|
|
 عربية المرا
|
عربية المرا
فورد إسكورت- جي، صغيرة شهباء، مزوقة بخطين أسودين يمتدان على جانبيها، تطوي المسافات طيا، تقلني وزوجتي في بداية عهد حياتنا الزوجية، هي وعشة صغيرة (كفاية علينا)، والطرقات تمتد أمام ناظرينا إلى حدود الأفق، هنالك بعيداً حيث ينبت قوس قزح، وتكتسب الأزاهير ألوانها، وفوق تلة خضراء، ربوة إن شئت، نتمدد على مقاعدها، نرقب في سكون مغرب الشمس المهيب. في المساء الباكر نعود نتلمس الخطى نحو أضواء المدينة وصخبها، مفعمين بالأمل وقلوبنا تنبض معا على دقات إيقاعه، أقود (اسطولي وإسمه الثاني عربيتنا)، وكلي ثقة ودراية وحصافة، وحينما تستبد بي الهاشمية، اسرع في انطلاقي، أشعر بالزهو وعروستي ترمقني بإعجاب وإشفاق (براحة يا حبيبي)، ويداها متشبثتان بحواف المقعد، كوني المتفرد المتمرد، (توم كروزها الأوحد) يا (انجلينا جوليهي) أنتي.
أطل وجه السعد طفلنا الأول، طفلي من نار كما يقول المغني، والحركة والسكون بيد الله، وعلي مقودي، ومفتاح (عربيتنا) ذو العمامة السوداء، أمارس متعة القيادة، كيفما أشاء ومتى ما أشاء، أرح الليلة تطعيم الشافع، البقالة للسيريلاك، رجع البامبرز ده بعمل راش، المريلة، الرضاعة، كرسي الشافع، مكدونالد درايف ثرو، تكاثفت أعباء القيادة على، البقالة، الصيدلية (لا الدوا ده ماهو، الفتيل الظهري قلت ليك)، ثم (عزو) يقول متباهياً "مرتي سايقة، مرتك ما بتسوق؟"، الحكاية دي بتريحك كتير يا التاج، أردف بالنصيحة، الباكستاني أحمد رفيق، نمرتو كم؟ بعد اسبوعين جلس رفيق يلهث على عتبة الباب من شدة الحر، وبانجليزية (يقول الرشيد زي الزول الفي خشمو بلي)، قال (شي إز ريدي، بليزقيف مي فووتر)، نظرتها جالسة خلف المقود مثل (الأسد) في ليلة تمامه، أو القمر النتر صحا المرافعين خوف، طرنا نسابق الريح رأساً إلى (الدي إم في)، وفي المساء إحتفلنا باستلام الرخصة وصغيري يتبول في وجهي، فاعتبرت ذلك علامة للبخاتة.
قلت ابشر صديقي الأفروميريكي (بيل ميجورز)، وكلي غبطة بالنبأ، قلت لن اتأخر عن مواعيد العمل بعد اليوم، قلت زوجتي تناصفني أعباء الهرولة، طلعت الرخصة يا بيل، عجبت لأمره ينظرني ساخراً، ثم كأنني سمعته يقول:
You will only get a bitch behind the wheel!
طمأنت نفسي (ما ينطبق على الأمريكيين لا ينطبق علينا)، وقبل أن نواصل حديثنا، وصلت زوجته (استيفاني)، ترجلت عن سيارتها أحدث موديل (كامارو)، خضراء زيتي والإطارت (منكلة) بالفضة، صفتها بجانب سيارته العتيقة وهي تنظرها بازدراء، ثم بيق بيق أمنت السيارة بريموتها، هاي تاج، ولم تكلف نفسها مشقة النظر إاليه، فأصابه الإكتئاب الذي لازم أسد جنينة الحيوانات في الخرطوم على عهدها، والذي كان يقدم له البطيخ كوجبة أساسية، ولم يعلم أحد حتى الآن سبب محاولته الإنتحار.
في البيت نظرت ملامح زوجتي الوادعة، وتاكد لي أننا (مختلفين) عن هؤلاء الغربيين، حضارة سبعة آلاف سنة، أودت بحياة (سودانير) ولا عجب، إشترينا لها سيارة جديدة، ليست من الشركة التي صنعت سيارة (ستيفاني)، إقترحَت اللون هي، واقترحتُ أنا (الفيتشرز)، (جَرّكتُها) في يومها الأول ولآخر مرة في حياتي، فكنت كمن يقود المركبة (ديسكفري)، قلت تستاهل، فهي لها ولطفلي، قادر أنا على قراع خطوب (هكرتي)، متى وأين توقفت، فهي والحران (في مناظرة) كما يقول شاعر الحقيبة، والخيل التي طبت بِشِعب بوان وعلى متونها المتنبي وفرسانه، متى ما تمنعت تركتها وذهبت إلى الأوكشن، وجئت بأختها، وأنا أغني لنفسي، طالما أنها تأخذك من النقطة (الف) إلى النقطة (باء) ف
Don’t let the joneses get you down.
مضي اسبوع في حياة زوجتي في عهد ما بعد الرخصة، تتنقل فيه بسيارتها في العالم تستكشفه، مثل طفل صغير يتعثر في بدايات المشي، حتي يشتد عوده، وتستوي سوقه، فتلحق به ركضاً إلى حوش الجيران، ولا تلبث السنوات تفعل الأعاجيب، حتي تسمع به يذرع العالم طولاً وعرضاً، من خميس مشيط وحتي حدود سمرقند.
تغير لباسها موضوعياً (ليتمنتش) مع السيارة، ومشيتها زي السحابة الراحلة أضحت، واستطال صبرها، فاصبح بامكانها التنقيب عن مفاتيحها في حقيبة يدها لساعة كاملة، ثم أتقنت طريقة صديقنا (مصطفي) في تدوير حلقة مفاتيح سيارته بين أصابعه، (سارتانا نان بارادونا ستايل)، وتعلمت فن القيادة والتحدث في النقال في آن، دون عناء، ووردت كلمة (سايقة) في أحاديثها التلفونية مرارا وتكرارا، تطور الأمر، فأصبحتُ راعياً للعيال نسبة لتعدد أسفارها الاتومبيلية، رضاعة وتغيير حفاضات، وكُت كُت كُت، يااااك يااااك اعيد الابتسامة لمن ينفجر باكيا دون سبب، أسمعها في عجلة من أمرها: ماشة أدي فاتحة، ماشة عرس، ماشة ازور زول في المستشفى، ماشة لناس حنان، ماشة الكوفير، ماشة السنما، الجيم، أرجع التوب لعفراء، أتم الشغل في المكتب، أغير زيت أغير موية، أغير جو، مخنوقة، مشنوقة، مفقوهة، مفقوعة، مهلوعة، مرزوعة، ملووعة، أغسل العربية، اجيب تمباك، أتم زيت الفرامل، الفريون، أحاسب الزبون، هوا العجل القدامي ناقص، أجيب كرت تلفون، في صوت غريب تحت الهود، واي ... كدندارة في الطبلون!!!
ثم انها أصبحت تعبانة في كل ليلة، فتوقفنا عن إنجاز الأطفال إلى أجل غير مسمى.
اصبحَت حين تضطر لأخذي معها، ودائما ما يكون الأخذ لمناسبة حزينة، تناولني مانيفستوالارشادات والنصائح بتمامه، ذلك الذي حفظته عن ظهر قلب، كمل قهوتك دي برة وبعدين اترزع، ما ترجع الكرسي ده لورا، إتصرف مع كرعيك الطوال ديل، ما تنزل مظلة الشمس دي، نضف جزمتك بعدين اركب، أربط الحزام، أقرا آية الكرسي، ما تغير المحطة ياخ، ما تلمس الرادي زاتو، باختصار قوم أقعد ورا ولا في الضهرية، انزل عبي البنزين ما بحب ريحتو، نضف القزاز معاك وكت اصلك واقف برة، امشي ورا هناك اشوف المرايات دي مظبوطة ولا لا، اركب سريع أتاخرنا على الجنازة.
إنكسرت نظرات نفوذي الذكوري سادتي، وتحولت إلى نظرات توسل وتضرع، عليك الله في سكتك أغشي جيبي لي معاك اسبرين، فتكون الإجابة لا مابقدر، إنت من قبيل ما جبتو مالك؟ فاسكت، وفي المساء حين عودتها، تلهب عقلي بسياط الغيرة عمداً: وقفني ضابط حركة (كيوت)، ما أداني (تيكيت)، فانظر مجبراً، كرشي المتهدل، وانتحب في دواخلي.
ثم جاء يوم مذلتي الأعظم، في مساء تعطلت فيه سيارتي، وأنا أستعد للذهاب لموعد مهم، مشيت إليها أخ كريم وإبن أخ كريم، أترجاها وليس في قلبي ذرة شك في أريحيتها، فالنساء مواقف كما الرجال سواسية ... أديني عربيتك ماشي لي لميعاد عمل مهم، وعربيتك مالا؟ بدا لي منطقياً ردها، عربيتي بايظة، قلت من خشية إملاق، ومن الصباح مالك ما صلحتها؟ هذا يا صديقي سؤال، له ما بعده، أخفيت غضبي وغيظي وقهري، وهممت بقضيب حديد وهمي في يدي أدق به يافوخها، ياخي بتديني عربيتك ولا لا؟؟ أملي في ان تبلع الطعم، وتستحي على حالها، وكريم تربيتها، ولكنها .. لا.. ولدهشتي.
ابتلعت غضبتي، ذهبت من حيث ما أتت، وددت أن أذكرها بأفضالي، يوم وديتك الشغل في الأسنو، ويوم كنتي عيانة .... فلم يتسق الأمر وأصول الرجولة الدون كيخوتية فسكت، فجأة رن هاتفها، تغيرت نبرات صوتها عند سماعها للصوت في الطرف الآخر:
عفاف؟ بكرة الكلام ده؟ الساعة كم؟ لا لا ماعندي حاجة تعالي سوقي عربيتي امشي بيها، مافي اي مشكلة، لا لا عبدو عربيتو كويسة.
في الدقائق التي تلت، كنت ابعبص في تلفوني دون جدوى، أبحث عن صديق ينقلني إلى موعدي الهام.
|
|
  
|
|
|
|
|
|
|
|
Re: عربية المرا (Re: Tagelsir Elmelik)
|
ــــــــــــــــــــــــــ
غايتو المستنيرين ديل بقوا يطربقوا سااااااى
ضلام لما بهناك ...
قال (المرا) قال !!
عموما وبدون زعل القصة نمطية ...
| |
|
|
|
|
|
|
|
|
|
Re: عربية المرا (Re: دينا خالد)
|
والله لا ادعينا استنارة ولا الله قال، نمطي زي ماعايزة ( الليبلات راقدة)
والمرا مستلفة من راجل المرا بتصرف
والرسمة معربة من عمل بتاع فنان غربي
ماف زعل طالما انها ما معروضة للبيع :)
| |
|
|
|
|
|
|
|
|
 Re: عربية المرا (Re: Tagelsir Elmelik)
|
ههههههههههههههه ...
الليلة ختوك بين يدي الله يا تاج ... كان سردبت ووب وكان اعترفت ووبين ...
إلاّ تعمل غمران ... عشان تجي المرا توديك الحوادث ...
... المهم ....
| |
|
|
|
|
|
|
|
|
 Re: عربية المرا (Re: Hani Arabi Mohamed)
|
الكتراااااابة ... ههههههه ...
جابت ليها رولان بارت ؟؟؟؟
يقولوا ليك اعمل غمران؛ تعمل ميت كلو كلو؟ 
انت اليومين دي "نمطي" ومشبوه ... ما تجيب لينا الهوى
(يوم السبت ربنا حقن دمي ... قلتلكم الزول متطنقع قعدتو تتنحنحوا!)
... المهم .....
| |
|
|
|
|
|
|
|
|
|
Re: عربية المرا (Re: Afraa Sanad)
|
| Quote: يعميني يا سيف التوب ما شفته بي عيني من يوم شالته حلفوا قالوا مافي سمايه في البلد ما لبستوا فيها... |
نكران الذات يا عفراء
| |
|
|
|
|
|
|
|
|
|
Re: عربية المرا (Re: showgi idriss)
|
جميلة حد الاندهاش وواقع معاش حتى في دول الخليج والسودان
العلاقة بين الزوجين تنتهي بعد انتهاء صلاحية الزوج (بعد تلد منو كم واحد كدا)
بدأت اقع في كره النساء بما فيهم وضاحة
| |
|
|
|
|
|
|
|
|
|
Re: عربية المرا (Re: عبدالله الشقليني)
|
الاستاذ المبدع الفنان شقليني
Quote: قصّ من واقع نحاول أن نتلمس الطريق غليه ، ويضنّ الكثيرون ...
حتى كتبت يوماً وأنا غريب عن تلك البلاد .... يوماً قصة قصيرة ....
تقبل محبتي |
يزدهي مكاني بحضورك دائما
لك اضعاف المحبة
| |
|
|
|
|
|
|
|
|
|
Re: عربية المرا (Re: داليا حافظ)
|
بدأت اقع في كره النساء بما فيهم وضاحة
__________________
يا الصادق ود صديق ما تخلينا نقوم نجيب مشاركاتك في البوستات المعنية
تحياتي لك ولصاحب البوست
| |
|
|
|
|
|
|
|
|
|
Re: عربية المرا (Re: محمد درار)
|
سلام واحترام للملك
من محاسن القصة (الخاطرة) دي تحديدا انها نمطية يا الإسمك دينا خالد
وما تغالطي .
(حريم) الزمن دا مبالغة عديل ..
| |
|
|
|
|
|
|
|
|
 Re: عربية المرا (Re: أبوبكر محمد عثمان)
|
نعم يا ملك الان ادركت عمق المؤامره النسائيه فمنذ ان غنت المغنيه ' سجل لى عرباتك '
كنت فى شك من أمرى ما علاقه العربات بالزواج
والان عرفت انها الطريق الى قياده دفه الحياه
————
يسعد صباحك يا ملك
امتعتنا من الصباح
| |
|
|
|
|
|
|
|
|
|
Re: عربية المرا (Re: سامى عبد المطلب)
|
ابداع يا تاج السر..
ذكرتني حوار بين اتنين من أقربائي الأول عائد لتوه من الغربة بوضع ممتاز و لكن رغم ذلك احتج كثيرا عندما وصلته اول فاتورة كهرباء بعد العودة ، دار الحوار التالي:
المغترب : بالله فاتورة الكهرباء تجي 40 الف (زمن الالف الف)
الثاني: الظاهرانتو بتكوو بالكهربا
المغترب : ايوه ، هي مكوة !! تبدا من الصباح و تنتهي المغرب!!
الثاني: ليه ما بتكوو بالفحم؟موش عندكم بت شغالة؟
المغترب: بت شغالة ؟ هي بت واحدة ، بت و و ولد!! والمرا قالت كيييف يكوو بالفحم!!التياب دي غالية تقوم شرارة تطير تحرق التوب!!
الثاني: انتو بتخافو من النسوان عشان كده بتتابعوهن
المغترب: و الله لا بنخاف من النسوان لا حاجة ، لكن عندنا ضغط و سكري لو قعدنا في النقة معاهن نمرض و ال 40 الف دي ما بتكفينا علاج عشان كده بندفع ال 40 الف دي و نسكت.
| |
|
|
|
|
|
|
|
|
|
Re: عربية المرا (Re: الحاج حمد الحاج)
|
يا أمير ود محمد إدريس
| Quote: يا الصادق ود صديق ما تخلينا نقوم نجيب مشاركاتك في البوستات المعنية |
ياخي جيب عليك الله - ما عشان كدا أنا قلت (بدأت في كره) النسوان ولم أقل (أكره) وختيت وضاحة دي بالذات عشان زي نوعك دا يجي يقول الكلام المقتبس أعلاه
يديك العافية يا أمير
| |
|
|
|
|
|
|
|
|
 Re: عربية المرا (Re: صلاح أبودية)
|
حبيبنا الصادق متابعة لصيقة لكل البوستات علشان ما في واحد من الناس البيكتبو هنا يفرفر ..
لك التحية يا الصادق اخوي ..( ما تسخن ياخي ) وش ضاحك لاني ما بعرف ألصق هنا
| |
|
|
|
|
|
|
|
|
|
Re: عربية المرا (Re: محمد جمعه الخير)
|
عان كمان نوع القال ليك الحمدلله احنا في السعودية...
غايته في ناس كده ظهرو على حقيقتهم.... اسحب تضامني.. وبقول زي داليا اختي، مره تمام!
*بسوق من عمري 17... منتظره بس يقولوا سوقو عشان نقلع الRAV4 من ابو محمود
| |
|
|
|
|
|
|
|
|
|
Re: عربية المرا (Re: وضاحة)
|
ابداع كالعادة يا تاج يديك العافية
لكن في الخليج - عدا السعودية :) - الوضع مختلف
ما بترتاح هنا إلاّ بعد الولّية تطلّع الرخصة
أمّا الراحة الجد بقى لما تجيب العربية التانية و تخلّي ليها القديمة هههههههههه
| |
|
|
|
|
|
|
|
|
|
Re: عربية المرا (Re: محمد البشرى الخضر)
|
Quote: ابداع كالعادة يا تاج يديك العافية يها بيها
لكن في الخليج - عدا السعودية :) - الوضع مختلف
ما بترتاح هنا إلاّ بعد الولّية تطلّع الرخصة
أمّا الراحة الجد بقى لما تجيب العربية التانية و تخلّي ليها القديمة هههههههههه
|
ود الخضر
الشوق والوطن والله، شهيتنا نحول للخليج، لكن قالو الرخصة صعبة (للولية) ههههههه
وبعدين وريني الحركة اليتخليها بيها تركب العربية القديمة
يا حليل عهود الذكورية السابقة هههه
تحياتي ولصديقي طلحة
| |
|
|
|
|
|
|
|
|
|
Re: عربية المرا (Re: وضاحة)
|
مبالغة يا شيخي
رغم الجندرة الحاصلة دي لكن برضو نمطيتك لذيذة.
يا دندن ياخ ما تكزي شديد مع ابو السرة دا لانو لو استنار شديد يمكن يمسخ شوية.
ما شمتانة عليك يا تاج لكن الرجال عندهم حركات كتيرة سغيلة عشان كدا النسوان لما يلقن فرصة بيحاولن يعيدن التوازن.
| |
|
|
|
|
|
|
|
|
|
Re: عربية المرا (Re: سناء الصباغ)
|
Quote: مبالغة يا شيخي
رغم الجندرة الحاصلة دي لكن برضو نمطيتك لذيذة.
يا دندن ياخ ما تكزي شديد مع ابو السرة دا لانو لو استنار شديد يمكن يمسخ شوية.
ما شمتانة عليك يا تاج لكن الرجال عندهم حركات كتيرة سغيلة عشان كدا النسوان لما يلقن فرصة بيحاولن يعيدن التوازن. |
نمطيتك لزيزة وحركتك ########ة هههههه
سلام وتعطيم لك يا سناء، عندما أكتب، انتي واعزاء اخرين في الخاطر
سعيد بك وبهم
مدد
| |
|
|
|
|
|
|
|
|
|
Re: عربية المرا (Re: وضاحة)
|
مبالغة يا شيخي
رغم الجندرة الحاصلة دي لكن برضو نمطيتك لذيذة.
يا دندن ياخ ما تكزي شديد مع ابو السرة دا لانو لو استنار شديد يمكن يمسخ شوية.
ما شمتانة عليك يا تاج لكن الرجال عندهم حركات كتيرة سغيلة عشان كدا النسوان لما يلقن فرصة بيحاولن يعيدن التوازن.
| |
|
|
|
|
|
|
|
|
|
Re: عربية المرا (Re: سناء الصباغ)
|
تحية لصاحب البوست و زوارو
سرد شيق وممتع...
شكرا استاذ تاج السر...
.
.
غاظتنى جدا "المرا" دى... ما عندها ذوق بى تعريفة
أكان قام طبق الكاريكاتير بتاع دينا خالد ده و حاكمو غالبا يطلع براءة :)
تدى العربية لصاحبتا و ما تداريها ...!!! منتهى ال passive aggression
| |
|
|
|
|
|
|
|
|
|
Re: عربية المرا (Re: محمد البشرى الخضر)
|
يا معتذراتي
إشمعنى يعني ما قلت ما في مبدأ بتاع أنصر أخاك( سايقا أو مسيوقا) ..
قلتا لي يعني مقلق بيك بوست القب قبة عشان كداقانص لي في صقيعة المنبر ؟؟
هههههههه .. زووووووووووط
ع العموم شوف غيرا لأنو الرد الفوق دا كلو عبارة عن تنكيت وقرقيبة ودا
واضح لكل ذو بصر وبصيرة.
قوم لف تعال اعتذر ..
| |
|
|
|
|
|
|
|
|
|
Re: عربية المرا (Re: محمد البشرى الخضر)
|
حاضرين اعتبرني ساعدتك الألفاظ وبأية حاجة ..
يلا أمشى اعتذر واللا أقول ليك .. ممكن تعتذر هنا وح أتوسط ليك لقيقا يقبلو .
هههههههه ..........
يا ملك معليش والله دي آخر مداخلة هنا مع المعتذراتي المقب قب دا.
| |
|
|
|
|
|
|
|
|
|
Re: عربية المرا (Re: طلحة عبدالله)
|
| Quote: فأصابه الإكتئاب الذي لازم أسد جنينة الحيوانات في الخرطوم على عهدها، والذي كان يقدم له البطيخ كوجبة أساسية، ولم يعلم أحد حتى الآن سبب محاولته الإنتحار. |
ذكرتنى ايام فياجرا الضريسة والبطيخ وما ادراك ما ودالموج وودالمدير اندياحهم فى المنبر
ترسم فينا الابتسامة كالعادة يا مبدع
الجندريات كلمة المرا دى مالها ما حرقتهم زى فى الغنية ديك
كتبت قصة من وحى الخيال فى تجسيد يترأى كانه من واقعى الشخصى وانتقدونى انه ما صاح اكتب قى ناس بيتنا
فااا هسه القصة دى خيال مش كده برضك
| |
|
|
|
|
|
|
|
|
|
Re: عربية المرا (Re: محمد زكريا)
|
| Quote: فااا هسه القصة دى خيال مش كده برضك |
كدا حا نتجاوز الكاتب الغمران وموت الكاتب وسحب سيارة الكاتب ...
وندخل في موت زوجة الكاتب (أو بالعدم تعطيل سيارتها) ....
قلنا ليك "نمطي" ومشبوه ... ونضيف ليها "مكشوف حال" ... وقطع شك حا تجيب لينا الهوى ...
... المهم ....
| |
|
|
|
|
|
|
|
|
|
Re: عربية المرا (Re: تبارك شيخ الدين جبريل)
|
Quote:
قلنا ليك "نمطي" ومشبوه ... ونضيف ليها "مكشوف حال" ... وقطع شك حا تجيب لينا الهوى ...
|
كنت قربت اكتب من يكتب باسم كاتبنا المفضل ودالملك
لكن لو القصة واقعية بتبقى مبرر للحتة بتاعة النمطيه دى وفى نفس الوكت تعتبر طفرة فى التجرد من الذات وعكس ممتاز لكاركاتير دينا خالد فى اول مداخله
سيشوار شنو كمان البدوها ليها وهى مفتاح عربية ما داير تديك
توب عفراء سند
الما المهم
| |
|
|
|
|
|
|
|
|
|
Re: عربية المرا (Re: محمد زكريا)
|
| Quote: لكن لو القصة واقعية بتبقى مبرر للحتة بتاعة النمطيه دى وفى نفس الوكت تعتبر طفرة فى التجرد من الذات وعكس ممتاز لكاركاتير دينا خالد فى اول مداخله |
رجعنا مدرستين لى ورا يا تاج ... بما انو "موت الكاتب" تبع "ما بعد البنيوية" ... معناها عشان ترجع لى "الواقعية" بتاعة البلاشفة الروس إلاّ تتلب بالحيطة ...
نمطي ومكشوف حال ومشرد مدارس نقدية ومشبوه وجبت لينا الهوى ظاطو ....
بالله يا التاج تاني اكتب لينا الأبراج وحظك اليوم بس ...
.... المهم ...
| |
|
|
|
|
|
|
|
|
|
Re: عربية المرا (Re: Khalid Osman Jaafar)
|
يا محمد زكريا ... لو كنت تعرف تاج السر الملك شخصيًا ...
لضحكت حتى تفنقلت لجمال هذا النص ...
لأن حرم الفنان تاج السر الملك ليست سودانية أصلاً ... لا تلبس "التوب" ولا اعتقد أنها لديها صديقات سودانيات ...
هندية وفي الهنود هي محاسبة ... وأم لولدين أحدهما يدرس الطب بعيدًا عن البيت والثاني متخصص في زلزلة عالم تاج السر الملك الهادئ ...
امرأة تحب التاج وضيوفه ولا تحب شمار السودانيين الكلام الفارغ ... واعتقد انها تقود سيارتها قبل أن تتزوج التاج منذ عشرين عامًا تقريبًا ...
أيه الواقعية والتنميط ونكران الذات والكلام العجيب دا ... تاج السر الملك كاتب لديه المقدرة على فضح تفاصيل لا تمت بصلة لحياته الشخصية من قريب أو من بعيد ...
وذلك منتهى الإبداع ...
قبل كدا كتب "كوابيس نهارية" عن واحدة سمّاها "بثينة" في نصه ذاك ... فاستحلفه الناس إن كانت "بثينة" زوجته ...
اقروا وشوفوا المدفّن في خيالاتكم الشعبية المنتشرة عن المرأة والعربية والرخصة ... وأدوا ربكم العجب ...
وتستمر يا تاج ... كاتبي المفضل بلا منازع ...
... المهم ....
| |
|
|
|
|
|
|
|
|
|
Re: عربية المرا (Re: تبارك شيخ الدين جبريل)
|
Quote: يا محمد زكريا ... لو كنت تعرف تاج السر الملك شخصيًا ...
لضحكت حتى تفنقلت لجمال هذا النص ...
لأن حرم الفنان تاج السر الملك ليست سودانية أصلاً ... لا تلبس "التوب" ولا اعتقد أنها لديها صديقات سودانيات ...
هندية وفي الهنود هي محاسبة ... وأم لولدين أحدهما يدرس الطب بعيدًا عن البيت والثاني متخصص في زلزلة عالم تاج السر الملك الهادئ ...
امرأة تحب التاج وضيوفه ولا تحب شمار السودانيين الكلام الفارغ ... واعتقد انها تقود سيارتها قبل أن تتزوج التاج منذ عشرين عامًا تقريبًا ...
أيه الواقعية والتنميط ونكران الذات والكلام العجيب دا ... تاج السر الملك كاتب لديه المقدرة على فضح تفاصيل لا تمت بصلة لحياته الشخصية من قريب أو من بعيد ...
وذلك منتهى الإبداع ...
قبل كدا كتب "كوابيس نهارية" عن واحدة سمّاها "بثينة" في نصه ذاك ... فاستحلفه الناس إن كانت "بثينة" زوجته ...
اقروا وشوفوا المدفّن في خيالاتكم الشعبية المنتشرة عن المرأة والعربية والرخصة ... وأدوا ربكم العجب ...
|
ويا تبارك ياخوى لو قريت مداخلتى الاولى تعرف انه انا عارف انه القصة كما عودنا ود الملك انها من ملك بنات خيالاته البديعة
ولكننى تخيلت السؤال الذى سيدور بذهن اغلب القراء لاننى مررت بالتجربة الواقع ام الخيال واستحلت الواقع لانه سيكون نمط
بعدين كلام النمطية ده ما جبتو انا ياخ , شوف ناس الجندر وما ادراك
انتوا دينا دى بتخافوا منها تتفسح فينا ولا زول يقول ليها بغم
تفتكر جملة ترسم الابتسامة دائما دى بتعنى انه الكاتب مفضل بالنسبى لينا برضو ولا العكس
| |
|
|
|
|
|
|
|
|
|
Re: عربية المرا (Re: محمد زكريا)
|
محمد زكريا الصديق
| Quote: كنت قربت اكتب من يكتب باسم كاتبنا المفضل ودالملك |
والله انا ذاتي ماعارف، تصدق بجي مع الناس اقرا بجاي واتعجب ههههه
تحياتي ليك وللشباب
ملحوظة:
أنا الزول الماقرا الحاجة وعلق بعررفو. فما بهتم كتير بتعليقو.
| |
|
|
|
|
|
|
|
|
|
Re: عربية المرا (Re: درديري كباشي)
|
| Quote: الحمد لله نحن في السعودية ممنوع المرا من سواقة العربية |
Brother Dirdiri
Because women in Saudia are smart ,
They drive from the passenger seat.
| |
|
|
|
|
|
|
|
|
المغترب: بت شغالة ؟ هي بت واحدة ، بت و و ولد!! والمرا قالت كيييف يكوو بالفحم!!التياب دي غالية تقوم شرارة تطير تحرق التوب!!
الثاني: انتو بتخافو من النسوان عشان كده بتتابعوهن
المغترب: و الله لا بنخاف من النسوان لا حاجة ، لكن عندنا ضغط و سكري لو قعدنا في النقة معاهن نمرض
| |
|
|
|
|
|
|
|
|
|
Re: عربية المرا (Re: Huda AbdelMoniem)
|
إستمتاع حد الإشباع.
ما عارف ليه تذكرت مقولة البروف المرحوم عبد الله الطيب حين عودته من أحد مهرجانات المربد في الثمانينات حيث قال (بتصرف): "جاءت نازك الملائكة فقالت كلام غير مفهوم و جاء نزار قباني فقالك كلام لا هو بالشعر و لا هو بالنثر، ثم جاء الفيتوري فأنقذ الموقف"
حقيقة لقد أنقذت الصفحة الاولى للمنبر في هذا اليوم،
إبداع و الله يا ملك.
.
.
.
برضو إتذكرت بوست د. نجاة "مجنون الكتابة الجنن الكتابة و جننا"
| |
|
|
|
|
|
|
|
|
|
Re: عربية المرا (Re: د.يوسف محمد طاهر)
|
د يوسف محمد طاهر
Quote:
ولا يزال سودانيز أون لاين بخير ...... شكراً يا تاج السر على السرد
الممتع ...... يعطيك العافية إنت وضيوفك الكرام . |
ولا يزال قراء سودانيز بالف خير
| |
|
|
|
|
|
|
|
|
|
Re: عربية المرا (Re: عمار يس النور)
|
سرد جميل و ممتع لكن لا أعتقد ان هنالك سودانية ممكن تكون بهذه الجراءة و مع زوجها ، يا أخي و الله شفيقاتنا دول حنينات لابعد ما يكون ممكن يكون هذا واقع في دول اخرى.
| |
|
|
|
|
|
|
|
|
|
Re: عربية المرا (Re: على عمر على)
|
| Quote: سرد جميل و ممتع لكن لا أعتقد ان هنالك سودانية ممكن تكون بهذه الجراءة و مع زوجها ، يا أخي و الله شفيقاتنا دول حنينات لابعد ما يكون ممكن يكون هذا واقع في دول اخرى. |
ذكّرتني المقيّل بى الانبوبة قدام باب الشقة لأنو "فطومة" محننة ... في القصة السرقها الفاتح جبرا من سجيمان ...
قال: "والله فطومة دي طيبة خلاس" ... ههههههههههههههههه
... المهم ....
| |
|
|
|
|
|
|
|
|
|
Re: عربية المرا (Re: على عمر على)
|
يا علي عمر سلام
Quote: وشكرا لود الشريف تبارك المهم
فى كونه منصفا لمبدع وفنان كبير |
تبارك ده زي عثمان دقنة كما وصفه (كبلينغ أعتقد)، حين اشعر في أمراء وفرسان المهدية:
Needs no flag
وبكلام أهلنا (كوم براهو) ابو أمجاد، وما دام جات السيرة، عيال شيخ الدين كلهم.
| |
|
|
|
|
|
|
|
|
|
Re: عربية المرا (Re: مهيرة)
|
سلام يا مهيرة
| Quote: ولا يهمك يازول ، زى ( المرا) دى بس ترمى ليها كاسيت ( راجل المرة حلو حلاة ) فى العربية |
غرقي لي الحفرة
كتر خيرك :)
| |
|
|
|
|
|
|
|
|
|
Re: عربية المرا (Re: الصادق خليفة)
|
الصادق خليفة
| Quote: سرد جميل و ممتع لكن لا أعتقد ان هنالك سودانية ممكن تكون بهذه الجراءة و مع زوجها ، يا أخي و الله شفيقاتنا دول حنينات لابعد ما يكون ممكن يكون هذا واقع في دول اخرى. |
كان ما اخاف الكضب، شامي لي ريحة هرشة، هههههه
عموما البشر هم البشر في كل مكان وزمان، وقد تخلق التغييرات الحادثة بسبب
الهجرات، بعضاً ن الظروف الانسانية الخاصة، عموما كل شي داخل إطار العمل ده
ممكن يكون فيكشنال.
تحيتي
| |
|
|
|
|
|
|
|
|
|
Re: عربية المرا (Re: عمار يس النور)
|
عمار يس
Quote: إستمتاع حد الإشباع.
ما عارف ليه تذكرت مقولة البروف المرحوم عبد الله الطيب حين عودته من أحد مهرجانات المربد في الثمانينات حيث قال (بتصرف): "جاءت نازك الملائكة فقالت كلام غير مفهوم و جاء نزار قباني فقالك كلام لا هو بالشعر و لا هو بالنثر، ثم جاء الفيتوري فأنقذ الموقف"
حقيقة لقد أنقذت الصفحة الاولى للمنبر في هذا اليوم، |
مودتي وشكري
| |
|
|
|
|
|
|
|
|
|
Re: عربية المرا (Re: سامى عبد المطلب)
|
Quote: نعم يا ملك الان ادركت عمق المؤامره النسائيه فمنذ ان غنت المغنيه ' سجل لى عرباتك '
كنت فى شك من أمرى ما علاقه العربات بالزواج
والان عرفت انها الطريق الى قياده دفه الحياه
|
انا غايتو يا سامي عندي عربات علب اللبن ديك وفي افضل الاحوال عربات الكارو
تحياتي
| |
|
|
|
|
|
|
|
|
|
Re: عربية المرا (Re: أبوبكر محمد عثمان)
|
Quote: تاج السر يا لذيذ المنهل
فنجان قهوه صباحيه ممتع للغايه
بس ذكرتني المثل الموزمبيقي ( التسوي بي ايدك ) |
والله يا ابوبكر انت من جيتك من موزمبيق دي كلامك اتغير ههه
| |
|
|
|
|
|
|
|
|
|
Re: عربية المرا (Re: Tagelsir Elmelik)
|
الاستاذ المليك ... قواسيب من الود ..
حقيقة قريت القصة دى مرتين وحاسى انى لسه عايز أقرها
قصة جميلة جدا وجمالها يكمن فى واقعيتها ..
شكرا جزيلا
| |
|
|
|
|
|
|
|
|
|
Re: عربية المرا (Re: الصادق عثمان محمد)
|
الصادق عثمان سلام
Quote: الاستاذ الملك ... قواسيب من الود ..
حقيقة قريت القصة دى مرتين وحاسى انى لسه عايز أقرها
قصة جميلة جدا وجمالها يكمن فى واقعيتها . |
الواقعية آسرة دائماً وأبداً
لك جزيل المودة
| |
|
|
|
|
|
|
|
|
|
Re: عربية المرا (Re: Tagelsir Elmelik)
|
ابداع يا ملك
غايتو ناس التنميط عملو جلا لي انو العربية الجديدة اشتروها لي المرا .....
مش ذي ناس ودالبشري لازالو حايمين بالعقل الذكوري و العربية الجديدة ههههههههه
احمد لراجل المرا اتباعة للقول ( اشغل اعدائي بانفسهم و سواقتهم .......:)
---------------
تشكر للاسترحة
نصرالدين
| |
|
|
|
|
|
|
|
|
|
Re: عربية المرا (Re: نصرالدين صلاح)
|
يا ابو صلاح
| Quote: ( اشغل اعدائي بانفسهم و سواقتهم .......:) |
لقيتك ختمي باتع هههه
لمن تجينا في فيرجينيا، شايفك مالك قرارك
شكرا لمرورك
| |
|
|
|
|
|
|
|
Tagelsir Elmelik
دينا خالد
تبارك شيخ الدين جبريل
Hani Arabi Mohamed
سيف النصر محي الدين
Afraa Sanad
مريم بنت الحسين
MOHAMMED ELSHEIKH
أمير محمد ادريس
إدريس محمد إبراهيم
showgi idriss
الصادق صديق سلمان
وضاحة
عبدالله الشقليني
داليا حافظ
عمر عبد الله فضل المولى
طلحة عبدالله
سامى عبد المطلب
الحاج حمد الحاج
صلاح أبودية
محمد جمعه الخير
محمد البشرى الخضر
سناء الصباغ
جواهر ابراهيم
محمد زكريا
Khalid Osman Jaafar
عمار يس النور
د.يوسف محمد طاهر
الصادق خليفة
مهيرة
على عمر على
الصادق عثمان محمد
نصرالدين صلاح
فيس بوك
تويتر
انستقرام
يوتيوب
بنتيريست