Quote: سمير سرور' 1933 - 2003 عازف ساكسفون مصري مواليد 26 أبريل 1933 بدأ مشواره في الخمسينات اشتهر في وسطه الفني بلقب عاشق الساكس، بدأ حياته الفنية بالموسيقي العسكرية إلي أن تعرف عليه بليغ حمدي بشارع محمد علي وكان اول من قدمة على الساحة الفنية .وقد قام سمير سرور بتعديل ]]لآلة الساكسفون]] لتصبح أول ساكسفون يعزف نغم شرقى (الربع تون) ، وقد كان قاسم مشترك فى جميع الحان بليغ حمدىتحديداً وقد عزف خلف جميع كبار المطربين بدءاً من أم كلثوم وفايزة احمد ونجاة الصغيرة و عبدالحليم الذى اتاح له فرصة العزف المنفرد للجمهور فى كثير من حفلاته وبعد نهاية مطربين الزمن الجميل اختفى عن الساحة الفنية . ولكن عاد مرةاخري بعد ان تعاون مع عمرو دياب فى اوائل التسعينات الذي كان من ابرز العازفين فى فرقتة الموسيقية واشهرهم لتعود مرة اخري اسطورة سمير سرور وقدم وقتها ستة شرائط موسيقية بأسم عاشق الساكس و بعدها انتشر الساكسفون في معظم أغنيات التسعينات انتشار النار في الهشيم وظل سمير سرور في الوسط الفني حتى قبل وفاته بأيام أما آلة الساكسفون التى كان يمكلها فقد كانت أغلى آلة فى وقتها حيث أهداه اياها أحد الأثرياء وكانت من الذهب الخالص و توفي في 31 مايو 2003 عن عمر يناهز 70 عاما
01-28-2013, 07:49 AM
omer osman
omer osman
تاريخ التسجيل: 06-09-2007
مجموع المشاركات: 15218
الف شكر يامجاهد وربنا يقدرنا نكون عند حسن ظنك دائماً بالمناسبة ياعمر ياجميل دي ذكرتني واحد من اعظم واشطر ضباط البوليس اسمو (عمر جميل) ان شاء الله يوم نكتب عنه في المنبر ده ....... له وليك الف تحية ........
01-28-2013, 08:17 AM
tmbis
tmbis
تاريخ التسجيل: 10-19-2002
مجموع المشاركات: 24862
والله كويس يا جنابو .. في نشاط والله يا جنابو شكرا جزيلا لانتشالنـا كل مرة والتانية إلى عالم الموسيقى .. وبالمناسبة آلة الساكس في كتير جدا من الأخوان عندهم ليها عشق خاص .. وفي كتير من الاخوان هنا عازفين مهرة .. يوم الجمعة بالليل اتصل علي محمد الشيخ زميل البورد .. عشان يديني خبر انو افتح النيل الأزرق الان .. وكان فيها خالد عبد الماجد .. وخالد دا انا كان عملت ليهو بوست لما كان في نجوم الغد لاني معجب شديد بالتكنيك حقو ومتكيف من انو بتمرن بي شراهـة شديدة وبيحب ىلة الساكس .. للاسف ما قدرت اجد الحلقة حتى في اليوتيوب وكنت ناوي افتح ليهو بوست تاااني لاني في انتظار انو يكون مشى خطوة لي قدام .. المهم الراحل سمير سرور يحمد له انه كان من خلف هؤلاء العمالقـة ومتميز بي احساسه الشرقي البحت وكنت استمعت ليهو كتير جدا في العديد من الأعمال .. ليس تعصبا لكن لدينا العديد من عمالقة الساكس الذين لم يجدوا حظهم لأن مصر بالرغم من مواهبهم غلا انهم بيزيدوها شويتين .
01-28-2013, 08:31 AM
omer osman
omer osman
تاريخ التسجيل: 06-09-2007
مجموع المشاركات: 15218
Quote: ليس تعصبا لكن لدينا العديد من عمالقة الساكس الذين لم يجدوا حظهم لأن مصر بالرغم من مواهبهم غلا انهم بيزيدوها شويتين .
المبدع عندنا ياتمبس مظلوم بي هموم الحياة والمعيشة !! يعني ممكن تلقاهو عازف ساكس ممتاز جداً لكن مضطر يشتغل شغل تاني عشان يقدر يعيش بالتالي هو غير متفرع للابداع والتجويد بعكس المصري يعني عمك سمير ده بكون دخلو من العزف معيشو في بحبوحة وبالتالي مافي سبب مايهتم بالتجويد والارتقاء بمهنته اضف الى ذلك ضعف التوثيق هسي انت بتفتش لشغل في اليوتيوب لي زول مبدع ما لقيتو لكن اكتب (سمير سرور) أو اكتب (عاشق الساكس) شوف كميات المعلومات والتوثيق البتلقاها !!!!!!!
01-28-2013, 09:01 AM
tmbis
tmbis
تاريخ التسجيل: 10-19-2002
مجموع المشاركات: 24862
** أبو عبدالرحمن.. ** سلام ومساءك خير .. ** وخد عندك إبن خالى (طارق ميرغنى) زميل البورد من أشهر عازفى الساكس فى السبيعنات ..
<<<<<<<<<<<<<<<<<<<<
هلا مولانا ابو محمد فؤاد شرفت البوست والله عندي معلومة انو الاخ طارق ميرغني ذو صلة وثيقة جداً بالموسيقي لكن اول مرة اعرف انا عازف ساكس محترف .....ده شغل نضيف والله ياريت لو يمر علينا في البوست ده واكيد بكون مرور مثمر جداً
01-28-2013, 10:53 AM
tmbis
tmbis
تاريخ التسجيل: 10-19-2002
مجموع المشاركات: 24862
Quote: فى تقديرى أن الاخوة الاثيوبين ابدعوا فى عزفها
يا جنابو قلت ليك انا بجيك بي رواقــه .. لانو بوست الساكس والنحاس دا حق مزاج عالي والكتابة فوقو بتحتاج لي مهارة برضو .. .. ح اجي انظر ليك في المسالة بتاعت ربع التون ونص التون وإلخ .. مع انو المسالة دي اكاديمية بحته ما بنستفيد منها شديد لانو معظم الاكاديميات المرتبطة بي الالة الموسيقية يستحسن انو الشرح فيها يكون عملي .. زي المشمعات الفرش مع أرض التدريب الصالحـة هههههههه اما بالنسبة لي كلام جنابو يوسف .. فيما يتعلق بي الاثيوبيين ملوك الساكس .. وابداعهم .. فعلا .. الاثيوبيين من ابدع ما يتعامل مع ريشـة الساكس في النفخ برقـة متناهية ومداعبـة انفاس العازف لريشة الساكس .. وسر انهم متميزين عن غيرهم ببصمة الصوت الواضحـة في العزف .. إذ بالامكان أن تميز بين نافخ الساكس الاثيوبي عن غيره من العازفين الآخرين ويعود السبب في ذلك إلى أن المنطقة المرتفعة في الهضبة الاثيوبية تساهم في تشكيل الصوت وايضا طبيعة النفس العالي للاثيوبيين .. طبيعة النفس خلقت لهم تكنيك خاص بهم يستخدمونه في كل المناطق داخل وخارج اثيوبيا يحتفظ لهم بنكهتهم الخاصة جدا .. ولا يوجد فرق في استخدام الالة ولا يجدون صعوبة في ذلك بل مهارتهم في كل الأحوال تتضح في كل آلة عن الاخرى .. ارفق نموذج للعملاق تلهـون قساسي .. لاحظ الشجن وعزوبــةالصوت الخارج من الساكس حتى اهتزاز الريشة وااضح جدا ..
01-28-2013, 11:04 AM
tmbis
tmbis
تاريخ التسجيل: 10-19-2002
مجموع المشاركات: 24862
ههههههه.. والله يا جنابوهــات لو انا البروجي .. ياكم كل يوم حالقنكم صلـعه ، بالمناسبة .. البروجي دا من اصعب الآت النفخ .. لانو عبارة عن نفس طالع بتتحكم فيهو بي النفخ فقط وماف اي مفاتيح للتنقل بين الحروف الموسيقية .. يعني تنفخ وتبكي بس
01-28-2013, 11:18 AM
وضاحة
وضاحة
تاريخ التسجيل: 01-16-2005
مجموع المشاركات: 9116
Quote: وبالمناسبة دي وين البوست الوعدتنا بيهو عن النحاسيات قبل كده !!!
..
Quote: هذه الآلة النحاسية البديعة تملأ النفس هدوء وسكون عميقين و تسمو بها الى رحاب الشجن .. فى تقديرى أن الاخوة الاثيوبين ابدعوا فى عزفها
معليش يا كمندانات بس تعديل بسيط .. الكثير من الناس يعتقد ان الساكسفون من الآلات النحاسية وهو خطأ شائع .. فالبرغم من المظهر الخارجي للساكس وعمله مع مجموعة النحاسيات فهو يحمل فقط الاسم شكلا لكن مضمونا فإن الساكسفون بأنواعه المختلفة يعتبر من الآلات الخشبية نعم الساكسفون من الآلات الخشبية التي يرجع اختراعها للبلجيكي آدولف ساكس عام 1840
01-28-2013, 11:07 AM
tmbis
tmbis
تاريخ التسجيل: 10-19-2002
مجموع المشاركات: 24862
Quote: وخد عندك إبن خالى (طارق ميرغنى) زميل البورد من أشهر عازفى الساكس فى السبيعنات ..
فعلا يا جنابـو .. الباشمهندس طارق ميرغني من الموسيقيين الخطيرين جدا ، خاصة في آلة الساكس .. لكن كالعادة ظروف الغربة تبعدك بكشل كلي عن التمارين وعن استخدام الالة .. ارجو أن يحضر الباشمهندس ليحاضر عن الالة وفي ذلك فايدة عظيمة .. عشان على الاقل اللقى لي زول ميري .. ما ملكية زيكم كدا في المزيكا
01-28-2013, 11:17 AM
محمد جبره
محمد جبره
تاريخ التسجيل: 01-12-2013
مجموع المشاركات: 940
يا الصادق ازيك .. انت متاكد انو الشباب ديل فرنسيين ؟ لو كانو فرنسيين لكن عمك اللاعب الصولو دا اثيوبي من غير ما يكتب في فنلتو فالاحساس الشغال بيهو هو احساس اثيوبي خالص ودا الكلام القلتو فوق لي جنابو عمر ولي جنابو يوسف .. ودي الميزة حقت الاثيوبيين في النفس والتكنيك شكرا عجبني عمك دا مكررب شغلو كويس .. .. وبالنسبة للملف الأولاني بتاع الفرقـة الاثيوبية قارن بين الصوت في الأول وبين الصوت في التاني وطريقة العزف والتكنيك متطابقات تماماوفي ميزة تانية انو الاثيوبيين دائما بيعمدو لي انهم يحشدوا جميع الآت النفخ في فرق الجاز مثل آلة: الترامبون .. والترامبيت .. اضافة إلى انواع الساكسفون المتعارف عليها .. السوبرانو والتينور والالتوو مع انهم ميالين دائما للتركيز على التينور والآلـــتو .. وهم الساكسفونات كبيرة الحجم .. والتي تميل في صوتها إلى الغليظ حسب الترتيب في النوتة الموسيقية ..
Quote: تقريباً الشخصية واحدة في الفرقة الإثيوبية + الفرقة الفرنسية ...
بالضبط يا صبري .. لكن السؤال بتاعك شنـو ..؟ تعرف يا صبري نفس الشخص دا لو دخلتو وشكيتو وسط فرقـة بتاعت روك امريكان .. ح تقدر تفرز النفخ حقـو من بين الناس ديل حتى من غير ما تقارن بالشكل ..
Quote: مهم جدا نعرف الزول دا عدل شنو في الآلة دي وعدلها كيف و وزنها كيف ؟ لان الساكس دا معقد خلقة
العزيز محمد جبـرة .. سلامات .. بعيدا عن الاكاديميات اللزجـة .. اي آلة موسيقية في طبيعة شكلها وحجمها سوا ان كانت نفخ أو وتريـة يمكن التحكم فيها وتوظيفها من حيث الدوزنـة للوتريات .. أو عن طرق أخرى بالنسبة للالات الغير وتريـة .. دا كلام معروف طبعا. لكن المهم في الأمر ان هناك استاندرد معروف وهو .. التيونر الذي يعطيك الصوت الحقيقي لاي حرف من الحروف الموسيقية السبعة المتعارف عليها .. هذا التيونر نقيس عليه كل الالات الموسيقية لكن يختلف من آلة لاخرى ففي بعض الالات الوترية نعمد إلى وزنها عن طريقة تحريك الصباعات الخاصة بدوزنـة الوتر .. في الآلات ذات الاصابع كالاورغ والبيانو يمكن ان نقوم بوزنها عن طريق بعض الاصابع المخصصة لذلك .. اما في الآلات النفخ فمعظمها يكون الصوت ثابت يتم وزنـه لمرة واحدة .. وذلك اثناء التصنيع سواء أن كان حديثا بالكمبيوتر .. أو قديما بالمهارة السمعية .. ح اواصل في الرد ليك .. لانو خايف الكتابة تكتر وتكون مملة في القرايـة
01-28-2013, 02:44 PM
tmbis
tmbis
تاريخ التسجيل: 10-19-2002
مجموع المشاركات: 24862
طيب .. لكل آلة موسيقية مدى صوتي محدد .. وهناك العديد من الالات الموسيقية اسرة واحدة .. على سبيل المثال خذ اسرة آلة الكمان .. تجد منها الكمان .. والفيولا .. والتشيلو .. والكونتر باص .. جميعها ذات شكل واحد تختلف من ناحية الشكل والحجم ومسمى الوتر وطريقة العزف .. والمدى الصوتي .. والكتابة لها في المدرج الموسيقي .. خذ مثلا الترامبيت والكورنيت .. وهو من الآت النفخ المعروفـة لكن تحتلف من ناحية الشكل الذي لا يكاد يكون واضح خذ الساكسفون موضوع النقاش .. واشكاله واحجامه المختلفة والمدى الصوتي .. المدى الصوتي يا جبــرة هو ما نقصد به مقدرة الالة الموسيقية على الصراخ مثلا .. بنفس القدر الذي يسمح للبني آدم أن يصرخ والحد الذي يصل له صراخـه .. والصراخ هنا في الموسيقى مقسم إلى نصف التون وربع التون والتون الكامل .. التون هو المسافة بين كل نغمـة موسيقية وأخرى .. يعني عمر عثمان بقدر يكورك التون دا مرة واحدة كدا في تلاتة طبقات مثلا .. وجبرة بقدر يكورك التون دا في طبقة واحدة دي مقدرتو .. هنا اللعبـة .. بجي بشرحـه ليك بي طريقة انو كيف الزول دا قدر يلعب في الالة الموسيقية
01-28-2013, 03:49 PM
محمد جبره
محمد جبره
تاريخ التسجيل: 01-12-2013
مجموع المشاركات: 940
كلام اخونا عمر بقول انه الزول دا عمل تعديل في الآله يعني غير شكلها باضافه او غيرها حسب ما فهمت وذي ما انت قلت آلات النفخ تحديدا بتتدوزن في مصنعها .......اي فتحه حجمها محدد والمسافة البينها وبين الثانية محددة ودا حسب حجم جسم الآلة , عشان كدا كان سؤالي الزول دا عمل شنو في الآلة نفسها عشان اجيب ربع التون
انفخ الصولو دا ومتعنا شايف عمر جدع ليك المايك جوه البوق
Quote: يا الصادق ازيك .. انت متاكد انو الشباب ديل فرنسيين ؟ لو كانو فرنسيين لكن عمك اللاعب الصولو دا اثيوبي من غير ما يكتب في فنلتو فالاحساس الشغال بيهو هو احساس اثيوبي خالص ودا الكلام القلتو فوق لي جنابو عمر ولي جنابو يوسف .. ودي الميزة حقت الاثيوبيين في النفس والتكنيك شكرا عجبني عمك دا مكررب شغلو كويس .. ..
اهلا تمبس مرحب الفرقة فرنسية و عمك اللاعب الصولو اثيوبي .. يبدو لي هو من هدى الفرقة الفرنسية لاداء عازة في هواك . بفتكر سبب ابداع الاثيوبيين في آلة الساكس هو نفس السبب اللي جعلهم يحصدون جوائز سباق الجري .. ففي احدى المنافسات حصدت اثيوبيا المراكز السبعة الاولى من عشرة و قد يكون ذلك لارتفاع منطقة اثيوبيا . في حرمة خواجية تنفخ الساكس نفخ السواد قدر ما فتشت الفيديو ما لقيتو .. بردو اهلنا في جنوب كردفان بنفخوا على آلة قريبة من الساكس صناعة بلدية .. ممكن اخونا كبر او بالعدم بريمة ينورنا و يعملوا مقارنة .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة