باقي الجنيه المعاك هات علبة سجائر وكبريته وصابونة حمام وعلبة حلاقة وصباع معجون ..
كذلك في اليوم الرابع .. وعمنا صاحب البقالة ما عارف كيف يتخلص من هذا الوضع الاستعماري الامبريالي .. هو يحس انه الجنيه خلص من زمان لكن كيف وكم لا يدري ولا يستطيع ان يدفع الطلبات المتلاحقة والملحة من هذا الانتهازي المبتز ..
اخيرا اهتدى للحل اول خطوة حضر ورقة جنيه كاملة الدسم انتظر صاحبه حتى قدم طلباته الجديده علبة سجائر وكبريته وكيس رغيف وزبادي وكلها وضعها امامه .. وبعد ماخلص من تحضير الطلبات قال له دقيقه ... وهاك الجنيه بتاعك ذاتو كمان عليك الله تاني ما تجي تشتري مني ولا بالكاش ..
وانا اعتقد هذه هي السياسة التي يطبقها الاثرياء في ناديي الهلال والمريخ
ناشطة كويتية ( في حقوق الانسان) انا غايتو ما واحد من الناس ما عايزة تنشط في حقوقي ... قدمت الحل لمسالة العنوسة والزنى في بلدها الكويت وهي اباحة تجارة الرقيق من جديد .. والمصدر طبعا سبايا الحروب بين الشعوب المسلمة والكافرة .. وركزت على دول البلقان والشيشان لانها مركزة على اللحم الابيض .. وقالت طالما انه رجال بلادها يسافرون ويزنون في الخارج تاركين او زاهدين في بنات بلادهم ( عاكسين اغنية .. بنحب من بلدنا مابر البلد) . فمن الاولى ان يشتروا الجواري الروسيات ( انا غايتو حاجز انا كارنبوفا بتاعة التنس من هسع حتى لو ابيع عربيتي ) اللاتي يتم اسرهن في الحروب ..
وكما يمكن ابضا ( وهو بيت القصيد)للنساء والبنات الكويتيات المريشات ومعنسات ان يشتروا عبيد روس طول بعرض عضلات تبش شعر اشقر عيون خضر ... وكما يحق لهن التغيير بعد خمسة سنوات ( مدة الاهلاك مثل السيارات) يعني العبد بعد خمسة سنوات يكون جاب زيت يحق لها تغييره في سوق الحراج بتاع النخاسة ( او تشتري واحد جديد لنج بالتقسيط من عبد اللطيف جميل فرع الجواري)... يلا مشكلة وحلت بكل بساطة .. ومستندة بمشايخ لتقول ان هذا من صميم الاسلام ..
وناسية ومتناسية انه الاسلام هو من اوقف الرق الذي كان سائدا في العالم ... ولكنه لم يتم باسلوب التاميم والمصادره .. انما شرع الكفارات التي ابطلت هذه الظاهره ... اصبح الاسلام يضار من قبل المتاسلمين اكثر من اليهود والكفار ... حالة جد تزهج والله .
رسامين الكراكتير المصريين اصدق واكثر تعبيرا وخفة دم عن الواقع المصري برسومات بسيطة
كراكتير فيه
الرجل واقف عند الباب ويحمل اسطوانة الغاز ويقول لزوجته التي هي جالسة امام التلفزيون ( انا رايح ايدل اسطوانة الغاز) وهي دون ما تلتفت ترد ( روح ربنا يفتحها في وشك)
دعوة مزدوجة اكيد تركت الرجل محتار هل هي تقصد الدنيا ام اسطوانة الغاز ...
واحتمال الاسطوانة وارد لانه هو عارف نفسه عامل فيها عمايل ومكرهها حياتها .. لكن لو هو كان عطوف ودود يشاركها في عمل البيت ويلبي طلباتها .. ويرسل زيارة لامها كل سنة حتى تقضي معهم ثلاثة شهور وتعود محملة بما ثقل وزنه وخف سعره من ابو ريالين والبطحا بحيث تصبح تكلفة الشحن اعلى من المحمول .. في هذه الحالة ستكون الدعوة مقصود بها الدنيا .. اما اذا كان من النوع الذي يقابل الطلبات بضربة على الطاولة تطير لها القلوب والكتب والكراسات ( توب شنو يا وليه هسع عيد الضحية القبل الفات داك ما اشتريتي توبين واحد ليك وواحد لاختك نحن نقعد هنا نقضيها كلها تياب ودلاقين هو نحن قاعدين لمتين ما تعملوا حساب للمستقبل تخلونا ننقلع من الغربة دي و و و و و و .......الخ) طبعا في الحالة يكون المقصود اسطوانة الغاز واكيد حا تلحقها بعبارة ( في بير السلم يا رب)
لكن لابأس طالما اننا على كوميديتنا السوداء اعتدنا ان نضحك مما نبكي
قيل :
احد السودانيين ظهر له اللوتري الامريكي فمشى في الارض مرحا وغرورا بعد ان شعر بعزة المواطن الامريكي حتى قبل ما يبدا الاجراءات .. قابله دفار الخدمة الالزامية جرى من جرى ولكن هو وقف مرفوع الراس مسنودا بلوتره .. نزل له العساكر وقالوا له تعال يازول .. جاءهم براسه المرفوع ... عندك اعفاء من الخدمة الالزامية ولا تركب معانا ياشاطر .. قال لاعندي ولا اركب لاني مواطن امريكي .. واستخرج الورقة الخضراء ..قالوا له كدا ؟؟؟ طيب تعال يا امريكي اصلا نحن عايزين الامريكان ديل وليهم تمكنا .. وهاك يا تدريب ومن المعسكر لارض المعارك لا امريكا نفعت ولا امم منتحرة نفعت في وقت لم تقضي حرب الجنوب اوزارها بعد .. ليعتلي صاحبنا لغما وتسبقه ساقيه الى الجنة ... اما هو سفر بالطائرة الى مستشفى السلاح الطبي بالخرطوم .. وبينما هو يتلقى العلاج اذ باللواء المسؤول يمر على الجرحى ويوصي بتحويله للعمل بالمطبعة العسكرية بعد شفائه طالما يديه لازالتا بخير .. وبعد ماشفى ما تبقى من ساقيه ذهب للعمل بالمطبعة العسكرية وتم تدريبه على قص الورق ..ويوم ما وهو يعمل ومشغول بالونسة ينزل المقص على اليدين ويلحقهما الساقين في لمح البصر .. يعاد اخينا الى السلاح الطبي .. يمر ذات اللواء بعنابر الجرحى ويتوقف عند اخينا ويتامل فيه طويلا ويفكر واخينا يترقب في النتيجة اخيرا يصرح سعادة اللواء قائلا ( خلاص بعد كدا ياخذ اعفاء من باقي الخدمة الالزامية ) ويقاطعه اخينا ( لا بالله ماتخليهم يركبوا لي قناية ويشغلوني سعافة للسقف )......................................
واصل يا درديري, بوست رائع الزهج واضح في بوستك دي. ارجعتني بالذاكرة لبدايات تأسيس المغفورله سي التجمع الوطني, قرر رجاله تكوين هيئة قيادة مولانا الميرغني وجون قرنق ومبارك الفاضل والشفيع خضر ومحمد عتيق, اذا بحركة التحالف وكانت رقما بالمعارضة لايمكن تجاوزه, اذا بها ترسل زميلة معنا بالبورد ممثلا لها بالهيئة. وهي صغيرة نسبيا وخبرة من اؤلئك الميامين الذين تذمروا من مبادرة قوات التحالف, خاصة حزب مولانا وحيرانه, دارت السنيين من ذلك وجرت مياه كثيرة تحت الجسر كما يقولون. الا أن تلك المناضلة مازالت تقبض علي جمرة القضية وتكافح لاسترداد الحرية والديمقراطية لشعبها. بينما جندل الزمان اؤلئك الرجال وصارت ارائهم اوهن من خيط العنكبوت.
سلام يا عبد العزيز ياخي حلقة د ناصر السيد دي خلت برنامج مراجعات من البرامج المفضلة عندي .. هو راجل لذيذ شجاع عفوي ما عنده اي تردد في انه يشوت ضفاري اي زول يجيبو سرتو قداموا .. اعتقد انه الطاهر التوم نفسه فرمل بقى ما بيجيب له سيرة الناس في يدهم القلم والبلم
وما ما قلت ليكم لقيت شنو في صحيفة الانتباهة التي اشتريتها لابدأ مقاطعتها من محاسن الصدف او من مصادف المحن احسن
موجود في الوسط لقاء مع رئيس اتحاد الرماية السوداني وهو يرأس الاتحاد من سنة 1996 يعني سبعة عشر سنة رئيس اتحاد بس ما قال لينا جابها بانتخابات ولا انقلاب عسكري .. وبنته هي بطلة السودان وممثلته في المحافل الدولية والمحلية ... وطبعا كباقي الاتحادات الاخرى التمثيل الخارجي هو من اجل الاحتكاك واكتساب الخبرات .. الا ان ينزل اللاعبين للمعاش ويجي لاعبون جدد يمثلونا خارجيا من اجل الاحتكاك واكتساب الخبرات وهكذا دواليب ..
انا مش عارف متى سنحصد نتيجة هذا الاحتكاك الخارجي واكتساب الخبرات ..
كله على حسابنا .. طائرات تجي وطائرات تقوم وطائرات تقع وطائرات تنوم ..
هسع نحن المغتربين ديل ما احتكينا بالاجانب ديل لامن جلدنا انسلخ واكتسبنا خبرات لامن الواحد بقى بعشرة محليين .. ما بنلزمكم في حاجة؟ .. يعني خبراتنا دي نموت بيها .. احتكاكنا دا حيروح شمار في مرقة ماجي ..( عشان اللحمة غالية)
غايظاني جدا حكاية اغاني الروب التي غزت الشباب السوداني دا ..
واغاني الراب هي اشبه بالالقاء الشعري على ايقاعات موسيقية .ز
بل على هذا الاساس نحن ممكن ندعي اننا سبقنا الخواجان في اغاني الراب .ز يعني مثلا لو راجعت بعض قصائد محجوب شريف .. تجد القصيده نفسها تحمل ايقاعا بدون لحن اشبه بالراب .
مثلا :
ميري زكرينا
عاشا كلمينا
اي سونك احسن
يبقى مسطرينا ..
او ممكن نحن نعمل شئ مغاير ما تجو نسودن اغاني الراب اولا نسميها مثلا اغاني الروب عشان الخواجات ما يقولوا شوهنا غناهم
ونستخدم في شعرها الاغاني البدوية زي المسدار والدوباي والنم .
في زمن الغربة الداخلية فقط .. وقبل ما يعرف اهلنا بلاد برة ..
اثنين من الشباب من اهلنا بمنطقة الشايقية خطبوا صديقتين وسافروا للعمل بمدينة بورتسودان ..
احدهم وفق في العمل بشركة شل ( بترول )
والثاني هام على وجهه في السوق يادوب يلاقي ما يسد رمقه ..
وبدأوا في مراسلة خطيباتهما ..
والصديقة التي خطيبها في السوق اكثر لها من الجوابات الرومانسية وشعر الغزل والنسيج والحب والشوق ..
تأخذ الجواب وتجري للتفاخر مع صديقتها تقول لها شوفي صلاح كاتب لي شنو في الجواب دا .. و الثانية تقول لها انا خالد ما رسل لي جواب لكن رسل لي الطرد دا .. تلاقي عندها طرد فيه هدايا ملابس واكسسورات وعطور من خطيبها بتاع شل
وترجع صاحبتنا وفي نفسها شئ من حتى ..
وبعد شهر يتكرر المشهد رسالة هنا وهدايا هناك ..
صاحبتنا في المرة الثالثة لم تكذب سوى التوجه لمكتب البريد والبرق وارسلت تلغراف لخطيبها من سطر واحد .
اصبح الزهج سمة ملازمة للسوداني لدرجة انه بعض الشعوب الاخرى اصبحوا يتعمدون تزهجينا ليستمتعوا برد فعلنا ..
قصة حكاها سعودي وكانت منتشرة في النت وقيل حدثت في دولة قطر ..
في مسجد صلاة الظهر الامام الراتب كان غائب وقدم المصلون كالعادة اكثر شخص يتوسمون فيه التقوى والاهلية .. وهو يبدو انه ليثبت جداراته اشتغل بتسوية الصفوف اكثر من اللازم اذا ذهب الى آخر الصف وبدأ يوجه في الناس .. وتخصص في شخص سوداني ... انت يا زوول ارجع ورا شوية .. لا لا لا قدام شوية ... لا كدا كثير ارجع شوية يقال انه الزول عصب وقال : ياخي أنت عاوز تصلي ولا عاوز تعكس كورنار... طبعا انفجر المصلون ضحكا بل اكثر من ذلك لم يستطيعوا ان يكملوا صلاتهم الا بعد فترة طوييييلة جدا ..
اللاعب العاجي المسلم يحيا توري لاعب برشلونة السابق ولا عب مانشستر يونايتد حاليا والفائز بجائزة افضل لاعب في افريقيا في العام الماضي .. فاز في أحدى مباريات فريقه بنجومية المباراة وقدمت له هدية زجاجة وسكي معتق فاخره ..
لكنه رفض ان يستلمها وهو يضحك بكل تهذيب .. عندما سألوه عن السبب قال هو مسسلم والخمر محرمة في دينه .. قاله له طيب خذها واهديها لاصحابك ..
قال حتى اهداء الخمر محرم عندنا في ديننا .. ويقول في هذا الكلام وهو يبتسم ويعتذر بكل تهذيب ..
اللاعب المسلم الافريقي الآخر المالي فريدريك كانوتي لاعب اشبيلية السابق وهدافها ونجمها الشهير .. سمع بأن هنالك مسجد في اسبانيا تريد احد الكنائس ان تهدمه بحجة ان الارض التي اقيم عليها هي ملك للكنيسه .. فما كان منه الا ان اشترى قطعة الارض منهم بنصف مليون يورو واهداها للمسجد ليظل شامخا .. وعندما التقت به الصحيفة سألته عن التبرير رد لهم بدون اي هوس او تعصب . وقال هذا تصرف شخصي بحت وغير قابل للنقاش .. انتهى الموضوع ..
هؤلاء اللاعبون الافارقة يخدمون الاسلام بتصرفات عفوية نابعة من ايمان صادق دون اي هوس او تعصب ويدعون الى الله بالحكمة والموعظة الحسنة فعلا لا تصنعا او تزلفا ..
يدق الباب في الثلث الاخير من الليل عند ابو عمر الذي قام مفزوعا من النوم
يفتح الباب وفي راسه الف هاجس ربما يكونوا شرطة او جهه امنية يفتح الباب وهو يدعك عينيه حتى يستطيع فتحهما ليجده صديقه ابو علي .. ابو عمر : خير يا ابو علي نعلوا ما في مشكلة ابو علي : قلت ليك يا ابو عمر لو فكيت ليك البت كان جريتني ؟؟ ابو عمر : البت ؟؟ بت منو كمان ؟؟ ابو علي : ياخي بت الاسود ابو عمر : يخرب بيتك يعني هسع انت جايي تتناقش في الحريق . ابو علي : اسكت ساي يا ابو عمر ما تشوف الخمسين دي حرقتني كيف ياخي انا كنت فاتح قلت لكن ما افتح الا بخمسين ومطمئن وما قايلك قافل .. ابو عمر : شوف هنا يا ابو علي انا من هنا ومن يوم الليلة تاني لا عاوز كشتينة ولا تجيب لي سيرتها .. ابو علي : لا يا ابو الشباب معقولة تعتزل قبل ما ناخذ ثارنا .. ابو عمر : يعني ايه تاخذ ثارك ..؟؟ ابو علي : يعني نلعب قيم حاسم هسع لو غلبتني اكون اقتنعت لو غلبتك اكون اخذت تاري .. ابو عمر : نلعب وين ؟؟ وهسع ؟؟ ابو علي : ايوا عندك هنا في الصالون ماعندك فردة ؟؟ ابو عمر : لا انا ماعندي كوتشينة في البيت .. ابو علي : ولا يهمك انا عندي في العربية انزل اجيبها واجي بس انت فرش الملعب . ابو عمر : اوفففففففف بالله دي مصيبة شنو الوقعنا فيها دي ؟؟ يرجع ابو علي وفي يده فردة الكتشينة ويدخلا في صالون ابو عمر .. ويبدا اللعب فعلا وبعد قليل تسمع صرخة ابو علي : الف .... وحي حي حي .. الليلة وووب يلا اعتزل احي انا .. تجي ام عمر مفزوعة هي واطفالها .. سجمي يا احمد في شنو ؟؟ يرد ابو علي :: في شنو غلبناه ليك قال عايز يعتزل قال يلا احي نشيل كشتينتنا ونتخارج بعد كدا لو عاوز اعتزل اعتزل ..
ام عمر : للدرجة دي يا احمد تخلينا ننوم وتجيب اصحابك تلعبوا في الصالون تقلبوه نادي الساعة ثلاثة صباحا هسع الجيران يقولوا علينا شنو .. انا ما قاعدة معاك بكره دي تسفرني لاهلي ..
ابو عمر : يا وليه افهمي .. والله انا كنت فاتح لكن مافي طريقه اتخلص بيها من ابو علي غير اخليه يغلبني عشان كدا انتظرتو .. وصدقيني انا في الجمعية غلبتو جا دق الباب يسال فيني عن سبب غلبه ولامن قلت ليه انا اعتزلت قال الا بعد مباراه ثاريه وانا زي ما قلت ليك خليتو يغلبني مخصوص عشان اعتزل ..
ام عمر : وتخلي يغلبك كيف؟؟ .. شوف هنا يا ترجع تاخذ تارك يا تسفرني لاهلي .. ابو عمر : يا وليه انت بصحك . ام عمر : ايوا بصحي يعني عاوز مرتو محاسن كمان تشمت فينا وتكرهنا المناسبات .
ابو عمر : خلاص بكره في الجمعية ..
ام عمر : لا لا لا عندي هنا دا تعزمن عشا هو ومرتو .. ولامن تجرو خمسين عايزاك تصرخ وتقول خمسين يا ام عمر عشان انا ازغرد من جوة واغلى ليك قلب محاسن غلي .. ابو عمر : ابشري يا ام عمر .
حضرت لقاء الجزيرة الخاص مع الرئيس مرسي لمدة ساعة كاملة في قناة الجزيرة
الحق يقال رجل متزن واثق في نفسه لم يتعتع في اي سؤال او يتردد
حاولت المزيعة خديجة بن قنة زنقته في اكثر من مرة عن مثلا علاقة مصر باسرائيل ..
بل سألته سؤال مباشر هل يمكن ان يزور مصر رئيس اسرائيلي او هو يزور اسرائيل
رد باجابة دوبلاماسية مستصحبا الفلسطنيين في الرد .. مؤكدا بكل براعة انه العلاقات المصرية الاسرائليلة قائمة على المصلحة المشتركة بين الشعوب الثلاثة بتوازن عادل .. وكل ما يتطلبه هذا التوازن هو سيقبل به ..منتهى اللباقة والعبقرية دون ان يصرح مباشرة بأنه يمكن ان يزور اسرائيل ويهيج المتطرفين عليه ..
وسؤال آخر هل صحيح ان مصر ستبيع قناة السويس لمصر : رد بطريقة الكلام ليك يا المنطط عينيك .. وقال لن تنتنازل عن اي شبر من اي ارض مصريه لاي كائن من كان مهما كان الثمن ...
حقيقة شخص يفرض احترامه ...
لكن من اللقاء يمكن ان نقول حلايب الله اعلم ترجع تاني ...رغما عن انها لم تسأله عنها .. او انا ما حضرت السؤال ..
عند انشاء طريق بورتسودان الخرطوم كانت العقبة في سلسلة جبال البحر الاحمر واوكل على تلك المنطقة اعتقد شركة ايطالية متخصصة في تكسير الجبال والحجار وقد كان اهلنا البجا من اهالي المنطقة عشمانين في المشروع بان يخلق لهم فرص عمل لولا انه الشركة استعانت بعمالة مصرية مفوتة عليهم الحلم .. وفي يوم ما بعد ان بدا المشروع شلة من شباب الهدندوة تجمعوا وهم ينظرون الى العمال المصريين بحسرة وهم يكسرون في الحجار فرد عليهم احد المصريين باستفذاذ قائلا ( بتبصوا عل
اييييه عمروكو ما شفتوش خبرا اقانب ) فرد عليه احد الادروبات بسخريتهم المعهودة ( خبرا اجانب شفنا لكن عمال اجانب عمرنا ماشفنا )
واحدة من الفوائد الفرعيه لاي استثمار اجنبي هو ان يخلق فرص عمل لسكان المنطقة التي بها المشروع ..وبئس الاستثمار الذي ياتي ويمتص مقدرات البلد ويترك الناس عطالى ينظرون الى الصرح باندهاش وفضول وهو يحتل مساحة ضخمة من اراضيهم وبلدهم . لايكتسبوا خبرات ولا اموال بل يكون المشروع احتل جزء من اراضيهم وصبت خيراته بعيد عنهم .
ما في دولة تعمل استثمار بمنح مساحات شاسعة لدولة ثانية تكون ملكا لها وتعمل بها ما تشاء ..
الرئيس مرسي نفسه قال في قناة الجزيرة يجب الا ينظر اي شخص غير مصري لاي ارض مصرية بعين طمع ..... مصر للمصريين فقط ..
ونحن نقول كذلك السودان للسودانيين فقط ..
لا توطين ولا استطيان انما عمالة وافدة واسثتمار بعقود لفترة محدودة ولنسب محدده في الفايدة .
04-23-2013, 12:11 PM
علي دفع الله علي دفع الله
تاريخ التسجيل: 08-31-2012
مجموع المشاركات: 2502
كنت فاكر نفسي وحدي من اعجب بلقاء المزيعة العملاقة خديجة بن قنة مع الرئيس المصري ..
غير ان اليوم كتب الزهراني في جريدة الوطن السعودية ...قائلا تعلم كيف تجري حوارا مع رئيس
وقال ان خديجة تقدم درسا مجانيا للاعلاميين في كيف يجرون حوارا مع شخص مهم او رئيس
في الحقيقة المدهش
انه استطاعت تلك المزيعة ان تحتفظ بنديه دون تطاول على شخص الرئيس.. غير عادة الاعلاميين في ذات الموافق التي تكون مليئة بالتطبيل الممل والتملف لشخص الرئيس بعد غمس الاسئلة في الالقاب من نوع سيدتكم وفخامتكم وحضرتكم ..
وفي ذات الوقت كانت اسئلتها جريئة وشجاعة .. ولم تترك الرئيس يفلت من السؤال لكن دون بجاحة او قلة أدب .. كانت في كل مرة تعيد السؤال بطريقة مختلفة كلما احسنت بأن الرد لم يغطي على السؤال
تروح عند دكتور بسبب آلام في كتفك مثلا يعطيك كبشة بتاعة ادوية وخاصة لو قلت له رحت لدكتور تاني اداني علاج والحالة ما تحسنتش .. هو طبعا عايز يقول لك وطن النجوم انا هنا ..
والادوية : دا تاخدوا بعد الفطار ودا قبل الفطار . اما دا تاخدوا اول ما تؤم من النوم .. ودا تاخدوا لامن تجي تنام . ودا ثلاث مرات في اليوم .. لمدة اسبوع بعدها تخليه مرتين في اليوم
والمرهم دا دا تدلكو في الصباح اول ما صحيت من النوم ودا تدلكو في المسا لامن تجي تنام .
تخم الاكياس وتجي البيت تلاقي الحابل اختلط بالنابل واسبوع كامل في غلاط مع ناس البيت .. مين القبل الفطار .. دا لا لا لا دا دا بعد الغدا .. ودا
اقول لك حاجة ولا دا ولا دا ولاد دا .. مش عايزين علاج خلاص
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
علي دفع الله
الفاضل يسن عثمان
فيس بوك
تويتر
انستقرام
يوتيوب
بنتيريست