|
|
 Re: البشير: كفاني حكم! (Re: عمر الفاروق عبد الله الشيخ)
|
في تصريح له لصحيفة الصحافة صرح ريسنا البشير عافاه الله مما ابتلاه بأنه كم وعشرين سنة في حكم السودان كفاية وخلاص عاوز اعتزل الحكم واتقاعد واقعد في البيت! بس يا ريس شاورت الجماعة زي ما بقول حمدي بدر الدين وما بترجع في كلامك ومش خايف من اللي حيحصل بعد التقاعد وعدم الترشيح من جديد.
وبعدين يا ريس هو دخول الحمام زي خروجه زي ما بقول اخواتنا المصريين الله يرحمك يا جمال خليت الاخوان بقوا اخوات.. يعني الخروج من الحكم بعد المدة الطويلة دي يعني بعد ما عتتوا في حكم السودان رغم انه تاريخ نهاية الصلاحية كان من فترة طويلة من يوم 30/6/89 يعني نحن محكومين كم وعشرين سنة بسلطة منتهية الصلاحية عشان كده كانت فاسدة ومفسده .
وبعدين منو القال ليك كفاية؟ لسة يا خي فايت مروح وين ما لسة الزمن بدري خليك شوية عشان جمبك بزيد حبي حكمة والله حكاية اجهشتني من البداية .. وبعدين العشرة ما بتهون اهلي كتير بعزوها .. وعشرة الأيام ما بصح تنساها كأنه ما عشناها وضمانا احلي حكم بضم الحاء وحكم بكسر الحاء.
خلينا نعمل ليك حفل تكريم بمناسبة الاعتزال في القلعة الحمراء وخلي جموع الشعب تقدم ليك الهدايا والوشاحات والأوسمة مع اخذ الصور التذكارية وحفلة كاربة يغني فيها فناني الحماسة
وخلينا نرقص في الساحة مع كام عرضة في حفلة الوداع الأخير ونديك الفيها النصيب!
بس سؤال يا ريس: باقي الجماعة المعاك في التيم الحكومي رايهم شنو؟ حيجيبوا كابتن جديد ولا حيعتزلوا معاك ويمشوا بيوتهم .. وفاء لك ووفاء لعشرة كم وعشرين سنة؟ مجرد سؤال
| |
 
|
|
|
|
عمر الفاروق عبد الله الشيخ
فيس بوك
تويتر
انستقرام
يوتيوب
بنتيريست