|
|
|
 Re: (تماينة شهور) ولم تجف مآقينا يا حميد!! (Re: عبدالمنعم العوض)
|
سيبقى فينا حميد
سيبقى في الآتين من وراء الأفق
وسيهمس في ضمائرنا بما يجعلنا أكثر إلفة ووثوقا
وسنغني له وبه
فالفجر يبزق من هذي المناحي
لك الشكر للتذكرة رغم أنه ما بارح العين والقلب لحظة
[center]يا حِمّيد....إتّ بِىّ صُحّكْ؟
(نَشِيجَّ التَرابّله)
آ مُحُمّدْ شُفتا كيف؟
آ مُحُمّدْ شُفتا كيف؟
………………..
شُفتا كيف النيل مِحُومِر بالدِمُوع
والجِرُوفْ آضراعِّي جَّتْ صِبّحَتْ تَعِيسِيّ؟
والعَبّرة زيّ مُهّراً يناتِقّ في الضِلُوع
والدنيا ضَلّمّا وطلّطَمِيسِيّ؟
آ مُحمّدْ شُفتا كيف؟
شُفتا كيف الموت بعّزِلّ في نِخيلاتْنا البيّلدِنّ
وتراهُوّ صايِّلْ... يعقِرّ الخِيلَّ البِسُبْقِنّ
ويَحْرِمَّ القمّرا الطِلُوعْ
وبي مُبْردّ الأسَّى والوجِيعَّةْ
يَسِنّْ مناجِلّْ الهَمّ وسِكِينْةَ الفجِيعَّةْ
ويَحِشّ تـِمِيرةْ كِبّدةِ الأُمّاتْ...
حَشّا التَربّاله ... والطَمّبَارا
والقُمّرِيّ البِنوُحْ فوقَ الفِرُوعْ
موجُوع ... يقُوقِي علِيكَا بالحيّ وُوبْ
مكنّدكْ بي رمّادْ (نُورِيّ الجِريّفْ)
آ مُحُمّد شُفتا كِيفْ؟
شُفتَا كِيف ....
الـمُوتْ بِقصّقِصْ
هامّةَ النَخَلَّ البَحَرسْ القِيفْ
وشُفتُو كيفِنّ
يتاتِيّ خُطاكا فوقّ دربَّ المِحَنّ؟
يتلهّمكِ بالهَمّ ... يدُودّر فِيكَا......
ويا المَحبُوب .... إيّا مُودِيكَا
للسِكِيِّ القَصِيّى ....
لا عَتقّكْ تناغِمّ لِيّ رَفّاقتَكْ .. ضُمّةْ
لا إتزّودتّا للسَفَرْ البَعِيدْ بي ضَمّة
ولا خَلّاكَا بسّ تَكْتِبّ وصِيّي
وتَودِّعْ القَاسمِين مَعاكْ حِمّلَّ القَضِييّ
ولا فَطّمْنا كِيفْ يِبّقى الرِجُوعْ
آمُحُمّد شُفتا كيف؟
شُفتا كيف ...
في ثانية زيّ لـمّحْ البصرّْ
(عَمّ عبد الرّحِيمْ في السِّكة إتلافَّا القَطّرْ)*
وفي الدِنِيّي (اِتشايّعْ خَبَرْ)*
والحِكْمّة بي نَفْسَّ الأمُرّْ
وإتّا في سِّكة سَفرْ
تلّفَـاكَا عَربِيّةَ (الكَجْرّ)*
شَانّ تَكتُمْ الغِنوّة فلِهاتَكْ
وينْرّشَا دمّك
فُوق حَصَى (الشِّريان) نزِّيفْ
وشَانّ رِويحتّكْ غِيمّة فوق (نادُوس) تحَلِقْ
وإتْا إصّلكْ زيّ دُعاشْ في كَتمّة
أو زيّ نسّمَة مرّتْ
في لهِيبْ سَهّراجْ وُحَرّ
وإتْا ... جُغْمّة مُويّ باردِيّ
ليّ غَلابَا ومُتعَبِينْ والدُنّيا صِيفْ
وإتّْ تكِنّكْ ود نَدِيهّه
أو تكِنّكْ كُنتا في بِينَاتنا ضِيفْ
آ مُحُمْدّ شُفتا كيفْ؟
ناشدكْ .. مُحُمّدْ .. يا رفِيقِ الهَمّ ..
عَقِيدْ الشُعرا ...مُشّهادْ الحَيّارىَ
قَبُالّ تفُوتنّا
ولي ضَرّى الغِيماتْ تَعرِجّ
وفوق خِيُولَ الرِيّحْ تَسْرِجّ
تمشِي بي رُوحكْ
تآجِرّ (نُورا) في فَـقدّكْ
تصّبِر (شُفّع العّربَ الفَتَارى)
وبي (رُقيّة) من فَرحَكْ
تفِكْ (حُزنّ الصّحارى)
شَانْ يسّترِيحْ وجَّعَ الفَقّارى
وبي كَفكْ اللّخّدَرّْ تقْشقِشْ
دمعةَ الشّعبْ العَفِّيفْ
آ مُحُمّدْ شُفتا كِيفْ؟
وعليكَ البِينَّا ...
أفتحْ ضلفّةَ الرُوحْ الشَفِّيفْ
وبي الرّاحّهْ تاوِّق من صَرِيفْ قَلبّكَ
... وعايِّنْ
البِنّبلّعْ فِيهو عِبّرة؟
ولّا عَبّرة؟
ولّا جمّرة؟
ولّا سِيّفْ؟
آ مُحُمْدّ شُفتأ كِيفْ؟
بِي ورَاكْ يا دُغرِيّ يا زُولْ ياشرِّيفْ
مِسْخّتْ عَلِيّنا الدِّنيِىّ ....
إصّلُو الدِّنيِىّ ماليِيها العّفنّ والزِيّفْ
وكُنّا راجِّينْ يا عَشَانْا
تحضّرْ جدِيدّنا آ ودّ حَشَّانْا
بي أِيدْ تبشَّر للبِرُقصِّنْ
وبي كفّ تتمِّر خَدّ غُـنّانا
وتضوِيّ بي حرفّكْ سَمانّا ..
وبالنشِّيد تسنِدّ قفانّا
وتطيِّبَ الوجّعْ المـُخِيفْ
آ مُحُمّدْ شُفتأ كِيفْ؟
شُفتّا كِيفْ إتْيبسَّ الغُـنّا .. في حِلوقْنّا
وما فِينا زولاً... قَالّ ... نَطقّْ؟
بنّدهه رفاقتّكْ جُملة يا تَرّبالْ
يا خِيّري يا عاطِفّ....
ويا أبو الحااااج..
ويا قدّاااالّ.....
الكعُو بالصبُر ألفُونّا يا زُمّاااال
ود عثماااان ويا مَحجُووووب ...
يَدّا الآسِرنا بي (إسّرَ الوِلِفّ كتّالْ)*
ياشِغِّيلة ... يا كلّاتة... يا عُمّاااال…..
كِيفْ عِرقَ القصِّيدة يَطُـقّ؟
وتحرِّنْ ضُمّة ... يا طَبلَّ الحَقِيقّة تدُقّ؟
وا مِغِيسّتنّا يا حُمّيد.....
و وا غَبِينّتا........
(كُمْسّيدَ الغبِينّة بِشُقّ)
(كُمْسّيدَ الغبِينّة بِشُقّ)*
و(كُمْسّيدَ الغَبِينّة) الليلِىّ،
في جُوفَّ المِهيرِيّات لهِيبُو يبُقّ
حُزُنّ كُوفّتْ مَسَايِّر القمّرا بالفجّعة
ونبحّْ دِنّقِرّْ وجعّنا يَدُقّْ
خَلاصَّ آضُراعّ؟
خَلاصَّ آخَيِىّ؟
قَفانّا قِمِحّ؟...
عّشمّنَا حِرِقّْ؟
وسَاسّْ غُنواتّنا فُوقْ مُوجَّ الدّمِيّرة غِرِقّْ؟
سَكْتّ حِسّ الغُنّا الهدّايّ؟
وإنبّكَمّتْ لِهّاةَ البُّوحْ؟
وإتشلّعّ ضَرّى الأحّلامْ
تِحِتْ مَطرِ العَوِيلّ والنُّوحْ؟
وإنجَرّحّ حَلِقّ قُمْرِيِّى
جَانِّي حِسِيسّا زيّ مَبّحُوحْ
وعِرّقَ الشِّيمّة شالَّ الشُعرا
وإنغّرغّر غُنانّا الكُنّا بيكْ سَانّدِنُو..
لِحِقّ الصُّحْ؟
وطَشّتْ في بُحُورَّ الهّمْ سَفِيّنةْ نُوّحْ؟
خَلاصْ يا الكُنّا (ِنِّتْرجِاكَّا)*
يا تَقّنَتْ (عَشّمْ باكِر)*
غُنّانا يَسِيلْ بَلّا مِرّتِقّ؟
وفُوقْ بحّراً هَوايّلُو كُتُّر
نشِيلّ صَفّحَةْ شُرَاعّنَا غَرِبّ
تَجِينّا النّوه هَابِيّ شَرِقّْ؟
وا مِغِيسّتنا واغبِينّتنا ياحُمّيد،
( كُمّسيّد الغبِينّة بِشُق)*
وقالا قِبِيلْ أخُوكْ (قَدّالّ)
يطْالِع في كِتَابْ الغِيبْ
( كُمّسيّد الغبِينّة بِشُق)*
راشد سيد أحمد الشيخ
22 مارس – 18 أبريل 2012
*أصداء من قصائد للشعراء حميد، محجوب شريف، قدال وعاطف خيرى
| |
 
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عثمان دغيس)
|
اخونا عثمان الدقيس سلامي ودعواتي لك بالخير
اعرف ماذا كان يعني لك حميد علي المستوى الشخصي والعام الله يصبرنا ويصبركم ويقدر الناس على حمل الامانة الكبيرة ونار حميد ماب تموت.
شفت يا عثمان كيف توالت علينا المصايب بالامس فقدنا سيف الدين سليمان السيد وكان القاسم المشترك بين الاتنين انهم كانوا رجال رجالة والله ناسين نفسهم وهامين بي غيرهم الله يرحمهم ويجعلهم برفقة الحبيب المصطفى عليه افضل الصلاة والتسليم.
من العجب ان سيف دفن على مقربة من حميد وكانا صديقيين حميمين اسأل الله ان يكونا كذلك في الفردوس الاعلى .
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: راشد سيد أحمد الشيخ)
|
الاخ راشد لك التحية والود
احنى لك الهامة فعلى مثل حميد يقال هذا الرثاء فقد اوفيته والوفاء من شيمكم كيف لا فهو شيخ قبيلتكم فمن في هذا العصر من جيل الشعراء لم يتأثر بمدرسة حميد وهو الذي احدث نقلة اساسية في تركيبة الشعر الحديث معنى ولفظ وبنية فلك الشكر والتحايا.
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
أخي عبد المنعم
تعازيّ فيمن فقدتم، الصبر والسلوان لنا جميعاً
حقاً كان حميد فتحاً جليلاً في الشعر السوداني، فقد أجبر ناشئتنا على تدبر وتأمل أوابد اللغة العربية السودانية المحكية
له ولصنوه محمد طه القدال القدح المعلى في إعادة تداول مفردات كادت أن تندثر، وهذه إحدى اللقى التي تركها لنا حميد، وقطعاً
سيرفد قاموسنا بالجديد/القديم من تأثروا بهما وبمن هم في رحم التخلق. فقد فاز بأجر السنة الحسنة، وكان سباقاً متفرداً دائماً
لنا فيما ترك أسوة حسنة
ولك أرفع القبعة و لهذا الوفاء.
مكين إعزازي
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: راشد سيد أحمد الشيخ)
|
باشمهندنا الرائع عبد المنعم
تحياتي وأشواقي ومرحبا بك فى هذا الحوش الكبير
شخصياً أعرف كم لا زال حزنك مقيما على الراحل الرائع حميد
فقد التصقتم معاً سنين عددا وكانت بينكما صداقة عميقة و ذكريات وحكاوي وطرائف منها طرائف أثناء المشاركة فى إنتفاضة أبريل كما رواها لنا الراحل حميد أبان وجوده فى الدوحة .
و قبل ذلك كله كانت بينكما نوري ونعرف ما تعنيه نوري لك وللراحل حميد
رحم الله حميد وأسكنه فسيح جناته فقد لازال الشعب السوداني مفجوعا فى رحيله
ولك الله ياباشمهندس ونسال الله أن يصبرك على فقد عزيزك وصديقك وتوأم روحك
وانا لله وانا اليه راجعون
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: معاوية محمد الحسن)
|
بالله هن تمن تمانية ياعبدالمنعم
من يقنع اطفالى الصغار بأن حميد لن يعود من الحج لينعلنا ان بكت ( نورا ) صاحبة الستة اشهر والتى سميناها نورا بت الواطة
لاحولا يامنعم
اسأل الله ان لايعين مآقينا وماذا نملك لنقدمه لحميد سواء البكاء والدعاء بعد ان تقاسمناه بيننا
ستظل نورا ابنتى الصغيرة هى صلة رحمنا بحميد
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عصام مدنى)
|
الاخ عصام مدني لك شكري وعزائي كلامك الصادق يجدد الحزن الذي لا ينتهي
وقد اشرت الى جانب انساني رائع من جوانب تلك الشخصية الفذة فقد كان حميد فرد من اسرة كبيرة بيتها السودان لا يفرق بين اي واحد من ابناء الوطن لذا تجده ودودا وكانه واحد من افراد اسرتك .
اخي عصام ابقوا عشرة على نورة ففي عيونها نرى السودان معافى بعد هذه العلة ولا يخالطني شك في ذلك فلتتشابك الايدي .
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: معاوية محمد الحسن)
|
الاستاذ معاوية محمد الحسن جبريل لك الود والشكر
فقد حميد فقد امة فقد وطن كما ذكرت وفعلا لقد كان لحميد جهد عظيم في انتفاضة ابريل فعلاوة على كلماته التي كانت كالرصاص في وجه نظام مايو وحاشيته من الاخوان المسلمين في ذلك الوقت كان له دور طليعي في تحريك النقابات والطلاب في شارع الانتفاضة فكان له صولات وجولات في ذلك صاحبتها طرائف ومقالب اثناء تحريك الشارع وكنا نعمل في خلية واحدة مكونة من عدة احزاب وناشطين كما ذكرت وانت نفسك كنت جزء من ذلك التاريخ خاصة ابان انتخابات 1986 فيا لهل من ايام سبقت الربيع العربي بعقود ولكني اري انها ستعاد على ايدي شباب حملوا نفس ما كان يحمله فقيدنا الراحل من هم ليعيدوا للسودان مجدا قد افل والايام حبلى يا ود جبريل وسنرى ان شاء الله.
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: راشد سيد أحمد الشيخ)
|
الاخ الاديب الشاعر راشد عبدالرحمن الشيخ
نحن هنا لنوثق لحميد ولنكتب عن ماقدم حميد في اطاره الادبي النقدي وبالطبع ليس هذا المقصود لوحده فقضية حميد هي قضية وطن استخدم الشعر كوسيلة تعبير لخدمة هذه القضية وفي اثناء هذه الرحلة قدم فنا راقيا اذهل الناس لذا فانت وامثالك من الادباء معنيون بالبحث والتدبر في هذا التراث الغني ارجو ذلك ولك مني الشكر اجزله.
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: Mohamed Abdelgaleel)
|
عيان بيان
شامخ شموخ
متجلي في داك المكان
واقف مع محمودنا راضي ومبتسم
تتحدوا لي ظلم المشانق يا الحنين
روحك بتفدي وطن نفيس
في البرزخ انت هناك عريس
لا صفقة مافيش لا رقيص
لا حني لا طنبور وكشف القرمصيص
مافيش تعب
مافيش نصب
يبراك ملاك
وسراك براك
ليك ما تريد
كل ما تشاء وهل من مزيد
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: نعمات حمود)
|
الاخت نعمات لك مني افضل تحية
اقول نعم حزن باذخ وشرف باذخ واهدي لك هذا المقطع من مرثية وصلت سدرة منتهاك والتي كتبتها فيه خاصة ونحن نعيش اجواء الثورة التي انطلقت ولن تتوقف بمشيئة الله.
ومن غير خلاف
خليتنا للربا والتلاف
حقك علي.. تب ماب اخاف
من كل تجار السلاح
الدسو كنتوش الملاح
خلونا بايتين القوا
ورافعين سلاح
عهدا علي تب ماب اخاف انا منهم
بمسك على جمر القضية وافنهم
فننن........ فنن
وحميد يصن
عقل البنيات دار يجن
خلن مشاطن وجيهتن
باللخمة ماعرفن يجن
بالهجمة من الصدمة ماعرفن يجن
صوتك مهابتك دلتن
حراتنا جن
جن سوقرن
خمن بكن
شكلن ونقزن وس######ن
الليلة وووب الليلة وووب
خليتنا لي ودالهبوب
شوف العبوب
الفاوة يا سجم الخبوب
سجنونا وووب
هانونا ووب.. دقونا وووب
كتلونا ووبين.. واللا وووب
فاقدنك آآآ حميده وووب
وقلبن كلامن ومنحن
اخونا فارس الحوبة عدال العوج
مقنعنا مفتاح الفرج
يا نورنا في عز الظلام
نضالنا.. حرية وسلام
نصفنو ما خلن كلام
زين وصفن
حزنا انتفن فوق قوز الرماد
وقفنا اتلفحنا بي توب السواد
رجعنا استغفرنا لي رب العباد
شدينا حيلنا
وما انقطع عصب الوزين
كربنا شناط الشعر
واتحزم البلد الحزين
شلناك على كتف الوطن
داعين و مبتهلين
وختيناك بسم الله
في روضة جنان حامدين
وكتبنافوق لحد المكارم
للزمن... شاهدين
بسم الحق بي سر الكلام القلتو
منضوم في عقد القصيد الزنتو
مسنون باوزان الحسام الشلتو
مكنون في لحن الغناوي نفحتو
في المعنى الرصين
شاهدين!
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
وياانت ياودالحسن
انت الحسن
طبعك حسن
ياالفت يعرب والرطن
والما رطن في العالمين
ماشفت شي
الناس ترصرص في الصفوف
ماشفت شي
الناس تنقر في الدفوف
ما شفت شي
يا اخي الخريف محق خلا بيوضة
والزمن السخيف فات.... بي وشي
واقفين علي طرف النهار المحتشي
وجات البشاير تنتفض
مسنودة بي بركة قوافيك تنتشي
ملت الشوارع بالهتاف
ابت الشوارع تتمشي
الرادي ذاع عبود رحل
عبود رحل؟
وتاني من نفس المكان
الرادي ذاع ابعاج رحل
بـــلا....وانجـــلا
الحمد لله الرحل
يا شعب لامتين التردد والوجل
يا الماك ########
عرطملك الحجر الشقي
وخسر الرهان
زح يا حجر ما ليك مكان
ارحل.. كما القبلك رحل
اقنع .....حار بيك الدليل
انجع......عارفين البديل
الحق ...والدرب والعديل
اسمع....وسمعك مو تقيل
الموت ...يحوم
اطلع ...وجنبنا الدموم
غادر...بتكفينا الهموم
الغم واحزان السنيــن
ارحل متل ما سوى زين
ارحل وان لم تمتثل
جاياك رياح الصابرين
تكفي القدور
وتقلع خيام حكم الفجور
وتطلق عقال جملو وتثور
تفرنب الدجل الكجور
وترفرف فوقنا روح حميد تدور
تندهنا تملا العتمة نور
نادوسك المقطوع يلم
خاتي النضم
قولة بغم
يظهر كما الفتح المبين
هبت رياح الصابرين
هبت رياح الصامدين
ونفكو دين
دين الوطن حاملنوا دين
لازم ننزلو من ضهر هم السنين
وينحل قيدك يا بلد فجرك يبين
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
محمد الحسن سالم حميد
"إن الأيادي التي في كتفها صقَر
قتلننا .. ثمّ لم يحيين .. قتلانا"
(تعالي وشي الوطن دركان عساكر آخر الزمن واطاه
تعالي …. وما علي كيفك تعالي .... وريِّحي الواطة)
الحال وراك كيفن تسر
باقيلك إنتي بلاك في زين
ما إتهشَّم إبريق الرضا
خنست نسيمات السمح
والبسمة زي حبة قمح
لفحه وطفر طيراً كتُر
أورث عصافيري الضنا
يبس غناها مع الفجر ؟؟
…. …. ….
عانيت وراكي جنس عنا
بوّغ سهادي كرو النجوم
خطو المواويل إرتعش
حرّس عصاتي بنات نعش
دومست فوق حِجر البتول
هلوست بي صلب المسيح
دروش شردت من الضريح
شويمت بي ظلم الحسين
أومت عليْ كم ميضنة
…. …. ….
وما بين عيونك والوصول
تاهت بي قافلة الحروف
وقَّع طنابير الزمن
إنطربق إيقاع الفصول
حاضت غمامة ورا الجبل
طرحت من النيل الجروف
شهقت شعاب إنساني خوف
منك عليكي .. على أيِّ زول
توَّك نياق شوقو الضنا
سرّح عصا التسيار قَبَل
درب الحياة المرمول فنا
يا وقفة الواقعين هناك
يا وقعة الواقفين هنا
يا وقعة الواقفين هناك
يا وقفة الواقعين هنا
يا وقفة الواقفين هناك
يا وقعة الواقعين هنا
... ...
يا عافة الوطن الجريح
إشمعنى وصلك لا دنى
ولا آفة الزمن المشيح
قدرت رويحتي تيقنا
من جيتك المِن مرقة متين
الدهدهك ..؟
روحتي وين ؟؟
… … …
غربل عليك كل المدائن
الكان زمانك حاله زين
نا شدتها
فتَّش نهارات القرى المتكيَّة
فوق شِعب الصبر
ساندتها …
علَّم بطانه الشيطنة
وغنِّيت معاهن سودنة
يا سودنة
يا سودنة
لملمتهم والدنيا ليل
والقمرة بت فاته القطر
وصَّف لهم حتّة شليل
… … …
ردد حروفن ردتها
وقّف سحابة مع الدغش
شهدتها
وشهدت معايا على العذاب
الهدّا أضلاع الغبش
راعدتها
تكلت خدوده على بكاي
لاقت شجون جاهدتها
كانت مكبرتة بالشباب
كنت التراب
راودتها
فوق ها السراب واعدتها
ولا إنتي جيتي ولا هي
آه ..
روحتو وين ؟؟
… … …
يا زين مرقتي مشيتي وين
كل البنات جو من الملي
حشَّن بكن
شدّن حكن
وأزيارنا والمرحات خلي
يا إنتي يا مرة العدل
ماك في صعيداً تترجي
روحتي وين ..؟
قوليلنا بس يا إنتي
شان نحراك تجي
جية المهيرة وتصهلي
لو فينا أطلعي مننا
أو برّة أدخلي .. أدخلي
… … …
غنيتك البارح براي
إنصلبطوا التانين غناي
والليلي بتواتاك شعر
دونو إنعتاقك أو فناي
هيا يا مغنين الشعر
ضد ها الزمان وطبنجتو
شعر .. الشعر
شعر ..
أيوا ..
يلاّ ..
علينا ..
جاي ..
ونكر المغني كمنجتو
أ .. نكر المغني ..
كمنجتو ؟؟!
... ...
نادوس يا .,..
فجر القصائد يندلق
ما حكَّ جلدك مثل ظفرك
فانطلق ..
إنا شرحنا لك صدرك
أو شرخناه
فانعتق
يا أنت يا كل الذين
لأجل خاطرهم طهوتُ
غداة عقم
زهور كلمي
لتنفتق غضباً يؤرق موقديه
كورته رجماً لكلٍ من :-
تخاذل
أو تنازل
أو تهاون
أو تخاون
أو تعاون ضد فتحك أو أتاني يسترق
… … …
تَربت يداك ..
تربت يداك ..
تبّت يدا كلِ الذين
تغامزوا
وتلامزوا
وتهامزوا
وتقذذوا
فتلذذوا
من فيه جرحك يا وطن ؟
نادوس آه
نادوس يا ..
... ... ...
أصبحنا يا نادوس
وأمسينا بيك يا أم
أمسينا يا نادوس
وأصبحنا بيك يا أم
يا سوسة ضد السوس
قلباً بلاكي يضم
ليل الضياع مهووس
يحلم هواكي يؤم
بعد الحصاد الروس
عالم نداهو يعم
ختيت هواك فانوس
بقّابي شلتو وحم
جيت المدن باخوس
لاقيتو جالب السم
راشح هجير البوس
وكل الوجوه دم دم
… … … …
كل الخلوق دمدم
كوركتَ ..
يا نادوس ..
أم الغبش يا أم
يا نخلِ يا أبنوس
يا سمبا .. يا تمتم
يا البيك غناي محروس
دخري الغلابة هلم
دهمني كم مجروس
عكّمتَ فيي وقم
... ... ...
حمَّرت في السحب المكبرتة
يا دخان ..
يا ريحه ..
يا قوّاده للبحر ال########
والعساكر والملس
ما تختشي .
بيّوضة يا ماحق الخريف
ما طنبرت عربانه شي
مستني في الزمن النزيف
القال بجي وفات بي وشي
مشت النهارات بالصبر
أبت المغارب تتمشي
رشت المغارب بالصبر
أبت العشيّات تترشي
دقست سواقي المتعبَين
كايساله فيها عقاب عشي .؟؟!
…. …. ….
بيوضة آه ..
أوّاه .. لو الكلمات حصى
قالتلي الله أقرب فرج
أوّاه .. لو الكلمات لهب
نرجم بو وش زمن القسا
قالتلي فِطن الليل وهج
هدّام أمان الناس نسى .
دنقرت للأرض المسربلة بالسراب
فرْنبتَ بي غلبي العوج
فقدت أياديَّ العصا
شدِّيت حزامات الجلَد
هرولت تالا ضرا الوصا ..
كوركتي أرجع يا ولد
صُد ..
صُد ..
صُد ..
أرجع يا ولد
طوريةْ أبوكا تراها دي
عاند كواريكك مشيت
طوريةْ أبويا .. تراها ديك
لفحوها لامن قام يصلِّي
خصاة ضكارات الغمام
مغرب صباح ليلة دخلتو
على البلد.
… … …
حرّق عروق حلفى الكلام
عطشان سقيت عِرْقَ الشديرة
من المطيرة الفيِّ
.. كان ..
حِسْ العساكر .. لا ورا ..
قالتلي أجر ..
أجِرْ ..
أجِر ..
أجِرْ ..؟
قالتلي أجر ..
شدرة غنايا ..
جريك ضرايا
جريك ضرايا
جريك ضرا ..؟!؟
قبل العساكر ، ما تصل ؟
قبل الدرادر ما تبين ؟
وكانوا العوارض في وشيي !؟
… … …
قلت أقول وقع !
قلت أقول وقع ؟
طينة الجداول ، ماها زي طينة جسارتك
يا بلد والكلِّ طين !
يا نبُّوت ..
دقَّة تفوت
ولا حلمِ يموت
… … …
النندق ..
نندق ..
نندق ..
ويفضل باقي لهيب الحق
حق الناس ينتل في الحلق
أو يتعارض شوكة حوت
وسم الغاصب ..
ويجي كابروت ؟
يا طاغوت
اليجي كابروت
يا جبروت
اليجي كابروت
يا كهنوت
اليجي كابروت ؟
يا كابروت ؟؟
كابروت ؟؟
كابروت .؟؟
… … …
كابروت عشم وطن الغلابة
الحال بلاك تبَّ ماب تسر
ما بان صباح ..
أو عسعست قِدّامنا ليلة
تزيدنا ضُر
أوتارنا يا آخر الغنا
حردان عشيَّاته النغم
فرغت مجالسنا البلاك
عنكب على أبوابه السأم
… … …
أصدق ..
كفانا كضب رياح
وهوس رعود
وضحك برق !!!
العشبِ مالي حشا الأراضي
حواهو لمّا الوش حِرق ..
العشب حيْ ..
بس كيف تصب
يملابك المليون عرِق
… … …
كدّبنا في الكرو
في رجاك
ساوين عصا الأشواق مرق
عربان ..
ونوبا ..
نهاتي بيك
والزنج
نتمناك عتِق
ما لسَّه بين الناس فرق ؟!
لسَّع في نخّاسة وفي رق
ورا يا وجع
هيا يا طلق
طلق
طلق
… … …
صُدْ لي ملامحك يا حراز
ريح العوارض غرَّبت
فرتك ضفائرك في الرزاز
جيةْ العصافير قرَّبت
لاقيته في غابة مدين
وصَّت شتيلةً حبحبت
على عش صغارا
الدوب حبت
ما وقَّفه الليل ، لا الهجير
كم جفَّ ريقه ووتبت
لاقت من العنت الكتير
ملت الفيافي أحدٌ
أحدْ
فايدةْ جناحي بلا أطير
الموت ولا العيش النكد
نتف الخلايا ولا الضمير
الموت ولا العيشي النكد
… … …
يا نيل مدد
يا غيث مدد
يا غيث مدد
مدد
مدد
.. … ..
ندِّي دمر ونادوس ونشوقا
خل الناس الصبحت ويوم
من حيّات الخور ملدوغة
خل الصوت الكبتو الجوع
يلقى براحو يضوع ، ويضوع
الصوت العالي يا صوت الناس
التحت الواطي المامسموع
خلّو يهز الدنيا مواكب
منّو يسل خاذوقاً راكب
يا مقطوع في الخلا دون زاد
وال لليلي هناك في بوغا
جاء الحقُّ وزهق الباطل
إنَّ الباطلَ كان زهوقا
… … …
إن طرت يا الزمن الرماد
عرجونة الشهر الندي
ترجع بها أفراح الحصاد
كابروت يهب لي هبَّها
كابروت نبع كل الشهور
كابروت مساره مصبّها
…. …. ….
دخري الغبش كابروت
سيطانو فوق الظلم
مرتق يصد الموت
من تالا غرس الحلم
زغرود يبق من بيت
تحضن صداهو بيوت
تلهج بو جيدن جيت
فارس أجمل البنُّوت
… … …
أختاها يا كل النكد
نادوس محصَّنة بالتراب
وأطفالنا
والحلم
المطر
من كل شر
…. ….
تختاها ما كابروت سمع
بوصل بشارة أجمل خبر
يوصل من التمر العول
من سكّة الجدب الدحابه
المتعَبين
من فجَّة الفجع القلابه
المسغَبين
من جيهة الغبن الصلابه
المتربين
نفس الدروب
الجابه كل خاذوق ركب
فِطن الغلابة الكل مرَّة
ممقلبين
توصل بو ..
ماب يجي من بخور
مابجيبو خور
يجي من مسامات الدغش
جيْة المطور المرسَلين
من بين معاناة الغبش
يمرق كما الفتح المبين
مابجيبو خور
مابجيبو خور
…. …. ….
يا ..
خور عُمَر سيلك
كسَّر ديار أهلي
طفَّرني ريح ليلك
قبّال طيور جهلي
علقت غناي خيلك
وأورثتني الصهلي
وين الغبش ديلك
وصُّوني بالمهلي
قالوا لِي شدْ حيلك
زي قمرة في السهلي
…. …. ….
يا ..
قمرة
يا ..
نادوس أبى
شوفي المشانق
والسجون
شاف المدارس
والفرح
شاف المصانع وإنشرح
مسرح
جنائن
أغاني عز
صفّت عكر نهر العيون
فضحت فحيح
ليل المجون
عافي ومحبَّة في كل زول
إنسان شديد
في وطن جديد
ودروب توصِّل كل زول
لي زولو والأيام حنون
لا سيل درادر
لا سجون
لا ليل عساكر
لا مجون
لا ويل مساخر
لا دقون ؟؟؟
… …. ….
ركَّة عدالة على فروع
جسد البلد
طفْرةْ غبينة من العيون المتعَبة
ومنفية في الزمن الصعب
منسية فوق آه متَّكِي
شوف القصائد
ضمَّة أبى
أبى ضمّة
يا نادوس أبى
أبى
أبَى
أبى ضُمَّة أبى
أبى ضمَّة ..
إلاّ ..أكَّان تجي
وتجي يا البِذكرِك
تطمئن كل القلوب المرعَبة
والأمرُ يومئذٍ .. لَكِ .
__________________
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
سكتّ
نَضَمْ غُناي ..
ورّاكْ ..
بَدابِكْ
باتّكالي عليكْ
خَتَمْ بِكْ ..
بي هروبي
إليكْ
وكيف طفّرتَ
صقر الآفة ..
ما يلفحْ ..
جناياً ليكْ
ولا يدخل مجال
عُشّاً ..
نسجتي حنانو
فوق إيديكْ
وكيف كُوترتَ
ريح الآهة ..
ما يقرب
فرح عينيكْ
وراء جبل الصّبر ..
فضّيتو
والمطر الِحرِد ..
رضّيتو
سُقتو على البلد
ورّيتو ..
ما لمّابا ..
لمّا بياّ ...
لمّا بيكْ
......
هادي الحُفرة ..
كانت بئر ..
وكان متكابي
فوقا حَرازْ
وتحتو الصخرة
كانت حوض ..
وكانت للقبيلِة
ملاذْ
كانت مُلتقى
العِربانْ ..
وكانت مُتّكا
الِحبّانْ
مركز دورة
الإنسانْ
مِنّها هبّة
الفرسانْ ..
وعندها رَبّة
العِرسانْ
وكم شِهدت
غَرام وغَرامْ
وحِفْضَتْ
كم كلام
وكلامْ
تعكّر حين خصام
وملامْ
تروّق حين وئام
وسلامْ
تراشق
أعين الأطفالْ ..
تراهِقْ للعصافير
يوتْ
ترشرِشْ لي
تياب بنّوتْ
جَنّها من أعزّ
بيوتْ
لا رَفعتْ عليهِن
سوط ..
ولا رَفَعَنْ عليها
الصّوتْ
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
الشورة كيفن شن نسوي مع الولد
الكت شايلو حمل بلد
وتمر الهبوب بقضى الغرد؟؟!
كرموش وصيص
خاتين بصيص
عفنون مرض
وفي بعضهم راقدين قرض
يا زينا انت رجعت وين؟
عتر لك الحجرآآآآآالبخيت
وانت التعتر لي مصايبنا
المحتربي فوقنا زي حيبي العوارض
يا الديمي ماك ساكت تعارض
و الخوازيق ليها رافض
عرضحالك للوطن
يا الماك مدغمس
وماك مدهنس
وماك مدلس
وماك مملس
خطو واضح ..وفكو عارض
لفيت بي وين... واللا وين؟
ياالجيتنا في نفس الزمان
وادركت لي وتر المكان
وشفعك رهين
شفتك ..هوى
دايرين تشمولكن هوا ؟
يا الكتو متقاودين سوا !
نازلين علي قيف البحر
اوعك من البحر البحر
بحر التساب الجهجهك
اخد الحذر
شفتك نزلت على الغريق
ووطنك غريق
مالك ..غتس؟
بنقرت ما شا الله انت مرق عديل
شايل وطن ما فيهو ميل
زين يا عديل
وكل احرفك وكل القوافي القلتها
ما اتبلت آآآزول ياجميل
مرقت... تسوق المتعبين
مرقت تضاضي المترفين
الشقو... صفنا... فلقتين
واحدي سموها الشمال
والتاني سموها الجنوب
وقااااعدين عتاوي المجرمين
بالضفتين
لي...سفنا
وانت وانا
بيناتنا دين
ما دينك انت علي كتير
نصبح حبايب لامتين
ونحن الحبايب من متين
علمتنا
الهودنا
والسودنا
وضوقتنا طعم الغنا
وكيفن تكون الدندنه
انعيك وانعي رويحتي والاجل الدنا
ابكيك لي مين واللا مين ؟
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
أخي عبدالمنعم - تحياتي،
صعبة الإحاطة بما أبدع حميد .. لديه إبداع
كثيف لكل المواسم .. ولعلنا في موسم السرة بت
عوض الكريم .. فإليكم هذا المقطع:
.....
.....
مدِّيت يميني
أساعِدَه
ردَّت يسارَه
تباعِدَه ؟!
وقالت لِي
أبوي ..!
وفِّر ضُراعك
للبلد ؟
وأدخُر مُرُوَّتَك
آولد
لي يوم بحين !
أحفض كرامتك
تحفضك ؟
الموت !
ولا العيش المهين ؟
الموت
نَفاد الما نَفَد
الموت
حياة الميِّتين
أَخَتاها جنِّة
معَ الفِقَر
وأدخُل
جحيم المتعَبين
وإن ما قِدرْتَ
علي دا
أبوي !
رب لك دقين ؟!
وضحكت ..
حمدنا الله
الحنون
جِيدَن خَلَقْنا
بلا دقون !!؟
وضحكنا زين
!!؟
؟؟!
.....
......
الشوك بَمُرْقَ الشوك ؟!
وشوكاً فينا شين ؟
مرّاقو ربَّ العِزّة
شعباً ماب يلين
الجايي
حيكومتنا
لكن الزمن
دِبُّويي
داير النهمِة
وينكن !!
يا الخزين ؟؟
ما قلَّ حاشا صَبُرْنا
لَكِن لا مِتِين ؟!؟
دعكت عيونَا
التوّعت
مسحت وشيها
وصنْقَعَت
كان الغيوم
إنجمَّعَت
تِقْلَت على الريح
النصيح
كان المطور
شوَوْوْ
ترَّعَت
زي باكي
فوق دمَّ الحِسين ؟!
لكن دا وين !؟
والتاني وين!؟
وإتلوَّعت
معقول !
في ناساً ما وِعت؟!
لليلِة
بالن بيَن بِين !!
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: Mohamed Abdelgaleel)
|
الاخ الاستاذ محمد عبدالجليل لك التحية والشكر
اذكر عندما التقى المجيدان الطيب صالح وحميد بالرياض في العام 2005 تقريبا وكان اول لقاء بينهما كان حميد يتسأل ماذا اقرأ قلنا له (السرة بت عوض الكريم )انسب لانها تشبه ابداع الطيب صالح وقد فعل، ولاانسى كيف وقف القامةالطيب واهتز طربا وكانه في حفلة عرس وقد قال قولته المشهورة(هذا مبدع مسكون بالابداع عرف جرس الارض حدثته بما تحمل في باطنها فحدث الناس بحديثها) الا رحمهما الله رحمة واسعة.
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
الناس يعرفون حميد الشاعر .. عبر قصائده العديدة الزائعة الصيت أو تلك التي تغنى بها
بها صديقه الراحل مصطفى سيدأحمد وبقية العقد الفريد من الفنانين المشاهير .. رحل حميد
وبقيت كثير من أشعاره طي الورق لم يطلع عليها الناس بعد .. أما أن لأشعار حميد التي
تحمل رؤيته الفلسفية العميقة لمحبيه.
يا أهلي
هُوي
إزيَّكم
إن عش قريِّب
منَّكم
وإن مت غريِّب
فليكُن
ياناس طيابة
بغلبكم
بنصاح ضراعكم
وقلبكم
بكفاح صراعكم
وحزبكم
برياح شراعكم
أحبكم
بسماح شعاعكم
ألبَّكم
لصباح ينور
دربكم
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: Mohamed Abdelgaleel)
|
آآه يا وطن
بالله مين قدرك حزين
كل الوطن
ياهو الوطن
العاشو جواه الخزين
اسوعت اندهدهت وين؟
راجنك آآ عشم الغلابة المتعبين
راجنك آآ دخري الضهابة المتربين
اسوعت اندهدهت وين ؟
عترلك الحجر آآآآآالبخيت؟
شوف عيني شفتك من زمان
في ها المكان
شوف العيان
متوشح انوار اليقين
عترلك الحجرآآآآآالبخيت
تتسامى بي فوق السحاب
ولوو... رهاب
رافع معاك ظلم السنين
الكان مبوق في الارض من قبل حين
شايل معاك ###### الارض نضفتها
وكمترت تشق كل زيف غربلتها
واشوفك اتوكل... لي وين؟
عتر لك الحجرآآآآآآالبخيت
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: ABU QUSAI)
|
ابو قصي ايها الحبيب سلام لك من الاعماق نعم تماينة كانت من الماركات المسجلة لحميد وله ماركات اخرى كثيرة على هذه الشاكلة هذا الرجل كانت حياته كلها حركة لم يهدأ له بال منذ نعومة اظافره وقد قدم الكثير لوطنه وخدم الناس فرادى وجماعات دون تمييز لجهة او نوع ثم رحل ولم يملك من حطام هذه الدنيا الفانية اي شئ رحل مخلفا وراءه تراثا فنيا ضخما من الابداع الراقي في اعلى مستوياته حميد غنى للبشرية كلها وسيأتي اليوم الذي يكتشف فيه هذا المعنى ثم ان شخصيته البسيطة المحببة للنفوس خلقت منه مبدعا متواضعا ملتصق بقضايا الناس وهمومها بالرغم من انه كان يعلم تماما انه مبدع من الطراز النادر الاستثنائي فكان حبيب الكل.
لهذا ولاشياء اخري اتفهم واقدر حزنك العميق ابوقصي على فقده ولكن اقول لك ان مشوار حميد طويل سيسلكه كل من امن بالرسالة السامية التى قدمها حميد من خلال ابداعه ومشروعه مستمر ان شاء الله.
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
رسِّل لنا
المرسال
نجي
يا
رُوق
بإحساس المحب
سيد بيت
وعننا ما ضِهِبْ
الهِيلنا .. هِيلَك
شِن ندس
ماطال
عُمرا ًيتحسِبْ
في ياتو بنكِ
وياتو عِبْ ؟
يات خزنة ؟
غير
خِزَن النفوس
الماهلِة
مفتاحها القلب
قول لأبن آدم
في بلد
طــــالت معاناتُو
وتٍعِب
سكانو
دايشين بالشرق
وحكامو
باشين بالغرب
إحـنا
اللي فاقدين
أيِّ شِي
في الدنيا
مالكين كلِّ شي
بالفينا
بالحيل
ودا الدرب
والتابع الصاح
ما ضِهِب
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: Mohamed Abdelgaleel)
|
حبيبنا عبدالمنعم
حكى لي عمنا "عبود الحسين" أن "حميد " عليه الرحمه....حين كان موظفآ في هيئة الموانئ البحريه بورتسودان....كان يسكن مع مجموعه من الشباب...وكان إلهام الشعر حاضرآ بقوه في تلك الغربه السودانيه الخالصه من "نوري" الى "بورتسودان"...ومن فرط رقة "حميد" كتب حروفآ للوجد والجوى لأهله ولنوري...وقد كانت "دفاتره" تئن من الكلمات...كان يكتب ويكتب وحين يمتلئ "الدفتر" يضعه في أحدى حقائبه القديمه وهكذا إستمر الحال.
كانت المجموعه التي تسكن معه حين تحتار في إشعال نار الطعام....ترسل احد افراد المجموعه فيمزق بعضآ من تلك الاوراق لإشعال النار...إستمر هذا الأمر لفتره طويله ....وبعد فتره جاء المرحوم "حميد" ليأخذ غرضآ من تلك الحقيبه القديمه فإذا به يفاجأ بأن عصارة فكره ودمه قد إلتهمتها النيران ولم يتبقى له إلا حروفآ قليله...يقال أن "حميد" مرض مرضآ شديدآ ألزمه السرير لفتره طويله جدآ...ولعل ذلك يبين إلى أي حد ان العلاقه بينه وبين حروفه كانت وطيده وصادقه.
نسأل الله تعالى أن يرحمه ويسكنه فسيح جناته مع الصديقين والشهداء وحسن أؤلئك رفيقآ.
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: الشيخ سيد أحمد)
|
الشيخ سيداحمد
لك الود والشكر طبعا حميد قطعة منكم وانتو قطعة من نوري معشوقته الاولى كلما داهمته المصاعب وقل ما كانت لا تداهمه لجأ اليها واحتمى بها وكانت تفرد اليه زراعيها وتقابله بالاحضان ولا تصده ابدا كانت ملهمة ابداعه.
عطفا على ما سمعته من عبود الحسين الرجل الهمام اعلم ان مثل هذه المواقف تكررت مع حميد كثيرا ولانه كان يتنفس شعرا لم يؤثر ذلك على انتاجه كما وكيفا.
اهدي لك مما تغنى به في عشق محبوبته
محمد الحسن سالم حميد
ـــــ
من زمان قالوها
صدِّق
إيد فرد واحدي
آب تصفِّق
إيدي في إيدك يدفّق
خيرنا للأحلام نحقق
… … …
لي جرح نورا النمرتِق
العوازل دايرا يفتِق
جات تضيِّيق ليها مشِّق
حلُّو خلَّ أرقوقا ينتق
يروي شتلاتنا وتعمشِق
لا تقوم واطاتنا تشِّق
… … …
البحر لا قدر الله
كان كسر ياهو المغرِّق
لاب يحابي مراكبي ولاَّ
بين بيوت الطين يفرِّق
للخزاز نومو ومجرّح
في الرقاد ماب يكفي فد شِق
لاب يطير الطير مجنّح
والمكتّف كيف يفشِّق
… … …
نوري يا باجور يدقدق
وإيد من أية حوض تورِّق
يا متر كلما نمتِّق
تاني حالاً زين يبتِّق
ناسه شِدّة مو التشوِّق
ما ها بالساهل تشرِّق
زول يكوس في زول يرفِّق
ما التراب كير عِقو ينتِق
في ضليل منقايي ، مشرِق
من عمرنا عياني نسرق
نحكي عن حالنا ونقرِّق
نقطع القافات نفرِّق
…. …. ….
الشمش لابد تحرِّق
لي جلودنا عشان تطرِّق
عز جدودنا تخلِّي يبرِق
ما ها من ترهاقا تشرِق
… … …
في ترح في خير تدفِّق
أمَّة .. لُمَّا عليها تشفِق
المعاوين حد ما تشرِق
لو مو نوري عليها تفرِق
يا جرف كلما نمتِّق
تاني حالاً يبتِّق
نفسي فوق قيفك محدِّق
في البحر والموج يصفِّق
نعشقه وبأسبابه نعشِق
عازة السودان
ونعشِق
عِزة الإنسان
ونعشق
والملآن شمتان يطرشِق ,, . ,,
**** **** ****
نوري ذِكْرِ
وطارة .. قبّة
نوري .. فِكرِ
ودارة .. ربَّة
أصلو لمّا رموها حبّة
وقامت اِنشرت محبّة
يا السواقيك
طِبق أناقيك
بي صلات أرحام وقربى
وين تروح الحِن يلاقيك
كيف يكون الحال في غربة
… … …
يابا يا الفكي شيخ
سلام
يا فقير فاقِشلُو قبّة
وطار يفتِّح في الغمام
والغمام بي خيرو صبَّا
عام ضرائح زوله نام
مطمئن بين أندى تربة
بختو ساب الجنِّي قام
يلقى فاكهتو ذاته وأبَّا
العمر عربون
ونوري
جنّة في حفض الله تربأ
… … …
الصغيرين يا تُمام
في عدل نسّامو هبَّ
من نخل ناساً تمام
لا عول لا فاطَّة شَربة
… … …
نوري أقول البدرِ تام
كم ليالي ألقاهو غبَّا
الشمش ..؟ .. بلقى الضلام
خبَّا بي نجماتو طبَّا
ال أقول نوري الغرام
وفي الغرام البيني شبَّا
المربِّى مع الكلام
في الدموع والدم مخبَّا
يا بيوت الطين سلام
شوقو بالتحنان معبَّا
زي مريكب مُوني عام
والصلاح في طِيابو هبَّا
… … …
يا .. ألِف .. با
حوض مباديك ..
مو كشينبة
أَوّّّ .. بحر ..
حين دارت أُمبَا
شَوّّّ .. مطر
عِن طارت أبَّا
التدورو تقول مربَّا
والبتأبى نفسنا تأبى
… …
نوري يا أم ترهاقا
يا أمِّي
يا العليك ما انتاقا
هَمِّي
بي خيول فشّاقا
هِمِّي
لمِّي شوقي الطاقة
ضمِّي
ماب أجُر من فاقة
نمِّي
عشقِ حُر قد لاقى
دمِّي
ماب ألِف الطاقة
عِمِّي
لا أم ألف محّاقة
صمِّي
وفي شمش حرّاقة
حُمِّي
وقاطع الفرطاقة
عَمِّي
من صباح إشراقة
نجمي
ومن سماح أخلاقه
نضمي
الحنان جِنِّك تردمي
الجنان جَنَّك تقسمي
يا أم عِرِق لأعراقه
إِمِّي
لا مرض لا فاقة
وأُمِّي
بين قلوب أفراقة
أرمي
ريدتك الأشواقه
ألمِي
الأناقي الساقه
حلمي
من خداره أوراقه
ضلمي
ما طريتك ..
وإنتي إسمي
لا نسيتك
وإنتي رسمي
نوري يا بغر الحواري
من بساتينا أم قماري
موية ليل ونهاره جاري
توَّرت نفس الطواري
عبَّت العطرون لواري
من خدارك ويا خداري
البلل لليلي طاري
حس حسونة الديمة ساري
مرقة الناس العصاري
والبراسيم التراري
ما أروع الليل
حين تساري
لا دواري ولا سواري
لا تِوقِّف في كباري
الحبيِّب دارو داري
في عيونو لقا ووداري
تاري يا نفضة غباري
من رحيلي وهم سفار
نوري رزقاً جاني جاري
ولاني حاري
ولاني داري ؟؟!
… … …
يا خشم باب لاب أدقُّو
ولاب أصفِّق بي إيديَّا
وفي المراح الدايرو أطلقو
أقضي للغرض العليَّا
يا الحسين رسَّل لأخيو
قالُّو طلقنا الرضية
يا الحسن مرتك مهارجي
أمِّي شان هرت البنية
الحسن ردّالو هاشِّي
والمشاعر هيَّ هيَّ
يا الحسين الطلقة ماشي
إلاّ رجعه في العشية
من ضرب للشافعي خازي
باقي حذَّرت الولية
إنت ما شفت الحرازي
حين تقع خرُّومة نية
وكيف حناناً في الجدادي
حين تحولق فوق حديَّة
شِد ضراع مِد الأيادي
فوق مواريثنا النديَّة
الكبار من كلمة طيبة
يرضو أبّان الرضية
والصغار بس كيف هي تربا
باشري بالخير دي القضية
ويا الحسين تمشي الرجيلى
وتغري خيلاني التحيَّة
قول لهم دوعلو العجيلي
حُمد أُحمد ناوي جيَّة
في الدويم ود حاج تزورو
وخت زيارتك حسن نيّة
وطاسي طاستين لي طيورو
وشيلا ندهاتاً قوِيِّة
قلبي منطبقات نذورو
والنذر دين مو شوية
… … …
في الطريق أغشاها أخيتك
وورَّها الحاصل عليَّا
كاتبي قالت وينا جيتك ؟!
ناسي ظرفاً مُو باِيديَّا
لو لا أكون كتَّر عليكا
عندي ليك كمِّين وصيّة
من وراء نار كوري توقد
ولي جبل كولقيلي حيَّة
يا الحسين نتلاقى طيِّب
وإنتو طيبين وأمِّي حيِّة
جنبي واحد من قوشابي
قالَّك أغريها التحيِّة
باقي في الغربة العصيِّة
العلائق قاعدي تكبر
والمسافات القصيِّة
بين جنات الجيهي تقصر
تلقى واحد من قرورة
وفي الجنينة مرقلُو كمْتَر
لاها صِرمة ولا الضرورة
فينا شيتاً مُو مأتَّر
يا هو زولاً في الكركي
من بعيد بي إيدو أشَّر
هوي سلام كورك كُرُكِّي
طار وكرودينا قرقر!!
ياهو دا السودان
يا أخيي
إلاَّ نوري الفيها أكتر
أيِّ زول بالله حيِّي
قول لُو صابرينبك تصبَّر
قولُّو خوجل كبرياءً
عزّة بي نوراك تنبَّر
إنت يا البتموت حياءً
وروحك الفوّاحة عنبر
صندلاً معلوم فؤادك
كلما حرقوهو عطَّر
ياتو ريح تسبق جوادك
وأيِّ غيم من لاكَ أمطر ؟
… … …
كلما نقرش مغنِّي
وبالمحبّة الخالدة طمْبر
وإن عَجَب !!؟
يبقالي عنِّي
ما قدِر بالضبطِ عبَّر
…. …. ….
أتبنك مورودة منِّي
صفحتك تملاله دفتر
يا وتر غلبك تغنِّي
صح عيونا الفيها أكتر
.؟؟؟.. …؟؟؟
جِبتَ ما خلِّيت لي جِنِّي
فيُّو خير ..
من وادي عبقر
كان فزع ..
جدع ..
إلا فنِّي
يي الحسالو
خيالو قصَّر
يا طرابيل عرِّفَني
نوري
أَم تاريخا أنضر
واللا زول
تحتك تدفني
تلقِي غطَّى الواطة أخضر
…. …. ….
ليْ بلد
رابَّة وتغنّـِي
قط .. قطَع
غنّايا دنقر
وصنَّا صيد الدارة
صَنِّـي ؟؟..؟؟
الأذان ..
الله أكبر .
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: Mohamed Abdelgaleel)
|
Quote: إنت ما شفت الحرازي
حين تقع خرُّومة نية
وكيف حناناً في الجدادي
حين تحولق فوق حديَّة |
منعم مالك علينا ياخى ؟
ياخى ما تخلى اللبقة فى بكانها كان جدول دموع حزنا ينسد
لا حولا من حزناً على حميد يا النعوم ..
ود بادى قال فى رثاء سماعين حسن:
آه... آه ياطويرة الاحزان
آه لو كان تعرفي البي
جرحك انتي صاب الريش
وجرحا لي مسافر في النسيج الحي
والله يا النعوم انا عارف عمق جرحك لكن ما تصدق انا قاعد تمسخ على حياة
الدنيا دى كيف وكتين اتذكر حميد ده وتبدو لى حياتى كلها تلكوء غير مبرر
ياخى كم مره فكرت امشى على الزول السمح ده فى برزخه ولكنها الاعمار
التى ليس بايدينا.. فعلاً جرح حميد ليس اقل من جرح سماعين مسافر فى النسيج الحى..
استغفر الله ،،،
| |
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: يوسف السماني يوسف)
|
محمد عبدالجليل الوفي لحميد سلام
نحن داخرنك لانك مرجع في اشعار حميد ولا يخفى عليك مدى الحوجة لذلك الان حتى يفرغ الناس من جمع وتحقيق ذلك التراث المبعثر وقد بدأ المشروع وانطلق من موقع التوثيق الشامل وانت واحد من تلك المجموعة اسأل الله لكم التوفيق .
شكرا على اثراءك لهذا الخيط.
ويلا قول لنا فوقك حميد راجنك.
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: يوسف السماني يوسف)
|
الاخ يوسف السماني لك اطيب التحايا واشكر على هذه الكلمات المضيئة ,نوافذ الامل تظل دائما مشرعة وحميد واحدة من تلك المسارب التي نتنفس من خلالها وينبعث لنا الضوء فنمشي على هداه.
اهدي لك لحنا من الحانه الغريبة.
الريق .. دقيق
خيل البعانخي
الصاقعات
شاءت مطر
شاءت حريق
أطراف تنُونِي
مجدّعات
جضّال
على طول الطريق ؟؟
...
دي قَدَم مُروّة بِِتَد حَنين
بي طِينه ..
بي وسْم الكُرِيق
بي طِرْقَتَه ..
وكُشَره السَنين
الكان بتمرقبُو الحِليق
أهْ تاني
ما ضرَعَتْ
جرِف تِحتاني ،،
ما قَرَعَتْ مَريق
حفياني ما انفدَعَتْ تَلِفْ ..
في الدارة تنحرقص بِريق
هي التُربة ..
ياريت تنعرِفْ
يا بِتْ
عقابَه ورا أبرقيق
فتّينا .. جُملة
حرِِفْ حرِفْ
والدنيا كَمْتَرَه
فَدْ عِريق
| |
|
|
|
|
|
|
|
|
|
Re: (تماينة شهور) ولم تجف مآقينا يا حميد!! (Re: عبدالمنعم العوض)
|
يحكي حالنا
والبلد كَعْ..كَرَع
ركَّ في الميضنة
دكَّ للطنطنة
المِن الميضنة
الهِي ما مئذنة
كانت الميضنة
الهِي ما مئذنة
ضاربة في نصنا
حقنة لي مصَّنا
مدخنة حربنا
مدمنة سبَّنا
وإحنا ما ذنبنا!
بي طريق ربنا
جينا لي
ها..البلد
وإنولد حبنا
ليها
لي شعبنا
والله عالم بنا
وعارف الميضنة
الهِي ما ميضنة
ساسه مما إنبني
ماها لي ربنا
ميضنة بشتنة
والرسول كجنة
ميضنة كشتنة
والله قد لجَّنا
...
من مياضن الدمار
الله هوي نجَّنا..
وأبني فينا الوقار
لي جنا الكم جنا..
إنت فارج الكروب
للبطولبو العنا..
يا مخارج الدروب
من متاه الضنا..
حكمتك في القلوب
بس ندور نتْبِنَا..
إنت ياك طِبَّنا
وياك خلاص قلْبَنا..
من دواس شعبنا
سَوْ رصاص حَرْبنا
فأس لقي وعبَّنا
بالصلاح رضّنا
لي فلاح أرْضَنا
نبني للميضنة
التبِر فرْضنا
التصون عرْضنا
وما تضُر بعْضنا"
...
...
| |
|
|
|
|
|
|
| |
راشد سيد أحمد الشيخ
الشيخ سيد أحمد
معاوية محمد الحسن
Mohamed Abdelgaleel
باسط المكي
نعمات حمود
ABU QUSAI
صديق الموج
يوسف السماني يوسف
فيس بوك
تويتر
انستقرام
يوتيوب
بنتيريست