|
|
 ساطور الحاج منزو وشرك حماده الساده!!
|
غايتو ! حكومة الناس ديل ما تخليك تستمرأ حالة الحزن التي أنت فيها و حزني علي توأم الروح والأحلام أحمد عبدالـمكرم ما يزال يطعن في الخاصرة غير أن افعال ناس ها الحكومة تجعلك لا تستمتع بهذا الحزن ومن هذه الأفعال رؤية الحاج آدم أو الحاج منزو وهو يحمل ساطورا قبالة شواطئ البحر الاحمر في إنتظار الصواريخ الإسرائيلية! أو رؤية محمد الحسن الأمين أو حماده الساده وهو يكج شركا للطائرات الإسرائلية غرب امدرمان
وقبل التعليق علي هذه العبثيات أستميحك عزيزي القارئ سرد هذه الواقعة لك و للمرة الثانية وذلك لأنها تتطابق و حالة الناس ديل! عمنا خليفه عبدالله كدودي كانت لديه فرشة خضار في سوق كوستي فغشاه أحد معارفه فقال له:-{تعرف يا عم خليفه أم بارح مغصت ليك الحرامي جنس مغصه! الحرامي دخل البيت وعاينت ليهو في عيونه وقلت ليهو عاد ما بسألك يا الحرامي ! الحرامي فتح دولابي و دولاب الـمره وشال كل الهدوم وصراهم في بقجة فقلت ليهو موت بـمغصتك يا الحرامي ما خشمي وأنا سيدو! الحرامي ملص دهب الـمره غويشه غويشه و لامن غلبتو الحيله قلب اللحاف اللي نايمين فيهو و جدعنا في الواطاه وشال كل الـمطابق تحت اللحاف وقلت ليهو كمل الناقصه يا الحرامي! أها ياعم خليفه الحرامي طلع بالباب عديل وقلت ليهو كيه و غيظه فيك يا الحرامي! عشان بسألك!!}
أها يا الحاج منزو وأنت أستاذ لعلم الهندسة الزراعية بجامعة الخرطوم وأكيد إنك درست تلاميذك نسبة الفرق في الإنتاج عند إستخدام الـملود أو الحشاشة التقليدية و إستخدام تقنيات الزراعة الحديثة وعليه ألـم تستدعي ذاكرتك هذه الـمعادلة وأنت تتوعد صواريخ توما هوك بالسواطير ! ولا كنت مسطول عا الآخر!
ولكن عاد ما بسألك يا سعادة الـمحامي عن هذا الشرك فهل هو شرك قلوبيه ولا شرك مصنوع من سبيب ضنب الخيل ولا مصنوع من الدباره???
غايتو! إسرائيل دي بقت ليكم زي حرامي كوستي تسرق تضرب وإنتوا نايـمين في العسل! و عاد ما بسألك يا الحرامي!!!!!
|
|
 
|
|
|
|
abdalla elshaikh
فيس بوك
تويتر
انستقرام
يوتيوب
بنتيريست