الاخوان المسلمين في مصر يستخدمون الكرباج السوداني لتعذيب المتظاهرين

Quote: منذ 20 دقائق · منقول: كمال خليل يكتب مشاهداته من داخل معسكر الإخوان بالمقطم: استعدادات لـ «الجهاد» وجلد متظاهرين بالكرابيج داخل المسجد نشر المناضل اليساري كمال خليل شهادته عن أحداث المقطم أمس وما جرى خلالها فأوضح أنه لدى وصوله كان هناك اشتباك قبيل مسجد الحمد وكان الإخوان يهاجمون المتظاهرين من فوق الجبل فوقف بسيارته يحذر المتظاهرين فتجمع عدد منهم وصعدوا فهاجموا الإخوان المتواجدين أعلى الجبل حتى أبعدوهم وتمكن حينها كمال خليل من التحرك بسيارته لميدان النافورة. وبحسب خليل تم هجوم آخر على المتظاهرين من فوق الجبل بعد عودة الإخوان مرة أخرى فتجددت الاشتباكات وصعد إليهم المتظاهرون وظلت الاشتباكات حتى تراجع الإخوان وخلفهم عدد كبير من المتظاهرين يهاجمهم حتى وصلوا لمنطقة تواجد الأتوبيسات وتم إشعال النار فيها كلها. وفيما يلي نص شهادة كمال خليل كما نشرها: امبارح الساعة 4:30 كنت فى عربيتى عند طالعة المقطم شوفت مسيرة من الإخوان على المطلع متجهه الى المقر روحت سبقتهم بالعربية وطلعت اول ما وصلت لقيت فى اشتباك قبل جامع الحمد كان الإخوان بيهجموا على المتظاهرين من فوق الجبل عند (اب تاون كايرو) والمتظاهرين من تحت فضلت فى عربيتى أحذر المتظاهرين بالمسيرة اللى طالعه ... بعد 10 دقائق المتظاهرين جمعوا نفسهم وهجموا على الإخوان فوق الجبل فطبعاً الإخوان تراجعوا وعرفت اعدى بعربيتى وصلت لميدان النافورة و قررت أركن عربيتى فى مكان بعيد عن الاشتباكات .. فضلت ماشى فى شارع 9 وركنها فى شارع جانبى عند السنترال جمب مسجد بلال. نزلت ورجعت لمكان الاشتباك لقيت إن الأخوان تقدموا تانى عند الجبل والمتظاهرين تراجعوا كان ساعتها المتظاهرين فيه ناس بتحدف طوب علينا من داخل جامع الحمد والمتظاهرين هجموا عليهم والناس ديه دخلت الجامع وقفلت على نفسها جوا والمتظاهرين وقفوا على الباب ومنعوا أى جد انه يدخل عليهم الجامع وكانوا بيقولوا "ومن دخل المسجدَ فهو آمن" فضل ساعتها الأشتباك عند الجبل لحد ما اتجمعنا تانى وحصل هجوم على الإخوان اللى فوق الجبل الأعداد تراجعت امامنا لحد ما وصلوا الى منطقة عسكرية كانت اتوبيساتهم متجمعه هناك (حوالى 6 اتوبيسات) فضل الاشتباك هناك لحد ما حصل عليهم هجوم كبير وجريوا وتفرقوا والناس ولعت فى الاتوبيسات كلها. لقينا سواق واقع ورجله مكسورة من طنطا ساعدته انا و5 كمان وعملنا له شوية إسعافات أولية ونقلناه لحد أقرب عربية إسعاف. رجعت تانى فى إتجاه المقر كان فيه ساعتها إشتباك مع الأمن المركزى وصلت كان فيه ضرب غاز بشكل مكثف فبعدت شوية بس الهواء كان شايل الغاز فى الإتجاه اللى انا ماشى فيه وصلت لحد السنترال فى شارع 9 لقيت تجمع كبير مسكوا واحد جمبى بيقولوا معاه خرطوش لقيت اتنين بيقولولى معاك سلاح قولتلهم لأ وواحد منهم فتشنى دخلت مع المجموعة اللى ماسكة الولد وعرفت أوصله كان كل اللى ماسكينه بدقون وعرفت ساعتها إنى فى وسطهم كانوا بيقولوا ماحدش يضربوا على دماغه وإن التكليف انهم ميقتلوش حد بس يضربوا فى المفاصل.. وصلت مع الولد ده لحد الجامع ساعتها فيه شاب مسكنى وزقنى وقالى حاسب أنت قلتله براحه فيه ايه راح مسكنى من كتفى وقالى انت مين وتبع (شعبة) اية؟ قلتله لا انا مش تبع شعبة.. نحفظ عليا وأخدنى ورا الجامع لواحد كده عشان يتحققوا منى وشافوا البطاقة وخدوها واحد قال ده جاسوس والتانى قال ده 6 ابريل عشان لابس حظاظة سوده . قعدونى على جمب يسألونى ايه اللى جايبك هنا انت منين واسمك وأعرف حد من اللى اتمسكوا ولا لأ. جالى واحد ساكن فى نفس منطقتى عرفنى من أسم والدى وعنوانى وأخدنى معاه للجامع قالى عشان تبقى فى أمان معانا. عرفنى على شعبة المنطقة وفضلوا يتكلموا معايا ويحاولوا يحسسونى انهم مش ضد حد وانهم مظلومين وده مخطط خارجى على البلد. بعد صلاة العشاء حصل نداءات إن كل اللى فى الجامع يطلعوا يساندوا إخواتهم اللى بره وإن نواب المحافظات يتجمعوا عند محراب الجامع للأهمية.. حاولوا يخلونى جوا الجامع على اساس إن ده أمان أكتر ليا بس انا صممت إنى أطلع. طلعت شفت اللى اعتقالات بيدخلوها دار المناسبات تحت الجامع .. كانت دار المناسبات مقسومة نصفين.. نصف مستشفى ميدانى لإصاباتهم والنصف الأخر للمعتقلين شفت حوالى 15 معتقل و كان فيه راجل معاه كرباج نازل فيهم جلد و معظم المعتقلين كانوا غايبين عن الوعى و بملابسهم الداخلية بس كان بيتم جلدهم بشكل متعصب جداً ..بعدونى بسرعه عن دار المناسبات أول ما شفت المنظر ده و كان اللى بيتم إعتقاله بيتاخد مسافة حوالى من 200 ألى 300 متر كلها ضرب فى المفاصل و على الدماغ لحد ما يوصل دار المناسبات عند الجامع حيث يتم تعذيبه و التحقيق معه. قابلت بعد فتره قصيره صاحب الكرباج اللى الناس بتتجلد بيه جوه كان طالع يبلغهم بإن العيال "بتتظبط" جوه بالكرباج بتاعه ولما سألته ده كرباجك قالى أه ده كرباج سودانى ناقعه فى زيت بقاله 6 شهور يعنى ضربته تقطع الجلد. كانوا دايماً بيحاولوا يبررولى إن الناس اللى ماسكينهم ومتقطعين ضرب شكلهم غلط وإنهم ضربين ترامادول ومش حاسين بحاجه و كل ما واحد فيهم يرجع مصاب يعيطوا ويقولوا هو ده الحوار السياسى اللى هما بيتكلموا عنه. كان الإخوان فى الشارع بيتكلموا عن حركة التطهير -فهمت بعدين إنهم قصدهم يهجموا على المتظاهرين- بس كانوا بيردوا على بعض انهم لسه ماجلهمش تكليف بكده ومجموعة تقول نعمل حركه ذاتيه ومنستناش التكليف -يعنى ياخدوا قرار المواجهه لوحدهم- وطبعاً كل شويه واحد يقول حرام انتوا سايبين إخواتكوا فى المواجهه وقاعدين هنا وان باب الجهاد مفتوح قدامكم وكلام من ده على الساعة 10:45 قاعدوا يباركوا لبعض عشان اخيراً جالهم تكليف بالهجوم و انهم مستنين المحافظات تتجمع عشان يعملوا كماشه على المتظاهرين كان فيه 3 محافظات بتستعد للهجوم كانوا الجيزة وطنطا وتقريباً البحيرة هى المحافظة الثالثة بس الكماشة كانت على متظاهرين فى شارع 9 بس مش فى إتجاه المقر بس الإتجاه التانى ساعتها انا استغليت إنشغالهم بالاستعداد للهجوم ومشيت من وسطهم ... واحد قالى انهم مقسمين نفسهم كمان وسايبين حازمون والجماعة الإسلامية عند المقر بس انا ماشوفتش الكلام ده http://www.youtube.com/watch?feature=player_e...iAM0q0I#at=48[/QUOTE]