|
|
 حكاوي عن بعض ظرفاء امدرمان
|
ظرفاء امدرمان
ود نفاش .. بلبل .. الفاضل سعيد .. صديق مولي .. سينا .. الهادي الضلالي .. العم شاخور .. ولكل منهم نوادر وحكاوي وطرائف
ود نفاش شخصية حقيقية عاشت بودنوباوي .. ومعظم النكات قصيرة التيلة كانت تحكي عنه او تنسب اليه من شاكلة "كان في ود نفاش" ود نفاش بالمناسبة هلالابي
بلبل .. أمير المنولوج والذي كان يعالج الكثير من القضايا حينئذ بلبل عرف بمريخيته وله منولوج شهير يبدا ب " مريخنا للهلال غلب زعلوا اليمانية والحلب" وكان معروفا بان معظم الجاليات الاجنبية وقتئذ من يمنية واغريق وهنود وحلب يشجعون الهلال.
الفاضل سعيد .. زعيم المسرح السوداني والذي علي يديه تخرج العديد من الدراميين والكوميديانية .. الفاضل برة المسرح وجوه المسرح عرف بنفس طرافته ومرحه ونكاته
صديق مولي احد شخصيات بيت المال عرف ببديهته الحاضرة ويذكر بان احد القرويين استوقفه وسأله " سوق امدرمان بوين" ؟ رد عليه ياخي انا جيتك في الأبيض وقلت ليك سوق ود ابو صفية وين؟ والطرفه هنا في ام "درمان" و "ود" ابوصفية
سينا ملك القفشات والردود الجاهزة يحكي عنه انه عندما كان لاعبا بالمريخ وكان للمريخ مباراة ودية مع ديم سلمان وفي الشوط التاني طلب احد لاعبي ديم سلمان الدخول مستبدلا احد لاعبي الديم وكان مظهره يدل علي كبر سنه .. سأل سليمان ابوداوود سينا " يا سينا اللاعب الداخل ده منو" رد سينا " ده عمك سلمان.
الهادي الضلالي اكثر شخصية امدرمانية محبوبة ومشهورة لاجتماعياته وحكاويه ونوادره المحفوظة للكثير من الامدرمانيين ومن نوادره بان مجموعة من طلاب الثانويات خرجوا في مظاهرة إبان فترة مايو فخرج معهم الهادي وكان قائد مجموعة البوليس التي طوقت الطلاب المرحوم بدر الدين ابورفاس قامت باعتقال عدد من الطلاب وهنا طلب منه الهادي بتمتمته الظريفة بان يقوم باعتقاله تضامنا معهم فرد عليه ابو رفاس والله لو هتفت يحيا لينين ما اعتقلك معاهم.
العم شاخور وهو ايضا من سكان ودنوباوي يحكي عنه الكثير من الطرائف الرياضية نذكر منها هنا
انه عندما ضلت الطائرة الليبية التي حاولت ضرب الاذاعة طريقها واسقطت قنابلها علي احد بيوت ناس المهدي علق العم شاخور قائلا : طيب ما كان يضرب نادي الهلال ويريحنا منه ويحكي عنه ايضا انه عندما صدرت قوانين الشريعة ايام نميري وصادف ان طرحت مايو مجموعة من الكؤؤس كاسات الدهب والثورة الصحية والتعليمية وكاس العودة وكلها كانت من نصيب الهلال قال شاخور للنميري " تعرف ياريس نحن اكتر ناس طبقنا الشريعة في عهدك" سأله النميري "كيف يعني؟" رد شاخور بطريقته الساخرة " ما حصل رفعنا لينا كاس"
ولنا عودة لشخصيات امدرمانية اخري ان شاء الله
|
|
 
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
قال ليك
حدث في امدرمان
برواية صديقي/ سامي جمعة
واحد كان بيصلي بالجماعة وشقيقه راجل ظريف كان يقف في الصف الاول
الامام ماشي كويس في القراءة لغاية ما جا في حتة وقف عديل
علا واحد من ورا اداهو دفرة
وواصل الامام لغاية ما جا في حتة دقداق عدييل
لكنو شد حيلو ومرق منها
هنا صاح شقيقه من الخلف
أيوا كده
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: garjah)
|
اخي قرشي يديك العافية وهاك دي وان شاهد عليها
احد الامدرمانيين وكان ينتمي للحزب الشيوعي ويصادف بان يعود للبيت متأخرا كل ليلة مع الآذان الأول لصلاة الفجر
وكان المؤذن يضيف للآذان من عنده داعيا علي النصاري واليهود والشيوعيين
انتظره صاحبنا في احد الأيام بعد انتهائه من الآذان وقال له:
ياخي انت بتطلع من النص مالك اخر حاجة في الآذان هي الشهادة " لا آله إلا الله" تاني لو ضفت من عندك ما بريحك
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
ود الشايقي من اطرف الشخصيات ويحكي عنة عند تسجيله بالهلال ومن ثم عودته للمريخ بعض الظرائف نذكر منها عندما كان يلعب بالهلال اعاد كرة لسبت بقوة كادت ان تلج الشباك فصاح فيه سبت ود الشايقي انت قايل نفسك لسه بهناك
وعند عودته للمريخ لعب له احد لاعبي المريخ باص مقصر قام قال ليه:
لما كنت بلعب في الهلال ناس جكسا والدحيش يدوك الباص طول وعرض تقول دبلان
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
حكي عن سينا انه في احد اعياد الضحية واحد صاحبة جاب ليه خروف من الغرب سمين ومدغلب
واثناء الضبح واحد علق يا سينا الخروف ده اكيد ما جبته انت رد سينا آي جاني هدية
قال ليه الضيف لكن الضحية بالخروف الهدية ما بتجوز
رد سينا ببديهته الحاضرة يعني الخروف الجابوا لسيدنا ابراهيم جابوه من الزريبة
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
| Quote: رد سينا ببديهته الحاضرة يعني الخروف الجابوا لسيدنا ابراهيم جابوه من الزريبة |
منطق شديد , ام درمان
والابداع اخوان ..
واصل يا مبدع ..
______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور
| |
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
المرحوم سينا كان صديقا لأنيس حجار صاحب مصانع حجار للتبغ قال ليه سينا: تعرف يا أنيس انا عكسك في تلاتة حاجات:
اسمي عكس اسمك
انت مقرش وانا مفلس
انتو بتلفوا السجاير ونحن بنفرتقوا
في المحطة الوسطى ام درمان اشترى هو و المرحوم كابتن برعي احمد البشير بطيخة ووقفا في انتظار صديق ثالث لهما ذهب لاحضار عربته،
فقال لهما بائع البطيخ عندما شاف وقفتهم طالت البطيخة دي عايزين تاكلوها هنا؟
وهنا قال له سينا ليه يا عم عايز الفاضي؟
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
ونحن علي ايام الإبتدائية ظريف امدرماني يلمنا ليك وهاك يا الغاز تمتاز بالطرافة منها:
اللمبة بت منو؟ .. الماسورة بت منو؟ .. المروحة بت منو؟
وعندما نعجز في الاجابة تكون اجاباته:
اللمبة بت نور والماسورة بت نقط والمروحة بت لف
وسؤال تاني : انتوا ليه العربجي في نص النهار لمن يكون سايق الكارو بتاعته بصر وشه ليه؟
البقول ليه عشان الشمس حارة والبقول ليه امكن الدخل ما مغطي معاه
يقول لينا لا لا تصوروا الاجابة شنو؟
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
المرحوم عبد الوهاب الجعفري احد ظرفاء دار الرياضة امدرمان وهو رجل درامي مثل في فرقة الفاضل سعيد
في طريقة لدار الرياضة امدرمان صادف صلاة العصر قبل ما يصلوا دار الرياضة فدخل مع رفاقه المسجد وصلوا
وعندما خرجوا من المسجد اطال احدهم الجلوس في فناء المسجد رافعا يديه يدعو والمرحوم الجعفري مستعجل عشان يلحق دار الرياضة
قام جدع ليه جزلانه وقال ليه
شيل الدايرو ورجع لي الجزلان خلينا نلحق الكورة
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: احمد سيد احمد)
|
واحد اخونا مرة قالي جابو لقاء مع درمة "الحانوتي" ان صح التعبير...وهو امدرماني ايضا...وحكى عن احرج موقف مر بيهو مع الموتى والدفن فقال:
واحد ابوهو كان عندو سكري وقطعو ليهو كراعو ودفنوها في البكري وبعد زمن مات الراجل نفسو ودفنوهو في احمد شرفي....فولد الراجل دا جا من بره وكان حزين جدا فلمن قابل درمه سألو عن قبر ابوهو عشان يمشي يديهو الفاتحة فدرمه قاليهو والله ابوك دا دفناهو في احمد شرفي وكراعو دفناها زمان في البكري يعني يوم القيامة الا يجي شدّت....فقال الولد رغم حزنو العميق ضحك شديد
| |
|
|
|
|
|
|
|
|
|
Re: حكاوي عن بعض ظرفاء امدرمان (Re: عمر الفاروق عبد الله الشيخ)
|
من ظرفاء أم درمان أحمد داؤود. وهو شخصية أنصارية ومن كبار الأنصار. المشهور عنده أنه يحضر أي جنازة في المدن الثلاثة أنذاك.
ومن الأشياء الغريبة عنه أن هنالك من يحكي أنه ذهب الساعة الرابعة مساء مقابر شرفي ووجد أحمد داؤود هناك. ويقسم من رآه في نفس الوقت في مقابر البكري وثالثهم يقول أنه شاهده في الرابعة مساء نفسها في مقابر حلة حمد.
جاءته مجموعة من أصدقائه ليتريقوا عليه قال له أحدهم: يا عم أحمد اليوم مشيت شرفي وما لقيتك. وقال له الثاني وأنا كنت في البكري وما لقيناك هناك وقال له الثالث: وفي حلة حمد وخوجلي غير موجود وقال له الرابع: وكمان ما جيت في مقابر فاروق مشيت وين؟
ردّ عليهم يا عبطاء، بموتوا المسلمين بس، مشيت حرقت لي واحد هندي.
(العوج راي والعديل راي)
| |
|
|
|
|
|
|
| |
عمر الفاروق عبد الله الشيخ
garjah
ياسر منصور عثمان
شهاب الفاتح عثمان
مامون أحمد إبراهيم
cantona_1
فيس بوك
تويتر
انستقرام
يوتيوب
بنتيريست