اكثر ما شد انتباهي لهذا الفيدو لا يكمن في مقدرة هذا الخواجة في تحدث العربية الدارجة بهذه الطلاقة.....ما شد انتباهي حقيقة هو تعليق اورده احد المعلقين علي الفيديو وهو:
Quote: والسوداني يعيش في دوله غربيه 5 سنينand#65279; يقول اولادي مابعرفو عربي
هذا الاشكال الذي تعانيه كثير من الاسر التي هاجرت للجزء الغربي من الكرة الارضية ,لا استثني في ذلك اطفالي الذين فشلت معهم كل محاولاتي لتحدث العربية كما يتحدثها والديهم
الخيط مفتوح للنقاش وكيفية ايجاد اي حلول ممكنة
تحيتي واحترامي
01-31-2013, 01:41 PM
الخير محمد عوض
الخير محمد عوض
تاريخ التسجيل: 10-25-2005
مجموع المشاركات: 3547
من الملاحظ ان معظم الاطفال المهاجرين مع اسرهم يجيدون مهارة السمع وربما الفهم دون المهارات الاخرى والتي من ضمنها الكتابة والمخاطبة او الكلام تتكلم مع طفلك عربي يفهمك طوالي لكنه يجد صعوبة في الرد بالعربية وهذا يعني انه استخدم مهارتي السمع والفهم وعجز في استخدام مهارة التحدث !!! لا اعلم اي سبب علمي واضح يبرر هذا.
01-31-2013, 02:06 PM
Osama Mohammed
Osama Mohammed
تاريخ التسجيل: 04-02-2008
مجموع المشاركات: 4619
معقولة يا الخير ؟؟؟؟ وانت استاذنا وأحد المتقنين للغة ثانية ؟ الممارسة هي المفتاح لابد ان يمارس الاطفال الكتابة والقراءة . Noam Chomsky David Crystal Vygotskys Krashen, S. D اها ديل كلهم قالو انو ممكن الاطفال يتعلموا اكثر من لغة تحدثا وفهما وكتابة وقراءة . تتذكر استاذ محمد علي ؟ مرة قال لينا ربنا يرحمو : اللغة والبني ادم زي الموية والكباية لو ما الكباية دفقت ما بتتملي . لو ربنا هون بجيك لانو مرة ناقشت ورقة عن (التحجر عند طلاب ومتعلمي اللغة الثانية ) التحجر ده بس عند الكبار الصغارما بتحجرو. ده عنوان الورقة Fossilization in SLA researches: creating confusion or offering clarification? خليني اخلص من الفي يدي وبجيك.
01-31-2013, 02:30 PM
الخير محمد عوض
الخير محمد عوض
تاريخ التسجيل: 10-25-2005
مجموع المشاركات: 3547
والله يا محمد ان اخاك قد وقف حماره في عقبة مفهوم الممارسة دا . يعني لو جبت ورقة وكراس وحسبت الزمن البتقعده مع طفلك وقارنته بالزمن البقضيهو طفلك خارج المنزل او حتى داخل المنزل لكن في شؤون تخصه هو بتلقى انو الزمن الما حقك اكتر من الزمن حقك معاهم يعني المدرسة 8 ساعات التلفزيون ساعتين الانترنت او الكمبيوتر ساعتين والنوم 8 ساعات يعني بتلقي صافي زمنك معاهم 4 ساعات دا لو كنت اصلا متواجد بالبيت وما شغال .... يعني فرقة ممارسة كافية ما بتتلقي وان وجدت ما بتتوجد بقدر كافي.... اما فيما يتعلق بعمنا نعوم جومسكي انا من اكثر المعجبين بكتاباته في هذا المجال وخصوصا الحتة الاتكلم فيها عن ال Language Acquisition Device للاطفال ودي بجيها بالتفصيل في هذا الخيط باذن الله وذلك لاهميتها وارتباطها المباشر بالحتة بتاعة اكتساب مهارات اللغة
Quote: لو ربنا هون بجيك لانو مرة ناقشت ورقة عن (التحجر عند طلاب ومتعلمي اللغة الثانية ) التحجر ده بس عند الكبار الصغارما بتحجرو. ده عنوان الورقة Fossilization in SLA researches: creating confusion or offering clarification? خليني اخلص من الفي يدي وبجيك.
حا اكون في انتظار رفدك لهذا الخيط بما يفيد فانت خريج مدرسة الاستاذ الفذ محمد علي حمد عليه الرحمة تقبل احترامي وكامل الود.
01-31-2013, 02:09 PM
Rihab Khalifa
Rihab Khalifa
تاريخ التسجيل: 07-07-2006
مجموع المشاركات: 3738
سلامات يا الخير المشكلة عويصة و لي من الاسرة و المعارف امثلة مختلفة، و زيجات متنوعة هناك من اصر علي الابناء تعلم العربية و اجتهد بكل ما اوتي من قوة، و ما شاء الله الاب كان يصر انهم يقيمو الاذان و الصلاة باصوات عالية في البيت، و الان فيهم امام مسجد في نيويورك، يتحدث العربية بطلاقة، مع انه ما شاف للسودان غير الاجازات
هناك من اصر علي بعث البنات فقط للسودان لتعلم اللغة و الثقافة و اللحاق بركب العرس، مع الاصرار انه يكون العريس سوداني و انتهت تجربة ارسال الابنة للسودان في مستشفي الامراض العصبية بعد شهرين من وصولها، و الان هي في امريكا متاثرة بندوب الشهرين ديل
و هناك من اتي للسودان بكامل الاسرة، بما فيها الام الغير متحدثة بالعربية و الان يتحدث الابناء العربية بطلاقة، و لكن مع لكنة، و استقرت الام في السودان و رجع الابناء للندن و امريكا للعيش بها
و برضه في الغير مهتمين بانه الابناء يتحدثو العربية.
و في الزيي ديل، الطلعنا من انجلترا لدول الخليج عسي و لعل تعلم العربي يكون سهل ربك يعين
الاطفال بامكانهم تعلم اكثر من لغة في وقت واحد
01-31-2013, 10:54 PM
الخير محمد عوض
الخير محمد عوض
تاريخ التسجيل: 10-25-2005
مجموع المشاركات: 3547
تعرفت علي اسرة في احدى مدن الساحل الشرقي انقسم فيها الابناء الي نصفين , نصف احب التعامل مع اللغة وتطويرها وهم الان متحدثين جيدين للغة اما النصف الاخر من الابناء تمرد عليها ولا يتعاملون بها ويعتبرونها شرا مستطيرا هذا مع العلم انهم قد رضعو من ذات ثدي الام وترعرعوا في كنف ذات الاب وتحت سقف ذات البيت .... المشكلة دي عوييييييييصة يا خية وربنا يمرقنا منها سالمين معلمين لاطفالنا لغة دينهم .
Quote: و في الزيي ديل، الطلعنا من انجلترا لدول الخليج عسي و لعل تعلم العربي يكون سهل ربك يعين
افكر في الاقدام علي نفس الخطوة , ارجوا افادتي لو شعرتي بان هناك اي تغيير ايجابي في لغة الابناء
تحيتي وكامل احترامي
01-31-2013, 11:19 PM
Elawad
Elawad
تاريخ التسجيل: 01-20-2003
مجموع المشاركات: 7226
سلام يا الخير العملية زي ما قلت ما ساهلة... لكن أهم حاجة زي ما قال أسامة الممارسة. والأطفال أذكياء جدا وفي رواية مكارين فهم بستسهلوا اللغة التانية البتعاملوا بيها في المجتمع والمدرسة وحتى لو فهموك بتقول شنو بحاولوا يردوا عليك باللغة الهم بعتبروها أسهل. أحسن حل في تقديري إنك تخلي العربي لغة التخاطب في البيت مهما قل زمن وجودهم فيه. وبتحتاج أحيانا لشي من التشدد يعني لو ما اتكلموا معاك بالعربي تقول ليهم ما برد عليكم أو ما بديكم الحاجة الطلبتوها. وربنا بس يسهل الأمور.
02-01-2013, 01:58 AM
Osama Mohammed
Osama Mohammed
تاريخ التسجيل: 04-02-2008
مجموع المشاركات: 4619
نعم مسالة استسهال الطف للغة التي يعتبرها لغته الاولي- وفي هذه الحالة الانجليزية- دائما ما يكون مسيطر علي الرغبة في الاستجابة وفي هذه الجزئية تجدي متفق معك تماما ولكن ما اختلف فيه معك هو مسالة اجبار الطفل او اكراهه للتحدث معك باللغة العربية لاني اؤمن تماما بان اسوأ وسيلة تعليمية هي الاكراه سوى في اللغة او غيرها ... حاولت انا اتبع اساليب تشجيعية اخرى ونجحت لكن عارف المشكلة شنو ههههههههه كان حاولت امشي في اساليبي دي حا اشهر افلاسي بعد شهر :) .... الطريقة الاستعملتها هي اني مثلا اكون عارف الطفل داير ليهو حاجة معينة في راسو اقوم اقول ليهو مثلا لو الليلة ما اتكلمت ولا كلمة بالانجليزي انا حا اشتري ليك الحاجة دي , اتخيل اليوم داك بدقو عربي اخطر من عربي الخواجة الفوق دا .... لكن كمان يا العوض اخوي ما بقدر يعني استمر في الموضوع دا كتير لانو بقطع نفسي وجيبي معا :).
تسلم يا حبوب
02-01-2013, 08:57 AM
Rihab Khalifa
Rihab Khalifa
تاريخ التسجيل: 07-07-2006
مجموع المشاركات: 3738
Quote: أحسن حل في تقديري إنك تخلي العربي لغة التخاطب في البيت مهما قل زمن وجودهم فيه Elawad
دي اجمل وصية مع صعوبتها
الوالد ربنا يديه العافية للان يا العوض و بالرغم من انه يتحدث الانجليزية بصورة تخجلني انا و اخوتي من اجادته لها، الا انه عنده قولة معهودة في البيت ولا يسمح حتي بادخال كلمات في النص سااكت بالانجليزي دايما بيقول لينا، اتكلمو بالعربي.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة