من مواليد مدينة كريمة حى نصرالدين (الحى القريب من دار الرياضة والعباسية). تلقى تعليمه الابتدائى والمتوسط والثانوى فى مدينة كريمة. تخرج من جامعة السودان للعلوم والتكتولوجيا ، هندسة الكترونات. عمل لفترة بسيطة داخل السودان ثم هاجر الى المانيا للدراسة والعمل هناك وظل بها حتى انتقل منها الى النرويج واستقر بها بعد ان التحق بالعمل ولايزال موجود هناك. منذ ان كان طالبا بمدرسة كريمة الثانوية تغنى للعديد من الفنانين ولكنه كان يبدع حينما يؤدى اغنيات الفنان وردى والفنان زيدان والفنان محمد ميرغنى. يجيد العزف على العود والطنبور . تغنى كثيرا باغنيات الفنان صديق احمد . لحن الكثير من الاغنيات الحديثة واغنيات الطنبور . تغنى بالحانه لكثير من الاغنيات الحديثة شقيقه الفنان عبدالمنعم منصور (وردى الصغير) والذى اعتزل الغناء حالياً. تغنى بالحانه بالطنبور العديد من الفنانيين منهم الفنان صديق احمد ومعاوية المقل وعثمان عبدالعظيم ومحمد النصرى ويعقوب تاج السر . ولقد كان الفنان عبدالعظيم منصور ثنائياً رائعا مع الشاعر عاطف خيرى وهو رفيق دربه وكان ثالثهم الفنان محمد الطيب والمستقر حاليا فى مدينة كريمة. - لحن وغنى عبدالعظيم منصور للكثير من الشعراء المبدعين نذكر منهم : ازهرى شرشاب ، عبدالقادر محمد عبدالقادر ، صديق محمد طه ، عاطف عوض خيرى ، بربر الحسن بربر ، محمد الحسن سالم حميد ، اسماعيل حسن ، الواثق السر ، احمد سليمان طه، دكتور توفيق الطيب .
في كلام النّاس بفتِّشْ .. بين عوينات المدارِسْ في صدى آذان المساجد .. ورنّة أجراس الكنائِسْ في إندهاشات العذارى .. في إرتعاشات الموامِسْ في بحر فرحان يبشِّرْ .. موجو لي جية النوارِسْ الرّوَاويس طَمْبروك .. وهزّ بيك في الدّارة فارِسْ بين سُكَات القرية أفتِّشْ .. بين هضاريب المدائنْ
في منحني النيل حيث تمتد ظلال الحضارات القديمة...تمتد اوتار الاغنيات معزوفة ريانة بصادق المناداة بالحب واشواقه وعذاباته....كأن الحنين من تلك الاغاني والدوذنات هو السهول الخضراء والريح تحمل التباريح كما يحمل النخيل الثمار..
من كل ذلك تجئ ميلودية التمر ... (المن زمان طامرنو في جوف الخوابي)....يا سلام....يا سلام...
غريبة عجيبة يا دنيا وعجيبة غريبة يا أقدار أنا المتعود الأسفار *** أسافر في عيون واحدين بلا أعرف اساميهم يتم الحول ونتآلف وأكون معتاد ألاقيهم أشوف الحب وكل الحب مجسد في أحاسيسهم ورغم الكان أفوت مجبور وأبحر في مراسيهم أتوه من تاني في الأخطار غريبة عجيبة يا دنيا وعجيبة غريبة يا أقدار *** حكايتي معاك حكاية خوف من المجهول حكاية زول يحب الناس يذوب بالحسرة للمعزول أحاسيس زول بيحيى وحيد وفي نفسوا الأمل مكتول خمسة سنين ينادي عليك يدق في بابك المقفول أنا المحــتا ر غريبة عجيبة يا دنيا وعجيبة غريبة يا أقدار *** لحظات عابرة نتقابل ونتفرق مع الأزمان تبقى الذكرى في القلبين ترن في عالم النسيان أهي الأيام بتتداول صيف وخريف فرح واحزان وبرضو الناس بتستحمل عجيب ما أغرب الإنسان زمان متقلب الأطوار غريبة عجيبة يا دنيا وعجيبة غريبة يا أقدار *** عجز الديك برغم الريش عن الطيران ومن دونن ترا الوطواط محلق في فضا الجدران وناس محتارة بين امرين وأحلاهم هو الحرمان وناس بتنادي من طابقين منازل شامخة في البنيان بيوت تسخر من الأشجار غريبة عجيبة يا دنيا وعجيبة غريبة يا أقدار *** وحاتكم يا أعز الناس وحات الفي القلوب مشتول حنانكم زاد عن الأوصاف وفات الواضح المعقول وحات عينيكم الحلوين مهما المدة بينا تطول حروفكم ناحتة في جواي دروب السوسة في القندول حنين يقدح ضلوعي شرار غريبة عجيبة يا دنيا وعجيبة غريبة يا أقدار *** وحاتك يا خفيف الروح وحات الفي الضمير مدسوس وحاتك لما أشوف عينيك بنسى الواقع المحسوس واشوف دنيايا مابتنشاف قصور مبنية في فردوس أعاين ليها بالإحساس وعن ذاتا النظر محبوس خيال السارح الأفكار غريبة عجيبة يا دنيا وعجيبة غريبة يا أقدار
Quote: يعتبر من اروع الملحنين الذين عرفتهم الساحة وهو يمتلك رهافة الحس وله اذن موسيقية يجيد من خلالها توزيع ما يقوم بتلحينه علي فناني الطنبور ..اذ يقوم هذا المبدع بجمع عدد من القصائد من الشعراء وتلحينها واعادة توزريعها حسب نوع ولحن القصيدة وما يتناسب وصوت فنان معين من قبيلة الطنبور ..
في منحني النيل حيث تمتد ظلال الحضارات القديمة...تمتد اوتار الاغنيات معزوفة ريانة بصادق المناداة بالحب واشواقه وعذاباته....كأن الحنين من تلك الاغاني والدوذنات هو السهول الخضراء والريح تحمل التباريح كما يحمل النخيل الثمار..
من كل ذلك تجئ ميلودية التمر ... (المن زمان طامرنو في جوف الخوابي)....يا سلام....يا سلام...
ياريت من زمان ياريتنى من بدرى سلمت الامور لى ال بالغيوب يدرى ما كان السنين الضاعو من عمرى قضيتهم خيال بين النجوم يسرى حبك فى دماى جوة العروق يجرى أصلو لا كلت خطاى لا منو ضاق صدرى يا مصدر شقايا ويا شغل فكرى مين قلل رضاك خلاكى ما بتطرى من رحم الزمن ريدك طلع بكرى وعاقر غيرو تب لا قبلى لابحرى دايما فى الخيال لون خدك المغرى زى لون الأصيل عند المغيب سحرى بتحمل براى نار فرقتى وجمرى وعافيلك شقايا ومحنتى وهجرى بهديك السلام ما غرد القمرى من قبل الرواح ومع الصباح بدرى بتلقاك لطيف شايل الندى الفجرى ويتمساكى طيف زى المنام يسرى
ياحليف الصون فلتدم في علاك أنت زول معصوم ولا إنت ملاك إنت بدري وكيف ***** الخدر ظلاك أنت كوكب نور ***** تشتهي الأفلاك فيكم كم آيات ***** يالحياك جلالك منظر الساحرات ***** ومنظر الأفلاك ياجميل النور ***** ماسه من عيناك بنظر الأنوار ***** طالعة من مغناك والشباب يترنم ***** بي معاني غناك والجمال الفيك ***** عن مديح أغناك
كل معاني اليوم ***** طالعه من معناك تبسم الأيام ***** لوبسمت سناك الزهور والنور ***** بانو في وجناك والزي جمال الحور ***** ديه فته هناك
مهما أقول أوصـاف ***** أشوفها ما واصفاك يانـقـي اللــون ***** أيه أقول في صفاك الحريــر يخشــن ***** للصفا الصافاك والتبــر يبـقــى ***** زي صفر لصفاك
تخشع الأبصار ***** من شعاع محياك وعُقَّل الأفكار ***** يسرحن في ضياك
النفـوس في هواك ***** يالهواك في حياك أنا عندي يوم الفوز ***** حبيبي يوم رؤياك الـرآك غير شك ***** بي حبيبه دعاك ليه لأنه يشوف ***** كل شئ يرعاك حتى نور الكون ***** حجبوه معاك يابـهـي الطلعة ***** أنا كيف قضيتي معاك
راح الميعاد وزمانى راح والجرح لانام لا استراح لكنى متكتم عليه من جراح أحب جراح ياقلبى ما تسهر معاى ما أظن يفيدنا الأنتظار عدينى فى روضة هناى سكت النغم سكت الكلام جفت ورود الأمنيات ياحليل زمان الإخضرار ياحليل حبيب كان لى نور كان لى ساعة الغربة دار ياريتنى لو اقدر أعيد لحظات من الماضى البعيد وأهدى الزمان كل الحنان وأكتب بعمرى ربيع جديد لكن رضيت وقلت مابقيدنى أحلم ما بقيد ياحليل ليالينا المضت من غير معانى تنورها يا غالى يا أمل الحياة ومعنى الصفات النيرة
ياااااااااه. زمن والله كان سمحا سماحة. سمعنا فيه عبدالعظيم وعاطف خيري وكنا نضحك. من غبانا علي رنة حليك. ونقلد صوت حنان النيل احسب انني كنت رفيقا لهذا المبدع الشامخ ولولا. مسحة الحياء لكان عبد العظيم في مصاف عباقرة. الغناء السوداني. فعبد العظيم كان يغني لنفسه ولاصدقائه ولم يحترف الغناء ولو فعل لكان خليفة لوردي في عرشه وفرعنته. عبدالعظيم كذلك شاعر حاذق ومجود لشعره حتي اسألوا عاطف خيري فقد كان رفيقه وصديقه واخيه في الشعر والإبداع
أيامنا الزمان ياحليلن شاربات من هداوة الريف وارثات الجمال من نيلن عامرات فى ليالى الصيف يا دنيا الرسول أحميهن يا حظ ليهن ابقا حليف زيل كل المخاطر شيلن افرش فل زهور وقطيف ايام من صباى يا حليلن قاصر مهما اقول توصيف يا تاريخ اعيد تسجيلن ارجوك مر مرور كالطيف يا طير الغصون غنيلن جدد لو معدى عفيف بالله يا نسايم شيلن يا سرب الحمام فى الليف عاد لمتين نعود نمشيلن نسيب بلد الخداع والزيف اقول لى ناس فلان احكيلن نتونس نتم الكيف اوريهن عذابى اشكيلن ساهرتا الليالى وكيف حنست العيون لا يسيلن انهمرن بحور غير قيف أيامنا الزمان ياحليلن شاربات من هداوة الريف وارثات الجمال من نيلن عامرات في ليالي الصيف
Quote: أيامنا الزمان ياحليلن شاربات من هداوة الريف وارثات الجمال من نيلن عامرات فى ليالى الصيف يا دنيا الرسول أحميهن يا حظ ليهن ابقا حليف زيل كل المخاطر شيلن افرش فل زهور وقطيف ايام من صباى يا حليلن قاصر مهما اقول توصيف يا تاريخ اعيد تسجيلن ارجوك مر مرور كالطيف يا طير الغصون غنيلن جدد لو معدى عفيف بالله يا نسايم شيلن يا سرب الحمام فى الليف عاد لمتين نعود نمشيلن نسيب بلد الخداع والزيف اقول لى ناس فلان احكيلن نتونس نتم الكيف اوريهن عذابى اشكيلن ساهرتا الليالى وكيف حنست العيون لا يسيلن انهمرن بحور غير قيف أيامنا الزمان ياحليلن شاربات من هداوة الريف وارثات الجمال من نيلن عامرات في ليالي الصيف
دي درّة من الدرر ومع جمالها التزم الشاعر بقافيتين وهنا تكمن الشاعرية لصاحبها شكري ولعصام تقديري
شكرا الاستاذ عصام مدني علي الإمتاع والله غناوي واشعار ضيوفك مع لحن الجميل المبدع المهندس عبد العظيم منصور متل اطفالنا حلوين شم وسمحين نغم ما نقدر نختار منو .....! وصراحة استفدت من بوستك كثيرا لان به اشعار اول مرة اسمعها واعرف اصحابها شكرا ليك كتير بوست ممتع وقيِّم
الجرح الشايلو دا مو الليلي مين بدّل جرحو يا عشَّاق أنا جرحي بقدرِ مواويلي خايل في الزمن الفرَّاق *** *** أغرق من بحرِ سواد ليلي وأقدم من صادي الأشواق أتقل من ريحاً حات شيلي وقافل واطاتي بأطواق *** *** *** أصلاً جيت عابر للدنيا والجرح الطيِّب صادفني وزيْ إنِّي بعرفو ومن بدري وزي الشايفني وعارفني ** *** طوّالي إتعلق في صبري صارحني بعمقِ وكاشفني إتربَّى في صدري مع الغنية والفتَ عليهو ووالفني *** *** *** كان جرحي حبيبي قُدر حالي وفي مرّة مشينا على لمَّة عند بابه إنكرم إستنّالي بس فيكن عاشق يا أُمة لمّاهو عليهو وخلاّلي جرحاً بس ضمُّة أبى ينضمَّه *** *** فرّح شُمَّاتي وعزّالي أكبر من صبري ومن ثمَّ لا داير يدخل موَّالي لا قادر يمرق من نمَّة *** *** ما قادر أحلِلُو يحلالي أنا جرحي قديم ودا بي دمُّو مين فيكن خلاَّ جرح غالي وشال جرحي القاشر بي همُّو *** *** ما طاقني جرحكن لا إنطاق ورُّوني متينكن تتلمُّوا ونتريَّح جملة يا عشَّاق وكل جرحاً يرجع لي أمُّو كل جرحاً يجمع في أُمو
الأخ عصام مدني، أحييك علي الجهد الكبير المبذول في البوست ده للتوثيق لي حبيبنا عبد العظيم، ومفروض اني اجي افزعك من زمان، أو على الأقل اكتب كلمة تشجيع، بس تقول شنو، اللوم يجي بالغفلات.. وليك العتبى .. ، عبد العظيم فنان كبير ويستحق أكتر، وبعكس ماهو سايد، انا بعتقد إنو أي زول ما سمع عبد العظيم والله بالجد مظلوم.. زمااان، وفي ليل البلد الصااان العجيب داك، كنا بنشغل المسجل ونسرح مع صوت عبدالعظيم، فكأننا والله في صلاة، زول يقاطع والا يقول حاجة مافي، إلا لي ضرورة قصوى، وكانت تسجيلات عبد العظيم نادرة والبلم في تسجيل كأنو طال القمرة.. مرة عندي صديقي وبعد انتهى الشريط، قام لا حيلو واتشهد، وقال لي تعرف الزول ده بشيل الحاجات التقيلة الجوة الزول "قُلاّف قُلاّف" ويرميها..اسع انا بقيت خفيييييف... ، تحايا بلا حدود لك.. وللصديق عبد العظيم. ،
يا تعبنا الراح كلو بيش يا كريم تسترنا ونعيش الجراد ما خلالنا عيش و الاسف تب يملالو خيش تشكي عسوم زي الطريف ضاقن السقاي و الجريف البوادي جفاها الخريف لي اضي و بارا و غبيش قدرتنا كلها في الفقير يفتي في الفراش الوزير اليفرفر قبال يطير يلحقوه ينتفو الريش ليه يجارطوهن في القليل الكبار يبلعو بالتقيل كترو العربات جاري سيل زي كريسيدا و ميتسوبيش الخدرجي و ست القفاف و اب كريتينتن بيها لاف لملموهن ورا جوه داف التقول جالبين الحشيش نحن نعلينا شكننا قالن اب تنشد مننا؟ السواليت دي ازننا امشي شوفلك لو كان دحيش قتلن فراج الكريم والله ينجينا من الجحيم بكره ندخل جنة نعيم ب شفاعة سيد قريش
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة