|
|
 Re: الى أقدم المتاوقيين أخى النعمة عبدالرحمن واصل فى الابداع وأطلق الش (Re: بشرى مبارك ود السقاى)
|
| Quote: [لى أقدم المتاوقيين أخى النعمة عبدا لرحمن واصل فى الابداع وأطلق الشراع] |
الأخ بشرى ودالسقاى، ليك التحية وأتشرف بمعرفتك، وأشكرك على هذا البوست،
أقدم المتاوقين دى صدقت فيها شديد و هنا اكرر، انه أكثر من عشرة سنوات مضت خلالها حاولت عدة مرات طلب باسورد لهذا المنبر العامر ولكن أخونا الكوماندر بكرى ابوبكر حتى ما بكلف نفسه يرد عليك.وبما أننى لست من الحاذقين فى التعامل مع الكيبورد العربى فمرات كتيرة ولا زلت بكتب العربى بالحروف اللاتينية، فمرة كتبت ليهو بهكذا عربى ودى المرة الوحيدة الرد علي فيها زاجرا ويطلب الكتابة بالحروف العربية وطبعا تفاءلت وحسيت انو الموضوع حيتسبك ورديت علبه بالعربي ومحلك سر الحال ظل كما هو .يوجد أحد أقربائى فى لا;س فيقاس نيفادا وانا بتكلم معاه قبل ما يقرب من السنة على الاسكايب، أخبرنى ان بكرى بتاع سودانيزأونلاين كان معاهم هو واسرته فقلت له يا أخى ما تتوسط لينا من أجل باسورد للمنبر، فقال لى قريبى، يا خال ده الشيء الوحيد الزول ده ما بجامل فيه وهو ذات نفسه ما قادر يطلب منه واحده.المهم نسيت الموضو وواصلنا المتاوقة وواصلنا المتاوقة.، المهم، فى مطلع فبراير الجارى وانا بنظم فى بريدى الاليكترونى القى واحدة من الرسائل التى أرسلتها لبكرى ابوبكر في وقت سابق وقمت بتحديثها وعملت النص بالعربى وقلت كدى يا أخى نجرب والزول ابدا ما يقطع الأمل_ ما أصعب العيش لو لا فسحة الأمل -. المفاجأة تلقيت ردا سريعا من بكرى يطلب صورة الجواز وكمان الاقامة والموافقة على شروط استخدام المنبر. وفى دقايق رديت عليه مرفقا كل ما طلبه من صور مستندات وبعدها بايام جاءت الموافقة وما صدقت ان الحصل ده حقيقة، ويبدو أنى ودون أن اعرف خاطبته في اللحظة المناسبة لأنه واضح كان في أوكازيون منح عضوية وشايف المنبر كلو شايل حال القادمين الجدد. وهكذا إنتهى عصر المتاوقة وده قصة الباسورد !
بعدين معاك يا راجل قصة الإبداع دى جبتها من وي؟ نحنا لسع مستجدين فى رحاب هذا المكان، والإبداع ليهو ناسو هنا وحتى لو قبلناها منك تبقى دى مسئولية كبيرة ما أظن شيلها ساهل، المهم نعتبرها مجاملة ترحيب وعربون معرفة وذوق منك وتشكر عليها واتمنى ان اكون عند حسن ظنك وقليلا مما وصفتني به.
| Quote: [التحية للأخ النعمة عبدالرحمن ونريد منه هنا بحث فى بوست كبير عن الاسماء المشتركة ] |
الاسماء المشتركة الاستخدام بين الذكور والاناث ،مثل جمال وإقبال وتيسير وبشرى والنعمة وغيرها أكيد بتدخل الشخص مرات فى مواقف طريفه وقد تكون محرجة أحيانا. انا الاسم جاءنى من جدى لأمي وهو مغربى من الجزيرة وعندهم هذا الاسم حصريا للذكور سواء فى الجزيرة او منطقة سوبا وأظن أبوحجار أيضا.وكمان فى موريتانيا المدينة الثانية فى البلد اسمها النعمة وما عارف ده هل ليهو علاقة بالمغاربة . كما ان اسم النعمة مذكرا تجده في لبنان لدى الطوائف المسيحية ومرات دون تعريف ،أى نعمة، وفى الخليج العربي هذا الاسم يعطى للذكور على نطاق واسع فى دولة قطر ومملكة البحرين. على كل، الاسم جميل ومميز فى معناه وانأ شخصيا متصالح معاه للآخر ولا أبدله بغيره رغم ان أبى أعطانى اسما آخر بقى معروفا على نطاق ضيق داخل الأسرة.
في مدينتنا الاسم معروف لعائلة أمي وما فيه اى غرابة ولكن عندما تمشى مكان آخر تبدأ المفارقات، تلقى واحد يناديك يا النعمة وآخر خالتي النعمة بت فلان وما شابه لأنهم يعرفون، او توجد أمرأة فى بلدهم اسمها النعمة. والطريف وأنا فى مدرسة المجلد الغربية الأولية كان بالمدرسة إحدى الطباخات في القسم الداخلي إساها النعمة ويا ما مرات عدة يطلبني لأمر ما ناظرنا وقتها المربى الكبير عمر على قسومة - رحمه الله - او أحد المعلمين، فبدلا عنى يدعونها هي أو العكس.وانا فى المرحلة الثانوية كانت كل إشعارات التحاويل والبرقيات تصلني مكتوبا عليها (الطالبة النعمة) رغم انه لا; توجد مدرسة ثانوية للبنات ولفت نظر موظف الإبراق في مكتب البريدومع ذلك لم يتغير شيئا بدا، وكثيرا ما ضحكنا بسبب ذلك.
هذه عينات من المواقف وفي غيرها، ولى عوده!
| |
  
|
|
|
|
بشرى مبارك ود السقاى
فيس بوك
تويتر
انستقرام
يوتيوب
بنتيريست