فى مجالسنا السودانية باختلافها (ان شاء الله تحت عامود نور ) بتلقى الناس كلها بتناقش فى اى حاجة وبتفهم فى اى حاجة .. حتى الامور المحتاجة تخصص ما بتمرق منهم .. يعنى لو شكيت من انو عندك فتور وحيلك ما شايلك وراسك بلف ينط ليك واحد يقول ليك اخد ليك هايدوكورتزون ( شايفين انا زاتو منهم ) .. تبقى زى البمب مع انو العلاج دا لو عندك حاجة تانية ممكن يلحقك امات طه ولا يقول ليك اخد ككسكاب تون ( دى من عندنا ) كمان فى الكورة بتلقى ليك زول يتكلم فى التدريب لما تحتار الزول دا لما هو خبير تدريب بالدرجة دى قاعد بدون شغل ليه وان جيت للسياسة فدى كوم براها ونحنا كلنا نستوى فيها كلنا خبراء فيها . المهم انو الموضوع يكون عايز تخصص شديد وتلقى واحد بكل بساطة عندو نصف معلومة بيفتى ليك فيهو وربنا يدى عمنا / عمر خيال العافية ( والد احد اصدقائى ) اول من نسألو عن حدث يقول ليك الخبراء قالو ....... وفعلاً السودان كلو خبراء ... حتى فى المنبر هنا بنلقى ناس بتكتب مواضيع وفيها معلومات مغلوطة بسبب ان الشخص يكتب اما عن عدم تخصص او بنصف معلومة
دحين مش الافضل انو الزول يكتب عن البعرفو وعندو عنو معلومات اكيدة .. او على الاقل معلومات تخلى يدير نقاش .. ولا ينظر ساااى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Artiga Gilani
فيس بوك
تويتر
انستقرام
يوتيوب
بنتيريست