اليوما داك جاتنا مرة سودانية في محل الهندي بتاع التياب, النوع البيونسك ساعتين عااادي, دي ما كانت مشكلتي, المشكلة إنها النوع البتكون لهجتو مصرية, بقوم أواجه مشكلة في ربط الصوت مع الخلقة القدامي, المهم, قعدت تونس فيني و تستجوب فيني فوق للبيعة, المرة: إنتي يا آمنة أريتي قامعة شخصي السمين: أي قريت جامعة الخرطوم كلية العلوم الرياضية المرة: إيه إيه إيه, قامِعة الخرطوم؟!!.. طب ليه شغالة هنا , ما أدمتيش في محله تانيه ليه؟ رديت ليها بي وش جادي: لا انا دخلت ورقي القصر و اليومين ديل عندهم وظيفة (جراح طيار عضو مجلس الشيوخ) حسع الملكة بتكون بتشوف في السي في بتاعتي و شهاداتي!! قامت نطتت عيونا و طوالي ردمتها ليك: يا بت جامعة الخرطوم شنو و وهم شنو, هم الإنجليز الامهم بت عم أبوهم و متخرجين من جامعة أوكسفورد و كيمبرج لاقين شغل؟!! عليك الله فكينا سكتت كدااا, قامت قالت لي : إنتي متقوزه؟ قلت ليها: أأأأي, الحمدلله رفعت لي حاجبها اليمين و ضيقت عينها الشمال: بتحبيه؟! ظريف يعني؟ رخيت ليها عويناتي و عملت ليها بي حاجبي اليمين كدا كدا : كيف ما ظريف ياخي دا (دا الاخدر الليموني,دا الكحل الملا عيوني,انا عشان خاطر حماضة إن شاء الله يرصصوني)* دلت حاجبها اليمين و رفعت الشمال: إنتي من فين في السودان؟ مطيت شلاليفي و في سري قلت المرة دي مالا ياخ دايرة تطلع لي (الرقم الوطني) ولا شنو: ابوي من الدويم و امي من سنجة. إستعدلت حواجبها و طرحتها: و قوزك من فين؟ زهجت زهج قلت المرة دي ما فاضل ليها إلا تجيب لي ال###### البوليصي قلت ليها: زوجي من نيالا. رجعت تاني لي رفيع الحواجبين:إيه قوزك من (ضار فور)؟ و لأيتيه فين دا؟! قلت ليها: أي من دااار فور غزت لي أوصبعا في خدها: أوعا يكون من عيال ال(فيِ سي بوك)؟!!
فيِ سي إيه؟!!! فيِ سي بوك؟!!! موبالغة لكين
حسع دا ما موضوعنا نهاااائي الموضوع اللساسي يا عيال الفيِ سي بوك إنكم يا عملات جبريل بلال (عظبتوني عظاب)* معقولة يا عيال الفيسبوك ما تلقو غير قصيدتي الوحيدة القاشره بيها من دون القصايد و تسرقوها؟! أي هي النصيحة لي الله قصيدة ظريفة و تستحق السرقة لكين كمان ما بالطريقة دي ياخ!! و على فكرة إنتو ما اول زول يسرقها, أتذكر زماااان قبل ما نبقى ناس قدام و محترفين في النت دا,طبعاً بديت الإحتراف دا يا عملات طلال فاروق بي كرة الشراب* في منتدى (عكس الريح) قمت نزلت القصيدة اول مرة هناك,قامت جاتني (إسراء بابكر) الله يطراها بالخير بعد سنتين تقريباً سالتني:إنتي يا حجوج(الجيم عطشانة) قصيدة(أديك سر) دي حقتك ولا قاشرة لينا بيها ساكت؟!لاني شفت واحدة منزلاها في منتدى سوداني و ما خاته إسمك!!! والله يا اخوانا ريقي نشف و كرعيني رجفن الليل دا انا كلو شلتو سهر, قمت كلمت (وجدان عوض) صحبتي و دفعتي في الجامعة و بعتبرها الخبير الاجنبي في كل ما يخص البحث في النت, قالت لي هيييي انا قايلاك عارفة, اساساَ الزول السرقا انا دخلت و رديت ليو!! طلع إنو غير البت القالت إسراء في راجل برضو شايل القصيدة!! انا بالجد إتكيفت, معناتو القصيدة بتستاهل!! المهم بقيت كل فترة و التانية أخش النت أقوقل القصايد حقتي و أشوف سرقوهن وين,أكتر قصيدة كانت بتتعرض للسرقة و التحرش كانت(أديك سر خليك بعيد), بخش المنتدى و أسجل و أرسل للعضو رسالة خاصة مهذبة, بنتظرو تلاته يوم و بعد داك برسل للمشرفين, لحد الان انا عملت الحركة دي في أربعة منتديات و النصيحة لي الله ردود المشرفين و أعضاء المنتدى لمن يرحبو بي بتكون غاية في الادب و الترحيب. يلا ربكم رب الخير قبل كمممم يوم كدا جاني إحساس إني أخش أشوف, يا عملات أمي* (النية زاملة سيدها) بديت أقوقل في القصايد,القى ليكم قريب للطورشومية رابط للقصيدة في الفيس بوك!! في واحدين محترمين و كاتبين إسمي و في واحدين قدر ما الله أداهم كمان ماضين أساميهم تحت!! ياخي كلو بتلقو في الروابط التحت دي, بس في رابط لصفحة إسمها(أرفع راسك إنت دنقلاوي) و واحدة تانية إسمها شندي بالانجليزي ديل ما قدرت اجيبم, و حكمة الله ديل اهم واحدات ولانو البنات حريفات السرقن القصيدة واحدة بدل (بيتنا الكبير الفي الدويم) كاتبه دنقلا و التانية كاتبه شندي!!! انا البيحيرني الواحد يجيك من هناك تراااااخ بي كل براءة يخت ليك القصيدة كوبي بيزد, و بي كل جراءة يخت ليك إسمو تحت!! والله يا عيال الفيس بوك كرهتونا(لعب البلي في الرملة)* اها موضوع السرقة دا زي ما قلت ليكم يا عيال الفيسبوك ما قاعد يزعلني.. انا البيزعلني يا عملات حافظ حسين (الإستعفان)*, مالي ما بتكتبو إسمي تحت القصيدة؟ ريحتي عفنة؟ يعني الواحد إتفالح لمن نقل القصيدة كلهااا بقت على إسم الزول القعد نحت يا عملات (شليل)* صنقورو دا,إنتو يا عيال الفيسبوك قايلين الشعر دا ساااهي كدا؟ تنوم و تصحى تلقى القصيدة تحت المخدة؟ اللذيذة البنات السرقن القصيدة الجماعة يجو يقولو ليها:أيتها الرايعة العجيبة تجي تقول ليهم: ههههههه شكرن يا معجبين انا اصلن رهيبة و كتابة بس إنتو ما مكتشفني!!! ليه يااااخ معناتو تاني عااادي ممكن الواحد يكون قاعد في النت تقوم جنبتو توجعو, يكشف كدا يلقى كلوتو ماف, يقوقلها يلقاها قااااعده في الفيس بوك بي إسم زول تاني!!! بالجد يا عملات سارة الضارة (اللهم لا تمحنا لا تبلينا)* بي مناسبة سارة الضارة حقو الواحد يكلما تتوسط لينا عند عمو أمين محمد سليمان بي إعتبار إنو الخبير الأجنبي بتاعنا في كشف السرقات الإسفيرية و الخبير في البل, ياخي بلا يخمكم بحق جاه النبي و بالمناسبة يا عيال الفيس بوك, دي النسخة الأسرية من الموضوع, تاني لو بالغلط الحركة دي إتكررت ما بيحصل خير. طبعاً في ناس حتتسال إنو ليه ما دخلت انا براي بليتم في الفيس؟.. بلا يخمهم بالجملة ياخي النكلمكم انا حسابي في الفيس قفلتو قبل اكتر من اربعة سنين, ويااخوانا الوصية في الظمة تخشو و ما تقصرو ومن هذا المنبر لا يفوتني انا أشكر الاخ الصديق الشاعر محمد أبو القاسم لانو الوحيد الدخل و حفظ لي حقي الادبي في أحد الروابط.
يلا نجيكم للنجوم يا عيال الفيسبوك عشان تعرفو أدب الإقتباس
* دا الاخدر الليموني,دا الكحل الملا عيوني,انا عشان خاطر حماضة إن شاء الله يرصصوني)* *النص أعلاه أغنية لنجمة الغناء الهاتف الاستاذة نجاة غرزة.*دا إسمو النقل بي تصرف لانها في الغنية بتقول محمد.
*(عظبتوني عظاب)* عن (جبريل بلال) حين قال في أحد الإذاعات لمن سالوهو عن الجماعة البيصرحو كل زول تصريحو قاطعو من شبطو: فرد قائلاً: ياخي ديل عظبونا عظاااااب!!!
* بديت الإحتراف في النت بي كرة الشراب* عن الاستاذين أيمن أحمد إبراهيم و طلال فاروق عضوا منتديات (سودانيز اوف لاين).
أمي* : الوالدة , كان ممكن أقول ليكم بخيتة لكين شايفاها اليومين ديل بقت ناكراني من يوم نزلت بوست(رسائل إلى أمي أرجو أن لا تقراها) اها يا خالتي بخيتة قولي نكرتيني هنا, يوم القيامة ناوية تسجلي غياب ولا شنو؟!
(لعب البلي في الرملة)* : قصيدة حقتي انا دي يا عيال الفيس بوك , برضو سمحة, أمشو أسرقوها برضو بلاهي.
*(الإستعفان)*: عن حافظ حسين عضو منتديات سودانيات, هي القصة طويلة لكين بي إختصار كدا البت السمحة جاتم في الشغل و قالت ليو لو سمحتا دايرة استاذ حافظ حسين(الكلام دا كلو بالجيم العطشانة) قال ليها: اناااا حافظ حسين , قامت إستعفنتو و ما صدقت.
*( صنقورو): عن شليل عضو منتديات سودانيات.
* (اللهم لا تمحنا لا تبلينا)*: عن سارة عضو منتديات سودانيات .
قالت : مشتهيه لي مرقة عصر.. لفحة سفنجة وتوب صلاة.. وجرة كحل.. قلنا : يابت تعالي..ماشه وين ؟ يابت تعالي..طايره وين؟ قالت : جـايه ..جـــــــــــــايه.. حبيبي جايه.. و أطير ..جــــــــــــــري.. الدمعة تسبق خطوتي.. قلنا : غبيانة دي..جنك بكاء.. أهديك وردة.. مرة حمراء ..ومرة بيضاء..ومرة لا.. قالت : وأديك سر؟ ...خليك بعيد مشتهيه لي كم قصة احكيهن وكت القى البنات إتلملمن أحكي وأزيد أحكي وأعيد... ..لما الحكي يوصل مدا أحكي ويغيرن..وانتشي شي من حقيقة.. ومن خيال كمين و شي أديك سر؟ ...خليك بعيد مشتهيه لي صحية الدغش .. والناس نيام تطل علي نسمة خريف صارا لي منك سلام.. صاراو شــــــــــــــديد.. في حزتا ..تطرب تزغرد.. حلة حلة .. وحارة حارة وشفع الجيران يمرقو لابسين جديد.. يمرقو ما يفضل نفر خالتي سيدة تلقي مريم يتقالدن ..بعد قطيعه..وحوريب عنيد و أديك سر؟ ..خليك بعيد مشتهيه لي لمة حريم ..وبنات كتاااااااااااار في ضل ضحى راكوبة في بيتنا الكبير الفي الدويم جبنه و بخور..فنجان يدور أول بكر ..تاني التني .. يابت كفاك يرمو الودع.. شااااااب طوووووويل.. يابت وليد الصرة جاك .. أديك سر؟ .. خليك بعيد قلنا : وانا مشتهي حوليه في فسحتنا ديك حلقة ذكر ..الله.. الله حي يــــــــا الله حي رايات ورق ..صاجات و طار.. والنوبه ايييييييييييييك الله ..الله .. مجانين يا شيخ العرب..مجانين الله ..الله.. يا شيخنا هووووى.. مجانين.. يا سيدنا البدوي .. مجانين أجساد تميل.. أرواح تميل الله .. الله.. وقلوب تميل.. الله .. والناس تغـــــــــــــيب.. الله يالله صلي على الحبيب الله ..الله.. القلوب تغرق تذوب.. ترهف تهش.. والوجوه تصفى و تبش الله ..الله في حزتا.. بتخيلك .. في كل نبضة قلب دق و ارتعش في كل وش.. في كل شي.. و أديكي سر؟ .. ماااف اي شي قالت : ما تستجيب لى دمعة خاينة .. إتمردت ما تراعي لي زفرات وجع .. إتجددت بس تأكد روحي ترتاح تحتويك و تهدهدك .. وعيون تساهر تحرسك.. تتوسد الشقاء والسهاد .. بس تسعدك .. أديك سر؟ ...انا بعشــــــــــــــقك ..
"أبـــوعــبيــر"
01-22-2013, 00:23 AM
صديق الموج
صديق الموج
تاريخ التسجيل: 03-17-2004
مجموع المشاركات: 19433
عشان ضنينه ان شاء الله يسرقوك فى رقبتك دى .. ماعافى منكم يا وليدات الفيس بوك اى شى تلقوهو باسم حجة امنه دى اسرقوه اكتبوهو فى اى مكان فى الدنيا باسمكم هسه زاتى انا عندى قصيدة بتقول الى دحش حمار الوادى قبلة اتحدى يجى زول يقول لى سرقتها عشان يشوف شوف،،،
01-22-2013, 05:17 AM
محمد سنى دفع الله
محمد سنى دفع الله
تاريخ التسجيل: 12-10-2005
مجموع المشاركات: 10986
حاجة امنة اتصبري يازولة ياجميلة اكتبي لي قصيدة انشرها بي اسمي عديل ولا نسرق ولا نتاوق كا قالت الاغنية انا ما سرقت انا جيت اعاين وانا الاغنية ما عايزة لي نفسي عايز اديهاـ داليا بستلة ـ اصلها مجناني جن فاكراني شاعر بتاع اغاني ولقيتك مثقفة ومنفتحة على الاخرين من امثال غرزة وعذاب فبري اخوك الثمين زيك بي اغنية تكون حديث المجتمعات المخملية وادخل دنيا الفنانات ـ حنان لغم ـ وزهرة بلا اشواك ـ واماني بنيه ـ اخوك السمين زيك مع خالص التحيات والاشواق
01-22-2013, 07:14 AM
بدرالدين الطائف
بدرالدين الطائف
تاريخ التسجيل: 01-09-2013
مجموع المشاركات: 1747
حجه امنه اديك سر . سرقة المنتديات مقدور عليها وانتى جربتى الطريقة. اما عيال الفيس بوك ما بتقدرى عليهم لانه الشقلة جااايطه وواسعه شوية. اعملى ليك صفحة باسمك فى الفى سي بوك ونزلى فيها اشعارك كلها ووزعيها لاكبر قدر من الاصدقاء. ..................... ثم ياخ مشتاقين ومنتظرين رسائل الى امى .
Quote: حجه امنه اديك سر . سرقة المنتديات مقدور عليها وانتى جربتى الطريقة. اما عيال الفيس بوك ما بتقدرى عليهم لانه الشقلة جااايطه وواسعه شوية. اعملى ليك صفحة باسمك فى الفى سي بوك ونزلى فيها اشعارك كلها ووزعيها لاكبر قدر من الاصدقاء. ..................... ثم ياخ مشتاقين ومنتظرين رسائل الى امى .
يا بدر ياأخي بي مناسبة الرسائل
كيف أنتم في المدة التي لم تروني فيها؟!
إتا قايل المشكلة شنو؟! انا النت بخشو ختف و بالمزاج
و دا السبب اللساسي حق الإستعفان الحاصل دا
لو كنت قاعده زي باقي الشباب المعاي الظهرو من خلال النت، ما كان دا كلو حصل.
لكين عيال الفيِ سي بوك الله أكبر عليهم؛ تاني إلا كان ينقلو على التويتر.
و بي مناسبة الرسايل برضو؛ حقو أنزلهن هنا؛ طبعاً أختك كانت مقرضة علي إنو أمي بتقرا سودانيز اون لاين و الراكوبة بس
قمت نزلت بوست (رسائل إلى أمي أرجو أن لا تقراها) في كل المنتديات عدا السابق ذكرهن، أها طبعاً أولاد الحلال بقو ما مديين أولاد الحرام فرصة في السواطات و القولات، واحد/ة من عيال الحلال كلم أمي و قرت البوست، قامت نكرتني نكرتها الشهيرة، ف عليه قررت أنزل البوست هنا، الدور دا مقرضة علي إنو الحكومة حظرت الموقع في السودان.
01-22-2013, 07:26 AM
Musab Osman Alhassan
Musab Osman Alhassan
تاريخ التسجيل: 01-16-2013
مجموع المشاركات: 557
Quote: حاجة امنة اتصبري يازولة ياجميلة اكتبي لي قصيدة انشرها بي اسمي عديل ولا نسرق ولا نتاوق كا قالت الاغنية انا ما سرقت انا جيت اعاين وانا الاغنية ما عايزة لي نفسي عايز اديهاـ داليا بستلة ـ اصلها مجناني جن فاكراني شاعر بتاع اغاني ولقيتك مثقفة ومنفتحة على الاخرين من امثال غرزة وعذاب فبري اخوك الثمين زيك بي اغنية تكون حديث المجتمعات المخملية وادخل دنيا الفنانات ـ حنان لغم ـ وزهرة بلا اشواك ـ واماني بنيه ـ اخوك السمين زيك مع خالص التحيات والاشواق
يا زول يا جميل إتا دا
يا أستاذ السني كان قلت ليك ما بتصدقني
انا الغنى الهاتف دا بحبو بي جِدي
وبزعل لمن يسمو الهابط
يااخي الشغل دا قاعد يرفع معنوياتي بشكل ما تتخيلو
و بعدين الأغاني الجادة انا فارقتها رسمي و شعبي لانها بقت تهبل بي في بلد الفِرنجة ديل
تلقاني طوالي دموعي جرن و نخريني سالن و بشتنة عدوك
و بعدين تعال هنا، حسع دا دخلو شنو بي موضوعنا اللساسي؟!
عليك الله ركز معانا ، و كان عصرت عليك في التركيزة دي ممكن تِفترع لينا خيت منفصل عن (الغناء الهاتف) وانا بجيك هناك أفتح موضوع قصيدتي السرقوها عيال الفيِ سي بوك
Quote: عشان ضنينه ان شاء الله يسرقوك فى رقبتك دى .. ماعافى منكم يا وليدات الفيس بوك اى شى تلقوهو باسم حجة امنه دى اسرقوه اكتبوهو فى اى مكان فى الدنيا باسمكم هسه زاتى انا عندى قصيدة بتقول الى دحش حمار الوادى قبلة اتحدى يجى زول يقول لى سرقتها عشان يشوف شوف،،،
تصدق يا الموج كلامك دا منطقي؟!
القصايد البعد (أديك سر) كلهن كانن ما بيتسرقن، إتخيل لي من الأسامي حقتن
يا مان البنات و الرجال السرقو القصيدة ديل هدفم كان إنهم يظهرو رومانسيين و طوال القامة و يتحدثون سبع لغات :D
يعني مثلاً قصيدة ( إلى حمار الوحش..قبلة) أو (جراداي في السروال)
منو الممكن يسرقهن و يخدمن ليو أجندته/ها أعلاه؟!! :D
لكين يا صديق، الفيك إنعرفت
01-24-2013, 01:36 PM
محمد كابيلا
محمد كابيلا
تاريخ التسجيل: 11-15-2008
مجموع المشاركات: 3510
Quote: *(الإستعفان)*: عن حافظ حسين عضو منتديات سودانيات, هي القصة طويلة لكين بي إختصار كدا البت السمحة جاتم في الشغل و قالت ليو لو سمحتا دايرة استاذ حافظ حسين(الكلام دا كلو بالجيم العطشانة) قال ليها: اناااا حافظ حسين , قامت إستعفنتو و ما صدقت.
الغريبة الكلام الفوق ده كلو ما لقيت فيهو (جيم عطشانة) غير المكتوبة باللخدر
01-22-2013, 11:27 AM
وليد محمد المبارك
وليد محمد المبارك
تاريخ التسجيل: 12-04-2004
مجموع المشاركات: 26313
Quote: Quote: *(الإستعفان)*: عن حافظ حسين عضو منتديات سودانيات, هي القصة طويلة لكين بي إختصار كدا البت السمحة جاتم في الشغل و قالت ليو لو سمحتا دايرة استاذ حافظ حسين(الكلام دا كلو بالجيم العطشانة) قال ليها: اناااا حافظ حسين , قامت إستعفنتو و ما صدقت.
الغريبة الكلام الفوق ده كلو ما لقيت فيهو (جيم عطشانة) غير المكتوبة باللخدر
ياابو العزايم مالك ماسمعت بي قصة البت القررت تتكلم بالجيم العطشانة و بقت تدخل الجيم دي في أي جملة مفيدة ، قامت مشت لي سيد الدكان قالت ليو: يا عموووو أديني جبنة و جحنية .
يعني يا أبو الريش جات لحد جيمي العطشانة العِفينة دي و و الجيمات كملن؟!
الزمن دا حقك تلاوي وتقلعو ـــــــــــــــــــــــــــــــــــــ أديكِ سر : خليك قريبة
الله يجبر خاطرك يا تايسون يأخي
لا انا تاني ما بخليني قريب سااهي كدا، والله عيال الفيسبوك إلا يطيرو.
بي مناسبة حقك تقاوي و تقلعو دي، كان عندنا ودعمتنا إسمو حمادة ، الوكت داك كان عمرو أقل من خمسة كان بيقول: حداً تحرسو ولاااا بيديك(قصدو حقاً و يجيك،ماشافع كمان يااخونا) حداً تحرسو ولاااا بيديد حدك تقاويو و تدلعو، أدعل سفنجاتك شراع و المابتحصلو جدعو!!!!
والله زمان جيتى تدوبى وقايلك فعلا حاجه وتأدبت ليك لكن ما شفتك وعرفتك قلت غشتنى الغش والسرقه حرام واحده بواحد والبادىء أظلم ياخ قولى يا جامع يا رغيب ولمن تجمعيهن حوطيهن وقولى حوالينا ولا علينا ولك السلام
Quote: والله زمان جيتى تدوبى وقايلك فعلا حاجه وتأدبت ليك لكن ما شفتك وعرفتك قلت غشتنى الغش والسرقه حرام واحده بواحد والبادىء أظلم ياخ قولى يا جامع يا رغيب ولمن تجمعيهن حوطيهن وقولى حوالينا ولا علينا ولك السلام
منصور
موبالغة لكين قلتا لي زمان لمن كنت قايلني حجة إحترمتني؟! حسع ممكن عادي ما تحترمني بي أثر رجعي، الله يطمنك ياخ حسع معناتو في أمل إنو عيال النت ديل يحترموني بأثر رجعي.
كنت عارفة عنك انك شاعرة وسمحة لكن أول مرة أعرف انو دمك شربات وانا بموت في الناس الدمهم عسل زيك اما بالنسبة للسمن فدا ما مشكلة الكلام علي الأخلاق ( انا اسمن منك بس ما تكلمي زول)
وكمان من فوائد البوست دا عرفت انك مقيمة بالمملكة المتحدة وكدا ممكن تبقى الصداقة قرابة ونكسب الودين كما قالت الشاعرة المخضرمة حواء بنزين.
النبي كن جاتكم تياب سمحة في دكان الهندي الما عزالدين اديني خبر
Quote: Quote: يعني يا أبو الريش جات لحد جيمي العطشانة العِفينة دي و و الجيمات كملن؟!
أها .... براااك بتجيبي (الإستعفان) ...... أنا ختّيت الخمسة في اللتنين.
تصدق كلامك صاح!!! بعدين مرحلة الإعتراف بوجود مشكلة دي أهم خطوة في العلاج حسع أنا بكون دايره لي خمسة سنين تاني حتان أتعالج من أثار الإستعفان ال إتعرضت ليو من عيال الفيسبوك ديل.
كنت عارفة عنك انك شاعرة وسمحة لكن أول مرة أعرف انو دمك شربات وانا بموت في الناس الدمهم عسل زيك اما بالنسبة للسمن فدا ما مشكلة الكلام علي الأخلاق ( انا اسمن منك بس ما تكلمي زول)
وكمان من فوائد البوست دا عرفت انك مقيمة بالمملكة المتحدة وكدا ممكن تبقى الصداقة قرابة ونكسب الودين كما قالت الشاعرة المخضرمة حواء بنزين.
النبي كن جاتكم تياب سمحة في دكان الهندي الما عزالدين اديني خبر
الفيس بوك والاقتباسات الغير منسوبة الي اهلها كثيرة به
فهناك من يتفنن في الخصوصية ولا يمكن رؤية مايكتبه الا ان تكون احد اصدقاءه
والجاتك في .. اديك سر .. سامحتك
مع ودي واحترامي
عارف يا محمد انا أضاني دي ما بردت ولا أعصابي هدت إلا بعد قفلت الفيسبوك!! يأخي مبالغة و الله. خليني من قصيدتي السرقوها، في ناس كدا يحيروك في الحاجات بيختوها في الفيسبوك، صور خاصة جداً و تفاصيل عن حياتهم الشخصية قاعده تحيرني و الله.
يا صديق الموج خدتا بالك لي (الشاعرة الأنيقة) اللصقا لي أبو حميد دا فوق؟! إتعلمو ياخ، إتو الله لا جاب عقابكم.
Quote: غايتو نجضتيهم نجاض :)))))))))))))))))))))) عافيه منك لكن فى لويحظه ان المصريين بينقطوا الجيم أ مش ق عطشيها :))))
رنوش يا جميل، يا بت وينك إنتي؟!!
طبعاً مع إني معتمداك الخبير الأجنبي بتاعنا بتاع اللهجة المصرية، لكن
خطين تحت لكن دي
يا بت نحنا من ما قمنا المصريين بيقلبو (القاف) إلى (الف) مثال: يا ولد جيب قلم الرصاص دا. فيرد عليك أخاك المصري: ألتي إيه، أقيب ألم الرصاص؟!
و بيقلبو (الجيم) (قاف) مثال: جدك مشي وين يا ولد؟! فيرد عليك أخاك المصري: إيه قِدي راح يقيب القريده مِن الدورق.
يابت الكلام دا قوليو لي زول ما كان متابع من (ليالي الحلمية) لحدي (هوانم قاردن سيتي)
يحليلك يا رانيا ياخ،ذكرتيني رنا صحبتي، رنا الجيلاني الواثق، عندهم أهل في مصر مرة مشو ليهم إجازة بتجوط ليك الكلام جوطة حبيبك، موش في نكته بتاعة البت القالت : الأديسة في البلاونه؟!(الكديسة في البلكونة) كان ما أخاف الكضب، دي رنا زااااتا العملت القصة التّافهة دي!!
ازيك يا سكره انا قاااااااااااااعده والله وبكثره اى يا عسل القاف بتبقى أ لكن ما الجيم انتى قابله برضو الجيم والجيم حقتهم بتتعطش كانها كاف لانى متذكره زمان لمن جيت من الخليج وكنا بننطق الجيم جيم زى فى الحساب أ ب ج د اها جيت مصر وكل ما اقولها كده يضحكوا فينى ويقولوا لى كيييييييييييم مش ججججججججججيم فى مره اتفرست وقولت اكسكين اها المدرسه قالت لى شوفتىىىىىىىىىىىىى الا دى تقولها اكيسجين :)))))))))))))))))))))))))))))))))))))))))))))
الأخت الحاجة آمنة تحياتى وكثير سلامى رغم أنه السرقة حارة و خاصة شئ تحسه أنه عزيز عليك لكن نقول ( رب سرقة نافعة )
لولا هذه السرقة لما قرأنا هذا الحكى الطاعم الطالع من الجوف حكى يذكرنا بى كبارنا و ناسنا الحنان و ما كنا عرفنا الحاجة آمنة أن شاء الله ما يسرقوا قصائدك تانى لكن أراك مقلة فى كتاباتك عليك الله تعالى أحكى ساكت وفضفضى ..
و ياااااااااااا حرامية الفى سى بوك رفقاً بخالتكم الحاجة .
Quote: الأخت الحاجة آمنة تحياتى وكثير سلامى رغم أنه السرقة حارة و خاصة شئ تحسه أنه عزيز عليك لكن نقول ( رب سرقة نافعة )
لولا هذه السرقة لما قرأنا هذا الحكى الطاعم الطالع من الجوف حكى يذكرنا بى كبارنا و ناسنا الحنان و ما كنا عرفنا الحاجة آمنة أن شاء الله ما يسرقوا قصائدك تانى لكن أراك مقلة فى كتاباتك عليك الله تعالى أحكى ساكت وفضفضى ..
و ياااااااااااا حرامية الفى سى بوك رفقاً بخالتكم الحاجة .
والله السرقة حارة شطة خدرا بس، المشكلة ما السرقة براها؛ البيحيرني الناس المكحلين بالشطة ديل سرقة بي عين قوية، شي عجيب يا ود أمي.
والله شاكره تضامنكم الجميل دا يأخ. الف شكر.
01-24-2013, 05:52 PM
أمير عثمان
أمير عثمان
تاريخ التسجيل: 08-11-2009
مجموع المشاركات: 805
Quote: يازول انا إعتزلت لعب البلي وكتابة الشعر زاتو!!
سلامات يا حجة ... غايتو لو اعتزلتى الشعر يا بخت اس المسرح بيكى!!! ياخى حكايتك مع المصروسودانية مبالغة ... يعنى المنتج ولا محتاج كاتب سيناريو ... مخرج وبس ... امتعتينا ... متعك الله دنيا وآخرة ...
01-25-2013, 00:20 AM
أحمد قلوب
أحمد قلوب
تاريخ التسجيل: 01-10-2013
مجموع المشاركات: 514
سلام يا حاقة امنة اخبارك .... بالجد ليك حق عيال الفيسى بوك ديل ماليهم حل ... وبتاعين المنتديات كمان فيهم قوة عين عجيبة ....دخلت فى واحد من الروابط الفوق لقيت واحد قاشر بى قصيدتك آخر قشرة والجكس متلمى كده والواد عامل فيها خلاص البحترى وبيرد كانة القصيدةقعد ليهل جنب البحر وكتبها من جوه حنانوا زاتو ......لا لا كلام عجيب ....دحين انا عندى ليك فكرة بس تحفظى لى حقوق الملكية الفكرية آآ ...الفكرة انك بدل دكان الهندى بتاع التياب ده تفتحى ليك دكان بتاع قصائد وشباب الفيسى بوك ديل بدل ما يلطشوا كده يجو يشتروا عديل وتفتحى ليهم دكان فى الفيسى بوك ده جنبهم مع خدمة الدلفرى عشان هم ما بتعبوا فى اى حاجة ولازم تعملى ليهم كمان قدر ظروفك وتبيعى بالقطاعى والجملة . وممكن كمان تفتحى دكان تاجير قصايد ...
01-25-2013, 01:11 AM
محمد عوض السيد
محمد عوض السيد
تاريخ التسجيل: 06-17-2011
مجموع المشاركات: 966
Quote: سلام يا حاقة امنة اخبارك .... بالجد ليك حق عيال الفيسى بوك ديل ماليهم حل ... وبتاعين المنتديات كمان فيهم قوة عين عجيبة ....دخلت فى واحد من الروابط الفوق لقيت واحد قاشر بى قصيدتك آخر قشرة والجكس متلمى كده والواد عامل فيها خلاص البحترى وبيرد كانة القصيدةقعد ليهل جنب البحر وكتبها من جوه حنانوا زاتو ......لا لا كلام عجيب ....دحين انا عندى ليك فكرة بس تحفظى لى حقوق الملكية الفكرية آآ ...الفكرة انك بدل دكان الهندى بتاع التياب ده تفتحى ليك دكان بتاع قصائد وشباب الفيسى بوك ديل بدل ما يلطشوا كده يجو يشتروا عديل وتفتحى ليهم دكان فى الفيسى بوك ده جنبهم مع خدمة الدلفرى عشان هم ما بتعبوا فى اى حاجة ولازم تعملى ليهم كمان قدر ظروفك وتبيعى بالقطاعى والجملة . وممكن كمان تفتحى دكان تاجير قصايد ...
صباحي إلخير ياأحمد ألوب ياخويا
فكرتك دي إتا قايل ما جاتني؟! الجماعة ديل من شِدة ما عقدوني مشيت كمان فتشت قصايد الفِرد، لقيت ليك العجب، في المنتدى الجبت ليكم رابطو في واحد إسمو (طارق) دا سرق قصيدتين من حقاتي و ما خلى قصيدة لي (عبدالله وداعة) ما سرقا !!!
المهم دخلنا إتشاكلنا معاهم قبل كم سنة كدا، قابلنا ليك بي برود لزج كدا،
بعد تمينا شكلتنا و لقطنا سفنجاتنا و مرقنا (وجدان) صحبتي ضربت لي و تضححححححك، قالت لي الحقي إنتي و عبدالله أدوكم لقب (شعراء من بلادي) !!! قلت ليها بلاهي خشي أكتبي ليهم بوست بي إسمي لانو انا لو جيتم بالدرب بسمعهم وسّخ إضنينهم، قولي ليهم آمنة قالت ليكم نحنا شعراء من بلادي غصباً عنكم يا حرامية يااولاد ال....
Quote: Quote: يازول انا إعتزلت لعب البلي وكتابة الشعر زاتو!!
سلامات يا حجة ... غايتو لو اعتزلتى الشعر يا بخت اس المسرح بيكى!!! ياخى حكايتك مع المصروسودانية مبالغة ... يعنى المنتج ولا محتاج كاتب سيناريو ... مخرج وبس ... امتعتينا ... متعك الله دنيا وآخرة ...
إتا قايل شنو، دا عشان بتفهم و تقدر والله أعمل حسابك، ما يوم تدقس قدام الفيسبوك يقومو يسحبو منك الفهم الراقي دا.
الف شكر يا أمير يأخي، ربنا يجبر خاطرك بحق جاه النبي.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة