|
|
 قلنالكم قبيل القمة ما مقياس ، قصيدة طريفة فى رثاء الهلال
|
الأستاذ الصحفي المريخي الساخر ( نادر التوم )
قلنالكم قبيل القمة ما مقياس
واللعب فى الديربى ما هو أساس
فريقكم منتهى ماعندو ياخى اساس
فضحتونا عديل مع كافة الأجناس
باقى الشاهد
ويوم طار الخرطوم قلنا قول واحد
وشايف يا الهلال كنت عليهو شاهد
ظنينا الصفر يمرق يبقى واحد
قول إتنين خلاص إندفنتو باقى الشاهد
ماها جديدة
ما تزعلوا روقوا ياخى ماها جديدة
من قرن عدييل هلالكم على الحديدة
ضيعتوا البلد ما قدمتو حاجة مفيدة
ونحن بنتفاءل كل ماتطلعوا جريدة جديدة
مازيمبى
الحظ وقف معاكم اداكم من حنانو لمسة
لو ما حظكم سمح كان الأقوان لى هسه
صفركم غور مافى منو مدسة
وكان ما طارت الضربة كانت خمسة
من زمان
شابككنا الهلال قيم وإعجاز
قلتولنا تيمكم خطير ممتاز
العجب العجيب ماعندو اى انجاز
الأبطال إنتهت أقرعوا الممتاز
جزاكم
ناسين فريقكم شغلكم كلو بالمريخ
ناسين الماضى ما بتقروا للتأريخ
الصفر المطول خلا عمركم مسيخ
والبطل الزعيم وما محتاج تأريخ
يرجع بيتو
مسكين الجمهور ياما ليهو غشيتو
خدرتوهو بالسنين من اموالو غنيتو
ما نافع معاكم الديبة أو غارزيتو
أقفلوهو النادى وكل واحد يرجع بيتو
تخميسة إلا!
قلنالكم هلالكم يا (أسياد) والله فطيسة
وفى درب النزال الفرق تزيدو تجريسه
باريتو المريخ بى كتابة عفنة إنسان رخيصة
جات بى أربعة ومرقتو من التخميسة
جوطة وعوارة
جماهير الهلال من زمن مولعه نارا
تحسب فى السنين راجيا إحصل إنتصارا
لعبكم كلو جوطة ولبع وعوارة
وضحكتونا كتير من البعمل فيهو سنكارا
راقد سلطة
الهلال يا رفاق البطولة منو بعيده
كلمة قلتها وبكررها وليكم بعيده
من زمان هلالكم راقد سلطة مديدة
وكيف يكون الحال بعد ما فاتكم سيدا
الأمور جاطت!
وباكر نشوف كلام إعلام الطابور
هلالكم مطرطش ما وقع لو الدور
غارزيتو لخبط الحكاية جاط عليكم الأمور
وجمهور الهلال ما ظنيت يكون مسرور
ما هاميهو!
وماهاميهو غارزيتو أصلا كان طار
ماهاميهو يحقق للهلال إنتصار
فى فريقكم بمَشى أىَِ قرار
وكل آخر شهر ياخد 50 الف دولار
معقولة بس؟؟
على فكرة الشاعر الاستاذ هذا ابن عمتى
|
|
  
|
|
|
|
هجو الأقرع
معاوية محمد الحسن
فيس بوك
تويتر
انستقرام
يوتيوب
بنتيريست