|
|
|
 Re: محمد الحسن سالم حميد ( ذكرى رحيل) (Re: Haytham Ghaly)
|
و اللاً التقول
أوًل قلوب
فى الدنيا
يغشاها القدر
بعدِن
تضيع منَو الدروب؟!
تِنْطَمْبَج الساحات
حريق
يدغى الطريق
المحتمِل
كلً الفريق
سوقَر وراك
ياجرحنا..
الكيف يندمل؟
ما بار وراك شهْدَ الغُنا
ونَحَل الحناجر
ماهِمل؟
صادر خلايا أبو الدَبُر
صاقَر حناياه
نَمِل...نَمل
| |
 
|
|
|
|
|
|
|
|
Re: محمد الحسن سالم حميد ( ذكرى رحيل) (Re: Haytham Ghaly)
|
وين داجّى
يا قمر الهنا الكّرمنا
عند مغرب مرقْ
سايب لياليك
لى نجوم
واقفات وجوم
على فَد رجِل؟!
وفرع الغُنا
الميّل هنا
على مين وراكَ....
حيتّكل؟
و الشيل تِقِل
........
قَدْر اليشيلو الشيلة
فى
لكن ظروفن
هل تفى؟
تحتاج جماعة من الرجال
الكنت ليها براك تقِل!
دارت قبيله من الحبال
الكان بقيله فَرد حبل.
.........
الخوف قلوبنا التشتهيك
تنشك فى ذاته
وتنقفِل!
من بعدما اتوحّدنا فيك
ننفك قبائل .. وتنكتل
وينشعنفن مُسّار
بعد فتْلَ الحبل....
| |
|
|
|
|
|
|
|
|
|
Re: محمد الحسن سالم حميد ( ذكرى رحيل) (Re: Haytham Ghaly)
|
رغم بهاظة وعظمة فقدك
إلا إنو الحياة ما وقفت
إلا إنو في ناس بيغنو
عشان تخضر الأرض النشفت
ناس من بعدك
بعضها بعضك
أرضها أرضك
وناس لا عرفت
ليك
لا سمعت
بيك
وتكنُّو غناك الليهُن
ماشي عليهُن
تتلافاهو الريح
وتفنُّوا .........
ورا الأحلام
الجفّت ورهفت
رهفت وخفّت
خفّت وطارت
طارت ورفّت
روحك فوق
الغنية إتلفت
بي بشكير الصبرِ إندفت
وإنشتت
كواني
كواني
قلنا الله بيخون الخائن
لملمناك والعين بتعاين
مدَّ النيل الوافي ضراعو
سوِّيناك باجور .. وجنائن
شيدنابك دور ومدائن
حندكنابك حز الريح
حركنابك شوقنا الكامن
أو قلنابك ..
ظل مطّامن
إنو حيشرق فجر العالم
بي بني آدم
طيِّب ... وآمن
ونفضل نطلق
نار الغنية
تالا الذمم الخاتي نظامن
تنسف ونجرف
دبش الدنيا
وغَش الفجر الكاذب
لامِن
تبرق
ويمرق
شخب الباكر
وتضوي سماك
يا يومه التامن
اللهم ارحم حميد واغفر له واجعله من اصحاب اليمين
واسكنه جنات النعيم مع الشهداء والصديقين ( امين يا رب العالمين)
| |
|
|
|
|
|
|
|
|
|
Re: محمد الحسن سالم حميد ( ذكرى رحيل) (Re: Haytham Ghaly)
|
خوفي من تلحق رفيقك
يا بريق نجم الحيارى
وإنت لا نّور طريقك
لا شرق فجر السهارى
من زمن يا صحوة طلعك
غصة في حلق الصحارى
حتى شال النمة فرعك
دودى زي وهج البشارة
قلنا يا سعد المواسم
عودك المليان جسارة
عودك الفجري المصادم
بالبصيرات والبصارى
مستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يااندلاع صوت الغفاري
في حلق دغش الغلابا
لو خريفك تاني يطرح
آه يا اخر سحابة
لمايا شرف المواكب
يبقى هم الناس إمارة
تندحر كل المناصب
ينكسر كرسي الوزراة
| |
|
|
|
|
|
|
|
|
|
Re: محمد الحسن سالم حميد ( ذكرى رحيل) (Re: Haytham Ghaly)
|
اسوعت اندهدهت وين ؟
عترلك الحجر آآآآآالبخيت؟
شوف عيني شفتك من زمان
في ها المكان
شوف العيان
متوشح انوار اليقين
عترلك الحجرآآآآآالبخيت
تتسامى بي فوق السحاب
ولوو... رهاب
رافع معاك ظلم السنين
الكان مبوق في الارض من قبل حين
شايل معاك ###### الارض نضفتها
وكمترت تشق كل زيف غربلتها
واشوفك اتوكل... لي وين؟
عتر لك الحجرآآآآآآالبخيت
عيان بيان
شامخ شموخ
متجلي في داك المكان
واقف مع محمودنا راضي ومبتسم
فوق المشانق بي ثبات الآمنين
روحك بتفدي وطن نفيس
في البرزخ انت هناك عريس
لا صفقة مافيش لا رقيص
لا حني لا طنبور وكشف القرمصيص
مافيش تعب
مافيش نصب
يبراك ملاك
وسراك براك
ليك ما تريد
كل ما تشاء وهل من مزيد
وحسن الجلالة عليك يميس
ميست....ميس !
ضلن رهين.. آمين..آمين
موتك قطع حبل الوتين
الشمس تشرق كل حين
تخفي القمر
ونور النجوم الانكدر
نوريك جريف قيفها انكسر
نوار جناينها حت ..حت
نورت تميراتها انطفت
نايرات مواسمها كاوقت
طفرت طيورها الورجغت
حتى الدوابي انزعزعت
كل الخلوق انزهللت
مسكونة بالوجع الدفين
ممكونة بالنوح والانين
توشل تقاويها الدموع مطر..مطر
ما صدقت ... تغزل كتر
يهوداك مع عيوشة راكبين القطر
سفرا بعيد يتمارى من زمن القطر
الاندثر الاندمر الانطمر
غفلتها وخليت غناويك ضو سراج
والظلم ينهب في الارض يقطع فجاج
مرقت حرفك ومنو ما فكيت ريق
اسوعت اندهدهت وين؟
تاريك انت نزلت في نص الطريق
فاقد جنيات الفريق
رشعت فوقن يامطر عز الحريق
لاعبتهم...
وهدهتهم
يا الماك ضنين
عترلك الحجرآآآآآالبخيت
خليتنا لي ظلم البشر
وحكم الكجر
ولي كل شر
يا خي الله في
ايوه الله في
حلة قوافيك المطرزة بالصدق
موجودة في
وان شاء الله مايغشاك شر
سي... ياوفي
بصرك حديد عين اليقين
دابك عرفت الخائنين
شوف الوطن ودوه وين
هكروه بين القبلتين
ظلموه يوم صلب المسيح
صلبوه يوم ظلم الحسين
وانت المتيم بيهو لابسو عرق جبين
| |
|
|
|
|
|
|
|
|
|
Re: محمد الحسن سالم حميد ( ذكرى رحيل) (Re: عبدالمنعم العوض)
|
Quote: متجلي في داك المكان
واقف مع محمودنا راضي ومبتسم
فوق المشانق بي ثبات الآمنين |
عبدالمنعم حبابك
عليك شوف تصوير حميد لوقفة الاستاذ محمود محمد طه في المشنقة رائع وبديع
ابتسامته وطمانينته رغم الحبل الذي يطوق عنقه في لحظاته الاخيرة
الله يا حميد ما اعظمك
لك الرحمة والمغفرة يا حميد
تحياتي وودي
| |
|
|
|
|
|
|
|
|
|
Re: محمد الحسن سالم حميد ( ذكرى رحيل) (Re: Haytham Ghaly)
|
ote: متجلي في داك المكان
واقف مع محمودنا راضي ومبتسم
فوق المشانق بي ثبات الآمنين
عبدالمنعم حبابك
عليك شوف تصوير حميد لوقفة الاستاذ محمود محمد طه في المشنقة رائع وبديع
ابتسامته وطمانينته رغم الحبل الذي يطوق عنقه في لحظاته الاخيرة
الله يا حميد ما اعظمك
لك الرحمة والمغفرة يا حميد
تحياتي وودي
الاستاذ هيثم سلام
معذرة النص الذي اوردته هو جزء من مرثية كاملة بعنوان وصلت سدرة منتهاك كتبتها في اليوم التالي لرحيل حميد الذي فجعني كما فجع الكثيرين نسأل الله له المغفرة وان يلحقنا الله بهم جميعا ان شاء الله في الفردوس الاعلى من الجنة الاستاذ محمود وسيد الشهداء حمزة وفي جوار سيد الخلق عليه افضل الصلاة والسلام.
لك فائق الشكر والتقدير.
| |
|
|
|
|
|
|
|
|
|
Re: محمد الحسن سالم حميد ( ذكرى رحيل) (Re: عبدالمنعم العوض)
|
Quote: الاستاذ هيثم سلام
معذرة النص الذي اوردته هو جزء من مرثية كاملة بعنوان وصلت سدرة منتهاك كتبتها في اليوم التالي لرحيل حميد الذي فجعني كما فجع الكثيرين نسأل الله له المغفرة وان يلحقنا الله بهم جميعا ان شاء الله في الفردوس الاعلى من الجنة الاستاذ محمود وسيد الشهداء حمزة وفي جوار سيد الخلق عليه افضل الصلاة والسلام.
لك فائق الشكر والتقدير.
|
عبداللطيف ازيك
والله يا عبداللطيف انا كنت قايل انو دي واحدة من قصايد حميد الكتار الما لاقتني قبل كدا فاعذرني بالله
الشي التاني يا عبداللطيف ياخ ماشاءالله انت بصراحة متمكن جداً جداً في الكتابة ورجاءَ ما تبخل على هذا البورد
بكتابة اشعارك واني لاتوقع ان عندك انتاج وفير فان مثل هذه الملكة في هذه القصيد ليست بسهلة وانما تدل على اننا
امام كاتب وشاعر كبير فلا تبخل علينا بشذي بساتين شعرك وكتاباتك ولك كل شكري واحترامي
| |
|
|
|
|
|
|
| |
فيس بوك
تويتر
انستقرام
يوتيوب
بنتيريست