" ما في سم عقب النار" ! ومناشدة للبشير ان كان يريد الكفارة بحق وحقيقة!

Quote: كشف خبراء الأورام السرطانية تصاعد حالات الإصابة بالسرطان في السودان بشكل كبير، ووصف أطباء في منتدى (السرطان ومواجهة مخاطره وآثاره) الذي أقامته مؤسسة سند الخيرية بمركز دراسات المستقبل أمس، تنامي الحالات المكتشفة بـ (المخيف). وأوضح د. كمال حمد كبير إستشاري الأورام بمستشفى الذرة، ان حالات السرطان المكتشفة تتجاوز الـ (7) آلاف حالة سنوياً، فَضْلاً عن حالات المتابعة الدورية. وقال حمد إن العدد لا يمثل الحالات الحقيقية، وتوقع وصولها إلى (30) ألف حالة لم تصل لمراكز التشخيص للجهل أو عدم قدرتهم للوصول إليها لأسباب مادية أو لمفاهيم تقليدية.

Quote: : الأخبار : طب وصحة مخاوف من انتشار السرطان بالسودان محمد الطيب سيجري عملية ثانية لاستئصال سرطان في الرقبة (الجزيرة نت) عماد عبد الهادي-الخرطوم محمد الطيب شاب تجاوز العشرين ربيعا بقليل، شعر لأول مرة بورم بسيط جدا في رقبته، لم يتعامل معه بجدية وخلال خمس سنوات، تزايد الورم ببطء شديد حتى بات في حجم حبة المانغو، فاضطر لإجراء عملية أولى ويستعد حاليا لأخرى ليستأصله نهائيا. محمد الطاهر شاب آخر، في ربيعه السابع عشر يجتهد للجلوس لامتحانات الشهادة السودانية المؤهلة لدخول الجامعة، لكن على كرسي متحرك بعدما بتر رجله اليمنى، امتثالا لنصيحة الأطباء، حتى لا ينتشر السرطان في بقية الأعضاء. وداخل المركز القومي للعلاج بالأشعة والطب النووي بالخرطوم ينتظر عشرات المصابين بالمرض، بين طفل وشاب وامرأة وشيخ، متشبثين بأمل النجاة ولو بأقسى أنواع العلاج. قانون خاص وعلى الرغم من ريادة السودان في مجال تشخيص وعلاج مرض السرطان، فإن الوتيرة تبقى بطيئة، مما دفع الحكومة لإصدار قانون خاص بإنشاء مراكز قومية أكثر تخصصا ترصد المعلومات المستجدة من أجل وقف انتشار المرض. ويعمل مركزان بصورة متكاملة أولهما بالخرطوم وثانيهما بودمدني عاصمة ولاية الجزيرة، ويعمل بصورة جزئية مركزُ جامعة شندي لأمراض السرطان بشمال البلاد. ويقول مدير المركز القومي للطب النووي والعلاج بالأشعة الدكتور صديق محمد مصطفى إن قابلية الإصابة تظل العامل الحاسم، وهو يهون في حديث للجزيرة نت من مخاوف انتشار المرض. وحسب الدكتور محمد مصطفى فإن السودان يحتاج عشرة مراكز لعلاج السرطان، لكن تكلفة الواحد منها مرتفعة وتبلغ عشرة ملايين دولار، فضلا عن كوادر من اختصاصيين وفيزيائيين وتقنيين. مستوى عالمي ويضيف أن نسبة الإصابة في السودان دون المستوى العالمي، وهو ست حالات لكل مائة ألف نسمة تقريبا. وحسب هذا المختص، فإن ولايات الخرطوم والشمالية والجزيرة تتصدر قائمة المناطق الأكثر إصابة، وقد تلقى مركزه خلال ست سنوات مضت 25 ألف حالة، كان نصيب العاصمة منها سبعة آلاف، ثم تأتي الجزيرة بـ5000 حالة، فالشمالية الكبرى وكردفان بأكثر من 3000 حالة لكل واحدة، ثم دارفور وشرق البلاد بنحو ألفي حالة مقابل أقل من 500 لجنوب البلاد. وحسب المسجلة القومية للسرطان الدكتورة انتصار الفاضل سعيد فإن التفسيرات المتداولة بشأن انتشار السرطان مجرد تخمينات ولا يمكن رد المرض إلى سبب معين. وترجع الدكتورة انتصار ارتفاع الحالات بالخرطوم إلى توفر الخدمة وارتفاع مستوى الوعي، مما يساعد في تشخيص المرض. سرطان الإشعاعات وينفي الأستاذ المشارك في كلية طب جامعة الخرطوم والاستشاري بمستشفى الذرة الدكتور كمال حمد وجود إشعاعات أو نفايات نووية في شمال البلاد تسبب المرض. وقاد الدكتور حمد فريقا متخصصا في 1996 لقياس الإشعاعات في هذه المنطقة. وحسب الدكتور حمد، فإن سرطانات الإشعاعات -مثل سرطان الغدة الدرقية والرئة والدم الحاد- غير موجودة، وهو يرجح أن يكون السبب عوامل وراثية ومواد مستخدمة في الأسمدة الزراعية ومكافحة الحشرات غير مطابقة للمعايير الدولية. ويرى الدكتور حمد علاقة كبيرة بين التبغ -الذي يطلق عليه في السودان "التمباك" أو "السعوط"- وارتفاع حالات سرطان الفم بين متعاطيه.

Quote: السرطان في السودان والتوزيع الجغرافي للاصابة باستخدام نظم المعلومات الجغرافية ويبدأ النحيب…!! السرطان.. قيامة البسطاء السودانيين..!! سلمى فتح الباب* شيء ما يزحف في الانحاء ويرسل يومياً عشرات السودانيين إلى احضان الموت.. «العناقريب».. تخرج من المنازل وهي تحمل جثمان من كان يحمل اسماً بيننا لسنوات.. ماتت «فاطمة» بالسرطان وهي بالكاد تعرف شيئاً عن الملاريا.. سمعته من الحكيم الذي يعمل بشفخانة القرية.. كثيرون رحلوا.. وكثيرون في الانتظار.. مع العلم انه ليس بالضرورة ان يؤدى السرطان الى الموت، ولكن الواقع يقول إننا أصبحنا نسمع الكثير عنه والبحث في الاحصاءات الرسمية يقول ان نسبة الاصابة في تزايد مستمر طول الوقت. لعل هذا التزايد المستمر كان أحد الأسباب التي جعلت الكثيرين يتساءلون عن سبب التزايد المستمر للسرطان، وهو سؤال يصعب الوصول الى اجابات محددة بشأنه. افادات المسؤولين كانت دائماً غير دقيقة، وان كانت تدور حول تغير النمط الغذائي، أما المواطنون البسطاء فارجعوه الى عدة أشياء منها ان هنالك شيئاً نستنشقه أو نأكله…الخ. بقاعة كلية الصيدلة بجامعة الخرطوم، كنت حضوراً في السمنار العلمي الذي أقامته المنظمة السودانية للبيئة والتغذية، وهي منظمة طوعية انسانية تسعى لعلاج المشاكل المتعلقة بالبيئة والتغذية في السودان، انشئت في عام 2003م.. نظمت سمناراً حول السرطان في السودان.. وحقيقة كان اكثر ما جعلني حريصة على حضور السمنار الورقة الثالثة التي كانت تحت عنوان «التوزيع الجغرافي» لمقدمها الاستاذ احمد محمد أحمد.. قمت بتسجيل بعض الإفادات أثناء السمنار، وبعضها آثرت الحصول عليه من الاستاذ احمد بمباني معهد الدراسات البيئية. فكرة الدراسة تستند على تقصي التوزيع المكاني للاصابة بمرض السرطان. وقد استخدم هنا الاحصاءات السرطانية المسجلة بمستشفى الذرة منذ عام (2003 - 2000) م. لنبدأ بأصل الفكرة.. والأصل هنا ان قراءة البيانات الجدولية لمرض السرطان قد يبدو صعباً للوهلة الاولى، لذا فكر في توفير بديل تقني حديث سهل القراءة والعرض وتحويل البيانات والارقام الى مكون بصري.. مثلاً عرض مجموع الاصابات المسجلة لنوع معين من مرض السرطان مربوط بفئة عمرية معينة، وهي مسألة كما قال عنها احمد يصعب ايضاحها بواسطة البيانات الجدولية، ولكن استخدام نظم المعلومات الجغرافية كأداة تقنية حديثة سهلت من هذه المسألة.. وحسب شرح احمد فإن انشاء قواعد البيانات الملحقة او الوضعية، يمكن من الاستفهام عن أية بيانات لأي نوع من أنواع مرض السرطان، حيث يتم الرد بشكل سريع جداً ودقيق عبر توجيه استفهام للنظام.. كما هدفت الدراسة الى توفير بديل تقني على مستوى عالٍ من التقانة والحداثة للخرائط الموجودة على ورق، مما يسهل اعادة انتاجها وتحديثها وتزويدها بالمعلومات الجديدة والاضافة. وصلنا للتساؤل الأهم بالنسبة لنا، وهو اثر البيئة الطبيعية على الاصابة بمرض السرطان.. رد أحمد بأنه من المعروف ان الدراسات الطبية كلها اثبتت ان هنالك بعض الجوانب المتعلقة بالبيئة الطبيعية، لها دور في انتشار أو سيادة نوع معين من مرض السرطان. وعلى سبيل المثال معروف ان هنالك مستويات عالية من اصابات سرطان الجلد بين العرق الابيض عموماً أو الاوروبيين.. وهو سائد في شمال الكرة الارضية. وكما هو معروف أيضاً ان سرطان الكبد اكثر الانواع انتشاراً بين الآسيويين عموماً.. ولذلك قصدنا أن نتقصى.. هل لاصابات مرض السرطان أية ارتباطات بيئية؟.. بمعنى هل هنالك انواع معينة من السرطان تسود في مناطق محددة؟ تم تجهيز خرائط رقمية تصف بعض المؤثرات البيئية مثل معدلات الامطار، المناطق البيئية أو المناطق »الايكلوجية «. والايكلوجية.. تعني الغطاء النباتي.. والدراسة حاولت الربط بين أمراض السرطان والبيئة السائدة في المكان المعين، والتي تتصف بنبات طبيعي معين ونوع معين من الأمطار. لنأتي هنا إلى ما خلصت إليه الدراسة. وهو النفي لوجود أي أثر بين البيئة الطبيعية ونوع السرطان الذي يسود فيها. وذلك في مناطق السودان المختلفة.. رغم وجود نمط مكاني معين لسيادة أنواع محددة من السرطان، مثلاً سرطان المريء أو البلعوم يسود بشكل كبير في شرق السودان… كما ان سرطان الرحم يوجد في بيئة صحراوية. ويوجد في منطقة تتميز بأنها سافنا غنية، وأخرى تتميز بأنها سافنا فقيرة، اضافة للمناطق الغابية. ويضيف انه من الجوانب المهمة في هذه الدراسة الخروج بخرائط سهلت مقارنات بين اكثر من نوع للسرطان في المكان الواحد، على مستوى ولايات السودان المختلفة. وأصبح من السهل جداً معرفة حجم مستوى الإصابة بسرطان البروستاتا وسرطان المعدة في الفئة العمرية (60-69). وعن أكثر المناطق كثافة بالمرض، يتضح لنا أن هنالك ما يسمى بالبقعة الساخنة.. التي أوضحها أحمد بقوله: انها المساحة التي اعطتها لنا خرائطنا.. وقد شملت الولاية الشمالية وولاية نهر النيل وولاية الخرطوم وجزءاً من ولاية الجزيرة واجزاءً طرفية من ولاية القضارف واجزاءً طرفية من شمال دارفور وشمال كردفان، وتتميز بمجموع اصابات كلي عالٍ. تساؤل آخر عن السرطان وانتشاره في قبائل بعينها.. الاجابة عنه كانت وبحسب معلومات وفرتها احصاءات مستشفى الذرة، فإن لديهم عشر قبائل هي الاكثر تكراراً وتردداً، وتسجل أعلى حالات الإصابة بمرض السرطان، كما ان هنالك انواعاً معينة من مرض السرطان هي الأعلى بين كل الانواع الاخرى. أوصت الدراسة في ختامها بضرورة استيعاب أو انشاء فريق عمل لبحوث السرطان، يشمل اصحاب مجالات علمية مختلفة ومتنوعة على رأسهم الاطباء، اضافة الى علماء السلوك وعلماء الاجتماع والاقتصاد، اضافة الى المجالات التقنية، مثل نظم المعلومات الجغرافية ونظم المعلومات ومختصي البيئة بشكل عام. كما أوصت الدراسة بضرورة توفير سجل علمي دقيق لمرض السرطان، حتى يتم الحصول على بيانات دقيقة توضح مستوى الاصابة، حتى يتم اتخاذ الخطوات الوقائية السليمة لمنع انتشار هذا المرض بين أهلنا في السودان. *في باب "يحدث في الشارع العام" من جريدة الصحافة النسخة الالكترونية، كتبت الاستاذة سلمي فتح الباب مقالا عن السرطان في السودان والتوزيع الجغرافي للاصابة باستخدام نظم المعلومات الجغرافية

Quote: الثدي, الرجل, السودان،, انتشار, بين, سرطان, نساء, وعنق انتشار سرطان الثدي وعنق الرحم بين نساء السودان، SudaneseOnline: سودانيزاونلاين الرئيس الأسبق نميري لم يدفن نفايات نووية في الولاية الشمالية الخرطوم: محمد شريف-صحيفة الصحافة : حذر مختصون وأطباء في علم الاورام من زيادة انتشار سرطان الثدي وعنق الرحم بين نساء السودان، وكشفت نتائج دراسات جديدة أُجريت في الخرطوم والولايات عن زيادة كبيرة في نسب الاورام الحميدة والخبيثة بين النساء اليافعات والبالغات والمتزوجات حديثاً واللاتي تجاوزن سن الياس. واستندت نتائج الدراسات إلى تقديرات منظمة الصحة العالمية التي اكدت شيوع السرطان بين نساء العالم، وتشخيص اكثر من 1.2 مليون اصابة بسرطان الثدي في كل انحاء العالم سنوياً، واشارت الى انخفاض نسبة الوفيات منذ عام 1990م بسبب الكشف المبكر. وناشد الدكتور حسين عوض الكريم مدير مركز الخرطوم التخصصي للاورام، وسائل الاعلام المقروءة والمسموعة والمرئية، التدخل العاجل للحد من تفشي السرطان بالبلاد، وحث النساء على الكشف المبكر وكسر حاجز الخوف والخجل، مشيرا الى نجاح الاعلام في التوعية بخطورة الايدز. وقال إن أكثر الاورام السرطانية شيوعاً بين النساء هي اورام الثدي، وتمثل 30 الى 35%، واورام عنق الرحم وتمثل 12 الى 15% من نسبة انتشار الاورام عند النساء. وقال ان 80% من اورام الثدي حميدة و20% منها خبيثة لا تجد العلاج الكامل لأن 80 الى 85% منها تشخص بعد فوات الاوان وتفشي المرض الخبيث في الرئتين والكبد والدماغ والسلسلة الفقرية. واكد ان اكتشاف سرطان الثدي وعلاجه مبكراً يؤدي الى الشفاء التام. ودعا النساء الى الالتزام بالرضاعة الطبيعية وعدم تجاهل اي ورم بالثدي، والفحص الذاتي للثدي باليدين او بواسطة القابلات، والفحص المجاني الاولي المتوفر بالمراكز المنتشرة بالعاصمة، والفحص بواسطة الموجات فوق الصوتية وجهاز الماموقرام. وعزا أسباب تأخر اكتشاف السرطان الى الفقر والجهل ومداواة الاورام باللبخة البلدية والكي خوفاً من البتر، وتركيز الخدمة في المدن، والإحساس بالخوف من الوصمة، وعدم تمويل البرامج الوقائية من الحكومة أو شركات القطاع الخاص. ودعا البروفيسور كمال حمد رئيس الجمعية السودانية لاختصاصيي الاورام الدولة ومنظمات المجتمع المدني والاعلام ونجوم الفن والدراما والرياضة، الى توعية النساء بخطورة السرطان واهمية الكشف المبكر. وقال إن مستشفى الذرة بالخرطوم ومدني يستقبل فقط عشرة آلاف حالة جديدة سنوياً، ومن المفترض أن يستقبل 34 الف حالة، موضحاً أن 30 الى 70% من المرضى يموتون دون تشخيص وعلاج. وناشد وسائل الاعلام كشف الحقائق وتغيير المفاهيم السالبة والتثقيف الصحي، وقال إنه راجت أخيراً شائعات تشير إلى أن الرئيس الاسبق جعفر نميري قد قام بدفن نفايات نووية بالولاية الشمالية تسببت في انتشار السرطان، مبيناً أنه شخصياً قاد فريقاً طبياً متخصصاً بحث عن اشعاع من كريمة الى عبري ولم يجد شيئاً، وقال إن الاشعاع يسبب اوراماً في الدم والرئة والغدة الدرقية، وكل السرطانات القادمة من الشمال بريئة من الاشعاع، وقد يكون سببها الأكل الملوث بالاسمدة والمبيدات والعامل الوراثي، والسجائر والتمباك هما المسؤولان عن 30% من الحالات ويتعاطاهما 21% من طلاب المدارس. وطالب بإدخال الكشف المبكر عن السرطان في برامج الصحة الأولية، وتدريب طالبات الثانوي وربات البيوت عليه لنشره في المدارس وبيوت الافراح والاتراح، وقال انه اجرى عام 1994 دراسة عشوائية في طوكر والقضارف بشرق السودان، وسأل « 160» سيدة عن سرطان الثدي ووجد ان 15% منهن لم يسمعن به، وتأسف على انتشار سرطان عنق الرحم حتى وسط الطبيبات، وقال إن أبحاثاً تجرى لمعرفة سبب انتشاره بكثرة وسط شريحة المعلمات بمدارس الاساس والثانوي، ودعاهن الى الذهاب للطبيب لأخذ عينة من عنق الرحم في دقيقة فقط حال شعرن بإفرازات متكررة ونزيف متكرر. وأشارت د. عايدة حسن اختصاصي الجراحة الى امكانية وصول سرطان الثدي للرجال، وأكدت شفاء مجموعة من النساء السودانيات من السرطان بسبب الاكتشاف المبكر والعلاج الناجح.

Quote: بسم الله الرحمن الرحيم عيادة على الهواء موضوع الحلقة : – أنواع السرطانات الأكثر حدوثا وظهوراً في السودان بثت9/ 6/ 2011م مقدم البرنامج : إسراء زين العابدين الضيف : دكتور/ كمال حمد محمد منان الأستاذ المشارك لعلاج الأورام والطب النووي بكلية الطب جامعة الخرطوم ومستشفى الذرة مقدم البرنامج : المستمعون الأعزاء أهلا مرحباً بكم لقاء جديد عبر عيادة على الهواء دعوتنا نجددها لكم مع أمنيات الصحة والعافية للجميع ، عيادة على الهواء هذا اللقاء الاسبوعى الذي نلتقيكم فيه نحاول من خلاله أن نزيل الكثير من المفاهيم الخاطئة حول بعض ممارساتنا الصحية ونسلط الضو على بعض القضايا الصحية ونحاول أن نحل هذه المشكلات الصحية برفقة الاختصاصيين والأطباء أصدقاء وضيوف البرنامج ، هاكم تحايا الفريق الذي يصحبني عبر هذا اللقاء ، أيها الأصدقاء نسعد كثيرا بمتابعتكم ونسعد أكثر بمشاركاتكم اتصالكم عبر هواتف البرنامج 87553151 و 87553152 ، أيها الأصدقاء في هذا اللقاء نرحب كثير جدا بضيف عيادة على الهواء دكتور/ كمال حمد محمد منان الأستاذ المشارك لعلاج الأورام والطب النووي بكلية الطب جامعة الخرطوم ومستشفى الذرة أهلا بيك وحبابك عشرة دكتور/ كمال حمد : أهلا وسهلا وأشكركم على استضافتنا مرات عديدة لإلقاء الضو على مشاكل السرطان في السودان مقدم البرنامج : نحن بنحييك وبنرحب بيك وطولت من العيادة بالرغم من إننا كنا نحاول أن نلتقيك في محاضراتك وبرامجك التي تهدف الى خفض مستوى السرطان ورفع الوعي وسط المواطنين دكتور/ كمال حمد : نحن سعداء دائما بلقاء المواطنين والحديث عن مشاكل السرطان وكيفية الكشف المبكر للسرطان وزيادة وعى المواطن بهذه المشكلة مقدم البرنامج : أهلا بيك دكتور كمال ، أيها الأصدقاء في هذا اللقاء سنتحدث عن ( أنواع السرطانات الأكثر حدوثا وظهوراً في السودان ) ما هي أسباب أن يأتي المريض متأخراً لطلب العلاج ، أساليب التوعية وإشراك المجتمع المدني في الكشف المبكر على مرض السرطان ، وأيضا نتحدث عن الاعتقادات الخاطئة وسط الناس ، اذاً أهلا مرحبا بكم أيها الأصدقاء ونرحب بكل الذين يتابعوننا ويحاولوا الاتصال بنا عبر هذا اللقاء ، دكتور كمال امكن هناك سؤال حينما يتبادر الى الذهن ماذا نعنى بالسرطان في تعريف بسيط وكم نوع من السرطان تقريبا موجود دكتور/ كمال حمد : الحقيقة السرطان هو عبارة عن ورم في اى جزء من جسم الإنسان ممكن يحصل وينمو سريع خلاف الورم الحميد فالورم الحميد دائما ينمو ببطء وحجمه لا يزيد بسرعة الورم السرطاني دائما بينمو سريع ويستطيع الانتشار عن طريق الأوعية الدموية وعن طريق الأوعية اللمفاوية في باقي الجسم يعنى ممكن يؤثر على الغدد اللمفاوية القريبة منه وممكن ينتشر عن طريق الدم الى أجزاء أخرى من الجسم في الرئة والكبد والعظام دي مشكلته عشان كدا هو بيؤدى الى مشاكل وقد يؤدى الى الوفاة أحيانا في حين انو الورم الحميد صغير عادة وبينمو ببطء شديد ولا ينتشر ، السرطان تقريباً ممكن يصيب كل أجزاء جسم الإنسان لكن في أجزاء تصاب أكثر من الأجزاء الأخرى مقدم البرنامج : طيب امكن دكتور كمال نسمع أحيانا بسرطان الدم وذي ما انت ذكرت بعض السرطانات التي تكون مثلا من أعراضها أورام في مناطق مختلفة أو بعض الأنواع التي يحدث فيها خلل في بعض الوظائف المعينة في جسم الإنسان أو في بعض الأجزاء دكتور/ كمال حمد : هو طبعا كما ذكرنا انو السرطان يصيب معظم أجزاء الجسم لكن في أجزاء تصاب أكثر من الأجزاء الأخرى مثل الثدي عند النساء والبروستاتة عند الرجال والرئة والمعدة دي التي تكثر في العالم ونحن في السودان أكثر الأورام عندنا نتحدث عنها بعدين لكن معظمها في هذه الأجزاء في كل العالم ما مختلفة كثير مقدم البرنامج : طيب لو تحدثنا عن أكثر السرطانات في السودان حسب أخر الإحصائيات أو الاصلا التي تشكل أرقام ونسب عالية جدا فهي واحدة امكن من التي تسبب تحديات لكم كمعالجين وكمستشفيات متخصصة في علاج السرطانات دكتور/ كمال حمد : نحن حقيقة في النساء عندنا أكثر السرطانات هي سرطان الثدي من سنة 1967 تاريخ إنشاء مستشفى الذرة بالخرطوم وكانت نسبة سرطان الثدي تتراوح بين 29 – 35% من السرطانات ودا ما زال أكثر السرطانات حدوثاً يعنى بيكون حوالى ثلث الحالات التي عند النساء بعده طوالى بيجى سرطان عنق الرحم وهو يتراوح بين 12 – 15% ومع بعض لما نجمعهم نلقاهم بيكونوا 50% من السرطانات عند النساء يعنى لو استطعنا انو نسيطر على سرطان الثدي وسرطان عنق الرحم عند النساء في السودان نكون سيطرنا على 50% من السرطانات باقي السرطانات كلها في النساء بتتراوح بين 2ونصف الى ثلاثة ونصف في المائة يعنى ما كثيرة نحن دائما بنركز على سرطان الثدي وسرطان عنق الرحم والوضع دا بيشبه سرطان الثدي في شمال أفريقيا دائما أكثر وسرطان عنق الرحم في أواسط وجنوب أفريقيا أكثر يعنى نحن ماخدين حاجتين حاجة من الشمال هي سرطان الثدي وماخدين من أواسط وجنوب أفريقيا سرطان عنق الرحم مقدم البرنامج : طيب أمكن لحسن الحظ ذي ما بتقولوا دائما دكتور كمال انو النوعين ديل من أنواع السرطان هم يمكن الكشف المبكر عليهم ويمكن السيطرة عليهم في مراحل يعنى اكتشافهم وبتالي العلاج شنو المهددات الكبيرة هل هو عدم وعى بالنسبة للمواطنين هل هو مرتبط بناحية عمرية هل له علاقة بالوراثة ولى شنو الأسباب التي تجعل هذين النوعين هم الأكثر ظهور وانتشار عندنا في السودان وسط النساء دكتور/ كمال حمد : يعنى هو حاجة عالمية سرطان الثدي عالمياً امكن يكون من أكثر السرطانات حدوثاً بعد الرئة في بعض أجزاء العالم نحن هنا ذي ما قلت ليك نشبه شمال أفريقيا امكن عندنا سرطان الثدي أكثر وتانى طوالى سرطان عنق الرحم لو مشيت الدول العربية الثانية بتلقي سرطان عنق الرحم ما كثير عندهم نحن كثير عندنا لأنو نحن جزء من الافركان في وسط السودان وجنوب السودان وبتالي امكن ى السرطانات الكثيرة نحن الحقيقة المهددات بالنسبة لنا هي عدم الوعي وعدم المعرفة يعنى نحن ما زلنا في السودان عندنا ناس ما بيعرفوا ما هو السرطان يعنى نحن عملنا دراسة في الشمالية وجدنا 5% من النساء لا يعرفوا السرطان هو شنو وفى شرق السودان 15% من النساء لم يسمعوا بالسرطان يبقى مجهود كبير جدا لازم يتعمل التوعية أول حاجة لازم الناس يعرفوا ما هو السرطان وفى كثير من المعتقدات الخاطئة وسط النساء يعنى نحن جينا سألنا في الشمالية سألنا مجموعة من النساء عن انو إذا حسيتي بورم في الثدي بتفتكرى هو شنو فـــ 70% بفتكروا انو كيس دهني ودا طبعا اعتقاد خاطىء لأنو أورام السرطانات في بدايتها ما بتكون مؤلمة وبتالي هم بيقولوا كيس دهني عشان كدا لا يشتغلوا به كثير نحن بنفتكر انو اى ورم في الثدي يجب الاهتمام به خاصة الأورام التي تحصل بعد سن انقطاع الدورة وهى في الغالب تكون سرطانات قبل سنين انقطاع الدورة بتكون في أورام حميدة كثيرة بتحصل في الثدي وما اى ورم معناه سرطان يعنى المريضة ما تبقى مريضة ودكتورة في نفس الوقت يعنى اى واحدة تحس بي ورم لو بتمشى تكشف وياخدوا عينة ويتأكدوا من نوعها شنو أحسن من الواحدة تقوم تشخص تقول دا كيس دهني ولا يؤلمني وتصهين والحاجة الثانية التي تخليهم ما يحضروا للدكتور الخوف من إنهم يمشوا ويقوموا يزيلوا لهم الثدي دا سبب كبير جدا من نسوان كثر بيعرفوا انو عندهم حاجة حاسنها الواحدة بينها وبين نفسها عارفة انو ممكن تكون حاجة سرطانية وهى خائفة تمشى يقوم يقول لها انو عندك الحاجة دي يسموها لها لأنو المرض سمعته سيئة وبعدين يقوموا يعملوا لها إزالة ثدي الحقيقة نحن دائما بننبه الناس انو لو بتحضر بدري يعنى لو ورم صغير اقل من أربعة لخمسة سنة ممكن يزال تحت جراحة وإعطاء علاج بالإشعاع وعلاج كيميائي وتتفادى إزالة الثدي فدى محاسن من المشي مبكراً للأطباء والتشخيص المبكر في أطوار التي يكون حجماً صغير وما انتشر فالواحدة لا تفقد ثديها فدى مهمة جدا لازم الناس يعرفوها يعنى الواحدة لو بتجى بدري ما بالضرورة يشيلوا لها الثدي ممكن يتعالج بعملية بسيطة وتاخد إشعاع وما يحصل لها حاجة كلما الورم يزداد كلما ينتشر في الغدد تحت الإبط ويبقى في الطور الثالث أو ينتشر لباقي الجسم ويبقى في الطور الرابع ويبقى علاجه صعب عشان كدا أهمية الكشف المبكر بالنسبة لسرطان الثدي مقدم البرنامج : طيب دكتور يعنى قبل ما نمشى من هذا الجزء امكن انت تحدثت عن الأورام التي تظهر في الثدي ودي اغلب النساء ممكن مع تدريب على كيفية الكشف المبكر والكشف الذاتي يمكن الوصول لي انو هل في ورم ولى ما في ورم وبيظهر متين أو لا ولكن عنق الرحم كواحدة أيضا من السرطانات عند النساء الأكثر تفشى كيف يمكن الكشف المبكر لها مع كثير من المحددات صعوبة الإبلاغ عن مشاكل زى دي شنو الأعراض التي ممكن تظهر وتكون هي تنبه النساء وهل هي عملية صعبة مسألة الكشف على عنق الرحم أو اخذ عينة دكتور/ كمال حمد : دا سؤال جيد الحقيقة هو سرطان عنق الرحم كما ذكرنا هو السرطان الثاني يصيب النساء في السودان وللأسف الشديد امكن حوالى 80% من الحالات بتجى في أطوار متأخرة وبالرغم من انو هو أعراضه النزيف والافرازات المتكررة لحدي ما تعمل رائحة لكن هو عادة بيحصل في النساء كبيرات السن بعد انقطاع الدورة بيخجلوا انو يمشوا للدكتور يقولوا عندنا نزيف عندنا افرازات ومرات لحدي ما الواحدة تطلع منها رائحة والأهل يقوموا يمشوا يشوفوا الحاصل شنو وبعداك تجى للعلاج 70% من النساء ديل لما يجونا بيكون عندهم نزيف أكثر من ثلاثة شهور مع العلم انو في العادة الإنسان لما يحصل له نزيف من اى جزء في جسمه حقوا شوية يخاف ويقوم يمشى للطبيب لكن دا ما حاصل عندنا فيبقى الاهتمام بالافرازات المتكررة والنزيف بالنسبة للنساء اللائي انقطعت منهم الدورة والنزيف بين الدورة والدورة بالنسبة للذين ما زالت بتجيهم دي حاجة مهمة جدا الذهاب للطبيب مبكراً والكشف المبكر لسرطان عنق الرحم في مراحله الأولية علاجه ساهل جدا ويمكن الشفاء منه الأهم من كدا مفروض اى امرأة متزوجة تعمل حاجة اسمها مسحة عنق الرحم هي عملية بسيطة جدا ما فيها بنج يعنى الواحدة ترقد وتضع لها قطعة بلاستيك في عنق الرحم بيلفوها بتشيل خلايا لا تحتاج الى بنج ولا تاخد أكثر من خمسة دقائق وغير مؤلمة ويضعوها في شريحة ويفحصوها تحت المايكرسكوب وتوضح التغيرات الأولية التي تحصل في الخلايا وسرطان عنق الرحم دا بياخد ذي عشرة سنة من الخلية تكون طبيعية تتحول الى سرطانية في العشرة سنة دي بتطلع خلايا من عنق الرحم ممكن تشيلا وتكشفا وتكتشفوا في مرحلة قبل ما يبقى سرطان وممكن تزيل الخلايا دي بطرق كثيرة وتمنع حدوثه مثلا في الدول الاسكندنافية الناس نقصوا نسبة الإصابة بسرطان عنق الرحم بأكثر من 80% فنحن بننصح انو النساء يعملوا مسحة عنق الرحم مقدم البرنامج : يعنى بيحتاجوا كل كم يعملوا يعنى المرأة بتحتاج إنها لو أجرتها مثلا مره بعد سن الخمسة وأربعين يعنى بتحتاج فترة قدر كم دكتور/ كمال حمد : هو مفروض اى واحدة متزوجة بعد سنتين من الزواج تبدأ تعمل مسحة عنق الرحم في الدول المتقدمة بيعملوها مرة كل سنتين طبعا في دول ذي دولنا دي ما بتقدر تقول كدا حسب هيئة الصحة العالمية على الأقل مرة كل خمسة سنوات يعنى لو عملناها كل خمسة سنوات لكل النساء في السودان حننقص نسبة الإصابة بأكثر من 50% ولو عملناها مره في العُمر بتنقص نسبة الإصابة بــ 30% المؤسف انو ما في فهم للقصة دي يعنى وعى النساء بمسألة عملية مسحة عنق الرحم ما كثيرة يعنى ما بيحضروا ويسألوا يقولوا نحن عايزين مسحة عنق الرحم بالرغم من انو في مراكز بتعمل مسحة عنق الرحم مقدم البرنامج : ومجاناً في كثير من المراكز دكتور/ كمال حمد : أيوا مجاناً نحن نتمنى انو النساء كلهم يعرفوا الحاجة دي يعنى اى واحدة بتفتكر انو الحاجة دي ما بتجيها هي للأسف الشديد يعنى واحدة من كل ثمانية نساء بيجيهم سرطان ثدي لكن لكل واحدة في السودان تفتكر انو الحاجة دي بتخص الناس الآخرين يعنى ما هي وواحدة من كل عشرين بتجيهم سرطان عنق الرحم يعنى اى إنسان ممكن يصاب بهذه الأشياء فيجب الحرص على الكشف الدوري على الثديين ومسحة عنق الرحم دي أشياء مهمة مقدم البرنامج : نحن بنحييك كثير جدا دكتور كمال ومعنا أول اتصال في هذه الحلقة الو السلام عليكم مشاركة عبر الهاتف : وعليكم السلام معاك منال محمود – شمال كردفان عندي سؤالين السؤال الأول كيف أنا اقدر أميز إذا كان في ورم في حته معينة انو هو دا سرطان أو ورم خبيث ولى حميد والسؤال الثاني هل ممكن اى ورم حميد يتحول الى ورم خبيث مقدم البرنامج : شكرا يا منال كتر خيرك معنا اتصال آخر نسمع الاتصال ونجيب على الأسئلة مع بعض الو السلام عليكم مشاركة عبر الهاتف : وعليكم السلام معاك بابكر حسان عبد الله من مقاطعة الرنك بسأل دكتور كمال عن ما هي مسببات مرض السرطان وعن أعراض هذا المرض ودائما بنلاحظ انو معظم الشرائح التي تصاب بهذا المرض شرائح الأطفال فهل هذا المرض معدي مقدم البرنامج : شكرا يا بابكر كتر خيرك اتفضل دكتور دكتور/ كمال حمد : هو طبعا السرطان دائما بيدي أعراض يعنى في اغلب الأحيان بيدي أعراض يعنى الإنسان هو الحصيف هو الذي يعرف انو الأعراض دي تكون حاجة خطيرة وبيمشى للطبيب مبكر لكن نحن في السودان الناس عادة بيحملوا الأعراض الأولية هل الورم الحميد بيتحول الى خبيث في معظم الأحيان لا يتحول الورم الحميد الى خبيث عادة بالنسبة لمسببات السرطان طبعا كثيرة جدا أهمها استعمال التبغ بأنواعه ودا بيسبب حوالى 30% من السرطانات وامكن السجائر بيسبب حوالى 13 نوع من السرطان يعنى الزول لو ما استعمل التبغ ونحن التبغ نقصد به السجائر والصعود والشيشة كلها تعتبر تبغ وكلها بتسبب السرطانات يعنى الإنسان لو ما استعمل تبغ بينقص احتمال انو يصاب بالسرطان بــ 30% ومن المسببات الثانية الكحول وبعض الفيروسات مثل فيروس الكبد الوبائي بيسبب سرطان الكبد في عوامل وراثية وفى مواد مسرطنة في الأكل الناس الذين لا يأكلوا ألياف كثيرة ولا خضروات كثيرة دائما بيصابوا بسرطان أكثر من الناس يعنى الناس الذين يأكلوا خضروات وفواكهة السرطان عندهم اقل من الناس الذين ياخدوا دهون كثيرة ولحوم حمراء كثيرة والسمنة خاصة وسط النساء لها علاقة بسرطان الثدي وسرطان الرحم ووجدوا انو الناس الذين يمارسوا رياضة أكثر بيقللوا نسبة أوزانهم فنسبة الإصابة فيهم بالسرطان اقل بالنسبة للأطفال يعنى ما أكثر أنواع السرطان يعنى في السودان مثلا عندنا كلما تشوف مائة زول عنده سرطان بتشوف ذي 7 – 8 حالات سرطان في الأطفال يعنى 8% من الحالات يعنى ما هو أكثر الأنواع مقدم البرنامج : هل ممكن يتولد الطفل وعنده سرطان دكتور/ كمال حمد : ممكن يعنى نحن في الشهر الماضي شفنا زول عمره شهرين وعنده سرطان في عيونوا الاتنين فدا نوع من السرطانات التي تحصل في الأعمار الصغيرة ما كثير طبعا عند الناس بعد الولادة طوالى فالسرطان لا يحترم العُمر ممكن يجى في اى عُمر مقدم البرنامج : طيب امكن أخونا بابكر سأل سؤال عن انتقاله هل ممكن يكون عنده عدوى وانت يا دكتور تحدتث عن بعض الأمراض الفيروسية التي ممكن تسبب سرطانات هل من الممكن انو تحدث عدوى أو انتقال بعض المشاكل ممكن تسبب دكتور/ كمال حمد : طبعا السرطان هو مرض غير معدي يعنى الزول لو عندو مريض لا يعاديوا لماذا لأنو لو بيعادى نحن ما كنا اشتغلنا فيه لكن بعض مسببات السرطان بتعادى يعنى أسى الناس بيفتكروا انو سرطان عنق الرحم بيعتبر مرض جنسي لأنو بيسببه فيروس معروف ينتقل من شخص الى شخص وفى السودان الفيروس دا بيسبب 94% من سرطانات عنق الرحم عشان كدا تلقاها في الناس المساكين والذين يلدوا كثير والذين لا يهتموا بصحتهم عشان كدا الفيروسات بتنتقل بينهم فيروس الكبد الوبائي مثلا بينتشر من شخص الى شخص ويسبب سرطان الكبد لكن السرطان في حد ذاته غير معدي مقدم البرنامج : طيب امكن قبيل كان عندنا سؤال من اختنا منال انو اى ورم كيف تفرز بين ورم وورم وافتكر انت أجبت عليه قبيل في حديثك حول التغير الذي يحدث في الورم ، اذاً أهلا مرحبا بكل المستمعين الذين يتابعونا أيها الأصدقاء في هذا اللقاء نتحدث عن أنواع السرطانات وكيفية الوقاية منها وما هي أنواع السرطانات الأكثر حدوثا دكتور/ كمال حمد محمد منان هو ضيف هذا اللقاء في عيادة على الهواء ، دكتور كمال في سؤال دائما ما يتبادر الى أذهان الناس أساليب التوعية وإشراك المجتمع المدني طالما هو مرض يعتمد في كثير من العلاج وكثير من اكتشاف هذا المرض المبكر أيضا يسرع بعلاجه أو حتى امكن العلاج منه نهائيا من هذا المرض كيف يمكن إشراك المجتمع المدني وهل هناك مجهودات في هذا الإطار بوصفكم قائمين على أمر الصحة في هذا المجال دكتور/ كمال حمد : حقيقة هناك اتعملت الكثير من المجهودات في هذا المجال بواسطة الدولة وبواسطة منظمات المجتمع المدني على رأسها جمعية المبادرات النسائية وهى جمعية ساعدت في تدريب الكثير من الكوادر الطبية يعنى دربنا أكثر من 70 طبيب على عملية الاكتشاف المبكر للسرطان عن طريق هذه الجمعية وما زلنا عندنا مركز للتدريب في مستشفى الدايات بأم درمان له خمسة سنوات شغال فبندرب كل الكوادر التي تشتغل في مستشفى الدايات من دايات وسسترات وممرضات على أساليب الكشف المبكر وما هو السرطان واتعملت دراسات ميدانية في الشمالية وفى شرق السودان عن السرطان وعن التوعية عن الكشف المبكر آخر المجهودات التي عملناها كانت في الشمالية عملناها في الفترة من 19 – 22 مايو السابق كانت في منطقة كريمة ومروى قمنا كجمعية أصدقاء ومرضى السرطان بالشمالية بالتعاون مع مجموعة من اخصائى علاج الأورام كلية الطب جامعة الخرطوم ووزارة الصحة ذهبنا الى مروى عملنا كورس تدريب للأطباء دربنا ذي 15 طبيب من المناطق المختلفة من الولاية الشمالية ودربنا حوالي 70 من الكوادر المساعدة من أطباء ومساعدين طبيين ومن ممرضات ودايات وناشطات في المجتمع المدني ونفتكر انو التدريب كان ناجح جدا لأنو نحن عملنا ذي امتحان للناس ديل قبل التدريب وبعد التدريب وأتضح انو الناس استفادوا كثير جدا من التدريب وكان في معتقدات خاطئة كثيرة جدا صححناها في نفس الوقت عملنا محاضرات للجمهور في مناطق في أندية ومجمعات نساء حضروها الآلاف وتحدثنا لهم عن ما هو السرطان وما هي أعراضه الأولية وكيفية الكشف المبكر وكانت في أسئلة جميلة جدا تدل على ارتفاع مستوى وعى الناس في هذه المناطق والحقيقة نحن عملنا تجربة جديدة في انو رافقنا بعض الفنانين بقيادة اختنا عازة عبد العزيز محمد داؤد لها التحية وآخرين من المنطقة وكنا بنقدم غناء للناس قبل الندوات حتى نستطيع نجذبهم ونجحت التجربة في انو جلبت لنا عدد كبير من الناس نساء ورجال حضروا وكلمناهم عن السرطان ووزعنا لهم بعض المطبقات الحقيقة نشكر الناس المسئولين في الشمالية الذين ساعدونا في هذا التدريب وعلى رأسهم وزير الصحة الولائى ومعتمد مروى وآخرين كانت مساعدتهم لها دور فاعل في أن تنجح هذه التجربة ونفتكر إنها تجربة ممكن أن ننتقل بها الى مناطق أخرى في السودان لأنو على حسب الدراسة التي عملناها بنفتكر إنها كانت تجربة ناجحة في زيادة وعى الأطباء والكوادر المساعدة والنساء مقدم البرنامج : طيب امكن دكتور كمال هذا يقودنا مباشرة لتسأول انو هناك أنواع من السرطانات حسب العادات وسلوكيات الناس في مناطق مختلفة في السودان وهى الأكثر انتشار وسط هذه الفئات أو هذه المجموعات عموماً نحن حنرجع الى هذا السؤال قبل كدا معنا اتصال الو السلام عليكم مشاركة عبر الهاتف : وعليكم السلام معاك على إدريس إسماعيل – ريفي العباسية تقلى أنا بسأل إذا في ألم في الجسم مثلا مرات بيكون بعد أسبوع ومرات بعد عشرين يوم هل هذا الألم بيكون سرطان دكتور/ كمال حمد : هو عادة الألم في الجسم ممكن يكون له أسباب كثيرة ما بالضرورة سرطان امكن يكون رطوبة يعنى ما بالضرورة يكون سرطان مشاركة عبر الهاتف : مرات في ورم طوالى بيقوم بالجنب الشمال دكتور/ كمال حمد : معها اى أعراض تانية هل في تغير في البول أو الفسحة مشاركة عبر الهاتف : أيوا في تغير في البول مرات البول بيكون ذي اخضر دكتور/ كمال حمد : قابلت دكتور مشاركة عبر الهاتف : أيوا قابلت وأدانى حبوب وقال لي دكتور/ كمال حمد : أمشى الدكتور يعمل ليك فحوصات وموجات صوتية ويشوف الحاصل شنو لكن دي لا تشبه أعراض السرطان مقدم البرنامج : على ذي ما قال ليك دكتور كمال لازم تمشى تقابل دكتور ولازم تتعمل ليك فحوصات وتحاليل وموجات صوتية عشان تتعرف المشكلة وإذا احتجت لي اى متابعة ممكن تتصل بنا ربنا يديك الصحة والعافية يا سيدي شكرا ليك ، معنا اتصال آخر الو السلام عليكم مشاركة عبر الهاتف : وعليكم السلام معاك حماد على أنا بسأل من مرض السرطان دا أول عندي ورم في المحسن عايز اسأل منو الدكتور مقدم البرنامج : في اى أعراض تانى مشاركة عبر الهاتف : والله في سخانة في البول دكتور/ كمال حمد : عمرك كم يا حماد مشاركة عبر الهاتف : عمري 50 سنة دكتور/ كمال حمد : هل في دم في البول ولى سخانة فقط مشاركة عبر الهاتف : لا ما في دكتور/ كمال حمد : يعنى البول كثير أكثر من اللازم مشاركة عبر الهاتف : أيوا في بول كثير دكتور/ كمال حمد : قابلت دكتور مشاركة عبر الهاتف : لا ما قابلت دكتور/ كمال حمد : يعنى نفس الحكاية انت لازم تمشى لأقرب طبيب يعمل ليك فحص للبول والدم ويعمل موجات صوتية ممكن يكون في التهابات أو يكون في تضخم في البروستاتة وبعداك الدكتور هو الذي يشخص لك الحالة ويعطيك العلاج مقدم البرنامج : يا حماد ذي ما قال دكتور كمال مهم جدا انو تمشى وتقابل طبيب عشان يعمل لك التحاليل وربنا يديك الصحة والعافية ، دكتور كمال قبل ما نمشى لسؤالنا المؤجل هذه الأسئلة بتقودنا طوالى الى تسأول انو أحيانا الإهمال وأحيانا عدم الاهتمام بأشياء تحت دراية الخوف أو إنها شيء طبيعي وخاصة ما يرتبط بالناس ممكن الزول بيعمل في مكان بيقعد كثير يعنى التهابات متكررة في البول مشاكل الإمساك الشديد المتكرر أو مشاكل عند الناس بعض النزيف من القولون الى اى مدى ممكن تكون دي واحدة من الأسباب دكتور/ كمال حمد : الحقيقة دي واحدة من أهم الأشياء انو الناس بيهملوا الأغراض الأولية للسرطان يعنى السرطان ذي ما ذكرنا في معظم الحالات بيديك أعراض أولية يعنى زول فسحته بتتغير يكون فيها دم وفيها مخاط معناها لازم يمشى للطبيب يعنى ما بالضرورة يقول ليك دي دوسنتاريا فالدوسنتاريا لو اخدت علاج الفلاجين وما راحت معناها في حاجة تانية تمشى للدكتور يعمل ليك كشف سريري ويعمل ليك منظار اى نزيف من اى مكان من جسم الإنسان يجب الاهتمام به خاصة النزيف من مجرى البول امكن يكون واحد من أعراض السرطان الكلية أو سرطان المثانة نزيف من الشرج يمكن يكون احد أعراض سرطان المستقيم حتى نزيف من الأنف امكن يكون احد أعراض سرطان الأنف أو البلعوم الانفى يعنى يجب الاهتمام بي اى نزيف في اى جزء من أجزاء جسم الإنسان خاصة لو كان متكرر كما ذكرنا قبل كدا أعراض سرطان عنق الرحم النزيف المتكرر والافرازات يعنى نزيف من اى حته متكرر وأدوا علاج وما استجاب يجب على الإنسان يمشى للطبيب واحد مثلا حصل له نزول مفاجى في وزنه بدون أسباب واضحة مفروض يمشى يكشف ويعمل فحوصات يشوف السبب شنو ما بالضرورة يكون سرطان لكن امكن يكون سرطان كما ذكرنا معظم الحالات بيكون فيها أعراض بتوضح انو احتمال تكون في حاجة ذي دي لكن الناس عادة بيهملوها لأسباب كثيرة منها الجهل والفقر وبعد المسافات دي كلها عوامل بتساعد الناس في إنهم لا يقدروا يمشوا للعلاج مبكراً مقدم البرنامج : طيب دكتور مسألة رفع الوعي أو بعض السلوكيات فقط لو مسكنا التدخين بأنواعه أو تعاطى التمباك في بعض المناطق الأكثر حتى في أعمارها أو مراحل عمرية معينة يعنى الرجال بعد سن الأربعين في أحايين كثيرة في بعض المناطق تصبح عادة مسالة أنواع من التدخين أو تعاطى التمباك أيضا يعنى انتشار أنواع من السرطانات في مناطق أكثر دون غيرها دكتور/ كمال حمد : الحقيقة مشكلة التبغ في السودان مشكلة كبيرة جدا حسب إحصائياتنا نحن في مركز التمباك بنفتكر انو في ذي 5 – 7 مليون شخص في السودان بيستعمل التمباك بانتظام وحوالي 3 ونصف الى أربعة مليون بيدخنوا بانتظام وأعلى نسبة استعمال تمباك وجدناها في الولاية الشمالية وجدناها 37% وسط الرجال و 7% وسط النساء وبعدها طوالى شرق السودان أهلنا الهدندوة والبني عامر عندهم نسبة عالية 34% من الرجال بيستعملوا التمباك السجائر بتتراح بين 29 – 30% فاخطر حاجة هي الدراسات التي وجدت وسط الأطفال في المدارس في سنه ثامنة في مرحلة الأساس وفى الصف الأول الثانوي وجدوا انو 21% منهم حاول واحد فيهم يستعمل يا إما تمباك أو سجائر أو شيشة و9% منهم بيستعملوها بانتظام ودا طبعا العادة بتاعة انو الواحد يرسل ولده يقول له أمشى جيب تمباك أو سجائر وطبعا حيحاولوا طوالى يمشوا يجربوا بعداك بيبقى مدمن عادة تلقى في حولي المدارس ناس بيبيعوا التمباك وناس بيبيعوا السجائر أنا مشيت أسجل ولدى في واحدة من المدارس دي وجدت الناظر سافي والسفة ذي سقالة البنطون بارزة قلت له يا أخ انت زول مربى لو بتسف مفروض ما تسف قدام الناس فدا بيقودنا الى انو النسبة بتاعة استعمال التبغ بأنواعه وسط الأطباء في الدراسات الأخيرة أيضا كانت نسبة مخيفة مقدم البرنامج : يعنى الدراسة كانت بتتكلم عن 51% من أطباء الامتياز فقط بيدخنوا و41% بيتعاطوا التمباك وأيضا هناك نسبة لا يستهان بها من المدخنات من الطبيبات دكتور/ كمال حمد : دي طبعا تكاد تكون أخبار مخيفة ومحزنة لأنو مروض الطبيب يكون قدوة للناس في السلوك الصحي وإذا ابتلى باستعمال السجائر والتمباك مفروض ما يعمل الحكاية دي وسط المرضى يعنى نحن مثلا قدمنا ندوة في محافظة الدبة في الولاية الشمالية تكلمنا عن التمباك والشرائح فالطبيب الشغال في المستشفى معنا قاعد في الصف الأول وخاتى سفتوا كبيرة واحد قام قال لي يا أخ أول حاجة ابدوا بي دكتوركم دا فيجب انو الأستاذة والمعلمين والأطباء يكونوا قدوة يعنى الواحد إذا بيعمل لا يعملها قدام الطالب وما يعملها قدام المرضى محزن جدا انو طبيب يستعمل التبغ وعارف مخاطره مقدم البرنامج : ودا امكن القوانين نفسها يعنى كثير من القوانين يجب أنها تفعل حتى لا يضار الناس بالتدخين السالب أو مشاكل ذي الشيشة وتعاطيها في شكل جماعات دكتور/ كمال حمد : أيوا نعم طبعا الناس في السودان بيجهلوا حكاية التدخين السالب يعنى انت ما بتدخن نفسك لكن واحدة زوجها بيدخن في الغرفة بتاعتهم والأطفال قاعدين والزوجة قاعدة دا اسمه التدخين السالب وهو ممكن يسبب نفس المشاكل التي يسببها الشخص المدخن لأنو الدخان الذي يطلع من الشخص المدخن بيؤثر على الآخرين لأنو بيستنشقوا نحن في السودان الناس لا يعرفوا حقوقهم يعنى ممكن تركب في تاكسي أو حافلة تلقى شخص بيدخن لو تكلمت معه الناس يقول ليك مالك ومالو فالناس مفروض يحرصوا على حقهم في المكاتب و المواصلات انو ما في شخص يدخن في وجود الآخرين مقدم البرنامج : ونحن دائما بنقول الصحة دي لا يمكن التلاعب بها ولا التفريط فيها نحن بنحييك كثير جدا كمال ونحن معنا اتصال الو السلام عليكم مشاركة عبر الهاتف : وعليكم السلام بنسأل الدكتور عن مرض السرطان أسبابه وهل المياه والمواد الإشعاعية بتاعة الاتصالات لها تأثير وأيضا النفايات وأيضا الخبازين الذين يشتغلوا في الأفران بتاعة الحطب فهل دي كلها لها تأثير وبتسبب سرطان مقدم البرنامج : شكرا ليك يا سيدة تسلم نحن بنحييك ، دكتور أيضا دي واحدة من الأسئلة الكثيرة التي تدور دكتور/ كمال حمد : نحن الحقيقة الإشعاع دا مرا بنا كثير جدا في دولتنا الناس في الشمالية تكلموا عن مواد مشعة دفنت في بعض مناطق الشمالية لكن نحن على حسب الحالات التي تجينا من الشمالية ما في زيادة في حالات السرطان التي يسببها الإشعاع معروف انو الإشعاع بيسبب سرطانات مثل الرئة وسرطان الغدة الدرقية وسرطان الدم ما في زيادة في هذه الأنواع من السرطانات في الولاية الشمالية ونحن كمجوعة قمنا وقامت الطاقة الذرية بقياس نسبة الإشعاع في الشمالية من منطقة كريمة لحدي شمال عبري ما كان في زيادة واضحة في نسبة الإشعاع يبقى حكاية انو الإشعاع سبب زيادة السرطان في الولاية الشمالية ما في اى حاجة علمية بتثبت هذا الاعتقاد بالنسبة للاتصالات في دراسة حديثة بتفتكر انو في علاقة بين استعمال الموبايل كثير والسرطان دي حاجة حديثة جدا لسه عايزة الدراسة نفسها تتكرر في مناطق أخرى وتثبت الكيبولات بتاعة الضغط العالي للكهرباء ثبت إنها عندها علاقة ببعض الكيمياء بتاعة الأطفال وفى قانون طبعا بينظم حكاية الكيبولات دي ومسافتها فيجب الاهتمام بهذا الجانب حتى لا تؤثر على الأطفال أما بالنسبة للمياه إلا تكون ملوثة ببعض المواد المسرطنة طبعا في مواد كيميائية كثيرة مسرطنة نحن بنفتكر في السودان الأسمدة والمواد المستعملة في مكافحة الحشرات في الزراعة تلعب دور مهم في تثبيت السرطان وهناك دراسات في مصر أثبتت ذلك وفى سوء في استعمال الأسمدة يعنى تلقى الواحد بيستعمل الأسمدة بيده وما بيلبس جونتات في يديه وما مغطى وجهه وبعداك في النهاية لما ينتهي بيجى يغسل يده في الحوض بتاع الموية أو الجدول ففي حوجة الى توعية كثيرة في هذه الأشياء مقدم البرنامج : الحقيقة امكن عايزين نتسأل عن الاعتقادات الخاطئة وسط الناس كثير من الناس ما زالت لديهم اعتقادات يعنى السرطان واحد من الأمراض التي يمكن علاجها بالعلاج البلدي لأنو تتفاقم مشكلته حينما يصبح هناك تدخل جراحي أو استخدام اى نوع من أنواع الجراحات أو أنواع العلاجات الذرية نفسها دكتور/ كمال حمد : الحقيقة في معتقدات كثيرة يعنى في السودان دا في ناس في الولاية الشمالية وفى الخرطوم وخارج السودان ناس الهاشمي المشهورين ديل بيفتكروا إنهم ممكن يعالجوا السرطان بعلاج بلدي بيستعملوا مواد كثيرة جدا ما في زول اثبت علمياً انو هذه الأشياء ممكن أن تعالج السرطان وبالعكس انو هي بتأخر حضور المرضى للعلاج يعنى نحن عندنا في السودان دا واحدة من كل خمسة نساء عندهم سرطان ثدي أول حاجة بيمشوا يعملوا علاج بلدي وبيحضروا لنا في مراحل متأخرة جدا ناس العلاج البلدي بيقوموا يفتحوا فتحة وبيضعوا مواد ذي الجير وأعشاب دي طبعا بتقوم تمتص السوائل والورم يقوم ينكمش والواحدة تفتكر إنها تعالجت ويقول لها ما تأكل لحم بقر فدى كلها اعتقادات خاطئة وما في زول بيقدر يعالج السرطان بعلاج بلدي المعروف انو في 40% من حالات السرطان ممكن تفاديها إذا الواحد عمل الحاجات التي ذكرناها قبيل و30% ممكن اكتشافها المبكر عليه وممكن الشفاء منه نحن عندنا عدد كبير جدا من الناس تعالجوا وشفوا من هذا المرض يعنى عندنا ناس عالجناهم وهم أطفال أسى امكن في ناس منهم صاروا أطباء وشفوا لكن دائما في السودان الإخفاقات بتظهر لكن النجاحات لا تظهر يعنى في ناس كثيرين جدا تعالجوا من السرطان وشفوا منه فالسرطان مرض ممكن الشفاء منه إذا الإنسان اهتم به وحضر مبكر حتى بعض السرطانات في مراحل مـتأخرة ممكن الشفاء منها يبقى الاعتقاد انو الناس بيعتقدوا يقول ليك لو وضعوا فيه المشرط أو وضعوا فيه إبرة أو شالوا عينة خلاص بينتشر دي كلها اعتقادات خاطئة ففي اعتقادات خاطئة كثيرة جدا في السرطان لأنو ناتجة من انو معظم الناس بيحضروا في الأطوار المتأخرة ونسبة الوفيات عالية وسط مرضى السرطان وبتالي سمعة المرض بقت سيئة لكن الناس يعرفوا إذا الشخص حضر بدري بيتعالج معظم السرطانات في بدايتها ممكن تتعالج يعنى ما مرض مخيف ذي ما كان زمان نحن مره شفنا واحد قلت له يا أخ عندك كيس في الحته الفلانية قال لي يا دكتور أنا عارف انو أنا عندي سرطان ما تقعد تقول لي كيس قال لي أنا يا دكتور شيخي مات وفناني مات فقمت قلت له فنانك منو قال لي عثمان حسين وشيخك منو قال البرعى يعنى الرجل دا ما زال حيى أكثر من خمسة سنوات كان عنده سرطان في البروستاتة وما زال حيى يرزق لما شفناه قبل خمسة سنوات هو كان بيفتكر خلاص انو حيحصل شيخه وفنانه فكثير من السرطان ممكن الشفاء منها لو الناس حضروا بدري وما في داعي للخوف الكثير من انو السرطان مرض قاتل فالسرطان مرض عادى يعنى لو قارنتى السرطان بالسكري بتلقي السكري مرض لا يمكن الشفاء منه لكن السرطان يمكن الشفاء منه مقدم البرنامج : الحقيقة امكن حنرجع عشان نتكلم عن العلاج نفسه وأهمية علاقة المريض بالطبيب والأسرة والروح المعنوية للمريض كل تلك الموضوعات حنتكلم عنها إنشاء الله ولكن قبل ذلك معنا اتصال الو السلام عليكم مشاركة عبر الهاتف : وعليكم السلام معاك محمد سنادة عندي اخى له ثمانية سنة عندو جرحة في يده وعملنا له عملية قبل كدا في الخرطوم وما نجحت فالعملية امكن لها سنة ونصف ما عرفنا دا من شنو دكتور/ كمال حمد : الجرح في يده وين يعنى في كفة اليد ولى فوق في الإبط مشاركة عبر الهاتف : في يده الشمال فوق مع الضراع دكتور/ كمال حمد : حجمه كبير مشاركة عبر الهاتف : والله بسيط ما كبير الجرح دكتور/ كمال حمد : فاتح يعنى بطلع دم مشاركة عبر الهاتف : أيوا بطلع دم عملنا له عملية وما نجحت معه وما عرفنا الأسباب شنو دكتور/ كمال حمد : عملوا منه عينة لما عملوا العملية ودوها المعمل مشاركة عبر الهاتف : لا ما عملوا عينة دكتور/ كمال حمد : دا لازم يجى يقابلنا في مستشفى الذرة في اى يوم أربعاء مع الصباح ونقوم نعمل له فحوصات ما بالضرورة يكون سرطان لكن امكن يكون فبيحتاج الى فحوصات ثانية تتشال منه عينة وتتعمل صور فمفروض يحضر لنا سريع مشاركة عبر الهاتف : وين مكانكم دكتور/ كمال حمد : مستشفى الذرة الخرطوم الأربعاء الصباح قبل الساعة العاشرة مشاركة عبر الهاتف : هل الحاجات الباردة العصائر بتؤثر بي حاجة دكتور/ كمال حمد : لا ما بتعمل سرطانات ما في زول اثبت انو العصائر الباردة بتعمل سرطان مقدم البرنامج : يا محمد سنادة امكن المشروبات الباردة إلا إذا باردة جدا أو مثلجة مع الأطفال ممكن تعمل لهم مشاكل بتاعة حنجرة لكن عموماً هم بيحتاجوا الى مشروبات باردة وسوائل كثيرة نحن بنشكرك كثير ونتمنى لأخوك الصحة والعافية وذي ما قال دكتور كمال تهتموا بالمرض أخوك نتمنى انو تحاول وتحضروا الخرطوم وتقابلوا دكتور كمال حمد مشكور سوف يقابلكم في مستشفى الذرة اى يوم صباح الأربعاء من كل أسبوع شكرا جزيلا ، أيها الأصدقاء ما زلنا نتابع معكم عيادة على الهواء ستة دقائق تفصلنا عن نهاية هذا اللقاء ، دكتور الحقيقة امكن من المفاهيم والمعتقدات الخاطئة والمخاوف يعنى الناس أثناء العلاج نفسه يعنى بعد اكتشاف المرض يتأخر كثير جدا المريض في انو يصل الى قناعة انو يأخذ العلاج وخاصة يعنى الجرعات المحددة في العلاج شنو ما يحدث للمريض في فترة العلاج وأثناء هذه الفترة كثير من الناس تشكوا من بعض التعب والإعياء الى اى مدى ممكن تكون هناك مرحلة مهمة جدا لمعرفة انو الناس كيف تتعامل مع مرض السرطان دكتور/ كمال حمد : الحقيقة علاج السرطان علاج جراحي علاج كيميائي وعلاج بإشعاع الكلام كله عادة بيدور حول العلاج الكيميائي لأنو بيسبب تساقط في الشعر أحيانا يسبب الغثيان والاستفراغ ونزول الدم يعنى دي كلها أعراض عادة يمكن السيطرة عليها أحيانا بتكون شديدة أكثر من اللازم ودا بيخلى الناس ما يواصلوا العلاج فعلاج السرطان عادة بيعمل أعراض وفى أدوية مساعدة لتقليل هذه الأعراض لكن لا تمنعها منع نهائي يعنى الشخص امكن يجيهوا استفراغ شديد لحدي ما يفقد سوائل وممكن يصاب بالحمى ولكن متابعة العلاج مهمة جدا لأنو زيادة الفترة بين الجرعة والجرعة خطيرة امكن الشخص لا يتعالج إذا زاد الفترات كثير ويجب الاهتمام بي انو الواحد يحضر في مواعيده ولما تحصل له اعرض مفروض يجى للطبيب يعنى لو حصلت له مضاعفات يحضر للطبيب والمضاعفات عادة ممكن علاجها معظمها العلاج بالإشعاع أيضا بيعمل سواد في المنطقة التي يبدو بها ويعمل شوية تقرحات في ناس بيقولوا ليك والله ناس الذرة ديل الأجهزة بتاعتهم ذي المكوة تضعها في الجسم طوالى تحرقوا ليك دا اعتقاد ما صحيح بل بيحصل شوية احمرار وأحيانا بتحصل شوية تقرحات وكلها مقدور على انو تتعالج المهم انو الشخص يصبر على الأعراض الجانبية والعلاج صعب ما علاج عادى لازم يعمل أعراض جانبية مقدم البرنامج : التغذية في هذه الفترة وممارسة المريض بعد كدا لنشاطه وحياته العادية يعنى حتى الروح المعنوية لتخفيف هذه الآثار الجانبية من العلاج أو متابعة العلاج بعد كدا لفترة طويلة دكتور/ كمال حمد : مريض السرطان عايز الناس يقعدوا معه ويشرحوا له المشاكل كلها أسى طبعا عدد الكوادر العاملة في مجال السرطان بسيطة وبتالي امكن يكون في تقصير في هذا الجانب وبعدين الشيء الآخر الأسر دائما لا يحبوا المريض يعرف الحاصل شنو يعنى اى مريض يحضر لنا أسرته بتجى داخله قبله يقول ليك والله هو ما عارف ما تكلمه أحيانا المريض لازم يعرف جزء من الحقيقة لا يكذبوا عليه يقول له كيس دهني لازم يكون عارف جزء من الحقيقة عشان يعرف يتعاون مع الناس لو سهلت له الموضوع دا حيتعاون وامكن يقطع العلاج ففي العالم أسى في قسم بتاع تغذية وفى قسم للعلاج النفسي نحن يعنى لسه ما زلنا الأشياء دي في بداياتها ما اتعملت كثير لكن المريض مفروض يعطوا توصية عن يأكل شنو والحاجات يحضروها له كيف ومريض السرطان عايز غذاء خاص وهنا في السودان الناس عندهم اعتقاد بي انو العصائر والقريب فرت والليمون بتزيد الدم فدى ما لها علاقة بزيادة الدم والقُضيم الواحد يعملوا له حلة بتاعة قُضيم ويصروا على انو لازم يشربها كلها فحاجات القُضيم دي كلها بتساوي لها كبسولة أو كبسولتين بتاعة حبوب بتاعة حديد ففي معتقدات خاطئة فمريض السرطان بيحتاج الى غذاء متوازن فيه كمية من البروتينات اللبن والزبادي والبيض وأشياء فيها بروتين والعصائر ما تكون هي الحاجة الرئيسية لازم الإنسان يأكل غذاء فيه بروتينات ودهنيات وفيه نشويات في نفس الوقت لا يركزوا على العصائر فقط مقدم البرنامج : الحقيقة امكن نحن في نهايات هذا اللقاء في سؤال مهم يعنى هل هناك أنواع من السرطانات ممكن تكون يعنى تنتقل عن طريق الوراثة أكثر يعنى على الأقل تستدعى انو الناس تعمل كشف أو نوع من الفحوصات إذا كانت متكررة في الأسرة أو في محيط العائلة دكتور/ كمال حمد : دا سؤال جيد الحقيقة مثلا سرطان الثدي من 5 – 10 % منه له علاقة بالوراثة أسى عندنا اسر عالجنا الحبوبة والأم وثلاثة من البنات في أسرة ذي دي وفى أسرة عالجنا أربعة من الأخوات في فحص بتاع جينات بيتعمل عندنا هنا في كلية الطب جامعة الخرطوم للأسر التي عندها حالات سرطان ثدي كثيرة ممكن تفحص تشوف الجين دا عند البنات ولى ما عندهم لو في بنقوم نعمل لهم متابعة خاصة وصور خاصة وموجات خاصة أيضا في سرطانات المعدة عندها علاقة بالوراثة أيضا سرطان الأمعاء وسرطان العين في سرطانات كثير لها علاقة بالوراثة يعنى الناس العندهم سرطانات في الأسر كثيرة من هذه الأنواع يجب ان يهتموا أكثر بي انو يعملوا كشف دوري نحن حقيقة عندنا في السودان الزول الصحيح لا يمشى يعمل كشف يقول ليك امش أفتش أقوم أجد لي حاجة لكن دي بيكون عندها الثقافة بتاعة انو الناس يعنى يمشوا ويعملوا كشف دوري حتى لو الشخص لا يشتكى من حاجة ما ينتظر لحدي ما تحصل المشكلة وبعداك يمشى يبحث عن الحل مقدم البرنامج : نحن بنحييك كثير جدا دكتور كمال حمد ، الحقيقة في أخر دقيقة يعنى امكن هناك تسأول كثير من الناس تسال أين نحن في السودان من التطور في علاج السرطانات واكتشاف السرطانات وأيضا في العلاج الكيميائي في السودان هل نحن نقول متقدمين أو على الأقل مواكبين دكتور/ كمال حمد : افتكر انو نحن مواكبين في معظم الأشياء يعنى معظم علاجات السرطان معروفة عندنا في السودان معظمها موجود عندنا صحيح في أدوية غالية جدا في العالم ما بتصلنا لكن في ناس بيجيبوها وبنستعملها نحن بدأنا علاج السرطان في مستشفى الذرة بدا سنة 1967م وامكن أول مركز في أفريقيا بعد مصر ومع جنوب أفريقيا افتكر نحن من الرواد في هذا المجال يعنى في اشراقات كثيرة في هذا المجال وفى إخفاقات طبعا لأنو علاج السرطان عموماً هو علاج مكلف ويحتاج الى مكنات عالية التكلفة والعلاج الكيميائي نفسه علاج مكلف ولكن المقارنة بباقي الدول في أفريقيا يعنى في أفريقيا في 19 دولة ما عندهم مكنات علاج بالأشعة مقدم البرنامج : نحن بنحييك كثير جدا دكتور/ كمال حمد محمد منان أستاذ مشارك علاج الأورام والطب النووي كلية الطب جامعة الخرطوم ومستشفى الذرة سعدنا بهذا اللقاء نتمنى انو نلتقيك إنشاء الله في حوارات أخرى عبر عيادة على الهواء دكتور/ كال حمد : شكرا جزيلا وأحييكم ونشكركم على تعاونكم وأنا افتكر انو البرامج دي عادة بعد ما تتعمل بيحضر لنا عدد كبير جدا من الناس بأورام مبكرة وشكرا جزيلا مقدم البرنامج : شكرا لكل الذين تابعونا عبر هذا اللقاء كنا معكم طه عبد الرحمن طه ، تحياتي إسراء زين العابدين الأسبوع القادم لقاء جديد عيادة على الهواء الإخراج منى صالح .